Yeⁿꞌé ꞌiiⁿꞌyāⁿ chí ꞌnííndívaacu chi canéé chi ꞌcaandiveéⁿ yā yeⁿꞌē víꞌī
3
ꞌTiicá ntúūⁿ ndísꞌtiī nꞌdaataá chi ꞌnííndívaacu tá, canéé chi diíⁿ nī chi ngaⁿꞌā isaⁿꞌā yeⁿꞌé nī. Ní nduuti chi isaⁿꞌā yeⁿꞌé nī nguɛ́ɛ́ iꞌtéénu sa Cristo, cuuvi cuꞌtéénu sa Cristo cáávā nꞌdaataá yeⁿꞌe sa tí nꞌdaacā nꞌgɛɛtinée tá. ꞌÁárá chi nguɛ́ɛ́ ngaⁿꞌā ta mar ꞌáámá nduudu yeⁿꞌe Cristo tuuꞌmi ní cuuvi cuꞌtéénu sa Cristo. 2 Caati nꞌdiichi sa chi nꞌdaataá yéⁿꞌe sa yeⁿꞌe nducuéⁿꞌē chí idiiⁿ tá ní nꞌdaacā ní diiⁿ tá respetar isaⁿꞌā tá. 3 Ní nꞌdaataá chi nꞌdai tá chi vɛ́ɛ́ isaⁿꞌā yeⁿꞌe tá nguɛ́ɛ́ canéé chi staꞌa tá cosas ni sꞌnuuⁿ tá cosas miiⁿ na cuerpo yeⁿꞌe tá chi diiⁿ chi nꞌdɛɛvɛɛ maaⁿ tá. Ní nguɛ́ɛ́ neené nꞌdɛɛvɛ́ɛ́ diiⁿ tá tiiⁿ tá o staꞌa tá cosas yeⁿꞌe ꞌdiiⁿnguāāⁿ o catecai chi yaꞌai chííꞌvɛ̄ chi snee tá chi cuuvi dichꞌɛɛtɛ́ maaⁿ tá táⁿꞌā. 4 Naati nꞌdɛɛvɛɛ́ chi yeⁿꞌe tá canee chí cūnee yeⁿꞌe maaⁿ tá ní canéé chi nꞌdɛɛvɛɛ tá ndúúcū espíritu yeⁿꞌē tá chi ndiicúúⁿ. Ní canee ꞌdiiiⁿ tá. Chuū ní dichííꞌvɛ̄ nanááⁿ Ndyuūs. 5 Caati tiempo chi chóꞌōo ꞌtíícā idiiⁿ nꞌdaataa sꞌeeⁿ chi yeⁿꞌé Ndyuūs, nꞌdaataa chi iꞌtéénu ca Ndyuūs ní sꞌteenu tá chi ngaⁿꞌā isaⁿꞌā yeⁿꞌe tá. 6 Ní táⁿꞌā Sara ꞌtiicá ntúūⁿ diiⁿ tá. Sꞌteenu tá isaⁿꞌā yeⁿꞌe tá chi nguuvi Abraham. Ní ngaⁿꞌā tá isaⁿꞌā yeⁿꞌe tá: Nꞌdii ní señor yeⁿꞌé. Maaⁿ ní ndísꞌtiī cuuvi diíⁿ nī tanꞌdúúcā chi ndísꞌtiī daiya Sara ndísꞌtiī nduuti chi nꞌdaacā idiíⁿ nī ní nguɛ́ɛ́ ꞌvaꞌá nī yeⁿꞌē mar ꞌáámá.7 Ní ꞌtiicá ntúūⁿ ndísꞌtiī saⁿꞌā chi vɛ́ɛ́ nꞌdaataá yeⁿꞌé nī. ꞌCuɛɛtinée nī ndúúcū tá ní diíⁿ nī respetar nꞌdaataá yeⁿꞌé nī. Ní diíⁿ nī honrar nꞌdaataá yeⁿꞌe nī tanꞌdúúcā chi deenu nī chi nꞌdaacā ti nꞌdaataa mííⁿ nguɛ́ɛ́ vɛ́ɛ́ fuerzas yeⁿꞌe tá tanꞌdúúcā ꞌáámá saⁿꞌā. Ní ꞌtiicá ntúūⁿ Ndyuūs yeⁿꞌe vaadī nꞌdai yeⁿꞌé yā caꞌa yā vida yeⁿꞌe tá daama daama tanꞌdúúcā chi tee yā ndísꞌtiī saⁿꞌā. Ní ndísꞌtiī saⁿꞌā diíⁿ nī ꞌtúúcā ní nguɛ́ɛ́ duꞌū vɛɛ chi diꞌvaachí ndísꞌtiī yeⁿꞌe chi diíⁿ nī taachi ngaⁿꞌanguaꞌá nī.
