—Tajpaklochiw, ¡matnoch nabej xena! ¡Xan nataefalde! Xanlap amxotx xamal kajachawaesliajwan. 4 Xamalliajwa pachaem wʉt, xan toꞌaxaelen tamakan japon mint wʉljaeliajwa xamal tʉakkiasliajwam. Do jawʉt, ¡kaesʉapich damlathʉldefʉk ampanaebʉxfalnajelanxot! 5 Xamal patam xot xan dukxxot, xan wʉljaesaxaelen naxaeyaxan xamal xaeliajwam, mamnikaliajwam, pejme folam wʉt —aech Abraham japi tres poejiwxot.

Japi jʉmnot wʉt, jʉm-aechi ampox Abrahamxot:

—Xam jʉm-ampox pachaem xanalliajwa —aechi jʉmnot wʉt.

6 Dolis japi damlathʉl wʉt naechanbʉxfalxot, Abraham lech wʉt pejcarpaba, jʉm-aechon ampox Saraxot:

—¡Xathilde pan isax! ¡Harinabelin, veinte kilos, chaxlaeman, kaes pachaembelin, pan isliajwam! —aech Abraham kitoꞌa wʉton pijow Sara.

7 Do jawʉt, Abraham najaeꞌe pejew pak poxade. Jaxotde itfeton pakxʉlan, kaes pachaempon. Jawʉt, Abraham kitoꞌa pamakan paxʉlan jeltiꞌsan xʉaꞌlaliajwapon. Pamakan xabich xathilt pakxʉlan chabosax. 8 Puexa chiekal toejaf wʉt, Abraham xalaen chabowawi. Xalaenbejpon cuajada, leche, japi tres poejiw xaeliajwa. Abraham xalwʉajcho-ot naxaeyaxan japi wʉajnalel. Naebʉxfalxot Abraham pajut chaxduw naxaeyaxan japi xaeliajwa. Do jawʉt, japi poejiw xael wʉt, Abraham nukon jaxot, japi asax weweꞌpas wʉt, kamta wʉljaesliajwa.

9 Japi kaechatoel wʉt, me-ama matabijs-el wʉt, ja-aechi, wʉajnachaemt wʉti Abraham. Do jawʉt, jʉm-aechi ampox wʉajnachaem wʉti Abraham:

—¿Amxotkat nijow Sara? —aechi wʉajna chaem wʉt Abraham.

Abraham jʉmnot wʉt, jʉm-aechon ampox:

—Japow carpabatat ek —aech Abraham japixot.

10 Do jawʉt, trespixot kaen jʉm-aech ampox Abrahamxot, japonlap chiekal Dios. Japon jʉm-aech ampox:

—Asawaech toepax wʉajna, xam pejme taenx wʉt, jawʉt nijow Sara paxʉchaxael —aechlap, Dios pajut chawʉajnajʉm-aech wʉt, Abrahamxot.

Japi nospaei wʉtfʉk, Sara puexa chiekal naewet wʉt, jʉmtaenpow, jawʉt nuk xotow carpabafafalel, Abraham pejwʉchakal. 11 Abraham, Sara sʉapich, xabich pakdiachiwpi. Samata, Sara pejlawpox wetoepslisow. Samata, naxʉwlaxilisow. 12 Samata, Sara kaes xafolatisaxilow xafafolaliajwa. Jawʉt, nejchaxoel wʉt, jʉm-aechow ampox: “Xan xabich patiꞌwan naxʉwlaliajwan. Tamalbej xabich patiꞌin. ¿Machiyaxaelkat xan nejchachaemlaliajwan, moejtax wʉt, tamal patiꞌin sʉapich?” —aechow pejnejchaxoelaxtat. 13 Pe Dios jʉm-aech ampox Abrahamxot:

—¿Ma-aech xotkat Sara jʉmch xafafol? ¿Japowkat naexasis-el paxʉlchaxaelpox, kaes xabich patiꞌow wʉt? 14 ¿Ijilkat Dios isaxilpox? Asawaech toepax wʉajna wʉt, xan pejme pasaxaelen. Jawʉt, Sara paxʉlchaxael, me-ama xan chajia jʉm-an —aech Dios Abrahamxot.

15 Sara japox jʉmtaen wʉt, xabich jʉmch pejlewlapow. Jawʉt, xanalia wʉt, jʉm-aechow ampox:

—Xan xafafola-enil —aechow xanalia wʉt.

Pe Dios jʉm-aech ampox:

—Diachwʉajnakolax xam xafafolam —aech Dios Saraliajwa.

16 Do jawʉx, japi tres poejiw, pati Abraham dukxot, fʉlaeyax tʉadutlisi Sodoma paklowax poxade. Abraham fʉlchalach japi kijachaliajwa. 17 Do jawʉt, Dios nejchaxoel wʉt, jʉm-aechon ampox: “Xan jʉmchiyaxaelen Abrahamxot isaxaelenpoxliajwa. 18 Abraham xabichaxael pamojiw. Japi pinamʉtaxaelbej. Pejsoldaw xajʉpaxaelbej malechaliajwa padaelmajiw. Asamatkoi, Abraham pijaxtat xan kajachawaesaxaelen puexa ampathatpijiw. 19 Xanlap makafitx Abraham tatoꞌlaliajwa paxi, pamojiwbej, japi naexasisliajwa tajtatoꞌlaxan. Japilap isaxael pachaempoxan, diachwʉajnakolaxpoxan. Ja-aech wʉt, xan isaxaelen puexa jʉmdutxpoxan Abrahamxot” —aech Dios, nejchaxoel wʉt Abrahamxot.

