Canee chi dichííꞌvɛ yú Ndyuūs tanꞌdúúcā chi Ndyuūs tee yā fuerzas sꞌuuúⁿ
4
Tanꞌdúúcā Cristo chꞌeenú yā chiī ní diíⁿ yā sentir na cuerpo yeⁿꞌé yā ꞌtiicá ntúūⁿ ndísꞌtiī canéé chi cutaꞌá nī fuerzas yeⁿꞌé nī cáávā tiempo chi caⁿꞌá nī ꞌcueenú nī cuuvi. Maaⁿ ní ꞌiiⁿꞌyāⁿ sꞌeeⁿ chí chꞌeenú yā chiī ní diíⁿ yā sentir na cuerpo yeⁿꞌé yā ꞌāā ntɛ́ɛ́ neⁿꞌé yā dinuuⁿndi yā. 2 Ní ndíí maaⁿ ndísꞌtiī canee chi diíⁿ nī tanducuéⁿꞌē chi neⁿꞌe Ndyuūs chi diíⁿ nī tanducuéⁿꞌē nguuvi yeⁿꞌe nī. Ní nguɛ́ɛ́ diíⁿ nī tanꞌdúúcā chi maaⁿ cuerpo yeⁿꞌé nī neⁿꞌe chi diíⁿ nī. 3 Tiempo chi ꞌāā chóꞌōo ní diiⁿ yú tanꞌdúúcā ꞌiiⁿꞌyāⁿ chi nguɛ́ɛ́ yeⁿꞌe ndaata Israel chi nguɛ́ɛ́ iꞌtéénu yā Ndyuūs. Tiempo miiⁿ ní diiⁿ yú cosas chi nguɛ́ɛ́ nꞌdaacā. Ní diiⁿ yú nuuⁿndi tanꞌdúúcā chi neⁿꞌe cuerpo yeⁿꞌe yú chi diiⁿ yú. Ní ꞌcuūꞌvi yú ní choꞌo nee cheꞌe yú taachi vɛ́ɛ́ fiesta yeⁿꞌē chi cheꞌe yú. Ní cuꞌu ca yú vino. Ní sꞌteenu yú santo sꞌeeⁿ chi ídolo sꞌeeⁿ. 4 ꞌIiⁿꞌyāⁿ sꞌeeⁿ chi nguɛ́ɛ́ iꞌtéénu yā Cristo, ¿Dɛꞌɛ̄ cáávā chi nadacadíínuuⁿ yā chi ndísꞌtiī nguɛ́ɛ́ nduuvidaamá nī ndúúcu yā, ní nguɛ́ɛ́ idiíⁿ nī ndúúcu yā cosas chi nguɛ́ɛ́ nꞌdaacā? Ní chííⁿ chi ꞌiiⁿꞌyāⁿ sꞌeeⁿ ní cunncáā ngaⁿꞌa yā yeⁿꞌé nī. 5 ꞌIiⁿꞌyāⁿ sꞌeeⁿ canéé chi ngaꞌa yā cuenta yeⁿꞌe vida yeⁿꞌe maáⁿ yā nanááⁿ Cristo chi diíⁿ yā juzgar nducyaaca ꞌiiⁿꞌyāⁿ, ꞌiiⁿꞌyāⁿ chi canduuchi ndúúcū ꞌiiⁿꞌyāⁿ chi nꞌdíí. 