Yeⁿꞌe chi nꞌgeenu yú ngii caavā chi nꞌdaacā idiiⁿ yú.
8 Ní yeⁿꞌe nducuéⁿꞌē canéé chi dáámá nūuⁿ nadacadíínuuⁿ nī nducyaaca ndísꞌtiī ní dáámá nūuⁿ nadacadíínuuⁿ nī na staava yeⁿꞌé nī. Dinéⁿꞌe nī ꞌaama nī taama nī tanꞌdúúcā chi cuáácú chi viꞌí nī. Ní yaꞌai ꞌiinú nī ꞌaamá nī taama nī. Ní diiⁿ chi ndiicúúⁿ nī ꞌaamá nī ndúúcū taama nī. 9 Taachi ꞌiiⁿꞌyāⁿ nguɛ́ɛ́ nꞌdaacā idiíⁿ yā ndúúcu nī nguɛ́ɛ́ idiíⁿ nī chi nguɛ́ɛ́ ndaacā ndúúcu yā. Ní taachi ꞌiiⁿꞌyāⁿ nguɛ́ɛ́ nꞌdaacā caaⁿꞌmáⁿ yā yeⁿꞌé nī nguɛ́ɛ́ cunncáā caaⁿꞌmáⁿ nī yeⁿꞌe yā. Ndaacā ca diíⁿ nī ní caaⁿꞌmáⁿ nī ndúúcū ꞌiiⁿꞌyāⁿ sꞌtiī ní diꞌviicú nī ꞌiiⁿꞌyāⁿ sꞌtiī. ꞌTíícā Ndyuūs cuuvi diꞌviicú yā ndísꞌtiī. Ndyuūs yaaꞌví yā ndísꞌtiī chi cuuvi yeⁿꞌé yā ti diíⁿ yā ꞌtíícā nduucú nī. 10 Canéé nguūⁿ na libro yeⁿꞌé Ndyuūs ꞌtíícā:
ꞌIiⁿꞌyāⁿ chi neⁿꞌe chi yeenú yā ndúúcū vida yeⁿꞌé yā ní neⁿꞌé yā chi vɛ́ɛ́ nduuyu yeⁿꞌé yā, ꞌāā ntɛ́ɛ́ canéé chi caaⁿꞌmáⁿ yā denduꞌū chi nguɛ́ɛ́ nꞌdaacā. Ní nguɛ́ɛ́ caaⁿꞌmáⁿ yā nduudu yaadi. 11 Canéé chi divíi yā yeⁿꞌe nducueⁿꞌē chi nguɛ́ɛ́ nꞌdaacā ní dámaāⁿ diíⁿ yā chi nꞌdaacā. Canéé chí neⁿꞌé yā vaadī ꞌdiiíⁿ ní diíⁿ yā nducuéⁿꞌē chi vɛ́ɛ́ vaadī ꞌdiiíⁿ yeⁿꞌe yā. 12 Señor Ndyuūs yeⁿꞌe yú maáⁿ yā ꞌiiⁿꞌyāⁿ chi dinꞌdaacá yā. Ní cueⁿꞌe daāⁿmaⁿ nꞌgiindiveéⁿ yā chi ꞌiiⁿꞌyāⁿ sꞌeeⁿ ngaⁿꞌanguaꞌá yā. Ní Señor yeⁿꞌe yú ní contra yeⁿꞌe ꞌiiⁿꞌyāⁿ chi nguɛ́ɛ́ nꞌdaacā idiíⁿ yā.
13 ¿Duꞌú ꞌiiⁿꞌyāⁿ chiꞌnuucáꞌai yā ndísꞌtiī nduuti chi ndísꞌtiī nducuéⁿꞌē tiempo diíⁿ nī chi nꞌdaācā? Nguɛ́ɛ́ diíⁿ yā ꞌtíícā. 14 Ní nduuti chi ndísꞌtiī nꞌgeenu nī ngii cáávā chi nꞌdaacā idiíⁿ nī tuuꞌmi ní yeenú nī. Nguɛ́ɛ́ diíⁿ ꞌvaꞌa nī yeⁿꞌē mar ꞌáámá ꞌiiⁿꞌyāⁿ ní nguɛ́ɛ́ diꞌyáá nī cuuvi. 15 Canéé chí dichꞌɛɛtɛ́ nī Cristo na staava yeⁿꞌé nī ní ꞌcuaáⁿ nī lugar Cristo chi ꞌiiví nī. Ní canéé listo nī chi cuuvi nanꞌguɛɛcútaⁿꞌá nī ꞌāā duꞌú nūuⁿ ꞌiiⁿꞌyāⁿ chi intiinguuneeⁿ ndísꞌtiī ꞌtíícā: Ndísꞌtiī dɛꞌɛ̄ cáávā chi cūnee ngíínú nī yeⁿꞌe Ndyuūs yeⁿꞌé nī. Ní taachi nanꞌguɛɛcutaⁿꞌá nī yeⁿꞌe yā diíⁿ nī chi ndiicúúⁿ nꞌdai nī. Ní diíⁿ nī respetar ꞌiiⁿꞌyāⁿ. 16 ꞌCuɛɛtinéé nꞌdaaca nī chi nguɛ́ɛ́ vɛ́ɛ́ chi nadacadíínuuⁿ nī yeⁿꞌē chi nguɛ́ɛ́ nꞌdaacā chi diíⁿ nī. Ní ꞌiiⁿꞌyāⁿ chi cunncáā ngaⁿꞌa yā yeⁿꞌe chi nꞌdaacā chi diíⁿ nī caavā chi iꞌtéénu nī Cristo, cuuvi ꞌcuináaⁿ yā cáávā chi ngaⁿꞌá yā. 17 Nꞌdáácā ca chi ꞌcueenu yú cuuvi cáávā cosas chi nꞌdaacā idiiⁿ yú nduuti chi Ndyuūs neⁿꞌé yā ꞌtíícā, nguɛ́ɛ́ ti cáávā cosas chi nguɛ́ɛ́ nꞌdaacā idiiⁿ yú.
