—Abram, xanlap Diosnan, puexaliajwa xabich mamnikaxponan. Kaematkoisfʉl xam chiekal naexasitam wʉt xan, xam is-emil wʉtbej babijaxan, ja-am wʉt, xan isaxaelen convenio xamxot. Xam kajachawaesaxaelen xabich pin-iakolaliajwa namojiw —aech Dios Abramxot.

3 Do jawʉt, Abram brixtat nuk Dios wʉajnalel sat makxabijnaliajwadik. Jawʉt, Dios jʉm-aech ampox Abramxot:

4-5 —Convenio xamxot isaxaelenpox, ampoxlape. Xam kajachawaesaxaelen xabich pin-iakolaliajwa namojiw, japi xabich pin-iamʉtaxael. Ma amwʉt, xam kaes nawʉlaxil Abram. Ma amwʉt, xam nawʉlaxael Abraham, xabich pin-iamʉtpijiwliajwa xamlap japi puexa pejchapamnaxaelam xot. 6 Xan kajachawaesaxaelen xabich pin-iakolaliajwa namojiw. Asew japixot reyes nadofaxael. Namojiw xabich pin-iamʉtaxael. Kaenanʉla pejmʉtan sʉapich pejtʉajnʉchanaxaeli.

7 Convenio xamxot isaxaelenpox, japox diachawʉajnakolax isaxaelen xamxot, naxixotbej, namojiwxotbej. Xanlap nejDiosnaxaelen pomatkoichaliajwa. Xanbej namojiw pejDiosnaxaelen pomatkoichaliajwa. 8 Xanlap chaxdusaxaelen xam ampatʉajnʉ, Canaán tʉajnʉ, ma amwʉtjel dukamtʉajnʉ. Ampatʉajnʉlap chaxdusaxaelenbej namojiw pomatkoichaliajwa. Xanlap japi pejDiosnaxaelen —aech Dios Abrahamxot.

9-11 Dios kaes jʉm-aech ampox Abrahamxot:

—Xamlap chiekal naexasisaxaelam jʉmchiyaxaelenpox, namojiwbej. Xamal, poejiwam, circuncidaxaelam. Circuncidaxaesbej puexa xamalxot duilpi. Japox circuncidax xamal nejkiowa-elaliajwa japoxlap tajconvenio, xamalxotpox, jʉmdutxpox. 12-13 Ma amwʉt, japox isaxaelam, asamatkoiliajwabej. Puexa poejiw xamalxot nalaelapi, japi circuncidaxaes, ocho matkoiyan wʉt nalaelapoxan. Jachiyaxaelambej puexa poejiw, esclavospaxi. Xamal circuncidam wʉt, japoxlap itpaeyam tajconvenio, pomatkoichaxaelpox xamalxot. 14 Pe nejweslapon circuncidaliajwas, japon aton ¡nej chajiya xamalxot, naexasis-el xoton tajconvenio! —aech Dios Abrahamxot.

15 Dios kaes jʉm-aech ampox Abrahamxot:

—Ma amwʉt nijow, kaes pawʉlaxil Sarai. Ma amwʉt nijow pawʉlaxael Sara. 16 Xan tajlejentat koechax isaxaelen japowliajwa. Asamatkoi, xam naxʉlaliajwa nijowxot. Diachwʉajnakolax jasoxtat xan kajachawaesaxaelen nijow. Japowlap pejchapaeꞌaxael xabich pin-iamʉtanpijiwliajwa. Japow pamojiwxot, asew, reyesaxael, xabich jiw tatoꞌlaliajwa —aech Dios Abrahamxot.

17 Abraham japox jʉmtaen wʉt, brixtat nuk wʉt, sat makxabijindik. Do jawʉt, Abraham jʉmch boejlach xafafol wʉt, jʉm-aechon ampox: “Aton cien waechanpon, me-ama xan, jason, ¿jason atonkat pijow tanxʉwlaxaes? Ma-is tajow, Sara, noventa waechan. Japowlis wetoeps naxʉwlax” —aech Abraham, boejlach xafafol wʉt. 18 Do jawʉt, Abraham jʉm-aech ampox Diosliajwa:

—Xanxot najʉmdutampox, convenio, xan wʉljowx japox isliajwam taxʉlan Ismaelxot —aech Abraham Diosxot.

19 Do jawʉt, Dios jʉmnot wʉt, jʉm-aechon ampox Abrahamxot:

—¡El, Abraham! Xan jʉm-anpox, diachwʉajnakolax isaxaelen xamliajwa. Nijow Sara naxʉwlaxael. Japoch, xaljamch, nalaelt wʉt, ¡xam wʉlduiyaxaelam Isaacwʉltat! Japonxot, pamojiwxotbej, xan isaxaelen jʉmdutxpox pomatkoichaliajwa. 20 Xan tajut chiekal matabijtax xam xabich nejchaxoelampox naxʉlan Ismaelliajwa. Samatabej, kajachawaesaxaelen naxʉlan Ismael. Japonbej xabichaxael paxi, pamojiwbej. Ismael paxipoejiw, docepi, japi paklowchiwaxael. Japon pamojiw xabich pinamʉtaxaelbej. 21 Pe xan, isaxaelen tajconvenio naxʉlan Isaacxot. Sara paxʉchaxael, asawaech toepax wʉajna —aech Dios Abrahamxot.

22 Dios naksiyax bʉxtoet wʉt Abrahamxot, jaxot Dios chijia. 23 Japamatkoitat, Abraham circuncida wʉt Ismael, jawʉt puexa pamakjiwbej circuncidapon. Asew japixot nalaelapi japonxot, asew japixot wʉajtaspibej platafachantat. Puexa japi poejiw circuncidapon, me-ama Dios kitoꞌas circuncidaliajwa. 24 Abraham noventa y nueve waechan wʉt, japon-is circuncidas. 25 Japamatkoi wʉt, Ismael trece waechan wʉt, circuncidaspon. 26 Jawʉt, japi kolenje circuncidas kaematkoitat. 27 Jawʉtbej, puexa poejiw circuncidas, japi nabisti Abrahamliajwa.