6 Ní cáávā chuū Cristo ngaⁿꞌá yā nduudu cuaacu yeⁿꞌe maáⁿ yā nanááⁿ espíritus yeⁿꞌe ꞌiiⁿꞌyāⁿ chi nꞌdíí caati espíritus yeⁿꞌé yā cuuvi canduuchi tanꞌdúúcā chi Ndyuūs canduuchí yā. Ní Ndyuūs nꞌdiichí yā nuuⁿndi yeⁿꞌé ꞌiiⁿꞌyāⁿ sꞌeeⁿ taachi chꞌɛɛtineé yā iⁿꞌyeeⁿdí ꞌcūū tanꞌdúúcā chi nꞌdiichí yā nuuⁿndi yeⁿꞌe nducyáácá ꞌiiⁿꞌyāⁿ chi snee yā iⁿꞌyeeⁿdi ꞌcūū.7 ꞌĀā cháā snee niiⁿnuúⁿ nguuví chi ꞌcuiinu tanducuéⁿꞌē denduꞌū. Ní cáávā chuū ꞌcuɛɛtinee nꞌdaaca nī ní ꞌāā dɛꞌɛ́ ora nūuⁿ ní cuuvi caaⁿꞌmaⁿnguaꞌá nī. 8 Ní yeⁿꞌē tanducuéⁿꞌē dineⁿꞌe cá nī ꞌaama nī taama nī caati taachi dineⁿꞌe cá nī tuuꞌmi ní inadīchꞌɛɛcú nī nuuⁿndi yeⁿꞌē ꞌáámá nī taama nī. 9 ꞌCuaáⁿ nī ꞌáámá nī taama nī na vaacu nī ní nguɛ́ɛ́ ꞌcuɛɛcu cheendí nī. 10 Ní caꞌáámá caꞌaama nī ní diíⁿ nī servir taamá nī ndúúcū ntiiⁿnyuⁿ chi Ndyuūs itée yā chi diíⁿ nī. Ní canéé chi diiⁿ nꞌdaaca nī ntiiⁿnyuⁿ yeⁿꞌé nī chi Ndyuūs itée yā caꞌaama caꞌaamá nī ti Ndyuūs itée yā ndísꞌtiī nducuéⁿꞌē chi nꞌdai taavi yeⁿꞌe yā. 11 Nduuti chi ꞌáámá nī candɛɛ nī nduudu cuaacu canéé chí ngaⁿꞌá yā nduudu cuaacu yeⁿꞌé Ndyuūs. Nduuti chi ꞌaamá nī diíⁿ nī ntiiⁿnyuⁿ yeⁿꞌe yaācū canéé chi diíⁿ yā ndúúcū nducuéⁿꞌē fuerzas yeⁿꞌé yā chi Ndyuūs caꞌa yā ꞌiiⁿꞌyāⁿ miiⁿ. Ní yeⁿꞌe tanducuéⁿꞌē chi ndísꞌtiī diíⁿ nī canéé chi diíⁿ nī chi cuuvi dichꞌɛɛtɛ́ nī Ndyuūs cucáávā Jesucristo. Ní yeⁿꞌé Ndyuūs chí ngíí dɛɛvɛ yeⁿꞌe yā ní vɛɛ poder yeⁿꞌé yā tanducuéⁿꞌē tiempo. ꞌTííca yā.
