Yeⁿꞌe Espíritu Nꞌdai yeⁿꞌé Ndyuūs ní yeⁿꞌe espíritu chi contra yeⁿꞌe Cristo
4
Ndísꞌtiī chi neⁿꞌé, nguɛ́ɛ́ cuꞌtéénu nī tanducuéⁿꞌē espíritu naati nꞌdííchineeⁿ nī tanducuéⁿꞌē espíritu chɛɛ́ chi yeⁿꞌe Dendyuūs caati nééné ꞌyaaⁿ ꞌiiⁿꞌyāⁿ nguɛ́ɛ́ ngaⁿꞌa yā nduudu cuaacu yeⁿꞌe Dendyuūs. 2 Caati ꞌtíícā ní cuuvi deenú nī Espíritu chi yeⁿꞌe Dendyuūs ꞌyā. Tanducuéⁿꞌē espíritu chí ntúmiiⁿnuⁿ chi Jesucristo ní ndaá yā iⁿꞌyeeⁿdí ꞌcūū ní yeⁿꞌe Dendyuūs. 3 Niicu tanducuéⁿꞌē espíritu chi nguɛ́ɛ́ ntúmiiⁿnuⁿ chí Jesucristo ní ndaá yā iⁿꞌyeeⁿdī tanꞌdúúcā sꞌuuúⁿ nguɛ́ɛ́ yeⁿꞌe Dendyuūs ꞌyā. Chííⁿ chí espíritu yeⁿꞌē anticristo. ꞌĀā chꞌiindiveéⁿ nī yeⁿꞌē espíritu yeⁿꞌe anticristo chi cánéé chi ndaa ni maaⁿ ꞌāā canéé iⁿꞌyeeⁿdí ꞌcūū.4 Ndísꞌtiī ní daiyá yeⁿꞌe Dendyuūs ndísꞌtiī. Níícú ꞌāā chichɛɛ́ nī yeⁿꞌe espíritu chi canéé iⁿꞌyeeⁿdí ꞌcūū chi espíritu yeⁿꞌe anticristo caati ꞌiiⁿꞌyāⁿ chi canéé ndúúcu nī chꞌɛɛtɛ cá yā nguɛ́ɛ́ ti espíritu chi canéé iⁿꞌyeeⁿdí ꞌcūū. 5 Ní espíritus ní yeⁿꞌe iⁿꞌyeeⁿdí ꞌcūū, caavā chííⁿ chi ngaⁿꞌá yā yeⁿꞌe iⁿꞌyeēⁿdī. Ní ꞌiiⁿꞌyāⁿ yeⁿꞌe iⁿꞌyeēⁿdī nꞌgiindiveéⁿ yā yeⁿꞌē. 6 Sꞌuuúⁿ ní yeⁿꞌé Dendyuūs sꞌuuúⁿ. Duꞌu chí nꞌdiichí Dendyuūs nꞌgiindiveéⁿ yā yeⁿꞌe yú. Duꞌu chí nguɛ́ɛ́ yeⁿꞌe Dendyuūs, nguɛ́ɛ́ nꞌgiindiveéⁿ yā yeⁿꞌe yú. Caati ndúúcū chúū ní nꞌdiichi yú Espíritu yeⁿꞌe nduudu cuaacu ní espíritu chi nguɛ́ɛ́ yeⁿꞌe nduudu cuaacu.
Ndyuūs ní vaadī neⁿꞌe
7 Ndísꞌtiī chi neⁿꞌe taaví, dineⁿꞌē yú ꞌaama yú taama yú caati vaadī neⁿꞌe ní yeⁿꞌe Dendyuūs. Nducyáácá ꞌiiⁿꞌyāⁿ chi yaꞌāī ꞌíínú yā ꞌiiⁿꞌyāⁿ ní yeⁿꞌe Dendyuūs ꞌiiⁿꞌyāⁿ miiⁿ, ní nꞌdiichi yā Dendyuūs. 8 Duꞌu chi nguɛ́ɛ́ idinéⁿꞌe yā ꞌiiⁿꞌyāⁿ nguɛ́ɛ́ inꞌdiichí yā Dendyuūs, ti Dendyuūs ní vaadī neⁿꞌe. 9 Níícú chuū chi chꞌiⁿꞌí yā nanáaⁿ yú ní vaadī neⁿꞌe yeⁿꞌe Dendyuūs. Níícú chuū chí Dendyuūs dichóꞌo yā ꞌáámá nꞌdyáⁿꞌā daiya yā iⁿꞌyeeⁿdí ꞌcūū caati cuuvi ꞌcuɛɛti nduuchi yú cáávā ꞌiiⁿꞌyāⁿ mííⁿ. 10 Níícú chuū ní chííⁿ chí canéé vaadī neⁿꞌe. Nguɛ́ɛ́ chi sꞌuuúⁿ chi dinéⁿꞌe yú Dendyuūs miiⁿ, ti Dendyuūs mííⁿ chi idinéⁿꞌe yā sꞌuuúⁿ, níícú dichóꞌo yā daiyá yā chi chꞌīi yā lado yeⁿꞌe yú cucáávā nuūⁿndī yeⁿꞌe yú.
