CARTA VMNÁÁⁿ VMNAAⁿ YEⁿꞌE SAN JUAN
Nduudu cuaacu yeⁿꞌe vida cueⁿꞌe daāⁿmaⁿ
1
Chiiⁿ chí ndii vmnaaⁿ, chiiⁿ chí chꞌiindiveéⁿ ꞌnū, chiiⁿ chí nꞌdiichí ꞌnū ndúúcū nduutináaⁿ ꞌnū, chiiⁿ chí nꞌgíínú ꞌnū, níícū chiiⁿ chí tuuꞌvi ꞌnū ndúúcū taꞌá ꞌnū chiiⁿ ní Nduudu yeⁿꞌē vida cueⁿꞌe daāⁿmaⁿ. 2 Chꞌiⁿꞌi yā ní naáⁿ ꞌnū chiiⁿ chi vida cueⁿꞌe daāⁿmaⁿ. Níícú nꞌdiichí ꞌnū ní caaⁿꞌmaⁿ cuaacu ꞌnū, ní yaaꞌví ꞌnū yeⁿꞌē vida cueⁿꞌe daāⁿmaⁿ chi canéé ndúúcū chiidá yā. Ní chiidá yā chꞌiⁿꞌi yā núsꞌuu vida cueⁿꞌe daāⁿmaⁿ miiⁿ. 3 Chiiⁿ chí nꞌdiichí ꞌnū ní chꞌiindiveéⁿ ꞌnū, chííⁿ chí ngaⁿꞌá ꞌnū yeⁿꞌe vida caati ndisꞌtíī ni canee cúúⁿmiⁿ nī chí nduuvidaama nī ndúúcū núsꞌuu. Níícú cuaacu nííⁿnyúⁿ nduuvidaama yú ndúúcū chiida yú ní ndúúcū daiya yā Jesucristo. 4 Cosa chuu ní dingúuⁿ ꞌnū yeⁿꞌé ndisꞌtiī caati vaadī yeenú yeⁿꞌé nī cuuvi cuaacu cá.Dendyuūs ní dɛɛvɛ ngii
5 Chuū ní nduudu chí chꞌiindiveéⁿ ꞌnū yeⁿꞌé yā. Chííⁿ chí ngaⁿꞌa ꞌnū chi Dendyuūs ní chidɛɛvɛ. Níícú mar ꞌáámá maāiⁿ nguɛ́ɛ́ ndúúcu yā. 6 Ndúúti chi sꞌuuúⁿ ngaⁿꞌā yú chí ndiidaama yú ndúúcu yā níícú na maaíⁿ cachiica yú tuuꞌmí nduudu yaadi ngaⁿꞌā yú, níícú nguɛ́ɛ́ idiiⁿ yú chi ngaⁿꞌa nduudu cuaacu. 7 Nduuti chí cachiica yú na chidɛɛvɛ tanꞌdúúcā chí Jesucristo canée yā na chidɛɛvɛ tuuꞌmi ní nduuvidaama yú ꞌaama yú ndúúcū taama yú. Yuuúⁿ yeⁿꞌe Jesucristo daiya Dendyuūs inaaⁿnu yā sꞌuuúⁿ yeⁿꞌē tanducuéⁿꞌē nuuⁿndi yeⁿꞌe yú. 8 Nduuti chi ngaⁿꞌā yú chi nguɛ́ɛ́ nuuⁿndi yú maāⁿ yú nginncheꞌei yú sꞌuuúⁿ ní nguɛ́ɛ́ canee nduudu cuaacu ndúúcu yú. 9 Nduuti chi natúmiiⁿnu yú nuuⁿndi yeⁿꞌē yú tuuꞌmí Jesucristo miiⁿ ní nꞌdaí yā ní diíⁿ yā dácaā chi caaⁿꞌmáⁿ yā ní nguɛ́ɛ́ n̄ꞌdaáⁿ yā caati nadachꞌɛɛcú yā nuuⁿndi yeⁿꞌē yú. Níícú naaⁿnú yā sꞌuuúⁿ yeⁿꞌé tanducuéⁿꞌē nuuⁿndi yeⁿꞌe yú. 10 Nduuti chi ngaⁿꞌā yú chi nguɛ́ɛ́ nuuⁿndi yú tuuꞌmi ní idiiⁿ yú chi Jesucristo ngaⁿꞌa yā nduudu yaadi, níícú nduudu yeⁿꞌé yā nguɛ́ɛ́ canéé ndúúcu yú.