3 Ndyuūs cáávā poder yeⁿꞌé yā ꞌāā tee yā sꞌuuúⁿ tanducuéⁿꞌē caati cuuvi ꞌcuɛɛtinéé nꞌdaāca yú ní cuuvi dichꞌɛɛtɛ yú Ndyuūs. Ní ꞌtíícā cuuvi diiⁿ yú ti deenu yú Jesucristo chi chꞌɛɛtɛ maáⁿ yā ní diíⁿ yā vaadī nꞌgiinu. Ní Jesucristo yaaꞌví yā sꞌuuúⁿ chi cuuvi yeⁿꞌé yā sꞌuuúⁿ. 4 Ní Cristo ꞌāā tee yā sꞌuuúⁿ promesas chí nꞌdɛɛvɛɛ́ nꞌdai ní ngꞌɛɛtɛ ca. Ní cucáávā promesas miiⁿ ndísꞌtiī ní cuuví cutaꞌá nī yeⁿꞌe vida ngai chí yeⁿꞌe Ndyuūs. Ní cuuvi nnguaⁿꞌai nī yeⁿꞌe nuuⁿndi yeⁿꞌē iⁿꞌyeeⁿdí ꞌcūū, nuūⁿndī chi maaⁿ cuerpo yeⁿꞌe yú neⁿꞌe chi diiⁿ yú. 5 Maaⁿ chi iꞌtéénu nī Jesucristo candɛɛ́ nī cuidado chi nꞌdaacā ca ꞌcuɛɛtineé nī. Ní taachi nꞌdaacā ca ꞌcuɛɛtineé nī tuuꞌmi ní caꞌcueéⁿ nī caati cuuvi deenu cá nī. 6 Ní taachi déénú cá nī tuuꞌmi ní ngaⁿꞌa ntiiⁿnyuⁿ nī yeⁿꞌe maaⁿ cuerpo yeⁿꞌé nī. Ní taachi diíⁿ nī chi ngaⁿꞌa ntiiⁿnyuⁿ nī yeⁿꞌe maaⁿ cuerpo yeⁿꞌé nī tuuꞌmi ní cuchɛɛ nī yeⁿꞌe maaⁿ cuerpo yeⁿꞌe nī. Ní taachi cuchɛ́ɛ nī yeⁿꞌe maaⁿ cuerpo yeⁿꞌé nī tuuꞌmi ní diíⁿ nī tanꞌdúúcā chi Ndyuūs neⁿꞌé yā chi diíⁿ nī. 7 Ní taachi ꞌāā diíⁿ nī tanꞌdúúcā chi Ndyuūs neⁿꞌé yā chi diíⁿ nī tuuꞌmi ní dineⁿꞌé nī ꞌáámá nī taama nī. Ní taachi dineⁿꞌé nī ꞌáámá nī taama nī tuuꞌmi ní ꞌáámá dinéⁿꞌe nī ꞌiiⁿꞌyāⁿ.

8 Ní yeⁿꞌē tanducuéⁿꞌē chuū, nduuti chi ndísꞌtiī diíⁿ nī ní nꞌdai nꞌdai diíⁿ nī tuuꞌmi ní cuuvi diíⁿ nī ntiiⁿnyuⁿ yeⁿꞌe Señor Jesucristo yeⁿꞌe yú. Ní dichííꞌvɛ nī Señor yeⁿꞌe yú. Ní chuū diīiⁿ chi dichííꞌvɛ̄ chí deenu nꞌdaāca cá nī Señor Jesucristo yeⁿꞌe yú. 9 Ní nduuti chi ꞌáámá nī nguɛ́ɛ́ diíⁿ nī tanducuéⁿꞌē chuū tuuꞌmi ní ndísꞌtiī ní tanꞌdúúcā ꞌáámá ꞌiiⁿꞌyāⁿ chi ngueenááⁿ ꞌtiicá nī ti nguɛ́ɛ́ cuuvi snaaⁿ nī chí yaⁿꞌai. Ní nguɛ́ɛ́ nꞌgaacu nī chí nduuvi dɛɛvɛ nī yeⁿꞌe nuuⁿndi yeⁿꞌe nī chi diíⁿ nī cuááⁿ vmnaaⁿ taachi caama iꞌtéénu nī Jesucristo. 10 Maaⁿ ní ndísꞌtiī hermanos yeⁿꞌé cáávā nducuéⁿꞌē chuū candɛɛ cá nī cuidado chi ꞌaama canéé nꞌdaaca nī ndúúcū chi iꞌtéénu nī. Ní canee nī seguro chi Ndyuūs yaaꞌví yā ndísꞌtiī chi cuuvi yeⁿꞌé yā ndísꞌtiī. Ní ndɛɛvɛ́ yā ndísꞌtiī. Ní nduuti chi diíⁿ nī denduꞌū chi ꞌtúúcā tuuꞌmi ní ꞌāā ntɛ́ɛ́ dɛꞌɛ̄ cáávā chi diíⁿ nī nuuⁿndi. 11 Ní taachi diíⁿ nī ꞌtúúcā Jesucristo tée yā lugar ndísꞌtiī chi cuuvi ndaa nī naachi canee Señor Jesucristo chi nadanguaⁿꞌai yā sꞌuuúⁿ ní naachi cuéⁿꞌé daāⁿmaⁿ ngaⁿꞌa ntiiⁿnyuⁿ yā yeⁿꞌē.