20 Do jawʉt, Dios jʉm-aech ampox Abrahamxot:

—Xan jʉmtaenx asatʉajnʉchanpijiw xabich wʉltaenpox Sodoma paklowaxpijiwliajwa, Gomorra paklowaxpijiwliajwabej, xabich babijaxan ispoxan. 21 Samata, ma amwʉt, tajut chiekaljapoxaxaechan tajut chiekal taeliajwan, diachwʉajnakolax xabich wʉt pejbabijaxan ispoxan, o, xabicha-el wʉt. Ja-aech wʉt, matabijsaxaelen. Japox diachwʉajnakolax wʉt, puexa Sodoma paklowaxpijiwliajwa, Gomorra paklowaxpijiwliajwabej, toejafaxaelen. Japi pejpaklowaxanbej chiekal toejafaxaelen —aech Dios Abrahamxot.

22 Do jawʉt, trespixot, kolenje, wʉajnade fʉlaech Sodoma paklowax poxade. Pefʉk Abraham kaweta Diosxot. 23 Jawʉt, Abraham kaes mox chiekal soepande Diosxot wʉajnachaemsliajwa. Jawʉt, jʉm-aechon ampox:

—¿Xamkat toesaxaelam jiw pachaempi, toetam wʉt jiw babejchiw? 24 Japapaklowaxxot duil wʉtcincuenta jiw, pachaempi. Ja-aech wʉt, ¿xamkat nakiowa puexa paklowaxpijiw toesaxaelam, pejpaklowaxbej? Cincuenta jiw, pachaempi, wʉt japi pijaxtat, ¿xamkat beltaeyaximil jiw japapaklowaxpijiw, japi pejpaklowaxbej? 25 Xam toesaxaelam wʉt jiw pachaempi, babijaxan ispi sʉapich, jachiyaxaelam wʉt, ¡japox pachaemaxil! Pachaempi toetam wʉt, japi, me-ama babijaxan ispi wʉt, jachiyaxaelam toetam wʉt. ¡Xam jasox isaximil, diachwʉajnakolax xam Juezkolnam xot pothatatpijiwliajwa! ¡Xamlax isde pachaempox! —aech Abraham Diosxot.

26 Do jawʉt, Dios jʉmnot wʉt, jʉm-aechon ampox Abrahamxot:

—Sodoma paklowaxxot cincuenta jiw duil wʉt, pachaempi, japi pijaxtat beltaeyaxaelen puexa jaxotde duili —aech Dios Abrahamxot.

27 Do pejme Abraham jʉm-aech ampox Diosxot:

—¡Xan nabeltaem, xam kaes wʉajnachaemtpoxliajwa! Xan tajut chiekal matabijtax atonankalpox. Matabijtaxbej xamlax Diosnam. 28 Pe weꞌp wʉtbej cinco jiw, pachaempi, pasliajwa cincuenta jiw, ¿xamkat nakiowa puexa japi jiw toesaxaelam? —aech Abraham wʉajnachaem wʉton Dios.

Do jawʉt, Dios jʉmnot wʉt, jʉm-aechon ampox Abrahamxot:

—Sodoma paklowaxxot cuarenta y cinco jiw pachaempi wʉt, xan toesaxinil paklowax —aech Dios Abrahamxot.

29 Abraham xabich nakiowa wʉajnachaem wʉt, jʉm-aechon ampox Diosxot:

—Asbʉan jʉmch cuarenta jiw pachaempi wʉt, ¿xamkat nakiowa toesaxaelam japi jiw, pejpaklowaxbej? —aech Abraham Diosxot.

Dios jʉmnot wʉt, jʉm-aechon ampox:

—Cuarenta jiw, pachaempi wʉt, xan toesaxinil japi jiw, japi pejpaklowaxbej —aech Dios.

30 Do pejme Abraham jʉm-aech ampox Diosxot:

—¡Xam nabej nalaleꞌ xanliajwa, kaes xabich wʉajnachaemtax xot! Pe xan pejme wʉajnachaemsaxaelen. ¿Xamkat machiyaxaelam, treinta jiw pachaempi wʉt? —aech Abraham Diosxot.

Dios jʉmnot wʉt jʉm-aechon ampox:

—Japapaklowaxxot hasta treinta jiw, pachaempi, wʉt, xan toesaxinil japi jiw, japapaklowaxpijiw, japapaklowaxbej —aech Dios.

31 Abraham nakiowa wʉajnachaemt wʉt, jʉm-aechon ampox Diosxot:

—Tajpaklon, xan xabich tadala xam kaes wʉajnachaemsliajwan. Pe nakiowa, wʉajnachaemsaxaelen. ¿Xamkat machiyaxaelam, veinte jiw, pachaempi, wʉt japapaklowaxxot? —aech Abraham Diosxot.

Dios jʉmnot wʉt jʉm-aech ampox Abrahamxot:

—Veinte jiw, pachaempi, wʉt, xan toesaxinil japapaklowax —aech Dios.

32 Abraham nakiowa wʉajnachaemt wʉt, jʉm-aechon ampox:

—Tajpaklon, ¡xam nabej nalaleꞌ xanliajwa! Ma kaes wʉajnachaemsaxaelen. Do jawʉx, xam kaes taliasaxinil. Diez jiw, pachaempi, wʉt, ¿xamkat nakiowa toesaxaelam japapaklowax? —aech Abraham.

Dios jʉmnot wʉt, jʉm-aechon ampox:

—Hasta diez jiw, pachaempi, wʉt, xan toesaxinil japapaklowaxpijiw. Toesaxinilbej japi pejpaklowax —aech Dios.

33 Do jawʉt, Dios naksiyax bʉxtoet wʉt, Abraham sʉapich, Dios chijia jaxot. Abrahambej nawiꞌan pejcarpaba poxadin.