Sꞌuuúⁿ cuuvi cuchɛɛ yú yeⁿꞌe iⁿꞌyeēⁿdī
5
Nducyáácá yā chi iꞌtéénu yā chi Jesús chi Cristo miiⁿ tuuꞌmi ní chꞌiindiyáaⁿ yā táámá yeⁿꞌé Dendyuūs. Nducyáácá yā chi dinéⁿꞌe yā chiida yú, idinéⁿꞌe ntúuⁿ yā ꞌiiⁿꞌyāⁿ chi daiyá yā. 2 Ndúúcū chuū ní deenu yú chí idinéⁿꞌe yú ꞌiiⁿꞌyāⁿ sꞌeeⁿ chi daiya Dendyuūs miiⁿ taachi idinéⁿꞌe yú Dendyuūs ní diiⁿ yú chi ngaⁿꞌa ley yeⁿꞌe yā. 3 Caati chuū chi vaadī neⁿꞌe yeⁿꞌe Dendyuūs chi sꞌuuúⁿ ní diiⁿ yú chi ngaⁿꞌa ley yeⁿꞌe yā. Ní ley yeⁿꞌe yā nguɛ́ɛ́ cosa chi ꞌcuinaaⁿ yú yeⁿꞌē. 4 Nducyáácá yā chi chꞌiindiyáāⁿ táámá ní yeⁿꞌé Dendyuūs ní cuuvi cuchɛ́ɛ yā yeⁿꞌe iⁿꞌyeēⁿdī. Ní chuū chi diiiⁿ chi cuchɛɛ̄ yú yeⁿꞌe iⁿꞌyeēⁿdī, ní chuū chi iꞌteenu yú Dendyuūs. 5 ¿Duꞌū chi cuuvi cuchɛɛ yeⁿꞌe iⁿꞌyeēⁿdi? ꞌIiⁿꞌyāⁿ chi iꞌtéénu yā chi Jesús ní daiyá Dendyuūs ꞌyā ní cuchɛɛ yā.Nduudu cuaacu yeⁿꞌe Daiyá Ndyuūs
6 Ní chuū ní Jesucristo chi ndaā ndúúcū nuūⁿnīⁿ ndúúcū yuuúⁿ. Nguɛ́ɛ́ dámaāⁿ ndúúcū nuūⁿnīⁿ caati ndúúcū nuūⁿnīⁿ ndúúcū yuuúⁿ. Ní Espíritu Nꞌdai yeⁿꞌé Ndyuūs ngaⁿꞌā nduudu cuaacu yeⁿꞌe yā caati Espíritu miiⁿ ní vaadī cuaacu. 7 Caati ꞌiinu yā ngaⁿꞌa yā nduudu cuaacu na vaꞌai chɛɛti nguuvi, Dendyuūs chiida yú ndúúcū Nduudu ndúúcū Espíritu Nꞌdai yeⁿꞌé Ndyuūs. Níícú naachi ndii ꞌiinú yā vɛɛ ꞌáámá núúⁿ yā. 8 Vɛ́ɛ́ ꞌiinu yā chi ngaⁿꞌa yā nduudu cuaacu ná íⁿꞌyeēⁿdi ꞌcūū ní Espíritu Nꞌdai yeⁿꞌé Ndyuūs ndúúcū nuūⁿnīⁿ ndúúcū yuuúⁿ. Ní naachi ndúú ꞌiinu yā ní vɛ́ɛ́ ꞌáámá núúⁿ yā. 9 Ndúúti chí cuꞌteenu yú nduudu cuaacu yeⁿꞌé ꞌiiⁿꞌyāⁿ yeⁿꞌe iⁿꞌyeeⁿdí ꞌcūū chꞌɛɛtɛ ca nduudu cuaacu yeⁿꞌé Dendyuūs nguɛ́ɛ́ ti ꞌiiⁿꞌyāⁿ miiⁿ. Caati chúū chííⁿ chí nduudu cuaacu yeⁿꞌé Dendyuūs, Ndyuūs ngaⁿꞌá yā nduudu cuaacu yeⁿꞌe daiyá yā. 10 Duꞌū chí iꞌteenu daiyá Dendyuūs vɛ́ɛ́ nduudu cuaacu ndúúcū maāaⁿ. Duꞌū chi nguɛ́ɛ́ iꞌteenu Dendyuūs, diíⁿ yā chi Dendyuūs ní yaadi yā caati nguɛ́ɛ́ iꞌtéénu yā nduudu cuaacu chí Dendyuūs chiida yú ngaⁿꞌá yā yeⁿꞌē Daiyá yā. 11 Níícú chuū chi nduudu cuaacu ní chuū chí Dendyuūs tée yā vida cueⁿꞌe daāⁿmaⁿ sꞌuuúⁿ. Níícú vida cueⁿꞌe daaⁿmáⁿ ꞌcūū ní yeⁿꞌē daiya yā. 12 Duꞌū chi iꞌteenu daiya yā vɛ́ɛ́ vida cueⁿꞌe daāⁿmaⁿ yeⁿꞌe yā. Duꞌū chi nguɛ́ɛ́ yeⁿꞌe daiya yā nguɛ́ɛ́ vɛ́ɛ́ vida cueⁿꞌe daāⁿmaⁿ yeⁿꞌé yā.
Chꞌiīnū carta ndúúcū consejos
13 Chuū ní dinguúⁿ yeⁿꞌe ndísꞌtiī chi iꞌtéénu nī chí Cristo ní daiyá Dendyuūs caati maaⁿ ní cuuvi cádíínuuⁿ nī chi vɛ́ɛ́ vida cueⁿꞌe daāⁿmaⁿ yeⁿꞌé nī. Níícú cuꞌtéénu nī chi Cristo ní daiyá Dendyuūs miiⁿ.
14 Ní chuū ní confianza chi vɛ́ɛ́ yeⁿꞌe yú ndúúcu yā. Nduuti chi sꞌuuúⁿ caaca yú ꞌyā tanꞌdúúcā chi neⁿꞌé yā chí caaca yú ꞌyā ꞌiiⁿꞌyāⁿ miiⁿ nꞌgiindiveéⁿ yā yeⁿꞌē yú. 15 Nduuti chi deenu yú chi nꞌgiindiveéⁿ yā yeⁿꞌe yú yeⁿꞌe tanducuéⁿꞌē chi caaca yú ꞌyā, tuuꞌmi ní ꞌāā deenu yú chi itée yā sꞌuuúⁿ chiiⁿ chi ꞌāā chiica yú ꞌyā.
16 Duꞌū chí nꞌdiichi chi dinuuⁿndí viꞌi nuuⁿndi chi nguɛ́ɛ́ yeⁿꞌe vaadī nꞌgii, canéé chí caacá yā Dendyuūs chi Dendyuūs caꞌá yā vida cueⁿꞌe daāⁿmaⁿ yeⁿꞌé yā. Ngaⁿꞌá yeⁿꞌe ꞌiiⁿꞌyāⁿ chi nguɛ́ɛ́ dinuuⁿndí yā yeⁿꞌe vaadī nꞌgii. Vɛ́ɛ́ nuuⁿndi chi yeⁿꞌe vaadī nꞌgii. Ní yeⁿꞌe chuū nguɛ́ɛ́ caacá chi caacá nī yeⁿꞌe ꞌiiⁿꞌyāⁿ chi diiⁿ nuuⁿndí yeⁿꞌe vaadī nꞌgii. 17 Tanducuéⁿꞌē chi nguɛ́ɛ́ yeⁿꞌe nduudu cuaacu ní nuuⁿndi, naati vɛ́ɛ́ nuuⁿndi mííⁿ chí nguɛ́ɛ́ yeⁿꞌe vaadī nꞌgii.
18 ꞌĀā deenu yú duꞌu ꞌiiⁿꞌyāⁿ chi chꞌiindiyáaⁿ yā táámá ní yeⁿꞌe Dendyuūs ní nguɛ́ɛ́ idinuuⁿndí yā. ꞌIiⁿꞌyāⁿ miiⁿ candɛ́ɛ yā cuidado yeⁿꞌe maáⁿ yā. Ní yááⁿnꞌguinūuⁿ nguɛ́ɛ́ cuuvi tuneeⁿ ꞌiiⁿꞌyāⁿ miiⁿ.
19 Déénu yú ti yeⁿꞌe Dendyuūs sꞌuuúⁿ, ní tanáⁿꞌā ꞌiiⁿꞌyāⁿ yeⁿꞌe iⁿꞌyeēⁿdī caneé yā lado yeⁿꞌe yááⁿnꞌguinūuⁿ.
20 Déénu yú ti daiya Dendyuūs miiⁿ ní ndaá yā. Ní tee yā chi cadiinuuⁿ yú, ní ꞌíícú nꞌdiichi yú ꞌiiⁿꞌyāⁿ chi cuaacu yā. Ní sꞌuuúⁿ ní yeⁿꞌé ꞌiiⁿꞌyāⁿ chi cuaacu yā ní yeⁿꞌe daiya Dendyuūs chi Jesucristo. Dendyuūs miiⁿ ní ꞌiiⁿꞌyāⁿ chi cuaacu, ꞌiiⁿꞌyāⁿ chi vɛ́ɛ́ vida cueⁿꞌe daāⁿmaⁿ yeⁿꞌé yā. 21 Ndísꞌtiī daiyá cundɛ́ɛ nī cuidado ti nguɛ́ɛ́ cuꞌtéénu nī santos ídolos. ꞌTíícā cuuvi.