Yeⁿꞌé ꞌiiⁿꞌyāⁿ chi iꞌtéénu yā Ndyuūs
5
ꞌÚú Pedro caꞌá consejo ꞌiiⁿntyeⁿꞌē yeⁿꞌe yaācū chi snéé nguaaⁿ ndísꞌtiī. ꞌÚú ꞌtiicá ntúūⁿ ꞌiiⁿntyeⁿꞌē ꞌúú. ꞌÚú ngaⁿꞌá yeⁿꞌe Cristo tanꞌdúúcā chi chꞌeenú yā chiī ti nꞌdiichí nduucū nduutinaáⁿ maáⁿ. Ní ꞌtiicá ntúūⁿ vɛ́ɛ́ parte yeⁿꞌé vaadī dɛɛvɛ ngii chi Ndyuūs ꞌcuuⁿꞌmíⁿ yā sꞌuuúⁿ cuayiivi. 2 Ndísꞌtiī ꞌiīⁿntyeⁿꞌē yeⁿꞌe yaācū, idiíⁿ nī ntiiⁿnyuⁿ yeⁿꞌé nī tanꞌdúúcā ꞌáámá pastor chi indɛɛ yā cuidado yeⁿꞌe ꞌiiti cuūchī. ꞌTíícā diíⁿ nī ndúúcū ꞌiiⁿꞌyāⁿ chi yeⁿꞌé Ndyuūs chi caⁿꞌá yā yaācū naachi ndísꞌtiī ní ꞌiiⁿntyéⁿꞌē. Nguɛ́ɛ́ diíⁿ nī ntiiⁿnyuⁿ yeⁿꞌe nī chi canéé chi diíⁿ nī naati diíⁿ nī ti maáⁿ nī neⁿꞌe nī diiⁿ nī caati ꞌtíícā neⁿꞌe Ndyuūs. Nguɛ́ɛ́ diíⁿ nī caavā chi cutaꞌá nī tuūmī naati diíⁿ nī ndúúcū nuuⁿmaⁿ staava yeⁿꞌé nī chi nꞌdai. 3 Nguɛ́ɛ́ diíⁿ nī ndúúcū ꞌiiⁿꞌyāⁿ chi maaⁿ cuidado yeⁿꞌé nī tanꞌdúúcā chi ndísꞌtiī ní ꞌiiví yeⁿꞌé yā naati ꞌcuɛɛtinéé nꞌdaacá nī níícú ꞌiiⁿꞌyāⁿ cuuvi nꞌdiichí yā ndísꞌtiī ní diíⁿ yā tanꞌdúúcā chi ndísꞌtiī diíⁿ nī. 4 Ní ꞌíícú taachi ndaa Jesucristo chi ꞌiiⁿꞌyāⁿ chí ndíí tiīiⁿ chí ícandɛɛ yā cuidado yeⁿꞌe ꞌiiⁿꞌyāⁿ yeⁿꞌé yā tanꞌdúúcā ꞌáámá pastor chi ndii tiīiⁿ chí ícandɛɛ yā cuidado ꞌiiti yeⁿꞌé yā, tuuꞌmi ní ndísꞌtiī cuuvi cutaꞌá nī ꞌáámá corona chi nguɛ́ɛ́ ꞌcuīinu dɛɛvɛ́ yeⁿꞌē. Nguɛ́ɛ́ corona yeⁿꞌe yaātā chi ītuuvií.5 ꞌTiicá ntúūⁿ ndísꞌtiī saⁿꞌā daꞌcaīyáā canéé chí diíⁿ nī tanꞌdúúcā chi ngaⁿꞌa ꞌiīⁿntyeⁿꞌē yeⁿꞌe yaācū. Nducyaaca nī canéé chí ndiicuuⁿ nī ní cunnee nī ꞌaama nī taama nī caati canéé nguūⁿ na libro yeⁿꞌé Ndyuūs ꞌtíícā:
Ndyuūs nguɛ́ɛ́ neⁿꞌe yā ꞌiiⁿꞌyāⁿ chi nacadíínuuⁿ yā chi maáⁿ yā chꞌɛɛtɛ yā naati caꞌá yā nducuéⁿꞌē chi nꞌdai yeⁿꞌe yā ꞌiiⁿꞌyāⁿ chi ndiicúúⁿ.
6 Maaⁿ ní nducyaaca ndísꞌtiī ndiicúúⁿ nꞌdai ꞌcuɛɛtinée nī maaⁿ poder yeⁿꞌé Ndyuūs ti Ndyuūs cuuvi dichꞌɛɛtɛ́ yā ndísꞌtiī tiempo chi neⁿꞌé yā. 7 Caꞌá nī nducueⁿꞌē cuidado chi díítūu yeⁿꞌe nī na taꞌa Cristo caati Cristo candɛɛ́ yā cuidado yeⁿꞌe ndísꞌtiī.
