3 Dichꞌɛɛtɛ ca yú Ndyuūs chi chiida Señor Jesucristo caati nééné yaꞌai ꞌiinú yā sꞌuuúⁿ chi diíⁿ yā chi chꞌiindiyáāⁿ ngai yú. Chuū diíⁿ yā caati nadacuéeⁿ yā Jesucristo yeⁿꞌē nguaaⁿ tináⁿꞌā. Maaⁿ ní cucáávā Ndyuūs tee yā sꞌuuúⁿ ꞌáámá vida ngai yeⁿꞌe yú ní vɛ́ɛ́ esperanza yeⁿꞌe yú. 4 Ní cūnee ngiinu yú yeⁿꞌe tanducuéⁿꞌē vaadī nꞌdai yeⁿꞌé Ndyuūs chi Ndyuūs ngaⁿꞌá yā chi tée yā sꞌuuúⁿ chi cuuvi yeⁿꞌe yú. Ní Ndyuūs nanguáínꞌdai yā cáávā sꞌuuúⁿ chiiⁿ chi cuuvi yeⁿꞌe yú na vaꞌai chɛɛti nguuvi naachi nguɛ́ɛ́ cuuvi chōō. Ní nguɛ́ɛ́ cuuví ꞌcuɛɛ, ndíí nguɛ́ɛ́ cúúví chóꞌōo yeⁿꞌē. 5 Ní chuū chi Ndyuūs nguáínꞌdai yā ní cáávā ndísꞌtiī ti ndísꞌtiī iꞌtéénu nī Jesucristo. Ní Ndyuūs diíⁿ yā cuidado ndísꞌtiī ndúúcū poder yeⁿꞌé yā ꞌnaaⁿ chi cūnee ngiinú nī chi nadanguáⁿꞌai yā ndísꞌtiī chi cuuvi déénu nī yeⁿꞌe chuū tiempo chi cuchiī.

6 Ní canee chi yeenú nī yeⁿꞌe chuū ꞌaara chi dindaachí nī duuꞌvi tiempo nūuⁿ ꞌnaaⁿ chi nꞌgeenú nī ngiī nꞌdeee nꞌdáí cosas chí ngií. 7 Cáávā chi iꞌtéénu nī Jesucristo vaadī iꞌtéénu yeⁿꞌé nī ní tanꞌdúúcā ꞌdííⁿnguāaⁿ, ꞌtíícā. Ní ꞌiiⁿꞌyāⁿ canéé chi nꞌdiichineeⁿ ꞌdííⁿnguāaⁿ ndúúcū yaⁿꞌā caati cuuvi deenú yā chi dámaāⁿ ꞌdííⁿnguāaⁿ. Ní ꞌtiicá ntúūⁿ vaadī iꞌtéénu yeⁿꞌé nī ꞌiiⁿꞌyāⁿ canéé chí nꞌdiichíneeⁿ yā. Ní vaadī iꞌtéénu yeⁿꞌé nī nduuti chi ichɛ́ɛ́ yeⁿꞌe tanducuéⁿꞌē taachi ꞌiiⁿꞌyāⁿ nꞌdiichineeⁿ yā yeⁿꞌē, tuuꞌmi ní cuaacu chi iꞌtéénu nī ní ꞌáámá cūnee vaadī iꞌtéénu yeⁿꞌé nī nguɛ́ɛ́ ti ꞌdííⁿnguāaⁿ chí nꞌgiinu. Cuayiivi taachi ndaá Jesucristo tuuꞌmi ní dichꞌɛɛtɛ́ yā ndísꞌtiī ní diíⁿ yā honrar ndísꞌtiī ní diíⁿ yā chi nꞌdɛɛvɛ́ ngii ndísꞌtiī cáávā chi nꞌdaacā ca iꞌtéénu nī Jesucristo.

8 ꞌÁárá chi nguɛ́ɛ́ nꞌdiichí yā Jesucristo dineⁿꞌé nī ꞌiiⁿꞌyāⁿ. Ní iꞌtéénu nī ꞌiiⁿꞌyāⁿ ꞌáárá chi nguɛ́ɛ́ inaáⁿ nī ꞌiiⁿꞌyāⁿ. Maaⁿ ní neené yeenú nī ndúúcū vaadī yeenu chi chꞌɛɛtɛ taavi ca. Ní nguɛ́ɛ́ vɛ́ɛ́ nduudu yeⁿꞌé nī chi cuuvi caaⁿꞌmáⁿ nī yeⁿꞌē. 9 Ní neⁿꞌé nī tunéeⁿ nī nguuvi chi Ndyuūs nadanguáⁿꞌai yā almas yeⁿꞌe nī. Ní cáávā chuū chi iꞌtéénu ca nī Ndyuūs.

