3 Ní vmnááⁿ vmnaaⁿ nadacadíínuuⁿ nī yeⁿꞌe chuū chí nguuvi sꞌeeⁿ chi ꞌcuiinū iⁿꞌyeeⁿdí ꞌcūū. Vɛ́ɛ́ ꞌiiⁿꞌyāⁿ chi duuchinéeⁿ yā yeⁿꞌe nducuéⁿꞌē chi yeⁿꞌé Ndyuūs. Ní ꞌiiⁿꞌyāⁿ sꞌeeⁿ diíⁿ yā nuuⁿndi tanꞌduucā chi maáⁿ yā neⁿꞌe yā. 4 Ní ngaⁿꞌá yā: ¿Tíí cánéé promesa chi ngaⁿꞌa chi Cristo canéé chi ndaa yā táámá vmnéⁿꞌēe? Ndii tiempo chi ꞌāā chóꞌōo taachi chꞌiī ꞌiiⁿꞌyāⁿ yeⁿꞌe ndaata yeⁿꞌe yú. ꞌĀā daamá nūuⁿ canéé tanducuéⁿꞌē ndíí taachi Ndyuūs dinꞌdái yā iⁿꞌyeeⁿdī. 5 ꞌIiⁿꞌyāⁿ chi ngaⁿꞌá yā ꞌtíícā nguɛ́ɛ́ neⁿꞌe yā diíⁿ yā cuenta yeⁿꞌe tiempo chi ꞌnaaⁿ tiempo chi chóꞌōo. Tiempo miiⁿ Ndyuūs ngaⁿꞌá yā ní ndúúcū nduudu yeⁿꞌé yā dinꞌdái yā nánguuvi ndúúcū iⁿꞌyeeⁿdí ꞌcūū. Ní iⁿꞌyeeⁿdí ꞌcūū canꞌdaā ná nuūⁿnīⁿ. Ní iⁿꞌyeeⁿdí ꞌcūū canee na lugar yeⁿꞌē cáávā nduudu yeⁿꞌé Ndyuūs. 6 Ní iⁿꞌyeeⁿdī yeⁿꞌe tiempo chi chóꞌōo ní chiituú nuūⁿnīⁿ ní ndai naāaⁿ yeⁿꞌē cáávā chi cheeⁿ taaⁿ cúúvī. 7 Ní nanguuvi ndúúcū yáⁿꞌāa chi vɛ́ɛ́ maaⁿ Ndyuūs caꞌá yā orden yeⁿꞌē chi canéé chí candɛɛ́ yā cuidado yeⁿꞌē ndii tiempo chi cuucu ndúúcū yaⁿꞌā. Ní taachi ngiichi yáⁿꞌāa miiⁿ tuuꞌmi ní Ndyuūs nꞌdiichí yā nuuⁿndi yeⁿꞌé ꞌiiⁿꞌyāⁿ. Ní Ndyuūs diíⁿ yā chi ꞌcuiīnū ꞌiiⁿꞌyāⁿ chi nguɛ́ɛ́ nꞌdaacā.

8 Maaⁿ ní ndísꞌtiī hermanos yeⁿꞌé chi neⁿꞌé taavi, nguɛ́ɛ́ cuuvi naáⁿ nī chi nanááⁿ Ndyuūs ꞌáámá nguuvi ní tanꞌdúúcā chi ꞌáámá mil nduūyū ní ꞌáámá mil nduūyū ní tanꞌdúúcā chi ꞌáámá nguuvi. ꞌTíícā canéé nanááⁿ Ndyuūs. 9 Ní Señor Jesucristo yeⁿꞌē yú nguɛ́ɛ́ cuuvi ꞌnaa yā yeⁿꞌe chi ngaⁿꞌa yā chi diiⁿ yā tanꞌdúúcā chi nadicadíínuuⁿ tanáⁿꞌā saⁿꞌā. Naati Ndyuūs ni vɛ́ɛ́ paciencia yeⁿꞌe yā ndúúcū sꞌuuúⁿ caati nguɛ́ɛ́ neⁿꞌé yā chi ꞌaama yú cuuvi ndai yú ti neⁿꞌé yā chi nducyaaca sꞌuuúⁿ ni ndaacadaami yú yeⁿꞌē nuuⁿndi yeⁿꞌe yú.

10 Ní nguuvi chi ndaa Señor Jesucristo taama vmnéⁿꞌēe, nguuvi miiⁿ ndaā tanꞌdúúcā chi ꞌááma duucu chi indáá nꞌgaaⁿ. Ní nguɛ́ɛ́ canéé ngiinu yú yeⁿꞌē nguuvi ꞌcūū taachi Ndyuūs nadiꞌtuūví yā nanguuvi yuudu nꞌdáí ꞌcuɛɛcú. Ní tanducuéⁿꞌē chi vɛ́ɛ́ nanguuvi ní cuūcū ní ꞌcuiīnū ndúúcū ngiichi yaⁿꞌā chi ꞌiiⁿꞌnuⁿ taaⁿ. Ní yáⁿꞌāa ntúūⁿ va ndúúcū tanducuéⁿꞌē denduꞌū ní cuūcū.

