ꞌIiⁿꞌyāⁿ sꞌeeⁿ chi daiyá Dendyuūs
3
Cunꞌdííchí ndísꞌtiī vaadī néⁿꞌe chi tee chiida yú sꞌuuúⁿ chi yaaꞌvi yā sꞌuuúⁿ chi daiyá Dendyuūs sꞌuuúⁿ. Cáávā chuū chí iⁿꞌyéeⁿdī nguɛ́ɛ́ inꞌdiichi sꞌuuúⁿ caati nguɛ́ɛ́ inꞌdiichi Cristo. 2 Ndísꞌtiī chi neⁿꞌe taaví, maaⁿ ní daiya Dendyuūs sꞌuuúⁿ. Ní nguɛ́ɛ́ ngii yā sꞌuuúⁿ táácā chi cūnee yú. Caati deenu yú taachi ndaa yā ꞌiiⁿꞌyāⁿ miiⁿ ní tanꞌdúúca yā ꞌtíícā ntúūⁿ sꞌuuúⁿ, caati nꞌdiichi yú ꞌiiⁿꞌyāⁿ taacá yā. 3 Duꞌū chi canee ngíínú yā chuū ní nadɛɛvɛ́ yā tanꞌdúúcā chi Ndyuūs miiⁿ ní dɛɛvɛ́ yā.4 Duꞌū chí idiiⁿ nuuⁿndi nguɛ́ɛ́ diíⁿ yā tanducuéⁿꞌē chi ngaⁿꞌa ley. Níícú nuuⁿndi ní chiiⁿ chi nguɛ́ɛ́ diiⁿ yā chi ngaⁿꞌa ley. 5 Ndísꞌtiī déénu nī chi Dendyuūs ní ndaá yā chi divíi yā nuuⁿndi yeⁿꞌē yú. Níícú nguɛ́ɛ́ vɛ́ɛ́ nuuⁿndi yeⁿꞌé yā. 6 Duꞌū chi yeⁿꞌé yā nguɛ́ɛ́ idiiⁿ nuuⁿndi. Duꞌū chi idiiⁿ nuuⁿndi nguɛ́ɛ́ nꞌdiichí yā ꞌiiⁿꞌyāⁿ. 7 Ndísꞌtiī daiya nꞌgaiyáa nguɛ́ɛ́ canncheꞌéí nī mar ꞌáámá ꞌiiⁿꞌyāⁿ. Duꞌū chi idiiⁿ denduꞌū chí nꞌdaacā tuuꞌmi ní nꞌdai tanꞌdúúcā ꞌiiⁿꞌyāⁿ miiⁿ ní nꞌdaí yā. 8 Duꞌū chi idiiⁿ nuuⁿndi ní yeⁿꞌe yááⁿnꞌguinūuⁿ caati yááⁿnꞌguinūuⁿ diiⁿ nuuⁿndi sa ndii vmnaaⁿ. Cáávā chuū ndaá daiya Dendyuūs cucáávā chí nadituuví yā chí diīⁿ yááⁿnꞌguinūuⁿ.
9 Duꞌū chí chꞌiindiyáaⁿ yā taama vmnéⁿꞌēe ní yeⁿꞌe Dendyuūs ní nguɛ́ɛ́ idiíⁿ yā nuuⁿndi caati ndaata yeⁿꞌé Ndyuūs canéé ndúúcu yā. Ní nguɛ́ɛ́ ngii diíⁿ yā nuuⁿndi caati chꞌiindiyáaⁿ yā taama vmnéⁿꞌēe ní yeⁿꞌé Dendyuūs. 10 Níícú chuū chí nꞌgiⁿꞌi chɛɛ chí daiya Dendyuūs. Níícú nꞌgiⁿꞌi chɛɛ chí daiya yááⁿnꞌguinūuⁿ. Duꞌū chi nguɛ́ɛ́ idiíⁿ nꞌdaacā ní nguɛ́ɛ́ neⁿꞌe viꞌī, ní nguɛ́ɛ́ yeⁿꞌe Dendyuūs.
Dineⁿꞌe yú ꞌaama yú taama yú
11 Chuū ní nduudu cuaacu yeⁿꞌé Ndyuūs chi ndísꞌtiī chꞌiindiveéⁿ nī ndii vmnaaⁿ, chi dineⁿꞌe yú ꞌaama yú ndúúcū taama yú. 12 Nguɛ́ɛ́ tanꞌdúúcā saⁿꞌā Caín chi yeⁿꞌē yááⁿnꞌguinūuⁿ. Saⁿꞌā chꞌiiⁿꞌnuⁿ sá ꞌdiīnū sa. ¿ꞌÍícú dɛꞌɛ̄ cáávā chi chꞌiiⁿꞌnuⁿ sá ꞌdiīnū sa? ꞌTíícā diiⁿ sa caati chííⁿ chí maaⁿ sa diiⁿ sa ní nguɛ́ɛ́ nꞌdaacā. Níícú chiiⁿ chi diiⁿ ꞌdiīnū sa ní nꞌdaacā.