11 Ndísꞌtiī chi neⁿꞌé, ndúúti chi ꞌtíícā neⁿꞌe Dendyuūs sꞌuuúⁿ ꞌtiicá ntúūⁿ sꞌuuúⁿ canéé chi dinéⁿꞌe yú ꞌaama yú taama yú. 12 Mar ꞌáámá ꞌiiⁿꞌyāⁿ nguɛ́ɛ́ nꞌdiichí yā Dendyuūs. Ndúúti chi idinéⁿꞌe yú ꞌaama yú taama yú, Dendyuūs ní canée yā ndúúcu yú. Níícú vaadī neⁿꞌe nꞌdaacā nꞌdai canéé ndúúcu yú. 13 Ndúúcū chuū ní deenu yú chi canee yú nduucú yā ní ꞌiiⁿꞌyāⁿ miiⁿ nduucú yā sꞌuuúⁿ cáávā chi tee yā Espíritu Nꞌdai yeⁿꞌé Ndyuūs sꞌuuúⁿ. 14 Sꞌuuúⁿ inꞌdiīchī yú ní ngaⁿꞌa yú nduudu cuaacu chí chiida yú dichóꞌo yā daiya yā. Ní daiya yā nadangáⁿꞌai yā ꞌiiⁿꞌyāⁿ yeⁿꞌe tanducuéⁿꞌē nuuⁿndi chi vɛ́ɛ́ yeⁿꞌe yā yeⁿꞌē iⁿꞌyeeⁿdí ꞌcūū. 15 Duꞌū chí intúmiiⁿnuⁿ chí Jesús ní daiyá Dendyuūs ꞌyā, Dendyuūs canée yā nduucú yā, ní ꞌiiⁿꞌyāⁿ miiⁿ canée yā ndúúcū Dendyuūs.
16 Níícú sꞌuuúⁿ ninꞌdiichi yú ní iꞌteenu yú chɛ́ɛ́ chi vaadī neⁿꞌe chi Dendyuūs dineⁿꞌé yā sꞌuuúⁿ. Vaadī neⁿꞌē mííⁿ ní Dendyuūs. Níícú ꞌiiⁿꞌyāⁿ chí neⁿꞌé yā nducyaaca ꞌiiⁿꞌyāⁿ ní yeⁿꞌe Dendyuūs ꞌiiⁿꞌyāⁿ. Níícú Dendyuūs canéé yā nduucú yā. 17 Ní chuū ní vaadī neⁿꞌe chi nꞌdai taavi chi vɛ́ɛ́ yeⁿꞌe yú. Níícú vɛ́ɛ́ nduudu yeⁿꞌe yú nduucú yā nguuvi chí ndaa juicio. Tanꞌdúúcā ꞌiiⁿꞌyāⁿ miiⁿ ꞌtíícā ntúūⁿ sꞌuuúⁿ canée yú iⁿꞌyeēⁿdī. 18 Vaadī neⁿꞌé ní nguɛ́ɛ́ vaadī ꞌvaꞌā. Naati chííⁿ chí nꞌdáacā taavi yeⁿꞌe vaadī neⁿꞌe iꞌneéⁿ ꞌáámá lado vaādī ꞌvaꞌā ti vaadī ꞌvaꞌa ngií chi ꞌcuīnáaⁿ yú. Duꞌū chí ꞌvaꞌa nguɛ́ɛ́ canéé vaadī neⁿꞌē nꞌdaacā ndúucū.
19 Sꞌuuúⁿ ní idinéⁿꞌe yú ꞌyā ti ꞌiiⁿꞌyāⁿ miiⁿ dinéⁿꞌe yā sꞌuuúⁿ vmnaaⁿ. 20 Duꞌū chí ngaⁿꞌa: ꞌÚú idineⁿꞌé Dendyuūs, níícú nguɛ́ɛ́ inꞌdiichí yā viꞌi yā, ní yaadí yā. Caati dúꞌu chi nguɛ́ɛ́ idinéⁿꞌe yā viꞌī chí nꞌdiichí yā, ¿táácā cuuvi dinéⁿꞌe yā Dendyuūs chi nguɛ́ɛ́ inꞌdiichí yā? 21 Niicu sꞌuuúⁿ ní canee yú ndúúcū ley yeⁿꞌé yā. Duꞌu chí idinéⁿꞌe Dendyuūs, ꞌtiicá ntúūⁿ idinéⁿꞌe yā viꞌi yā.