Abram bʉꞌwiapox pajian Lot
14
Japamatkoiyan, cuatro reyes kaenejchaxoelax. Cuatro reyespixot, kaen pawʉl Amrafel. Japonlap Sinar tʉajnʉpijinrey. Asan pawʉl Arioc. Japon Elasar tʉajnʉpijinrey. Asan pawʉl Quedorlaomer. Japonlap Elam tʉajnʉpijinrey. Cuartopijin pawʉl Tidal. Japonlap Goim tʉajnʉpijinrey. 2 Japi, cuatro reyes, chakifʉlaech asew, cinco reyes natameja poxade. Japi cinco reyespixot, kaen pawʉl Bera. Japon Sodoma paklowaxpijinrey. Asan pawʉl Birsa. Japonlap Gomorra paklowaxpijinrey. Asan pawʉl Sinab. Japonlap Adma paklowaxpijinrey. Asan pawʉl Semeber. Japonlap Zeboim paklowaxpijinrey. Asan rey, japon Bela paklowaxpijinrey. Bela paklowax asawʉl Zoar paklowax. 3-4 Majtlap japon rey Quedorlaomer, pejsoldaw sʉapich, naba wʉt, japi cinco reyes sʉapich, japon, pejsoldaw sʉapich, malecha cinco reyes. Samata, cinco reyes, tatoꞌlas doce waechan. Kaewaechfʉl wʉt, plata mosfʉli rey Quedorlaomer. Pelis trece waechan wʉtliajwa, cinco reyes kaenejchaxoelax pejme nabeliajwapi, rey Quedorlaomer sʉapich, toepaliajwa rey Quedorlaomer japi tatoꞌlaspox. Samata, japi cinco reyes, pejsoldaw sʉapich, kaeyaxtat natameja nabeliajwa, rey Quedorlaomer sʉapich, Sidim yoxot. Japayo, mox mar Muertoxot.5 Samata, asawaech wʉt, rey Quedorlaomer, asew, tres reyes sʉapich, puexa japi pejsoldaw sʉapich, chakifʉlaech cinco reyes natameja poxade. Do jawʉt, rey Quedorlaomer, tres reyes sʉapich, pejsoldaw sʉapich, fol wʉti, matxoela pati Astarot Karnaim tʉajnʉxot. Jaxot naba wʉt, japatʉajnʉpijiw malechas. Japatʉajnʉpijiw pawʉl refaítas. Do jawʉx, rey Quedorlaomer, tres reyes sʉapich, japilap malechafʉl, naba wʉti asapaklowaxpijiw sʉapich. Japi jiw pawʉl zuzitas. Japi pejpaklowax pawʉl Ham. Do jawʉx, malechabejpi emitas, Save-quiriataimyoxot. 6 Do jawʉxbej, rey Quedorlaomer, tres reyes sʉapich, malechapi horeos, japi duili Seir mʉaxanxot. Japi, horeos, dʉkp wʉt, kawʉxadʉkpaspi Parán yo poxade. Japayoxot mox pajilax. 7 Rey Quedorlaomer, asew, tres reyes sʉapich, kaxaliajwadin wʉt, pati En-mispat paklowaxxot. Japapaklowax amwʉtjel pawʉl Cades. Pat wʉti amalecitas pejtʉajnʉxot, amalecitas chiekal toech. Do jawʉx, fʉlaeyaxtat faekafʉlpoxan tabejsfʉli. Jatisbej, amorreosliajwa, japi duili Hazezon-tamar tʉajnʉxot.
8-9 Japi cinco reyes, pejsoldaw sʉapich, wʉajnaweti nabeliajwa Sidim yoxot, rey Quedorlaomer sʉapich. Jaxot nafaek wʉti, cinco reyes, pejsoldaw sʉapich, naba, rey Quedorlaomer japonlap, tres reyes sʉapich, cinco reyespi sʉapich, nabapi pejsoldaw sʉapich.
10 Sidim yoxot, xabich chalak mʉthanxot, me-ama pindaernaelsapan, jasi. Kolenje rey, japilap Sodoma paklowaxpijiw, Gomorra paklowaxpijinbej. Japilap dʉkp wʉt nabeyaxxot weliajwa, japilap natacholandik japamʉthan poxadik. Pelax, asew reyes, cincopixot tres reyes, dʉkpi pinamʉaxan poxade. Japilax wia.
11 Rey Quedorlaomer, tres reyes sʉapich, pejsoldaw sʉapich, malecha wʉti, asew, cinco reyes, jawʉt noti puexa xabich ommaenkpi, naxaeyaxanbej, Sodoma paklowaxxot, Gomorra paklowaxxotbej. Ja-aech wʉt, jaxot chijiapi. 12 Sodoma paklowaxxot Lot duk, pejjiw sʉapich. Japon, Abram pajian. Lot bʉꞌfos wʉt, puexa japon pejjiw sʉapich matbʉꞌfospon. Lot pejew wematxafosbej. 13 Pe jawʉt, kaen wia. Jawʉt, japon aton najaeton Abram poxade chapaeliajwa puexa ja-aechpox. Abram, hebreo-aton, japon duk pinanaechan nuilxot, pawʉlxot Mamre. Majt jaxot duk amorreo-aton, pawʉlpon Mamre. Mamre pakoewan, pawʉl Escol. Asan pawʉl Aner. Japilap Abram pejnachala. Japibej kaenejchaxoelax kajachawaesliajwa, Abram naba wʉt, padaelmajiw sʉapich.
