2
Maaⁿ ní cáávā chuū divíi nī ꞌáámá lado nducuéⁿꞌē chi diíⁿ nī chi nguɛ́ɛ́ nꞌdaācā ní nguɛ́ɛ́ canncheꞌéí nī. Ndíí nguɛ́ɛ́ caaⁿꞌmáⁿ nī denduꞌū chi nguɛɛ cuaacu. Ndíí nguɛ́ɛ́ ndúú diíⁿ ngueé nī yeⁿꞌē taama ꞌiiⁿꞌyāⁿ. Ndíí nguɛ́ɛ́ ndúú ngaⁿꞌa nī nduudu yaadī yeⁿꞌé ꞌiiⁿꞌyāⁿ. 2 Ní ndísꞌtiī tanꞌdúúcā chi dacuaꞌaá chi caama ꞌniindiyáāⁿ ní neⁿꞌe leche, ꞌtíícā ndísꞌtiī. Diíⁿ nī ní neⁿꞌé nī leche chi nduudu nꞌdai yeⁿꞌē nduudu cuaacu. Ní cuuvi cuꞌtéénu cá nī ndúúcū nduudú ꞌcūū tanꞌdúúcā dacuaꞌaá cuuvi ꞌcuiitá yā ndúúcū leche nꞌdai. 3 ꞌTíícā cuuvi diíⁿ nī nduuti chi cuaacu nííⁿnyúⁿ nꞌdiichíneeⁿ nī Señor Jesucristo chí nꞌdai yā.Jesucristo ní tanꞌdúúcā tuūu chꞌɛɛtɛ chí canduuchi
4 Ndísꞌtiī canéé chi ndaa niiⁿnuúⁿ nī nanááⁿ Señor Jesucristo ti tanꞌdúúcā ꞌáámá tuūu chꞌɛɛtɛ chí canduuchi ꞌtiicá nī. ꞌIiⁿꞌyāⁿ yeⁿꞌe iⁿꞌyeeⁿdí ꞌcūū nguɛ́ɛ́ ꞌcuúⁿ yā tuuú miiⁿ ti nadacadíínuuⁿ yā chi nguɛ́ɛ́ dichííꞌvɛ̄ naati Ndyuūs ndɛɛvɛ yā tuūu miiⁿ chi yaⁿꞌai chííꞌvɛ̄ chi Cristo. 5 Ní ndísꞌtiī ntúūⁿ tanꞌdúúcā tuūu cánduuchi ꞌtiicá nī ti Ndyuūs ꞌāā teé yā ndísꞌtiī vida ngai. Caꞌa nī lugar Ndyuūs chí cutaꞌá yā vida yeⁿꞌe ndísꞌtiī ní dinꞌdái yā yeⁿꞌe cuerpo yeⁿꞌe ndísꞌtiī ꞌáámá yaācū yeⁿꞌe Espíritu Nꞌdai yeⁿꞌé Ndyuūs. Ní ndísꞌtiī canéé chi diíⁿ nī ntiiⁿnyuⁿ yeⁿꞌe chiiduú yeⁿꞌe yaacú ꞌcūū ní caꞌá nī ofrendas nanááⁿ Ndyuūs ndúúcū chi duuchi Jesucristo, ofrendas chi Ndyuūs cuuvi ꞌcuáaⁿ yā. 6 Ní ꞌtíícā canéé nguūⁿ na libro yeⁿꞌé Ndyuūs cáávā chuū:
Cuinꞌdiichí nī. ꞌÚú Ndyuūs cuꞌneéⁿ yáāⁿ Sión ꞌáámá tuūu chꞌɛɛtɛ yeⁿꞌe cimiento yeⁿꞌe esquina yeⁿꞌe yaācū. Tuūu miiⁿ nꞌdɛɛvɛ́ ní yaⁿꞌai chííꞌvɛ̄. ꞌIiⁿꞌyāⁿ chi iꞌtéénu yā Señor yeⁿꞌe yú chi tuūu chꞌɛɛtɛ miiⁿ nguɛ́ɛ́ cuuvi ꞌcuinaáⁿ yā yeⁿꞌe Señor yeⁿꞌe yú.