12 Ní cáávā chuū ꞌúú cueⁿꞌe daāⁿmaⁿ idiíⁿ chi ndísꞌtiī nꞌgaacu nī yeⁿꞌē tanducuéⁿꞌē chuū ꞌáárá chí deenú nꞌdai nī yeⁿꞌē. Ní nꞌgɛɛtinéé nꞌdaaca nī ní nꞌgiindivééⁿ nꞌdaaca nī nduudu cuaacu yeⁿꞌé Ndyuūs. 13 ꞌÚú nadacádiinúúⁿ chi nꞌdaāca ca neⁿꞌe chi canduuchi cá chi ꞌtíícā diíⁿ chi ndísꞌtiī cuuvi nanꞌgaacu nī yeⁿꞌe tanducuéⁿꞌē chuū. 14 Señor Jesucristo yeⁿꞌe yú ꞌāā chꞌiⁿꞌí yā ꞌúú, Pedro, ꞌtíícā. ꞌĀā ntɛ́ɛ́ ꞌnááⁿ canduuchí ní ꞌcuūví. 15 ꞌTiicá ntúūⁿ idiíⁿ chi ndísꞌtiī nꞌgaacu nī cuéⁿꞌé daāⁿmaⁿ yeⁿꞌe denduꞌu ꞌcūū taachi ꞌāā nꞌdií.

16 Chííⁿ chi núsꞌuu caꞌcueéⁿ ꞌnū ndísꞌtiī yeⁿꞌe Señor Jesucristo yeⁿꞌe yú chi ndaa ntuúⁿ yā ndúúcū poder yeⁿꞌé yā nguɛ́ɛ́ yeⁿꞌe vaanicadíínūuⁿ yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. ꞌTíícā núsꞌuu ꞌāā nꞌdiichí ꞌnū ndúúcū nduutinaáⁿ maáⁿ ꞌnū Señor Jesucristo yeⁿꞌe yú chi neené chꞌɛɛtɛ. 17 Ní nꞌdiichí ꞌnū chi Cristo ní neené chꞌɛɛtɛ yā taachi Ndyuūs chiida yú dichꞌɛɛtɛ́ yā Jesucristo ní caꞌa yā Cristo chi dɛɛvɛ́ taavi ngii yā. Caati Ndyuūs chi dɛɛvɛ ngii ca ngaⁿꞌá yā yeⁿꞌe Cristo ní nꞌgiindiveéⁿ ꞌnū nduudú ꞌcūū. Chuū caⁿꞌa Ndyuūs: Sáⁿꞌa ꞌcūū chi daiyá chi neⁿꞌe taaví ní ꞌúú nééné yeenú yeⁿꞌē daiyá. 18 Ní núꞌsūū maáⁿ ꞌnū chꞌiindiveéⁿ ꞌnū nduudu ꞌcūū chi chiica yeⁿꞌe vaꞌai chɛɛti nguuvi taachi cueⁿꞌé ꞌnū ndúúcū Jesucristo na yiīcū chi duuchi Nꞌdɛɛvɛ́ Nꞌdai.

19 Maaⁿ ní cuꞌtéénu cá ꞌnū chi nduudu cuaacu chi ꞌiiⁿꞌyāⁿ profetas candɛ́ɛ yā tiempo chi ꞌāā chóꞌōo ní cuaacu. Nꞌdaacā ca chi ndísꞌtiī iꞌneeⁿveéⁿ nī nduudú ꞌcūū. Nduudú ꞌcūū tanꞌdúúcā ꞌáámá chidɛɛvɛ chi ngii yaⁿꞌā na ꞌáámá cuaaⁿ chí maāiⁿ. ꞌTíícā yeⁿꞌē, ní chidɛɛvɛ ní ngii ndii tiempo chi ndaá nguuvi ní canꞌdaā ꞌííⁿnyúⁿ chi nguuvi ꞌyuudi chí nduudu cuaacu ní canee na staava yeⁿꞌé nī. 20 Neⁿꞌé chi ndísꞌtiī vmnááⁿ vmnaaⁿ nadacadíínuuⁿ nī yeⁿꞌe chuū. Mar ꞌáámá nduudu yeⁿꞌe libro yeⁿꞌé Ndyuūs chi ngaⁿꞌā yeⁿꞌe ꞌáámá denduꞌū chi cuchiī ndísꞌtiī nguɛ́ɛ́ dámaāⁿ maáⁿ nī cuuvi deenú nī yeⁿꞌē. 21 Ní nduudu cuaacu chi ngaⁿꞌa profetas tiempo chi chóꞌōo nguɛ́ɛ́ ngaⁿꞌa yā yeⁿꞌe chi nadacadíínuuⁿ yā maáⁿ yā naati Espíritu Nꞌdai yeⁿꞌé Ndyuūs yaaꞌví yā profetas nduudu cuaacu chí caⁿꞌa yā. Ní nduudu yeⁿꞌé yā ngiica yeⁿꞌé Ndyuūs ti ꞌáámá diíⁿ yā ntiiⁿnyuⁿ yeⁿꞌé Ndyuūs.