18 Cristo miiⁿ maáⁿ yā chꞌeenú yā chiī chi chꞌīi yā cáávā nuuⁿndi yeⁿꞌe yú ní ꞌáámá vmnéⁿꞌēe chꞌiī Cristo cáávā nuuⁿndi yeⁿꞌe nducyaaca ꞌiiⁿꞌyāⁿ, ní nguɛ́ɛ́ nuuⁿndi yeⁿꞌé yā. Ní chꞌīi yā caati cuuvi candɛ́ɛ ya sꞌuuúⁿ nanááⁿ Ndyuūs. Cuáácú chꞌiī cuerpo yeⁿꞌé yā naati espíritu yeⁿꞌé yā nduuchi. 19 Ní espíritu yeⁿꞌe Cristo cuayiivi chi chꞌīi yā cheⁿꞌe yā ní caⁿꞌa yā nduudu cuaacu yeⁿꞌé Ndyuūs nanááⁿ espíritu sꞌeeⁿ yeⁿꞌe ꞌiiⁿꞌyāⁿ sꞌeeⁿ chi nꞌdiī. Ní espíritu sꞌeeⁿ ní preso yā na lugar yeⁿꞌe espíritu sꞌeeⁿ. 20 Espíritu sꞌeeⁿ ní yeⁿꞌe ꞌiiⁿꞌyāⁿ chi nguɛ́ɛ́ chꞌiindiveéⁿ yā Ndyuūs ꞌáámá tiempo chi ꞌāā chóꞌōo. Ní Ndyuūs canee ngíínu yā ní ꞌdiiíⁿ canée yā chi ꞌiiⁿꞌyāⁿ sꞌeeⁿ ndaacadaamí yā yeⁿꞌē nuuⁿndi yeⁿꞌe yā ꞌnaaⁿ tiempo chi saⁿꞌā Noé dinꞌdái sa ꞌáámá arco chí barco chꞌɛɛtɛ. Ní chɛɛti barco miiⁿ nꞌduuví ꞌiiⁿꞌyāⁿ, dámaāⁿ niiní yā, ní nguaⁿꞌai yā yeⁿꞌe nuūⁿnīⁿ. 21 Ní nuūⁿnīⁿ miiⁿ ní tanꞌdúúcā nuūⁿnīⁿ chi ngɛɛdínuūⁿnīⁿ yú chi nanguaⁿꞌāī sꞌuuúⁿ. ꞌTíícā nuuⁿniⁿ miiⁿ. Taachi ngɛɛdínuūⁿnīⁿ yú nguɛ́ɛ́ caavā chi naaⁿnu cuerpo yeⁿꞌe yú naati cáávā chi ꞌáámá compromiso yeⁿꞌe yú nanááⁿ Ndyuūs. Ní nꞌdaacā diiⁿ yú chuū ndúúcū núúⁿmáⁿ staava yeⁿꞌe yú. Ní Ndyuūs nadanguáⁿꞌai yā sꞌuuúⁿ chi iꞌteenu yú Cristo cáávā Cristo nducueeⁿ yā yeⁿꞌē nguaaⁿ tináⁿꞌā. 22 Ní Cristo miiⁿ cunaⁿꞌá yā na vaꞌai chɛɛti nguuvi ní maaⁿ canee yā lado yeⁿꞌe honor yeⁿꞌe Ndyuūs chi lado tá cuaacu. Ní Cristo ngaⁿꞌa ntiiⁿnyúⁿ yā yeⁿꞌé ángeles ndúúcū ꞌiiⁿntyéⁿꞌē ní yeⁿꞌē poderes chi vɛ́ɛ́.