13 Ndísꞌtiī viꞌí, ꞌáá nguɛ́ɛ́ nꞌdiichí nī chi ꞌiiⁿꞌyāⁿ yeⁿꞌe íⁿꞌyeeⁿdī nguɛ́ɛ́ neⁿꞌé yā ndísꞌtiī. 14 ꞌĀā choꞌō yú vaadī nꞌgii ní ꞌāā nꞌgɛɛtinéeⁿ yú ndúúcū vida cueⁿꞌe daāⁿmaⁿ. Sꞌuuúⁿ déénu yú ti neⁿꞌe yú viꞌī yú. Duꞌū chí nguɛ́ɛ́ neⁿꞌe viꞌī, ꞌiiⁿꞌyāⁿ miiⁿ cánéé vaadī nꞌgii ndúúcu yā. 15 Duꞌū chi nguɛ́ɛ́ nꞌdiichi viꞌī ꞌcaaⁿꞌnúⁿ yā ꞌiiⁿꞌyāⁿ. Níícú deenu yú chi ꞌiiⁿꞌyāⁿ chí nꞌgiīⁿꞌnūⁿ ꞌiiⁿꞌyāⁿ nguɛ́ɛ́ canéé vida cueⁿꞌe daāⁿmaⁿ ndúúcu yā. 16 Ní ndúúcū chuū nꞌdiichi yú vaadī néⁿꞌe, caati chꞌiī Jesús cáávā sꞌuuúⁿ. ꞌTiicá ntúūⁿ sꞌuuúⁿ canee chi ꞌcuūvī yú lado yeⁿꞌē viꞌī yú. 17 Naati duꞌū chí vɛ́ɛ́ yeⁿꞌē tanducuéⁿꞌē chi vɛɛ yeⁿꞌe iⁿꞌyeeⁿdí ꞌcūū níícú naáⁿ yā viꞌi yā chi nguɛ́ɛ́ yeⁿꞌé yā, ní nguɛ́ɛ́ neⁿꞌe yā caꞌá yā ꞌiiⁿꞌyāⁿ, ¿táácā cūnee vaadī neⁿꞌe yeⁿꞌe Dendyuūs nduucú yā? 18 Ndísꞌtiī daiya nꞌgaiyáa, nguɛ́ɛ́ dineⁿꞌe yú ndúúcū nduudu yeⁿꞌe yú ndúúcū chi caaⁿꞌmaⁿ yú naati ndúúcū ntiiⁿnyuⁿ chi diiⁿ yú ndúúcū vaadī cuaacu.
Vɛ́ɛ́ confianza yeⁿꞌe yú nanááⁿ Ndyuūs
19 Ndúúcū chuū ní deenu yú chí vaadī cuaacu ní ndúúcu yú. Níícú staava yeⁿꞌe yú seguro canéé nanáaⁿ yā. 20 Ndúúti chi staava yeⁿꞌe yú caaⁿꞌmaⁿ nuuⁿndi yeⁿꞌe yú, chꞌɛɛtɛ cá Dendyuūs nguɛ́ɛ́ ti staava yeⁿꞌe yú. Níícú déénu yā nducuéⁿꞌē denduꞌū. 21 Ndísꞌtiī chí neⁿꞌé, ndúúti chi staava yeⁿꞌe yú nguɛ́ɛ́ caaⁿꞌmaⁿ nuuⁿndi yeⁿꞌe yú tuuꞌmi ní vɛ́ɛ́ confianza yeⁿꞌe yú ndúúcū Dendyuūs. 22 Nducuéⁿꞌē chi caaca yú Ndyuūs, itée yā yeⁿꞌe yú caati diiⁿ yú chi ngaⁿꞌa ley yeⁿꞌé yā níícú idiiⁿ yú cosa chi nꞌdaacā nanáaⁿ yā. 23 Chúū chi ley yeⁿꞌé yā, chi iꞌteenu yú chi duuchi daiyá yā Jesucristo, ní dineⁿꞌē yú ꞌaama yú ndúúcū taama yú, tanꞌdúúcā chí ngaⁿꞌá yā nduucū yú. 24 Duꞌū chí diiⁿ chi ngaⁿꞌa ley yeⁿꞌé yā canéé ndúúcū Ndyuūs, níícú Dendyuūs canee yā ndúucū. Ní chuū chi deenu yú chi ꞌáámá cūneé yā ndúúcu yú cáávā Espíritu Nꞌdai yeⁿꞌé yā chi tee yā sꞌuuúⁿ.