11 Deenu yú chi tanducuéⁿꞌē denduꞌū chí ꞌtúúcā ꞌcuiinu tuvií. Ní ¿táácā cuuvi ꞌcuɛɛtinée nī? Ndísꞌtiī canee chi caꞌá nī núúⁿmáⁿ staava yeⁿꞌé nī na taꞌa Ndyuūs ní dichꞌɛɛtɛ́ nī Ndyuūs. Ní ꞌcuɛɛtineé nī dámaāⁿ tanꞌdúúcā chi Ndyuūs neⁿꞌé yā. 12 ꞌTíícā ꞌcuɛɛtineé nī ꞌnaaⁿ chi canee ngiinu yú ndii nguuvi chi ndaā Señor Jesucristo taama vmnéⁿꞌēe. Ní diiⁿ yú nducuéⁿꞌē ntiiⁿnyuⁿ yeⁿꞌe Señor caati niiⁿnuúⁿ niiⁿnuuⁿ cuuvi ndaa yā. Nguuvi chi ndaa yā nánguuvi ní cuūcū ní ꞌcuiinu ndúúcū tanducuéⁿꞌē chi vɛ́ɛ́ yeⁿꞌē. Ní ꞌcuiinu ntuvií cáávā nguuchi yaⁿꞌā. 13 Naati sꞌuuúⁿ ní canéé ngiinu yú chi snaaⁿ yú ꞌáámá nanguuvi chí ngaī ndúúcū ꞌáámá iⁿꞌyeēⁿdī chí ngaī naachi vɛ́ɛ́ dámaāⁿ nducuéⁿꞌē chi cuaacu ní nducuéⁿꞌē ní nꞌdaacā nꞌdai. ꞌTíícā Ndyuūs ngaⁿꞌá yā chi tée yā sꞌuuúⁿ.

14 Ní cáávā chuū ndísꞌtiī hermanos chi neⁿꞌé taavi, ꞌnaaⁿ tiempo chi cunee ngiinú nī denduꞌú ꞌcūū candɛɛ cá nī cuidado chi ꞌdiiíⁿ ꞌdiiiⁿ ꞌcuɛɛtineé nī ní nguɛ́ɛ́ dinuuⁿndí nī. Ní ꞌtíícā nguɛ́ɛ́ vɛ́ɛ́ culpa yeⁿꞌe nī nanááⁿ Ndyuūs taachi Cristo ndaa yā. 15 Diíⁿ nī cuenta chi Señor Jesucristo yeⁿꞌe yú ndúúcū ngiīnū nꞌdáí diíⁿ yā ndúúcu yú caati neⁿꞌé yā chi nanguaⁿꞌai yú. ꞌTiicá ntúūⁿ Pablo, hermano yeⁿꞌe yú chi neené neⁿꞌe yú, ꞌāā dinguúⁿ yā yeⁿꞌé ndísꞌtiī ꞌáámá carta ndúúcū vaadī deenu chi Ndyuūs ncaꞌá yā Pablo miiⁿ. 16 Ní Pablo miiⁿ ngaⁿꞌá yā yeⁿꞌe nducuéⁿꞌe ꞌcūū ndúúcū vaadī deenu yeⁿꞌé Ndyuūs na nducyáácá carta chí dingúuⁿ yā. Ní naⁿꞌa carta yeⁿꞌé yā duūꞌvi dendúꞌū ní nꞌgíⁿꞌi nꞌdáí chi cuuvi déénu yú. Ní ꞌiiⁿꞌyāⁿ chi nguɛ́ɛ́ deenu yā ndúúcū ꞌiiⁿꞌyāⁿ chi duuꞌvī iꞌtéénu yā nguɛ́ɛ́ ngaⁿꞌá yā nduudu cuaacu yeⁿꞌe denduꞌū chi ngii ní yeⁿꞌe ꞌtɛɛ chi canéé nguūⁿ. Ní caavā chi ngaⁿꞌá yā chi nguɛ́ɛ́ cuaacu ní diíⁿ yā chi canéé chi ntuuví maáⁿ yā.

17 Naati ndísꞌtiī hermanos yeⁿꞌé chi neⁿꞌé taavi, ꞌāā deenú nī denduꞌú ꞌcūū. Cundɛ́ɛ nī cuidado chi nguɛ́ɛ́ ꞌcaandiveéⁿ nī nduudu yeⁿꞌe ꞌiiⁿꞌyāⁿ chi nguɛ́ɛ́ diíⁿ yā chi ngaⁿꞌa ley yeⁿꞌé Ndyuūs iiⁿꞌyāⁿ chi candɛ́ɛ yā ndísꞌtiī lado yeⁿꞌé yā ti ndísꞌtiī nguɛ́ɛ́ ꞌcuɛɛtinéé nꞌdaacā ndúúcū chi iꞌtéénu nī. 18 Maaⁿ ní ndísꞌtiī cuꞌtéénu cá nī Señor Jesucristo yeⁿꞌe yú chi nadanguáⁿꞌai yā sꞌuuúⁿ. Ní itée yā sꞌuuúⁿ nducuéⁿꞌē chi nꞌdai taavi yeⁿꞌé yā ndúúcū vaadī deenu yeⁿꞌé yā. Ngaⁿꞌa yú chi Jesucristo miiⁿ ní chꞌɛɛtɛ cá yā maaⁿ ndúúcū nguuvi chi cúchiī ní cueⁿꞌe daāⁿmaⁿ. ꞌTíícā cuuvi.