Canéé chi nꞌgeenu yú ngii ti yeⁿꞌe Cristo sꞌuuúⁿ
12 Ndísꞌtiī hermanos chi neⁿꞌé taavi nguɛ́ɛ́ nadicadíínuuⁿ nī chi cosa chi díítūu nguɛ́ɛ́ canéé chí chóꞌōo yeⁿꞌé nī taachi ꞌiiⁿꞌyāⁿ nꞌdiichineeⁿ cá yā ndísꞌtiī chi yaꞌai nꞌgeenú nī ngii ti canéé chí chóꞌōo yeⁿꞌé nī ꞌtíícā. 13 Naati canéé chí cuuvi yeenú nī taachí nꞌgeenú nī ngii tanꞌdúúcā Cristo chꞌeenú yā chii. Ní cuayiivi cuuvi yeenu cá nī taachi Cristo ndaa yā taama vmnéⁿꞌēe ní ꞌcuuⁿꞌmíⁿ yā chi chꞌɛɛtɛ nꞌdai ngiichí yā tanꞌdúúcā dɛɛvɛ ngiichí chꞌɛɛtɛ. 14 Nduuti chi ꞌiiⁿꞌyāⁿ nꞌgaaꞌvá yā ndúúcu nī cucáávā chi iꞌtéénu nī Cristo tuuꞌmi ní yeenú nī. Espíritu Nꞌdai yeⁿꞌé Ndyuūs chí dɛɛvɛ́ ngii canéé ndúúcū ndísꞌtiī. ꞌÁárá chí ꞌiiⁿꞌyāⁿ sꞌeeⁿ cunncáā ngaⁿꞌa yā yeⁿꞌe Cristo, ndísꞌtiī ní diíⁿ nī honrar Cristo. 15 Ní nduuti chi ꞌáámá chɛ́ɛ́ ndísꞌtiī nꞌgeenu nī ngii ꞌúú nguɛ́ɛ́ neⁿꞌé chi ꞌcueenú nī cuuvi caati chꞌiiⁿꞌnúⁿ nī ꞌiiⁿꞌyāⁿ o ididuucú nī o nguɛ́ɛ́ diíⁿ nī tanꞌdúúcā chi ngaⁿꞌā ley yeⁿꞌé Ndyuūs chi chꞌɛɛtɛ ca. 16 Ní nduuti chi ꞌáámá chɛɛ ndísꞌtiī nꞌgeenu nī ngii cáávā chi iꞌtéénu nī Cristo nguɛ́ɛ́ cuuvi ꞌcuinaáⁿ nī naati canee chi dichꞌɛɛtɛ́ nī Ndyuūs caati ꞌiiⁿꞌyāⁿ ngaⁿꞌa yā chi díí ní yeⁿꞌe Cristo dii.
17 ꞌĀā ndaa tiempo chi Cristo caⁿꞌá yā nꞌdiichi yā nuuⁿndi yeⁿꞌe ꞌiiⁿꞌyāⁿ ní vmnááⁿ vmnaaⁿ caⁿꞌá yā nꞌdiichí yā nuuⁿndi yeⁿꞌe ꞌiiⁿꞌyāⁿ chi iꞌtéénu yā ꞌiiⁿꞌyāⁿ. Ní nduuti chi vmnááⁿ vmnaaⁿ nꞌdiichí yā nuuⁿndi yeⁿꞌe yú, ¿táácā cuuvi yeⁿꞌé ꞌiiⁿꞌyāⁿ chi nguɛ́ɛ́ iꞌtéénu yā nduudu cuaacu yeⁿꞌé Ndyuūs cuayiivi taachi nꞌdiichí Cristo nuuⁿndi yeⁿꞌe yā? 18 Ní nduuti chi ngíꞌīi chi ꞌiiⁿꞌyāⁿ chí nꞌdai cuuvi nanguaⁿꞌai yā, ¿dɛ́ꞌɛ̄ cuuví ndúúcū ꞌiiⁿꞌyāⁿ chi nguɛ́ɛ́ nꞌdaacā diíⁿ yā ní ndúúcū ꞌiiⁿꞌyāⁿ chi dinuuⁿndí yā ní nguɛ́ɛ́ iꞌtéénu yā? 19 Ní ꞌtíícā canee chi diiⁿ yú. Taachi nꞌgeenu yú ngii caavā chi Ndyuūs neⁿꞌé yā chi diiⁿ yú ꞌtíícā, canéé chí diiⁿ yú nducuéⁿꞌē chi nꞌdaacā. Ní canéé chí ngaꞌa yú vida yeⁿꞌe yú na taꞌa Ndyuūs caati Ndyuūs dinꞌdái yā sꞌuuúⁿ ní ꞌindɛɛ yā cuidado sꞌuuúⁿ. Ndyuūs ní diíⁿ yā chiiⁿ chi ngaⁿꞌa yā chi caⁿꞌa yā diiⁿ yā.