Abram toꞌaspox Dios, japon fʉlaeliajwa Canaán tʉajnʉ poxade
12
Do, asamatkoi wʉt, Dioslap jʉm-aech ampox Abramxot: “Abram, ¡nejtʉajnʉxot chijiamde, nejjiwxot! ¡Fʉlaem asatʉajnʉ poxade, xan itpaeyaxaelentʉajnʉ poxade! 2 Jaxotde xabichaxael naxi, namojiwbej. Xabich pinamʉtaxaelbejpi. Xam kajachawaesaxaelen. Xabich jiw wʉltaeyaxael xam. Xam nijaxtat xan xabich jiw kajachawaesaxaelen. 3 Asew jiw pachaem wʉt xamliajwa, xanbej pachaemaxaelen japi jiwliajwa. Asew jiw chaemil wʉt xamliajwa, xanlap kastikaxaelen japi jiw. Xan kajachawaesaxaelen puexa ampathatpijiw xam nijaxtat” —aech Dios Abramxot.4-5 Dios bʉxtoet wʉt naksiyaxxot, Abram ow-aech Dios toꞌaspox. Samata, jawʉt, Abram chijiapon, pijow Sarai sʉapich, Harán paklowaxxot, Canaán tʉajnʉ poxaliajwade. Bʉꞌfolon pajian Lot. Bʉꞌfolbejpon pejew choef, pamakjiwbej, Abram wʉajtpi, Harán paklowaxxot duk wʉton. Puexa pejew xafolbejpon. Abram chijia wʉt Harán paklowaxxot, japon setenta y cinco waechan.
6 Abram, pejjiw sʉapich, Canaán tʉajnʉxot pat wʉt, foli Siquem paklowax poxade. Japatʉajnʉxotlap cananeos kaes chijia wʉajna duil Abram ijil wʉtfʉk. Jaxot, mox Siquem paklowaxxot, pinanae nuk. Japanae nukxot pawʉl More. Jaxot bijapi. 7 Abram jaxot wʉt, Dios natulaelt Abramxot. Do jawʉt, Dios jʉm-aech ampoxAbramxot: “Ampatʉajnʉlap namojiw chaxdusaxaelen” —aech Dios Abramxot.
Do jaxot Dios natu laelt xot, Abram iaꞌ sumta-efʉl altar isliajwa Dios kawʉajnaliajwa. 8 Do jawʉx, Abram, pejjiw sʉapich, chijia surlel pasliajwa xabich mʉaxan maenkxot, Betel paklowax pej-estelel. Japamʉaxanxot Abram, pejjiw sʉapich, pat wʉt, bijapi. Abram, pejjiw sʉapich, bijaxot, atʉajfʉk kolepaklowax. Kaepaklowax pawʉl Betel. Japapaklowax naman oestelel. Asapaklowax pawʉl Hai. Japapaklowax naman orientelel. Abram, pejjiw sʉapich, bijaxot, jaxot bija kaematkoi sʉapichliajwa. Jaxotdebej Abram pejme iaꞌ sumta-efʉl altar isliajwa. Jawʉx Abram jaxot kawʉajan Dios. 9 Do jawʉx, pejme chijiapi asalelliajwa. Laelp wʉt, bijafʉli Canaán tʉajnʉ, surlel, mox Néguev tʉajnʉxot.
Abram patpox Egipto tʉajnʉxot
10 Japamatkoiyan, ijil naxaeyaxan potʉajnʉcha Canaán tʉajnʉxot, iam piach thilna-el xot. Samata, Abram, pejjiw sʉapich, fʉlaech Egipto tʉajnʉ poxade, jaxotde duilaliajwa pin-iamatkoiyan. 11 Egipto tʉajnʉ pasliajwa wʉt, Abram jʉm-aech ampox pijow Saraixot: “¡Xan chiekal naeweꞌe! Xanlap matabijtax ampox xam xabich chimiawam. 12 Egipto tʉajnʉpijiw xam taen wʉt, japi jʉmchiyaxael ampox xamliajwa: ‘Ampowlap, ampon aton pijow’ —chiyaxaeli xamliajwa. Ja-aech wʉt, japi jiw xan naboesaxael. Xamlaxi boesaxil namanaliajwam japatʉajnʉxot. 13 Samata, japi chiekal pachaemaliajwa xanliajwa, ¡xamlap jʉmchiyaxaelam ampox: ‘Ampon, Abram, xan takoewan’ —chiyaxaelam xanliajwa japi jiwxot! Ja-aech wʉt, japi jiw xan naboesaxil” —aech Abram pijow Saraixot.
14 Abram pat wʉt Egipto tʉajnʉxot, Egipto tʉajnʉpijiw taen wʉti Abram pijow, japi piajtkal jʉm-aechi ampox Sarailiajwa: “Diachwʉajnakolax ampow xabich chimiow” —aechi piajkal. 15 Asew, Egipto tʉajnʉpijiw, nabistpi faraónliajwa, taen wʉti Abram pijow, japi fʉlaech faraón poxade, chapaeliajwa taenpox, Sarai xabich chimiowpoxliajwa. Do jawʉx, bʉflaechlisi Sarai faraón pejba poxade.
16 Faraón xabich pachaempon Abramliajwa, nejchaxoel xoton fisliajwa Sarai. Samata, faraón xabich malechpi chaxduwpon Abram. Malechpi, japi oveja, pak, bur, camello, esclavos, poejiw, wathoꞌbej, japilap Abraham pamakjiwliajwa.
17 Faraón fisaxael xoton Sarai, Dios kastika faraón. Dios pijaxtat faraón, pejjiw sʉapich, xabich bʉꞌxaenk waxaetat. 18 Ja-aech wʉt, faraón wʉlala Abram fʉlaeliajwadin japon poxadin. Abram pat wʉt faraónxot, wʉajnachaemt wʉt faraón jʉm-aech ampox: “¿Achaxkat xam isam xanliajwa?” ¿Ma-aech xotkat kamta xam najʉmchi-emil ampox: ‘Ampow xan tajow’ —nachi-emil? 19 “¿Ma-aech xotkatlax jʉmch jʉm-am ampox xanliajwa: ‘Ampow takoewow’ —na-amkat? ¿Ma-aech xotbejkat tapaeyam japow bʉflaeliajwas xanlel, xan fisliajwan japow? ¡Ama nijow! ¡Bʉflaem! ¡Amxotbej chijiamde!” —aech faraón Abramxot.
20 Do jawʉt, faraón toꞌa pejjiw, japi bʉflaeliajwa Abram Egipto tʉajnʉxot. Samata, faraón pejjiw bʉꞌfoli Abram Egipto tʉajnʉxot, japon pijow sʉapich, japon pejjiw sʉapichbej, pejchoef sʉapich, chijiyaliajwapon Egipto tʉajnʉxot.