Lot nadijanpox Abramxot
13
Abram chijia wʉt Egipto tʉajnʉxot, chijiapon pejme pasliajwa Néguev tʉajnʉxot. Abram bʉꞌfol pijow Sarai. Bʉꞌfolbejpon puexa pejjiw, puexa pejchoefbej. Abram pajian, pawʉlpon Lot, japonbej nakfol paxon Abram. 2 Abram xabich kimaenk. Xabichpon oro, plata, xabichbejpon choef. 3 Dolis, Néguev tʉajnʉxot pat wʉti, bijafʉli hasta pasliajwa Betel paklowaxxot. Do Betelxotde wʉt, fʉlaechlisi majt bija poxade, pejme bijaliajwa pejkawʉxot. Do jaxotfʉk kolepaklowax atʉajfʉk. Kaepaklowax pawʉl Betel. Japapaklowax naman oestelel. Asapaklowax pawʉl Hai. Japapaklowax naman orientelel. 4 Jaxot majt Abram bijt wʉt, pejjiw sʉapich, jaxot chajia altar ispon Dios kawʉajnaliajwa. Jaxot pat wʉt, pejjiw sʉapich, Abram pejme choef xʉaꞌat Dios pej-ofrendaliajwa, Dios kawʉajnaliajwa.5 Lotlap-is xabich kimaenk. Me-ama paxon Abram wʉt, ja-aech Lot kimaenkpox. Lot xabichpon, oveja, cabra, pak, pamakjiw, japon sʉapich, bijafʉl. 6 Samata, Lotliajwa, Abramliajwabej, puexa japi pejchoefliajwa xajʉpa-el pola, japi xabich xot pejew choef. Samata, Abram, pajian Lot sʉapich kaeyaxtat duilaxili. 7 Lot pamakjiw, japi tataefʉlpi choef, chajia nabʉnlosfʉli, Abram pamakjiw sʉapich, polaliajwa. Asamatkoi, nalot wʉt, nabapi, Abram pamakjiw sʉapich. Japamatkoiyan wʉt, japatʉajnʉpijiw, cananeos, ferezeosbej, duil japatʉajnʉxot. Japibej weweꞌpas pola pejew choefliajwa.
8 Ja-aech wʉt, asamatkoi, Abram jʉm-aech ampox pajian Lotxot: “Xatis nakaewas. Samata, pachaema-el nakaewa nalosliajwas. Namakjiw, choef tataefʉlpi, japi nalosaxilbej, tamakjiw sʉapich. 9 ¡Kaes pejme pachaem xatis nadijaliajwas! ¡Ama amxot satan! ¡Xam nejxasinkamsat fiꞌe! ¡Xam bʉflaem asalel nejjiw! Xanbej tajjiw bʉflaeyaxaelen asalel” —aech Abram pajian Lotxot.
10 Do jawʉt, Lot chiekal itfulajʉpon, puexa satan chiekal taeliajwa. Jawʉt, Lot taen sat xabich pachaempox mox Jordánlajtxot. Japasat xawaejach hasta Zoar paklowaxachxotde. Jaxot xabich pachaem minxot, Lot pejew choef minliajwa. Xabichbej pola. Jaxot yo pinjiyax. Me-ama Egipto tʉajnʉ, ja-aech jaxot. Japasatxot ja-aech Dios toesax wʉajna Sodoma paklowax, Gomorra paklowax sʉapich.
11 Do jawʉt, Lot jaxot puexa sat fiton dukaliajwa, Jordánlajt moxxot, pejsatliajwa. Jawʉx Lot liaxtlison, puexa pejjiw sʉapich, orientelelliajwade. Jasoxtat Abram, Lot sʉapich, nadija, japi kaenanʉla pejlel duilaliajwa. 12 Abram dukjepon Dios jʉmduchtʉajnʉxot chaxdusliajwas, kaesʉapich atʉaj Jordánlajtxot. Lot fʉlaech dukaliajwa asapaklowaxanxot, mox Sodoma paklowaxxot. 13 Japapaklowaxanpijiw xabich babijaxan is, Dios nejweslapoxan.
Abram liaxtpox, puexa pejjiw sʉapich, Hebrón paklowax poxade mox
14 Lot fʉlaech wʉt dukaliajwa orientelel, jawʉt Dios jʉm-aech ampox Abramxot: “Xam nukamxot, ¡atʉaj puexa chiekal itfulajuim satan taeliajwam! 15 Puexa satan, taenampoxan, xam chaxdusaxaelen, namojiwbej, pomatkoichaliajwa. 16 Xam nejwʉlela xan kajachawaesaxaelen xabichaliajwa namojiw. Japi xabich pin-iamʉtaxael. Me-ama jiw xajʉpaxili asthumba xajuiliajwa, jachiyaxaellap-is namojiw, xabichaxael wʉt. 17 ¡Xabʉaꞌde puexa japasatan, Canaán tʉajnʉ, chiekal matthʉnaliajwam! Diachwʉajnakolax xan chaxdusaxaelen puexa japatʉajnʉ xam, namojiwliajwabej” —aech Dios Abramxot.
18 Do ja-aech wʉt, Abram liaxtlison puexa pejjiw sʉapich, Hebrón paklowax poxade mox. Jaxotde xabich naechan nuil. Jaxotde majt duk pawʉlpon Mamre. Jaxotde Abram iaꞌ sumta-efʉl isliajwa altar, itpaeliajwa sitaeyax Diosliajwa.