4 Deenu yú chi Ndyuūs nguɛ́ɛ́ nadichꞌɛɛcú yā yeⁿꞌe ángeles chi dinuuⁿndí yā naati sꞌneéⁿ yā cuaaⁿ chuvaꞌai na infierno ní sꞌneéⁿ yā naachi maaíⁿ. Ní dichiichí yā ángeles ndúúcū cadenas. Ní ángeles cūnee yā miiⁿ ndii nguuvi chi Cristo caⁿꞌá yā nꞌdiichi yā nuuⁿndi. 5 Ní deenu yú chi Ndyuūs ꞌāā idiꞌcuiinú yā iⁿꞌyeeⁿdí ꞌcūū ndúúcū ꞌiiⁿꞌyāⁿ yeⁿꞌē taachi diíⁿ yā chi chee cúúvī vmnááⁿ iⁿꞌyeēⁿdī ndúúcū ꞌiiⁿꞌyāⁿ chi nguɛ́ɛ́ nꞌdaacā idiíⁿ yā. Ndyuūs dámaāⁿ nadinguaⁿꞌai yā saⁿꞌa Noé chi candɛ́ɛ sa nduudu cuaacu yeⁿꞌé Ndyuūs ndúúcū táámá ndɛɛ̄chɛ̄ ꞌiiⁿꞌyāⁿ. Tanaⁿꞌa cá yā ní chꞌīi yā. 6 ꞌTiicá ntúūⁿ Ndyuūs diíⁿ yā condenar ꞌiiⁿꞌyāⁿ yeⁿꞌe yáāⁿ Sodoma ndúúcū yaāⁿ Gomorra. Ní diꞌcuiinú yā yáāⁿ sꞌeeⁿ chi nduuví yāiyáā cáávā chi dichoꞌó yā nguuchi yáⁿꞌā vmnaaⁿ yáāⁿ sꞌeeⁿ. Ní ꞌíícú Ndyuūs sꞌneeⁿ yā ejemplo ꞌcūū chi ꞌiiⁿꞌyāⁿ chi cuchiī cuayiivi, ní nguɛ́ɛ́ nꞌdaācā idiíⁿ yā, cuuvi deenú yā táácā cuuvi chóꞌōo yeⁿꞌe yā. 7 Naati Ndyuūs nadanguaⁿꞌai yā yeⁿꞌe yáāⁿ sꞌeeⁿ saⁿꞌa Lot chi saⁿꞌā nꞌdai, saⁿꞌā chi chꞌeenu sa chiī caavā chi diiⁿ ꞌiiⁿꞌyāⁿ chi nguɛ́ɛ́ nꞌdaacā. 8 Ní Lot miiⁿ chi nꞌdai sa canéé sá nguaaⁿ ꞌiiⁿꞌyāⁿ sꞌeeⁿ. Ní nguuvi nguuvi nꞌdiichi sa ní nꞌgiindiveeⁿ sa nducuéⁿꞌē chi diíⁿ yā chi nguɛ́ɛ́ nꞌdaacā. Ní nꞌgeenu sa ngii na staava yeⁿꞌē sa. 9 Ní nduuti chi Ndyuūs diíⁿ yā ꞌtúúcā tiempo chi ꞌāā chóꞌōo ꞌtiicá ntúūⁿ Ndyuūs deenú yā táácā chi nadanguáⁿꞌai yā ꞌiiⁿꞌyāⁿ chi iꞌtéénu yā Ndyuūs yeⁿꞌe ꞌiiⁿꞌyāⁿ chi nguɛ́ɛ́ nꞌdaacā idiíⁿ yā chí nꞌdiichineeⁿ yā ꞌiiⁿꞌyāⁿ yeⁿꞌe yā. ꞌTiicá ntúūⁿ Ndyuūs deenú yā táácā caꞌá yā testigo ꞌiiⁿꞌyāⁿ chi nguɛ́ɛ́ nꞌdaācā ndíí taachi ndaa nguuvi chi nꞌdiichí yā nuuⁿndi yeⁿꞌe nducyaaca ꞌiiⁿꞌyāⁿ.