10 Tiempo chi ꞌāā chóꞌōo ꞌiiⁿꞌyāⁿ profetas chi candɛ́ɛ yā nduudu yeⁿꞌé Ndyuūs neené nꞌdai nꞌnuuⁿ yā yeⁿꞌe chi Ndyuūs nadanguáⁿꞌai yā ꞌiiⁿꞌyāⁿ. Ní itíínguuneeⁿ yā yeⁿꞌe chuū. Profetas ní ꞌiiⁿꞌyāⁿ chi ngaⁿꞌá yā yeⁿꞌe chi Ndyuūs caⁿꞌá yā chi tée yā ndísꞌtiī yeⁿꞌe chi nꞌdai taavi ca yeⁿꞌé yā. 11 Ní profetas ní neⁿꞌé yā deenu yā yeⁿꞌe tiempo ꞌcūū ni táácā cuuvi chóꞌōo yeⁿꞌe tiempo ꞌcūū taachi Cristo ꞌcueenú yā cuuvi ní cuchɛɛ yā. Ní cuayiivi cuchiī chi dɛɛvɛ́ ngii yeⁿꞌé Cristo caati Espíritu yeⁿꞌe Cristo chi canee ndúúcū profetas ꞌāā chꞌiⁿꞌí yā profetas yeⁿꞌe chuū. 12 Naati Ndyuūs chꞌiⁿꞌí yā profetas chi tiempo yeⁿꞌe Cristo yeⁿꞌe chi ngaⁿꞌa yā nguɛ́ɛ́ cuuvi nꞌdiichí profetas naati ndísꞌtiī ní ꞌāā nꞌdiichí nī. Profetas ngaⁿꞌá yā nduudu cuaacu yeⁿꞌe chi cuchiī naati ndísꞌtiī ꞌāā nꞌgiindiveéⁿ nī chi ꞌāā chóꞌōo chííⁿ chí caⁿꞌa yā. Ní cáávā ꞌiiⁿꞌyāⁿ chi ngaⁿꞌá yā ngii yā ndísꞌtiī nduudu cuaacu chi Jesús nadanguáⁿꞌai yā ꞌiiⁿꞌyāⁿ ndúúcū poder yeⁿꞌē Espíritu Nꞌdai yeⁿꞌé Ndyuūs. Ní Ndyuūs dichóꞌo yā Espíritu Nꞌdai yeⁿꞌé yā yeⁿꞌē vaꞌai chɛɛti nguuvi nanááⁿ sꞌuuúⁿ. Ní nducuéⁿꞌē chuū ní ángeles maáⁿ yā neⁿꞌe yā snaaⁿ yā denduꞌū.

13 Maaⁿ ní cáávā nducuéⁿꞌē chuū nadacadíínuuⁿ nī nꞌdaacā yeⁿꞌe chi caⁿꞌá nī diiⁿ nī ní ꞌcuɛɛtinéé nꞌdaacá nī. Ní cunee ngiinú nī dámaāⁿ yeⁿꞌe nducuéⁿꞌē chi nꞌdai taavi chi Señor Jesucristo caⁿꞌá yā tée yā ndísꞌtiī taachi ndaa yā taama vmnéⁿꞌēe. 14 Ndísꞌtiī ní ꞌcaandiveéⁿ nī nduudu yeⁿꞌé Ndyuūs ti daiya Ndyuūs ndísꞌtiī. Ní nguɛ́ɛ́ diiⁿ nī tanꞌdúúcā chi diíⁿ nī nducuéⁿꞌē chi neⁿꞌe maáⁿ nī taachi ꞌāā cuɛ́ɛ́ nꞌdiichí nī Ndyuūs. 15 Maaⁿ ní ꞌcuɛɛtinéé nꞌdaāca nī chi nguɛ́ɛ́ vɛ́ɛ́ nuuⁿndi yeⁿꞌé nī caati Ndyuūs chi yaaꞌví yā ndísꞌtiī chi cuuvi yeⁿꞌé yā ndísꞌtiī ní dɛɛvɛ yā. 16 Canéé nguūⁿ na libro yeⁿꞌé Ndyuūs ꞌtíícā: Canéé chí diiⁿ nꞌdaacá nī chi dɛɛvɛ nī caati ꞌúú, Ndyuūs, ní dɛɛvɛ ꞌúú.