8 Canéé listo nī ní nguɛ́ɛ́ ꞌcuɛɛtiyaadú nī. Cundɛ́ɛ nī cuidado chi nꞌdaacā ꞌcuɛɛtinée nī ti yááⁿnꞌguiinūuⁿ miiⁿ chí contra yeⁿꞌe nī chíícá sá ní nꞌdiichi sa ndii ꞌmuuⁿ ní ndii miiⁿ. Ní tanꞌdúúcā ꞌáámá ꞌyáíⁿyāaⁿ cuáꞌaá nꞌgai tī ní cachiicá tī ní iꞌnuúⁿ tī duꞌu chi cuuvi cheꞌé tī ꞌtííca diiⁿ yááⁿnꞌguiinūuⁿ miiⁿ. 9 Nguɛ́ɛ́ caꞌa nī lugar yááⁿnꞌguiinuúⁿ ꞌcūū naati ꞌáámá cūnee nī ndúúcū chi iꞌtéénu nī. Ní déénu nī chi ꞌāā daamá nūuⁿ nꞌgeenu yú ngii tanꞌdúúcā nducyaaca hermanos chi sꞌnéeⁿ yā na núúⁿmáⁿ íⁿꞌyeeⁿdī ti iꞌtéénu yā Cristo. 10 Ní cuayiivi chi chꞌeenú nī chiī duuꞌvi tiempo nūuⁿ tuuꞌmi ní Ndyuūs diíⁿ yā chi ndɛɛvɛ canéé vida yeⁿꞌe nī. Ní diituú caneé nī ndúúcū chi iꞌtéénu nī Ndyuūs. Ní Ndyuūs caꞌá yā fuerzas yeⁿꞌe nī ní diíⁿ yā chi seguro caneé nī ndúúcū chi iꞌtéénu nī. Maaⁿ Ndyuūs miiⁿ ní teé yā nducuéⁿꞌē chi nꞌdai. Ní maáⁿ yā yaaꞌví yā sꞌuuúⁿ chi cuuvi yeⁿꞌé yā sꞌuuúⁿ cáávā chi vɛ́ɛ́ parte yeⁿꞌe yú ndúúcū dɛɛvɛ ngii chꞌɛɛtɛ yeⁿꞌé yā caati sꞌuuúⁿ ní yeⁿꞌe Cristo sꞌuuúⁿ. 11 Caaⁿꞌmaⁿ yú chi Ndyuūs ní chꞌɛɛtɛ nꞌdai yā ní yeⁿꞌé yā vɛ́ɛ́ nducuéⁿꞌē poder chi vɛ́ɛ́ ní cueⁿꞌe daāⁿmaⁿ cueⁿꞌe daāⁿmaⁿ ꞌtíícā.
ꞌCuiinu carta miiⁿ ní yaaꞌvi yā ꞌiiⁿꞌyāⁿ chi nꞌdaí ndísꞌtiī
12 ꞌTɛ́ɛ́ nūuⁿ idinguúⁿ carta ꞌcūū yeⁿꞌē ndísꞌtiī ní hermano Silvano nginnee sa ꞌúú. Nadicádiinúúⁿ chi Silvano miiⁿ ní hermano chi nꞌdai taavi. ꞌÚú teé consejo ndísꞌtiī chi seguro canee ndísꞌtiī chi nducuéⁿꞌē chi Ndyuūs itée yā ndísꞌtiī yeⁿꞌe vaadī nꞌdai yeⁿꞌé yā ní yeⁿꞌé nī ti neⁿꞌé yā ndísꞌtiī. Maaⁿ ní ꞌcuɛɛtinéé nꞌdaaca nī ní diituu canee nī ní cuchɛ́ɛ nī yeⁿꞌe tanducuéⁿꞌē chuū.
13 ꞌIiⁿꞌyāⁿ yeⁿꞌe yaācū chi canéé na yáāⁿ Babilonia chi Ndyuūs didɛɛvɛ́ yā tanꞌdúúcā sꞌuuúⁿ: Nꞌdaí ndísꞌtiī, ngaⁿꞌa yā. ꞌTiicá ntúūⁿ Marcos chi tanꞌdúúcā daiyá: Nꞌdaí ndísꞌtiī, ngaⁿꞌa sa. 14 Ndísꞌtiī hermanos: Nꞌdaí nī, ngaⁿꞌa nī ꞌaama nī taama nī ti neⁿꞌé nī ꞌaama nī taama nī ti yeⁿꞌé Cristo ndísꞌtiī. Ní Ndyuūs tée yā vaadī ꞌdiiíⁿ yeⁿꞌé yā nducyaacá ndísꞌtiī chi yeⁿꞌe Cristo. ꞌTíícā cuuvi.