10 ꞌTiicá Ndyuūs caꞌa yā castigo ꞌiiⁿꞌyāⁿ chi diíⁿ yā nuuⁿndi tanꞌdúúcā chi neⁿꞌe cuerpo yeⁿꞌé yā. Ní nguɛ́ɛ́ nꞌgiindiveéⁿ yā nduudu cuaacu yeⁿꞌe ꞌiivú Ndyuūs. ꞌIiⁿꞌyāⁿ sꞌeeⁿ ní nguɛ́ɛ́ ꞌvaꞌá yā chi caaⁿꞌmaⁿ yā cosas chi nguɛɛ ndaacā yeⁿꞌe ꞌiīⁿntyéⁿꞌē. Ní nguɛ́ɛ́ ꞌvaꞌá yā yeⁿꞌē mar ꞌáámá. Ní diíⁿ yā nducuéⁿꞌē nuuⁿndi chi neⁿꞌe yā. 11 Ní ángeles nguɛ́ɛ́ ꞌtííca yā. ꞌÁárá chi ditiinu cá yā nguɛ́ɛ́ ti ꞌiīⁿntyéⁿꞌē sꞌeeⁿ ti taachi ndaá yā nanááⁿ Señor Jesucristo yeⁿꞌe yú nguɛ́ɛ́ cunncáā ngaⁿꞌa ángeles contra yeⁿꞌe ꞌiīⁿntyéⁿꞌē sꞌeeⁿ. 12 ꞌIiⁿꞌyāⁿ sꞌeeⁿ diíⁿ yā tanꞌdúúcā ꞌyúuduu taáⁿ diíⁿ tī ní nguɛ́ɛ́ nadacadíínuuⁿ tī. ꞌTíícā diíⁿ yā. Ní tanꞌdúúcā ꞌiiti taaⁿ chi ꞌiiⁿꞌyāⁿ nꞌnuúⁿ yā ní nꞌgiiⁿꞌnúⁿ yā ꞌiiti, ꞌtíícā ꞌiiⁿꞌyāⁿ sꞌeeⁿ. Ní cunncáā ngaⁿꞌa yā yeⁿꞌe denduꞌū chi nguɛ́ɛ́ ituumicadíínuuⁿ yā. Ní ꞌcuūví yā tanꞌdúúcā ꞌáámá ꞌiiti taaⁿ. 13 Ní ꞌiiⁿꞌyāⁿ sꞌeeⁿ ní chꞌeenú yā chii caati ꞌāā diíⁿ yā chi tanáⁿꞌa yā chꞌeenú yā chii. Maaⁿ ní yeenú yā chi dinuuⁿndí yā tanꞌdúúcā chi neⁿꞌe cuerpo yeⁿꞌé yā. Ní nduuti chi ꞌiiⁿꞌyāⁿ sꞌeeⁿ caⁿꞌá yā ndúúcu nī ní cheꞌé yā ndúúcu nī taachi vɛ́ɛ́ ꞌviicu yeⁿꞌe nī tuuꞌmi ní nadacadíínuuⁿ yā chi nginncheꞌéí yā ndísꞌtiī. Ní chuū ni cosa chi cuuvi ꞌcuinaáⁿ yā yeⁿꞌē.