7 Ní tuūu miiⁿ ní neené vɛ́ɛ́ chiiꞌvɛ̄ cucáávā ndisꞌtiī chi iꞌtéénu nī Cristo naati nguɛ́ɛ́ ꞌtíícā tuūu miiⁿ nanááⁿ ꞌiiⁿꞌyāⁿ chi nguɛ́ɛ́ iꞌtéénu yā. ꞌTíícā canéé nguūⁿ na libro yeⁿꞌé Ndyuūs:
Tuūu mííⁿ nūuⁿ chi ꞌiiⁿꞌyāⁿ chi dinꞌdái yā yaācū nguɛ́ɛ́ ꞌcūuⁿ yā ti nadacadíínuuⁿ yā chi nguɛ́ɛ́ dichííꞌvɛ̄. Tuuú ꞌcūū nūuⁿ ní tuūu chɛɛtɛ yeⁿꞌē cimiento yeⁿꞌe esquina.
8 Ní canéé nguūⁿ na libro yeⁿꞌé Ndyuūs táámá chi ꞌtíícā:
Tuuú ꞌcūū ní diiⁿ chi cuundí caꞌa ꞌiiⁿꞌyāⁿ ni tuūu mííⁿ chiiⁿ chí cundɛɛvɛ ꞌiiⁿꞌyāⁿ.
Cuaacu chí indɛ́ɛ́ caꞌa yā ti nguɛ́ɛ́ nꞌgiindiveéⁿ yā nduudu cuaacu ní Ndyuūs diíⁿ yā chi ꞌtíícā canee chi diiⁿ ꞌiiⁿꞌyāⁿ sꞌeeⁿ.
Yeⁿꞌe ꞌiiⁿꞌyāⁿ chi yeⁿꞌe Ndyuūs
9 Ndísꞌtiī ní yeⁿꞌe ꞌiiⁿꞌyāⁿ chi Ndyuūs ndɛɛvɛ́ yā. Ndísꞌtiī ní chiiduú yeⁿꞌe Ndyuūs chi Rey. Ndísꞌtiī ní yeⁿꞌe ndaata dɛɛvɛ́. Ndísꞌtiī ní yeⁿꞌe Ndyuūs ndísꞌtiī. ꞌTíícā diiⁿ Ndyuūs caati ndísꞌtiī cuuvi caaⁿꞌmáⁿ nī chi chꞌɛɛtɛ nꞌdai chi diíⁿ Ndyuūs. Ndyuūs nꞌgai yā ndísꞌtiī yeⁿꞌe na maaiⁿ ní ndaá nī nanáaⁿ yā ná dɛ́ɛ́vɛ́ chi nꞌdɛɛvɛ́ nꞌdai yeⁿꞌe maáⁿ yā. 10 Ndísꞌtiī ní tiempo chi chóꞌōo ní nguɛ́ɛ́ yeⁿꞌe Ndyuūs ndísꞌtiī naati maaⁿ ní ꞌtiicá nī. Tiempo chi chóꞌōo Ndyuūs nguɛ́ɛ́ yaꞌai ꞌiinú yā ndísꞌtiī naati maaⁿ ní ꞌtíícā déénu nī chi Ndyuūs yaꞌai ꞌiinú yā ndísꞌtiī ti yeⁿꞌé Ndyuūs ndísꞌtiī.