14 Do jawʉt, Abram jʉmtaen wʉt pajian Lot bʉꞌfospox, jawʉt puexa pamakjiw lapon. Japi puexa xajʉpi nabeyax. Japibej tiꞌtpi Abramxot. Japi puexa trescientos dieciocho poejiw. Do jawʉt, Abram chakifol, pamakjiw sʉapich, tres reyes poxade, hasta Dan tʉajnʉ poxade.
15 Pat wʉti mox tres reyes bijaxot, jawʉt, madoi wʉt, Abram, pamak sʉapich, bapi padaelmajiw, japi chiekal nejmamach wʉti nabeyaxliajwa. Samata, Abram, pejjiw sʉapich, malechapi tres reyes, japi pejsoldawbej. Asew dʉkp wʉt weliajwa, Abram, pejjiw sʉapich, nakiowa kawʉxadʉk padaelmajiw. Jawʉt, dʉkpi fʉlpaꞌaspi Hoba paklowaxxotde, Damasco paklowax pejnortelel. 16 Do jaxotde puexa pejme noti padaelmajiw xalaen Sodoma paklowaxxotdin. Abram bʉꞌwia wʉt pajian Lot, jawʉt puexa Lot pejewpi pejme noti. Do jawʉtbej, puexa woeyapi Lotxot, japon pejewpi. Bʉꞌwiabejpon asew jiw, malis wathoꞌ.
Melquisedec kawʉajanpox Dios, Abram kajachawaesliajwas Dios
17 Jawʉx, Abram nawiaꞌan wʉt, malecha xot rey Quedorlaomer, asew, tres reyesbej. Jawʉt Abram nawiaꞌan wʉt, pejjiw sʉapich, ma jawʉtlap-is Sodoma paklowaxpijin rey, fʉlaechon xabʉꞌkʉsliajwa Abram Save yoxot. Japayo asawʉl, Rey Pejyo. 18 Jaxotlap-is rey Melquisedec, japon Salem paklowaxpijin rey. Japon xafol vino, malis pan, Abramliajwa. Rey Melquisedec, japonlap Dios athʉpijin pejsacerdote.
19 Rey Melquisedec jʉm-aech ampox Abramxot:
“Dios, athʉpijin, thatbaxo tulaeltpon, ampathat sʉapich,
¡Japonlap nej kajachawaes pomatkoicha xam!”
20 ¡Puexa jiw nej jʉm-aecha ampox: “Xam xabich pachaemam” —nej aechapi Dios, athʉpijinliajwa, japonlap kajachawaet xam chiekal puexa malechaliajwam nadaelmajiw! —aech rey Melquisedec Abramxot.
Dolis rey Melquisedec japox jʉm-aech wʉt, jawʉt Abram dijan diezmʉaxtje puexa padaelmajiw wenoti. Jawʉt, Abram chaxdut kaemʉaxt reya Melquisedecliajwa. 21 Do jawʉx, Sodoma paklowaxpijin pejrey, jʉm-aechon ampox Abramxot:
—Tadaelmajiw puexa notpoxan tajpaklowaxxot, ¡japoxan puexa xam xanmande! Pe jiw, tajpaklowaxpijiw, ¡nawewoeyam! —aech rey, Sodoma paklowaxpijin, Abramxot.
22 Pe jawʉt Abram jʉmnot wʉt, jʉm-aechon ampox:
—Xan diachwʉajnakolax chiekal jʉm-an ampox Dios chiekal najʉmtaeliajwa, japon athʉpijinpon, tulaeltpon thatbaxo, ampathatbej: 23 Xan chinax kaeyax xalaeyaxinil nejewpi. Chinax xalaeyaxinilbej kae-hilomʉat. Chinax xalaeyaxinilbej kaetʉakxajoelamʉat. Samata, xamlap najʉmchiyaximil ampox xanliajwa: ‘Abram kimaenk xan tejewtat’ —chiyaximil xanliajwa. 24 Xanliajwa pachaema-el, me-ama tejewkola wʉt, jachiliajwan asan pejjew. Tamak xaelpoxankal, japoxkalliajwa xan, me-ama puexa notx wʉt, ja-an. Pe tajnachala, xanxoti, ¡japi nejxalae japoxan pejewliajwa xalaeliajwa pejbachan poxade! Japi trespi, kaen pawʉl Aner. Asan pawʉl Escol. Asan pawʉl Mamre —aech Abram Sodoma paklowaxpijin reyxot.