Abraham patpox, rey Abimelec pejtʉajnʉxot
20
Do asamatkoi, Abraham chijiapon Mamrexot, jawʉt fʉlaechon Canaán tʉajnʉ pejsurlelde. Japatʉajnʉ pawʉl Néguev. Do jaxotde, Abraham mox dukpon pawʉlxot Cades. Jaxotbej pawʉl Shur. Do jaxot kaesʉapich matkoiyan, Abraham duk Gerar tʉajnʉxot. 2 Japatʉajnʉxotlap Abimelec reypon, puexa Gerar tʉajnʉpijiwliajwa. Jaxot Abraham duk wʉt, japon jʉm-aech ampox asew jiwliajwa: “Sara xan takoewow” —aech Abraham japi jiwliajwa. Do jawʉt, rey Abimelec japox wʉltaen wʉt, pejjiw toꞌapon Sara bʉflaeliajwas japonxadin, rey Abimelec fisliajwa Sara. 3 Pe japamadoitat, rey Abimelec xamoejt wʉt, Dios jʉm-aech ampox rey Abimelecxot: “Abimelec, xam fitampow, japow pamal. Samata, xam tʉpaxaelam, japow fitamxot nijowliajwa” —aech Dios rey Abimelecxot.4 Pefʉk rey Abimelec bʉꞌmoejs-el Sara. Samata, rey Abimelec jʉm-aech ampox Diosxot, xamoejt wʉton: “Tajpaklon, ¿xamkat nejchaxoelam xan naboesliajwam, is-enil wʉt asax japow sʉapich? 5 Abraham pajut chiekal jʉm-aech ampox xanxot: ‘Xan japow takoewow Sara’ —aech Abraham pajut xanxot. Ma-is Sara pajut chiekal jʉm-aech ampox xanxot: ‘Xan japon takoewan’ —aech Sara pajut xanxot. Samata, xan nejchaxoelx wʉt, jʉm-an ampox: ‘Xan isx pachaempox, Sara fisaxaelen wʉt’ —an xan, nejchaxoelx wʉt. Samata, xan babijax is-enil japiliajwa” —aech rey Abimelec Diosxot, xamoejt wʉton. 6 Jawʉt, Dios jʉm-aech ampox, jʉmnot wʉton rey Abimelec, xamoejt wʉt: “Xan chiekal matabijtax xam nejchaxoelampox. Samata ¡tapae-enil xam bʉꞌmoejsliajwam japow, babijax isasamatam xanliajwa! 7 Ma amwʉt, ¡xam wiaꞌe japon pijow! Japon atonlap xan tajprofeta. Samata, xam japow wiatam wʉt, japon aton xan nakawʉajnaxael xam beltaeliajwan kaes laejaliajwam. Pe xam wias-emil wʉt, ja-aech wʉt, diachwʉajnakolax xam tʉpaxaelam, puexa nejjiw sʉapich, nejtʉajnʉpijiw sʉapichbej” —aech Dios rey Abimelecxot, xamoejt wʉton. 8 Do kandiawasap wʉt, rey Abimelec nant wʉt, pamakan toꞌapon asew pamakjiw wʉlalaeliajwa, puexa japi natamejlaliajwa japonxot. Dolisi, puexa chiekal natameja wʉt, rey Abimelec jalpaei xamoejtpox. Japi japox jʉmtaen wʉt, xabich pejlewlapi Diosliajwa.
9 Do jawʉx, rey Abimelec pamakan toꞌa bʉflaeliajwadin Abraham. Abraham bʉꞌpach wʉt, rey Abimelecxot, rey Abimelec jʉm-aechon ampox Abraham:
—Xam xabich babijax isam xanalliajwa. ¿Achababijaxkat xan matxoela isx xamliajwa, xan xabich natasalsliajwam xan tajbʉꞌwʉajanliajwa, puexa tajtʉajnʉpijiw pejbʉꞌwʉajanliajwabej? Xam jasox isaximil amxot. 10 ¿Achaxkat xam nejchaxoelam, japox isam wʉt xanliajwa? —aech rey Abimelec Abrahamxot.
11 Do jawʉt, Abraham jʉmnot wʉt, jʉm-aechon ampox rey Abimelec:
—Xan nejchaxoelx wʉt, jʉm-an ampox: ‘Ampatʉajnʉpijiw chinax Dios sitae-el. Samata, xan naboesaxaeli tajow Sara fisliajwa’ —anxot, nejchaxoelx wʉt, japox jʉm-an. Samata, xan japox jʉmch jʉm-an 12 Pe diachwʉajnakolax, xan japow takoewow. Japow taj-ax paxʉlow. Pe japow asake-enpijow. Samata, pachaem xan japow fisliajwan, japox xanal tajkabʉan xot. 13 Dios natoꞌa wʉt xan nakolsliajwan taj-ax pejbaxot, xan japow bʉxtoꞌax, asatʉajnʉchanxot patx wʉt, japow japox jʉmchiliajwa: “Xan japon pakoewan” —chiliajwapow xanliajwa —aech Abraham rey Abimelecxot.
14 Do jawʉt, rey Abimelec wiatlison Sara, Abraham pijow. Do jawʉtbej, rey Abimelec malech chaxduwpon Abraham. Japi malechpi, oveja, pak, malis jiw, japi jiw, Abraham pej-esclavoliajwa, poejiw, wathoꞌbej. 15 Do pejme rey Abimelec jʉm-aechbejpon ampox Abrahamliajwa:
—¡Tajsatan chiekal najut taem! ¡Ma xamliajwa ipachaemdoꞌ dukaliajwam nejjiw sʉapich, jaxot sat fiꞌe! —aech rey Abimelec Abrahamxot.
16 Rey Abimelec jʉm-aechbej ampox Saraliajwa:
—Xan chaxdusaxaelen nakoewan mil platafachan puexa jiw, xamxoti, pajut chiekal taeliajwa xam bʉꞌwʉajanjimilpox. Samata, chinax kaen aton jʉmchiyaxil babejjame xamliajwa, xam is-emil xot babijax —aech rey Abimelec Saraxot.
17-18 Do jawʉt, Abraham Dios kawʉajan rey Abimelecliajwa, japon pijowliajwabej. Abraham Dios kawʉajan wʉt, rey Abimelec boejthʉspon xijilawaxae waechpox. Japoxwaxaebej rey Abimelec pijow boejthʉs. Boejthʉsbej rey Abimelec pamakjiw wathoꞌ. Samata, pachaemlisi naxʉwlaliajwa. Japamatkoiyan wʉt, Sara bʉflaens wʉt rey Abimelec pejba poxadin, Dios tapae-el wathoꞌ moejwaliajwa, duili rey Abimelec pejbaxot.