ꞌIiⁿꞌyāⁿ chi ꞌáámá diíⁿ yā ntiiⁿnyuⁿ yeⁿꞌe Ndyuūs
11 Ndísꞌtiī hermanos yeⁿꞌé chi neⁿꞌé taavi, ꞌúú idiꞌcuiītú ndísꞌtiī chi tanꞌdúúcā ꞌiiⁿꞌyāⁿ chi snúúⁿ yúúní ꞌtiicá nī neⁿꞌe chi snéé nī iⁿꞌyeeⁿdí ꞌcūū ndísꞌtiī. Nguɛ́ɛ́ diíⁿ nī nuuⁿndi tanꞌdúúcā chi neⁿꞌe cuerpo yeⁿꞌé nī chi diíⁿ nī caati chiiⁿ chi neⁿꞌe cuerpo yeⁿꞌé nī ní cueⁿꞌe daāⁿmaⁿ contra yeⁿꞌē chi neⁿꞌe staava yeⁿꞌé nī. 12 ꞌCuɛɛtinéé nꞌdaaca nī nguaaⁿ ꞌiiⁿꞌyāⁿ chi nguɛ́ɛ́ iꞌtéénu yā nduudu cuaacu yeⁿꞌé Ndyuūs. Ní ꞌáárá chí ngaⁿꞌá ꞌiiⁿꞌyāⁿ sꞌeeⁿ contra yeⁿꞌe ndísꞌtiī tanꞌdúúcā chi ndísꞌtiī ní ꞌiiⁿꞌyāⁿ chi nguɛ́ɛ́ nꞌdaacā, ꞌiiⁿꞌyāⁿ sꞌeeⁿ ní cuuvi snaaⁿ yā ntiiⁿnyuⁿ chi nꞌdaācā ca chi idiíⁿ nī. Ní cuuvi ꞌcaaⁿꞌmáⁿ yā chi chꞌɛɛtɛ ca Ndyuūs nguuvi chi Ndyuūs ndaa yā taama vmnéⁿꞌēe ní nnguaī yā cuenta yeⁿꞌe nuūⁿndī yeⁿꞌe yú.
13 Canéé chi diíⁿ nī tanꞌdúúcā chi ngaⁿꞌā ꞌiiⁿntyéⁿꞌē ꞌāā duꞌú nūuⁿ chi vɛ́ɛ́ nduuti chi saⁿꞌā rey o chí ꞌiiⁿntyeⁿꞌē chꞌɛɛtɛ. Ní nꞌdaacā canee nī nanáaⁿ yā caavā chi ndísꞌtiī ní yeⁿꞌē Señor Ndyuūs yeⁿꞌe yú ndísꞌtiī. 14 Ní diíⁿ nī chi ngaⁿꞌa ꞌiiⁿꞌyāⁿ ꞌiiⁿntyéⁿꞌē chi Ndyuūs sꞌneéⁿ yā miiⁿ caati ꞌiiⁿntyéⁿꞌē cuuvi caꞌa yā castigo ꞌiiⁿꞌyāⁿ chi nguɛ́ɛ́ nꞌdaacā idiíⁿ yā ní cuuvi caaⁿꞌmáⁿ yā chi chꞌɛɛtɛ́ ꞌiiⁿꞌyāⁿ chi nꞌdaacā idiíⁿ yā. 15 Ti chuū ní chiiⁿ chi Ndyuūs neⁿꞌé yā chi diíⁿ nī. Ní cáávā chi ndísꞌtiī dinꞌdaacá nī, ꞌiiⁿꞌyāⁿ chi zonzo yā ní nguɛ́ɛ́ deenu yā nguɛ́ɛ́ cuuvi caaⁿꞌmáⁿ yā dɛꞌɛ̄ vɛɛ contra yeⁿꞌe ndísꞌtiī.
16 Ní ꞌcuɛɛtinée nī tanꞌdúúcā ꞌiiⁿꞌyāⁿ chi canéé libre yā. Nguɛ́ɛ́ diíⁿ nī chiiⁿ chi nguɛɛ nꞌdaacā cucáávā chi canéé libre nī, ní ngaⁿꞌá nī chi cuuvi diíⁿ nī ꞌtúúcā. Nꞌdaacā ca chi ꞌcuɛɛtinéé nꞌdaacá nī ti ndísꞌtiī ꞌiiⁿꞌyāⁿ chi ꞌáámá canee chi dichííꞌvɛ̄ Ndyuūs. 17 Ní diíⁿ nī honrar nducyaaca ꞌiiⁿꞌyāⁿ. Ní dinéⁿꞌe nī nducyaaca hermanos yeⁿꞌe yú. ꞌVaꞌá nī Ndyuūs ní diíⁿ nī honrar emperador chi ꞌiiⁿntyéⁿꞌē.