17 Nduuti chi ndísꞌtiī ní ngaⁿꞌá nī chi Ndyuūs ní chiidá nī ní caacá nī Ndyuūs chi cunnee yā ndísꞌtiī, canéé chi ꞌcuɛɛtinéé nꞌdaacá nī ní ꞌvaꞌá nī Ndyuūs neⁿꞌe chi cuneé nī iⁿꞌyeeⁿdí ꞌcūū. Ndyuūs yeⁿꞌe yú ꞌāā daamá nūuⁿ nꞌguúⁿ yā nducyaaca ꞌiiⁿꞌyāⁿ. Ní nꞌdiichí yā caꞌáámá cāꞌaama yā tanꞌdúúcā chi chꞌɛɛtineé yā ndúúcū ntiiⁿnyuⁿ chi diíⁿ yā. 18 Deenú nī chi Ndyuūs nadanguáⁿꞌai yā ndísꞌtiī yeⁿꞌe vida chi nguɛ́ɛ́ nꞌdaācā chi staꞌá nī yeⁿꞌe ꞌiiⁿꞌyāⁿ yeⁿꞌe ndaata yeⁿꞌé nī. Ní nꞌdáácā ca deenú nī chi nadííꞌvɛ̄ yeⁿꞌe chi nadanguáⁿꞌai yā ndísꞌtiī. Nguɛ́ɛ́ cuái yā ndúúcū denduꞌū chí nchōō tanꞌduucā ꞌdííⁿnguāaⁿ o ꞌdííⁿnguɛ̄ɛ. 19 Naati Ndyuūs nadanguáⁿꞌai yā ndísꞌtiī ndúúcū yuūúⁿ chi yaⁿꞌai chííꞌvɛ̄ ti yuūúⁿ yeⁿꞌe Cristo. Cristo ní caꞌa yā maáⁿ yā cuerpo caavā ofrenda chi ꞌiiⁿꞌyāⁿ sꞌeeⁿ ꞌcaaⁿꞌnúⁿ ya ꞌyā. Ní Cristo miiⁿ tanꞌdúúcā ꞌáámá ꞌiiti cuūchī chi nguɛ́ɛ́ nꞌgai tī ní nguɛ́ɛ́ dɛꞌɛ̄ vɛɛ ndíí yeⁿꞌe tī, ꞌtííca yā. 20 Ní Ndyuūs ndɛɛvɛ́ yā Cristo chi maáⁿ yā cuerpo yeⁿꞌé yā cuuvi ofrenda ndíí vmnááⁿ vmnaaⁿ taachi ꞌāā cuɛ́ɛ́ dinꞌdái yā iⁿꞌyeeⁿdí ꞌcūū. Naati maaⁿ ní nguuvi sꞌeeⁿ Ndyuūs chꞌiⁿꞌi yā Cristo nanááⁿ ndísꞌtiī ní caavā ndísꞌtiī. 21 Ní cucáávā Cristo miiⁿ ní ndísꞌtiī iꞌtéénu nī Ndyuūs chi nadacuéeⁿ yā Cristo yeⁿꞌē nguaaⁿ tináⁿꞌā. Ní Ndyuūs dichꞌɛɛtɛ́ yā Cristo ndúúcū honor. Ní ndísꞌtiī ꞌāā iꞌtéénu nī Ndyuūs ní cūnee ngiinú nī yeⁿꞌē chi Ndyuūs caⁿꞌa yā chí tée yā ndísꞌtiī chi cuuvi yeⁿꞌé nī.

22 Maaⁿ ní chi ꞌāā iꞌtéénu nī nduudu cuaacu yeⁿꞌé Cristo cucáávā Espíritu Nꞌdai yeⁿꞌé Ndyuūs ꞌāā didɛɛvɛ́ nī staava yeⁿꞌé nī chi dineⁿꞌé nī hermanos yeⁿꞌe yú. Canéé chi dineⁿꞌé taavi cá nī ꞌaama nī taama nī hermanos ndúúcū staava yeⁿꞌé nī chí dɛɛvɛ. 23 Ndísꞌtiī ní ꞌāā chꞌiindiyáaⁿ nī taama vmnéⁿꞌēe nguɛ́ɛ́ yeⁿꞌē ꞌiiⁿꞌyāⁿ yeⁿꞌē iⁿꞌyeeⁿdí ꞌcūū chí ꞌcuūvi yā naati yeⁿꞌe nduudu yeⁿꞌé Ndyuūs, nduudu chi canduuchi ní ꞌáámá cūnee cueⁿꞌe daāⁿmaⁿ. 24 Caati canéé nguūⁿ na libro yeⁿꞌé Ndyuūs ꞌtíícā: