Ismael nalaeltpox, japonlap Abram paxʉlan
16
Abram pijow, Sarai, naxʉwlaxil, nafoena xot. Samata, tanxʉwlaxilow pamal Abram. Pe Sarai kaepow pej-esclava, japow Egipto tʉajnʉpijow. Japow pawʉl Agar. 2 Samata, Sarai jʉm-aech ampox pamaxot: “Abram, xan naxʉwlaxinil, Dios nafoenat xot. Pe, xam toꞌax moejsliajwam, tamakow Agar sʉapich. Ja-aech wʉt, japow paxʉchaxael wʉt, xan, japoch yamxʉch, me-ama taxʉlankolan wʉt, jachiyaxaelen” —aech Sarai toꞌa wʉtow Abram.Do jawʉt, Abram ow-aech Sarai toꞌaspox. 3 Do jawʉt, Sarai fʉlaech pamakow bʉflaeliajwa Abram poxadin, japow, me-ama Abram pijow wʉt, jachiliajwa. Japoxlap ja-aech, duil wʉti diez waechan Canaán tʉajnʉxot. 4 Do jawʉt, Abram moejton, Agar sʉapich. Do baxael, Agar moejow. Japow pajut chiekal matabijt wʉt moejowpox, jawʉtlap Agar sitae-ellisow Sarai. 5 Japox ja-aech wʉt, Sarai lot wʉt, jʉm-aech ampox pamal Abramxot:
—Xamlap nejbʉꞌwʉajan, Agar nasitae-eliajwa. Xan tajut japow bʉflaechx xamxot wiasliajwan, me-ama nijow wʉt, jachiliajwam. Pe, japow ma amwʉt, paxʉchaxael xot, nejchaxoel wʉt, jʉm-aechow ampox: ‘Xan kaes pachaeman. Me-ama tajpaklow Sarai, jachi-enil’ —aechow, nejchaxoel wʉt. Xam najut chiekal matabijtam Abram. Diosliajwa japox pachaema-el, xam boejlachliajwam japowliajwa —aech Sarai, lot wʉtow Abram.
6 Abram jʉmnot wʉt, jʉm-aechon ampox pijow Sarai:
—¡Xan chiekal nanaeweꞌe! Xam japow nej-esclava. Samata, ¡xamliajwa pachaempox isde Hagarliajwa! —aech Abram pijow Saraixot.
Do jawʉt, Sarai xabich kaes tatoꞌal nabichax pamakow Hagar. Samata, jawʉt, Agar najaet Saraixot. 7 Hagar atʉaj wʉt, Dios pej-ángel natulaelt xabʉꞌkʉlsliajwapon Hagar pajilaxxot, min nakakolsinxot. Japamin nakakolsinxot, jaxot nʉamt fʉlaechpot Shur poxaliajwade. 8 Jaxotde Dios pej-ángel wʉajnachaemt wʉt, jʉm-aechon ampox Hagarxot:
—Agar, Sarai pej-esclava, ¿amxotkat xam fʉlaeman? ¿Ampoxaxaemchkat? —aech Dios pej-ángel wʉajnachaemt wʉt Agar.
Agar jʉmnot wʉt, jʉm-aechow ampox Dios pej-ángelxot:
—Xan najaetx tajpaklow Saraixot —aech Agar jʉmnot wʉt Dios pej-ángel.
9 Do jawʉt, Dios pej-ángel jʉm-aechon ampox:
—¡Xam kaxa nawiꞌamich nejpaklow poxade! ¡Nejpaklow jʉm-aechpox xam chiekal naexasiꞌe! —aech Dios pej-ángel nawias toꞌa wʉton Agar.
10 Dios pej-ángel pejme jʉm-aech ampox Hagarliajwa:
“Xan kajachawaesaxaelen xam xabichaliajwa namojiw. Japi xabich pin-iakola wʉt aton xajʉpaxil japi xajuiliajwas.
11 Xam ma amwʉt moejwam. Naxʉlan nalaelt wʉt, ¡wʉlduim Ismaelwʉltat, Dios chiekal jʉmtaen xot, nejnabijasax kawʉajnam wʉt!
12 Naxʉlan jiw naexasislanaxael. Japonlap puexa jiw nejweslaxaeson. Ma-is japon nejweslaxael jiw. Japon tamach atʉaj dukaxael, pejjiw sʉapich” —aech Dios pej-ángel Agarxot.
13 Agar nejchaxoel wʉt, jʉm-aechow ampox: “Xan tajut chiekal taenx Dios. Pe nakiowa, laejax” —aechow, nejchaxoel wʉt. Samata, jawʉt japow jaxot jʉm-aech ampox Diosliajwa: “Xamlap Diosnam, nataenamponam, natataeflamponambej” —aechow Diosliajwa. 14 Samatalap, japaminmʉth pawʉl “Dios nataenpon xan, pomatkoicha dukpon, japon pejminmʉth”. Japaminmʉth chiekal patutat naman Cadesxot, Beredxotbej.
15 Do jawʉt, Hagar nawiatow Sarai poxade. Do baxael wʉt, paxʉlan nalaelt. Faenpow Abram paxʉlan. Abram wʉlduw paxʉlan Ismaelwʉltat.
16 Ismael nalaelt wʉt, Abram ochenta y seis waechan.