Yeⁿꞌe chi Cristo nꞌgeenu yā ngiī chi ejemplo yeⁿꞌe yú
18 Ndísꞌtiī ꞌiiⁿꞌyāⁿ criados chi chííꞌvɛ̄, diíⁿ nī respetar patrón yeⁿꞌé nī ní diíⁿ nī tanꞌdúúcā chi ngaⁿꞌa patrón yeⁿꞌe nī, nguɛ́ɛ́ dámaāⁿ patrón yeⁿꞌé nī chi dinꞌdaacā ní nꞌdai yā naati patrón yeⁿꞌé nī chi nguɛ́ɛ́ dinꞌdaaca yā ní taaⁿ yā. 19 Caati nꞌdaacā ca chi cuchɛɛ nī taachi nꞌgeenu nī ngiī cáávā cosas chi nguɛ́ɛ́ nꞌdaacā chi diiⁿ ꞌiiⁿꞌyāⁿ chi contra yeⁿꞌé nī. Ní cuchɛɛ nī ti deenu nī chi nꞌdaacā idiiⁿ nī. ꞌTíícā Ndyuūs neⁿꞌe yā chi diiⁿ nī. 20 ¿Dɛꞌɛ̄ chꞌɛɛtɛ chuū nduuti chi nꞌgeenú nī ngii ti vɛ́ɛ́ nuuⁿndi yeⁿꞌé nī ni ꞌtíícā castigo yeⁿꞌé nī, ní ichɛ́ɛ nī? Nguɛ́ɛ́ chꞌɛɛtɛ chuū. Naati nduuti chi nꞌgeenu nī ngii ti nꞌdaacā idiíⁿ nī ni ngiinū ngiinū cuchɛɛ nī tuuꞌmi ní Ndyuūs nadiꞌviicú yā ndísꞌtiī. 21 Ní yaaꞌví yā ndísꞌtiī caavā chi diíⁿ nī ꞌtíícā. Cristo ꞌāā chꞌeenú yā chiī cáávā sꞌuuúⁿ ní sꞌneéⁿ yā ꞌáámá ejemplo yeⁿꞌe yú. Ní sꞌuuúⁿ canéé chi ꞌtííca nūuⁿ diiⁿ yú tanꞌdúúcā chi diíⁿ yā. 22 Cristo miiⁿ nguɛ́ɛ́ diíⁿ yā mar ꞌáámá chuundi ꞌliiⁿ nuuⁿndi ní nguɛ́ɛ́ chinncheꞌéí yā mar ꞌáámá. 23 Ní taachí ꞌiiⁿꞌyāⁿ sꞌeeⁿ ngaⁿꞌa taáⁿ yā yeⁿꞌe Cristo, Cristo miiⁿ nguɛ́ɛ́ ngaⁿꞌa taáⁿ yā yeⁿꞌe yā. Ní taachi ꞌiiⁿꞌyāⁿ sꞌeeⁿ diíⁿ yā chi Cristo yaꞌai chꞌeenú yā chii nguɛ́ɛ́ caⁿꞌā cúnncaa yā yeⁿꞌe yā. Naati cūnee ngiinú yā nanááⁿ Ndyuūs chi cuaacu chí Ndyuūs caⁿꞌá yā nꞌdiichi yā nuuⁿndi yeⁿꞌe ꞌiiⁿꞌyāⁿ sꞌeeⁿ. Ní Ndyuūs diíⁿ yā cosa chi cuaacu. 24 Cristo maáⁿ yā candɛɛ yā nuuⁿndi yeⁿꞌe yú na cuerpo yeⁿꞌe maáⁿ yā taachi chꞌīi yā na cruz. Ní ꞌíícú sꞌuuúⁿ ní cuuvi diiⁿ yú tanꞌdúúcā chi nꞌdii yú yeⁿꞌe nuuⁿndi yeⁿꞌe yú. Ní maaⁿ ní ꞌcuɛɛtinee yú yeⁿꞌe nducuéⁿꞌē chi nꞌdaacā. Ní ꞌāā nnduuvá yeⁿꞌē yú yeⁿꞌe castigo yeⁿꞌe nuūⁿndī yeⁿꞌe yú cáávā chi Cristo nacaꞌáí yā cáávā nuuⁿndi yeⁿꞌe yú. 25 Tiempo chi chóꞌōo sꞌuuúⁿ ní tanꞌdúúcā ꞌiiti cuūchī chi nindai tī ꞌtíícā sꞌuuúⁿ naati maaⁿ ní ndaa yú nanááⁿ Cristo chi candɛ́ɛ yā cuidado sꞌuuúⁿ tanꞌduucā ꞌáámá pastor. Cristo ní candɛ́ɛ yā cuidado alma yeⁿꞌe yú.