CARTA CUAYIIVI YEⁿꞌE SAN JUAN
Yeⁿꞌe nduudu cuaacu ní yeⁿꞌē vaadī neⁿꞌe
1
ꞌÚú Juan chi saⁿꞌā chi ngaⁿꞌa ntiiⁿnyuⁿ yeⁿꞌe yaācū idinguúⁿ yeⁿꞌē nꞌdaataá chí Ndyuūs ndɛɛvɛ yā ndúúcū daiya yā chi cuaacu nííⁿnyúⁿ neⁿꞌé. Ní nguɛ́ɛ́ ꞌúú dámaáⁿ neⁿꞌé ti ꞌtiicá ntúūⁿ nducyáácá yā chi nꞌdiichí yā nduudu cuaacu. 2 Ní cáávā chi vɛ́ɛ́ vaadī cuaacu yeⁿꞌe yú ní caavā nduudu cuaacu chi canéé ndúúcu yú, ꞌáámá cūnee tandíí ndúúcu yú. 3 Neⁿꞌé chi canéé ndúúcū ndísꞌtiī vaadī nꞌdai yeⁿꞌé Ndyuūs ndúúcū vaadī yaꞌai ꞌiinu yeⁿꞌe yā ndúúcū ꞌdiiíⁿ yeⁿꞌe Dendyuūs chiida yú ndúúcū Señor Jesucristo chí daiya Dendyuūs chi chiida yú. Tanducuéⁿꞌē chuū canéé ndúúcu nī ndúúcū nduudu cuaacu ndúúcū vaadī neⁿꞌē.4 ꞌĀā ꞌáámá yeenú caati chí nindaācá daiya di chí diíⁿ yā chiiⁿ chi cuaacu tanꞌdúúcā sꞌuuúⁿ chi staꞌa yú ley yeⁿꞌē chiida yú. 5 Maaⁿ ní idiꞌcuíitú nꞌdiī nꞌdaatāa chí dinéⁿꞌe yú ꞌáámá yú táámá yú. Chuū nguɛ́ɛ́ tanꞌdúúcā chi idinguúⁿ ꞌáámá ley ngaī caati ley yeⁿꞌē yú chííⁿ chí canee ndíí cuaaⁿ vmnaaⁿ. 6 Níícú chuū chí vaadī neⁿꞌe ní chiiⁿ chi cachiica yú tanꞌdúúcā chi caaⁿꞌmaⁿ ley yeⁿꞌe yā. Ley yeⁿꞌe yā ní chuū chí cachiicá nī ndúúcū vaadī neⁿꞌe tanꞌdúúcā chi nꞌgiindiveéⁿ nī ndíí cuaaⁿ vmnaaⁿ.
ꞌIiⁿꞌyāⁿ chi nginncheꞌéí yā ꞌiiⁿꞌyāⁿ
7 Nꞌdeee nꞌdáí ꞌiiⁿꞌyāⁿ ꞌāā nginncheꞌéí yā ꞌiiⁿꞌyāⁿ na iⁿꞌyeeⁿdí ꞌcūū. Nguɛ́ɛ́ natumiiⁿnúⁿ yā chi Jesucristo ní ndaá yā tanꞌdúúcā sꞌuuúⁿ. ꞌIiⁿꞌyāⁿ chi ꞌtíícā nginncheꞌéí yā, ꞌtiicá ntúūⁿ anticristo yā. 8 Cundɛ́ɛ nī cuidado yeⁿꞌē maáⁿ nī ní nguɛ́ɛ́ dindai yú tanducuéⁿꞌē ntiiⁿnyuⁿ chi diiⁿ yú ti sꞌuuúⁿ ní cuuvi cutaꞌa yú tanducuéⁿꞌē chi yeⁿꞌe yú.
9 Duꞌū chí diíⁿ nuuⁿndi ní nguɛ́ɛ́ ꞌáámá canéé yā ndúúcū nduudu cuaacu yeⁿꞌe Cristo, nguɛ́ɛ́ yeⁿꞌe Dendyuūs ꞌiiⁿꞌyāⁿ. Duꞌū chí ꞌaama canéé ndúúcū nduudu cuaacu yeⁿꞌē Cristo, tuuꞌmí ꞌiiⁿꞌyāⁿ miiⁿ ní yeⁿꞌe chiida yú Dendyuūs ndúúcū daiyá yā. 10 Duꞌū chí ndaa vaacú nī chi nguɛ́ɛ́ ngaⁿꞌa nduudu cuaacú ꞌcūū nguɛ́ɛ́ ꞌcuaáⁿ nī chi cunée yā na vaacú nī. Ní nguɛ́ɛ́ caaⁿꞌmaⁿ nī, nꞌdaacā chi ndaá yā vaꞌāī yeⁿꞌe nī. 11 Duꞌú ꞌiiⁿꞌyāⁿ chi ngaⁿꞌá yā ꞌiiⁿꞌyāⁿ miiⁿ chi nꞌdaacā chi ndaá yā vaꞌāī yeⁿꞌé yā tuuꞌmi ní induuvidáámá yā ndúúcū ꞌiiⁿꞌyāⁿ chí idiiⁿ chi nguɛ́ɛ́ nꞌdaacā.
Chꞌiīnu carta maaⁿ
12 ꞌÁámá vɛ́ɛ́ cá yeⁿꞌé chi neⁿꞌé dinguúⁿ yeⁿꞌe ndísꞌtiī ní nguɛ́ɛ́ neⁿꞌé dinguúⁿ na caaca ꞌcūū ndúúcū tinta, caati neⁿꞌé chi nꞌdiichí ndísꞌtiī ní caaⁿꞌmáⁿ ndúúcu nī ní ndísꞌtiī nduucú. Níícú vaadī yeenú yeⁿꞌe yú ní cúúví cuaacu.
13 Vɛ́ɛ́ daiya tá yeⁿꞌē nꞌdaataá chi Ndyuūs indɛɛvɛ́ yā táⁿꞌā. Daiya tá idichoꞌó yā: Nꞌdai nꞌdiī, ngaⁿꞌa yā. ꞌTíícā cuuvi.