2 Díí saⁿꞌā Gayo chi neⁿꞌé, ꞌúú neⁿꞌé chi cáávā maaⁿ di tanducuéⁿꞌē chi vɛ́ɛ́ yeⁿꞌē di ní nꞌdai taavi. Níícú vɛ́ɛ́ vaadī ꞌviichɛɛ́ yeⁿꞌē di tanꞌdúúcā chi alma yeⁿꞌe di vɛ́ɛ́ vaadī ꞌviichɛɛ́ yeⁿꞌē. 3 Nduudu cuaacu chi neene yeenú taachi ndaā viꞌī yú chi caⁿꞌa yā nduudu cuaacu yeⁿꞌē di chi nꞌdaācā diiⁿ di, tanꞌdúúcā chi ꞌáámá idiiⁿ di chiiⁿ chi cuaacu. 4 Nguɛ́ɛ́ chꞌɛɛtɛ ca vaadī yeenu yeⁿꞌé chi chꞌiindiveéⁿ chí daiyá diíⁿ yā chiiⁿ chi cuaacu.

5 Dii chi neⁿꞌé, tanducuéⁿꞌē chi diiⁿ di, nꞌdaacā nꞌdai diiⁿ di ndúúcū viꞌi yú ndúúcū ꞌiiⁿꞌyāⁿ chi ngiica ná yúúní. 6 ꞌIiⁿꞌyāⁿ miiⁿ ngaⁿꞌá yā nduudu cuaacú yeⁿꞌe vaadī neⁿꞌe yeⁿꞌe di nanááⁿ ꞌiiⁿꞌyāⁿ chi snúūⁿ yaācū. Nduuti chi cunnéé dí ꞌiiⁿꞌyāⁿ tanꞌdúúcā chi canéé chi diiⁿ di ní tanꞌdúúcā chi neⁿꞌe Dendyuūs chi diiⁿ di, tuuꞌmi ní nꞌdaacā idiiⁿ di. 7 Caati ꞌiiⁿꞌyāⁿ cueⁿꞌé yā ꞌmuuⁿ cueⁿꞌé yā miiⁿ cucáávā chi neⁿꞌé yā caaⁿꞌmáⁿ yā yeⁿꞌe Cristo. Nguɛ́ɛ́ dɛꞌɛ̄ vɛɛ staꞌá yā yeⁿꞌē ꞌiiⁿꞌyāⁿ chi nguɛ́ɛ́ yeⁿꞌe ndaata yeⁿꞌé yā. 8 Sꞌuuúⁿ ní canee chi ꞌcuaaⁿ yú ꞌiiⁿꞌyāⁿ sꞌtíī. Níícú cuuvi cunée yā ndúúcu yú ꞌiiⁿꞌyāⁿ chí idiíⁿ yā ntiiⁿnyuⁿ yeⁿꞌe vaadī cuaacu.

9 ꞌÚú nidinguúⁿ yeⁿꞌē ꞌiiⁿꞌyāⁿ yeⁿꞌe yaācū caati Diótrefes nguɛ́ɛ́ ꞌcuaaⁿ sa núsꞌuu ti néⁿꞌé sa caaⁿꞌmaⁿ ntiiⁿnyuⁿ sá yeⁿꞌé yā. 10 Cáávā chuū taachi ꞌúú chi ndaá tuuꞌmi ní ninꞌgaacú tanducuéⁿꞌē chi diiⁿ sáⁿꞌā miiⁿ. Taatiī caⁿꞌā sa yeⁿꞌe sꞌuuúⁿ ndúúcū nduudu taaⁿ chi nguɛ́ɛ́ nꞌdaacā taatiī ꞌcaāꞌvā sa contra yeⁿꞌe sꞌuuúⁿ. Ní nguɛ́ɛ́ yeenú sá ndúúcū denduꞌū. Nguɛ́ɛ́ nꞌguuⁿ sa viꞌī yú. Ní nguɛ́ɛ́ neⁿꞌe sa chi tanáⁿꞌa yā chi ꞌcuaaⁿ yā viꞌí yā. Níícú tunꞌdáa sa ꞌyā chɛɛti yaācū.

11 Díí chi neⁿꞌé, nguɛ́ɛ́ diiⁿ di chiiⁿ chi nꞌdiichi di chi nguɛ́ɛ́ nꞌdaacā. Diiⁿ di chi nꞌdaacā. Duꞌū chi dinꞌdaacā ní yeⁿꞌē Dendyuūs. Duꞌū chi nguɛ́ɛ́ nꞌdaacā nidiiⁿ ní nguɛ́ɛ́ nꞌdííchí Dendyuūs.

12 Nducyáácá yā ngaⁿꞌá yā nduudu cuaacu yeⁿꞌe saⁿꞌā Demetrio. ꞌĀā ꞌtiicá nūuⁿ nduudu cuaacu nꞌgiⁿꞌi vida yeⁿꞌé yā. ꞌTiicá ntúūⁿ sꞌuuúⁿ ngaⁿꞌa yú ndúúdú cuaacu yeⁿꞌe yā. Ní ndísꞌtiī deenú ni chí ngaⁿꞌā yú nduudu cuaacu yeⁿꞌé yā.

13 Nééné vɛ́ɛ́ yeⁿꞌé chi neⁿꞌé dinguúⁿ yeⁿꞌe ndísꞌtiī naati nguɛ́ɛ́ neⁿꞌé dinguúⁿ ndúúcū tinta ndúúcū pluma.

14 Caati neⁿꞌé nꞌdiichí ndísꞌtiī núúⁿ niīⁿyūⁿ ní caaⁿmáⁿ ndúúcu di ní ndísꞌtiī nduucú.

15 ꞌDiiíⁿ canéé ndúúcū di. Amigos yeⁿꞌe sꞌuuúⁿ dichóꞌo yā: Nꞌdaí nꞌdīī, ngaⁿꞌa yā. Dii dichóꞌo di: Nꞌdaí ndísꞌtiī, yeⁿꞌē amigos yeⁿꞌe sꞌuuúⁿ taachi yaaꞌvi di ꞌiiⁿꞌyāⁿ caꞌáámá caꞌáámá yā caavā chi duuchí Cristo. ꞌTíícā cuuvi.