Dios jʉmxaliaxapox jiw nakaewa najʉmtae-elaliajwa
11
Chajiakolaxtat, majt puexa jiw chiekal kaejame naksiya. 2 Nakola wʉti orientelel, faeni yo, pinjiyax, Sinar tʉajnʉxot. Do jaxot duilisi. 3-4 Asamatkoi, asew jiw japixot naksiya wʉt, jʉm-aechi ampox piajtkal: “Kaeyax paklowax, pinjiyax, isaxaes. Bʉx-as mojlaxaes isliajwas ladrillo. Ladrillo isas wʉt, chiekal mamoꞌal wʉt, bowaxaes jitat chiekal tinkaliajwa. Do jawʉx, paklowax isaxaes. Do jawʉxbej, xabich pinaba isaxaes ladrillotat, japaba pasliajwase thatbaxo. Japox isaxaes xatis nasalasamatas, puexa jiw chiekal nakmatabijsliajwa” —na-aechi piajkal. Do jawʉx, ladrillo is wʉt, tamejapi ladrillo. Xapapeꞌinpi, me-ama pindaernael, jasitat, ladrillo chiekal xapeꞌlaliajwa.5 Do jawʉx, japi paklowax isax tʉaduw wʉt, Dios nejwesla japi ispox. Samata, Dios fʉloek taeliajwa japapaklowax, xabich pinababej, thatbaxo pasaxaelba. 6 Dios nejchaxoel wʉt, jʉm-aechon ampox: “Japi jiw, chiekal kaepaklowaxpijiw. Kaejame chiekal naksiyabejpi. Samata, japi jiw tʉaduw ampabichax isliajwa. Xan japi jiw tapaeix wʉt japabichax isliajwa, japi xajʉpaxael pajut isasiapoxan isliajwa. 7 Samata, ma amwʉt, fʉlaeyaxaeks japi poxadik pejjame jʉmxaliaxaliajwas, nakaewa najʉmtae-elaliajwa” —aech Dios, nejchaxoel wʉt.
8 Do jawʉt, Dios jʉmxaliaxa wʉt, puexa jiw nasal pothata xajʉpaliajwa. Do jawʉtbej, paklowax ispox kikofapi. 9 Jaxotde Dios jʉmxaliaxa jiw nakaewa najʉmtae-elaliajwa, kaenanʉla pejmʉtan sʉapich, nasalaliajwa pothata xajʉpaliajwa. Samata, japapaklowax pawʉl Babel.
Sem kaespox pamojiw
(1 Cr 1.24-27)
10 Ampawʉajanlap, Sem pamojiw pejwʉajan. Kolewaechan xent wʉt that buꞌalpox, Sem cien waechan wʉt, paxʉlan nalaelt. Sem paxʉlan pawʉl Arfaxad. 11 Do japoxwʉx, Sem kaes quinientos waechan laeja wʉt, xabichpon paxi, poejiw, wathoꞌbej.
12 Arfaxad treinta y cinco waechan wʉt, paxʉlan nalaelt. Japon pawʉl Sala. 13 Do japoxwʉx, Arfaxad kaes cuatrocientos tres waechan laeja wʉt, xabichpon paxi, poejiw, wathoꞌbej.
14 Sala treinta waechan wʉt, paxʉlan nalaelt. Japon pawʉl Heber. 15 Japoxwʉx, Sala kaes cuatrocientos tres waechan laeja wʉt, xabichpon paxi, poejiw, wathoꞌbej.
16 Heber treinta y cuarto waechan wʉt, paxʉlan nalaelt. Japon pawʉl Peleg. 17 Japoxwʉx, Heber kaes cuatrocientos treinta waechan laeja wʉt, xabichpon paxi, poejiw, wathoꞌbej.
18 Peleg treinta waechan wʉt, paxʉlan nalaelt. Japon pawʉl Reu. 19 Japoxwʉx, Peleg kaes doscientos nueve waechan laeja wʉt, xabichpon paxi, poejiw, wathoꞌbej.
20 Reu treinta y dos waechan wʉt, paxʉlan nalaelt. Japon pawʉl Serug. 21 Japoxwʉx, Reu kaes doscientos siete waechan laeja wʉt, xabichpon paxi, poejiw, wathoꞌbej.
22 Serug treinta waechan wʉt, paxʉlan nalaelt. Japon pawʉl Nacor. 23 Japoxwʉx, Serug kaes doscientos waechan laeja wʉt, xabichpon paxi, poejiw, wathoꞌbej.
24 Nacor veintinueve waechan wʉt, paxʉlan nalaelt. Japon pawʉl Taré. 25 Japoxwʉx, Nacor kaes ciento diecinueve waechan laeja wʉt, xabichpon paxi, poejiw, wathoꞌbej.
26 Taré setenta waechan wʉt, do jawʉx, baxael wʉt, tres paxipon. Kaen pawʉl Abram. Asan pawʉl Nacor. Asan pawʉl Harán.
Ampilap Taré pamojiw
27 Ampawʉajan, Taré paxi pejwʉajan. Taré tres paxi, poejiw. Kaen japixot pawʉl Abram. Asan pawʉl Nacor. Asan pawʉl Harán. Do jawʉx, Harán kaen paxʉlan. Japon pawʉl Lot. 28 Japi duil wʉtfʉk pawʉlxot Ur, Caldea tʉajnʉxot, jawʉt Taré paxʉlan, pawʉlpon Harán tʉp. Taré laeja wʉtfʉk, Harán tʉp pejtʉajnʉxot, nalaelttʉajnʉxot.
29 Do jawʉx, Abram pijow fit. Japow pawʉl Sarai. Nacorbej pijow fit. Japow pawʉl Milca. Japow Harán paxʉlow. Pakoewow pawʉl Isca. 30 Sarai naxʉwlaxil, nafoena xot.
31 Do, asamatkoi wʉt, Taré chijia pawʉlxot Ur, Caldea tʉajnʉxot, Canaán tʉajnʉ poxaliajwade. Taré bʉꞌfol paxʉlan Abram, malis japon pijow. Bʉꞌfolbejpon Taré pamon, pawʉlpon Lot. Fol wʉti, pati Harán paklowaxxot. Do jawʉt, pat wʉti jaxot, kaes fʉlae-ellisi. Do jaxot, duilisi. 32 Baxael, Harán paklowaxxot duil wʉt, jaxot Taré tʉp. Tʉpon, doscientos cinco waechan wʉt.