—Abram, ¡xam nabej nejlewleꞌ nadaelmajiwliajwa, xanlap nejtaxchalnan! Xam chaxduiyaxaelen, xabich pachaempox, xam chiekal naexasitam xot xan jʉm-anpoxan —aech Dios Abramxot, masoxtat taen wʉt me-ama xamoejt ja-aec wʉton.

2-3 Pe, Abram jʉmnot wʉt, jʉm-aechon ampox Diosxot:

—Tajpaklon, ¡xanliajwa japox chiekal pachaema-el, xam nachaxdusaxaelampox xabich pachaempox! Xam najut chiekal taenam xan xijinilpox. Asamatkoi, xan tʉpx wʉt, tamakan Eliezer, Damasco paklowaxpijin, puexa tejew xanmanaxael —aech Abram Diosxot.

4 Dios jʉmnot wʉt, jʉm-aechon ampox Abramxot:

—Japox jachiyaxil xamliajwa. Xam nejewpi asamatkoi naxʉlankolan, puexa japoxan xanmanaxael. Asan nosaxil xam tejew —aech Dios Abramxot.

5 Do jawʉt, Dios toꞌa Abram nakolsliajwa tathoetade. Jaxotde wʉt, Dios jʉm-aech ampox Abramxot:

—¡Natachaemsmich athʉ chiekal taeliajwam itthaej! ¿Diachwʉajnakolaxkat xam xajʉpaximil xajuiliajwam itthaej, xabich pin-iakolapi? Malap-is jachiyaxael asamatkoi namojiw xam nejwʉlela. Japi xabich pin-iakolaxael namojiw —aech Dios Abramxot.

6 Do jawʉt, Abram chiekal naexasitxoton Dios, Dios jʉm-aech ampox. Samata, Abram xabich pachaem wʉt, ja-aechon, Dios taen wʉt Abram. 7 Dioslap jʉm-aech ampox Abramxot:

—Xanlap Diosnan. Xam bʉflaenxponan pawʉlxot Ur, Caldea tʉajnʉxotdin, pasliajwam ampatʉajnʉ, Canaán tʉajnʉxot. Ampatʉajnʉlap xam chaxdusaxaelen, namojiwbej —aech Dios Abramxot.

8 Abram wʉajnachaemt wʉt, jʉm-aechon ampox Diosxot:

—Tajpaklon, ¿xankat machiyaxaelen, chiekal matabijsliajwan ampatʉajnʉ tajtʉajnʉyaxaelpox? —aech Abram Diosxot.

9 Do jawʉt, Dios jʉm-aech ampox Abramxot:

—¡Xanliajwa xalaeman kaen pakxʉlanpawis, malis kaen cabrapawis, malis kaen ovejapoi, kaenanʉla japi choef, tres waechanpi! ¡Nawexalaemanbej a-ut, pinjin, malis a-uxʉlan! —aech Dios, toꞌa wʉton Abram.

10 Do jawʉt, Abram japi choef bʉflaen wʉt Diosliajwa, xʉaꞌaton. A-u xapat wʉt, babejpon a-u. Jawʉt, matnoch tawakapon choef. Choeftafachan, kolelelje, owafʉlon. Pe a-u tawaka-elon. 11 Do jawʉt, pawi matwʉajasik thʉtha pask pawi xaeliajwa. Pe Abram japi thʉthan tadʉkt, xaesamata pawi.

12 Juimt xabich tuila wʉt, Abram xabich moejt. Do jawʉt, chalechkal itkʉatax masajiach Abram. Jawʉt, Abram xabich pejlewla. 13 Do jawʉt, Dios jʉm-aech ampox Abramxot:

—Namojiw asatʉajnʉxot duilaxael asajiw pejtʉajnʉxot cuatrocientos waechan. Japatʉajnʉxot namojiw esclavos kiladofaxaes japatʉajnʉpijiw. Xabich pin-iawaechan nabijasaxaeli japatʉajnʉpijiw pijaxtat. 14 Pe jawʉx, xan kastikaxaelen japatʉajnʉpijiw. Namojiw japatʉajnʉxot chijia wʉt, xabich xalaeyaxael ommaenkpoxan, japatʉajnʉpijiw malech chaxduiyaxaespoxan. 15 Xam laejaxaelam pin-iawaechan. Samata, xabich patiꞌnam tʉpaxaelam bʉꞌwʉajanjilaxtat. Do jawʉx, xam mʉthsaxaeli. 16 Xabich pin-iawaechan, cuatrocientos waechanwʉx, namojiw chijiyaxael japatʉajnʉxot duilaliajwa ampatʉajnʉxot. Japamatkoitat, xan tajutlap kajachawaesaxaelen japi malechaliajwa amorreos japi wʉajna chijiayaliajwabej ampatʉajnʉxot, amorreos xabich babijaxan is xot —aech Dios Abramxot.

17 Do jawʉx, Dios naksiyax bʉxtoet wʉt Abramxot, jawʉt, itkʉaꞌnik wʉt, chiekal masoxtat natulaelt, me-ama baext pinjit, jasot. Japabaextuxot itdelan oel. Samata, japot, baext, itnum nakola. Jaxotbej chalechkal masoxtat natulaelt, baenthnaeya jasox tamdadutpox. Japoxan natulaela wʉt, choef tawakaspi, nataela-owastuchakaldik, xendikox. 18 Jawʉtlap, Dios jʉmdut isliajwa convenio Abramxot. Jʉm-aechon ampox:

—Ampatʉajnʉlap namojiw xan chaxdusaxaelen. Chaxdusaxaelen Egiptolajt matdukafʉlxot hasta nawel pinjiyax, Eufrates nawelxotdin. 19-21 Ma ampamatkoyan, asew jiw duil japatʉajnʉxot. Japatʉajnʉpijiw xot, kaemʉt pawʉl ceneos. Asamʉt pawʉl cenezeos. Asamʉt pawʉl cadmoneos. Asamʉt pawʉl hititas. Asamʉt pawʉl ferezeos. Asamʉt pawʉl refaítas. Asamʉt pawʉl amorreos. Asamʉt pawʉl cananeos. Asamʉt pawʉl gergeseos. Asamʉt pawʉl jebuseos.