14 ꞌIiⁿꞌyāⁿ sꞌeeⁿ taachi nꞌdiichí yā ꞌáámá nꞌdaataá neⁿꞌé yā caⁿꞌá yā ndúúcū nꞌdaataá miiⁿ. Dámaāⁿ neⁿꞌé yā dinuuⁿndi yā ní nginncheꞌéí yā ꞌiiⁿꞌyāⁿ chi debil staava yeⁿꞌé yā chi dinuuⁿndí yā. ꞌIiⁿꞌyāⁿ sꞌeeⁿ deenu nꞌdai yā na staava yeⁿꞌé yā chi neⁿꞌé yā denduꞌū chi nguɛ́ɛ́ nꞌdaacā. Ní Ndyuūs ngaⁿꞌa yā yeⁿꞌe yā ꞌtíícā: Dɛꞌɛ chúú cā yaꞌai yeⁿꞌé yā ti condenado yā. 15 ꞌIiⁿꞌyāⁿ sꞌeeⁿ divíi yā yeⁿꞌe yúúní cuaacu yeⁿꞌe Ndyuūs ní chiicá yā yúúní chí neⁿꞌe maáⁿ yā. Diíⁿ yā tanꞌdúúcā chi diiⁿ profeta Balaam chi daiya saⁿꞌā Beor. Tiempo chi chóꞌōo Balaam miiⁿ neⁿꞌe sa diiⁿ sa ganar tuumī yeⁿꞌe chi nguɛ́ɛ́ nꞌdaacā chi diiⁿ sa. 16 Ní taachi cueⁿꞌe sa ndúúcū burro yeⁿꞌe sa, burro yeⁿꞌe sa ngaⁿꞌá tī ndúúcū nduudu yeⁿꞌe ꞌiiⁿꞌyāⁿ ní diíⁿ tī reprender saⁿꞌā Balaam miiⁿ yeⁿꞌē nuuⁿndi chi diiⁿ sa. Ní ꞌāā ntɛ́ɛ́ diiⁿ sa nuuⁿndi miiⁿ tiempo miiⁿ.

17 Ní ꞌiiⁿꞌyāⁿ sꞌeeⁿ ní tanꞌdúúcā vaacu nuūⁿnī díyaāi ꞌtiicá yā. Tanꞌdúúcā meēeⁿ chi candɛ́ɛ̄ ꞌyúúné taaⁿ ꞌtiicá yā. ꞌIiⁿꞌyāⁿ sꞌeeⁿ ní condenado yā ní caⁿꞌá yā choꞌó yā naachi diituu nꞌdáí maaíⁿ. Ní miiⁿ canee yā cueⁿꞌe daāⁿmaⁿ. 18 ꞌIiⁿꞌyāⁿ sꞌeeⁿ ní ngaⁿꞌa yā nduudu nꞌgɛɛtɛ chi nguɛ́ɛ́ dichííꞌvɛ̄. Ní ndúúcū vicio yeⁿꞌe yā, ndúúcū nducuéⁿꞌē nuuⁿndi chi neⁿꞌe cuerpo yeⁿꞌe yā, ꞌiiⁿꞌyāⁿ sꞌeeⁿ ní neⁿꞌe yā diíⁿ yā chi tanáⁿꞌā ꞌiiⁿꞌyāⁿ chi ꞌāā nduuvidɛɛvɛ́ yā ní ꞌāā ntɛ́ɛ́ caⁿꞌá yā ndúúcū ꞌiiⁿꞌyāⁿ chi dinuuⁿndi yā ní tanáⁿꞌa yā neⁿꞌé yā nanguɛɛcúndii ntuúⁿ yā ní dinuuⁿndi yā taama vmnéⁿꞌēe. 19 ꞌIiⁿꞌyāⁿ sꞌeeⁿ chi nginncheꞌéí yā ꞌiiⁿꞌyāⁿ ngaⁿꞌá yā chi caꞌá yā ꞌiiⁿꞌyāⁿ sꞌeeⁿ chi libre yā. ꞌIiⁿꞌyāⁿ sꞌeeⁿ maáⁿ yā ní canéé yā prisioneros yeⁿꞌe nuuⁿndi chi diíⁿ yā. Ní caꞌáámá caꞌaama ꞌiiⁿꞌyāⁿ chi nguɛ́ɛ́ libre yā ní canéé yā maaⁿ poder nuuⁿndi ní nguɛ́ɛ́ cuuvi cuchɛɛ yā yeⁿꞌē. 20 Ní ꞌiiⁿꞌyāⁿ chi iꞌtéénu yā Señor Jesucristo yeⁿꞌe yú ní yeⁿꞌé yā, ní Cristo ꞌāā nadanguáⁿꞌai yā ꞌiiⁿꞌyāⁿ yeⁿꞌe nducuéⁿꞌē chi nguɛ́ɛ́ nꞌdaacā yeⁿꞌe iⁿꞌyeeⁿdí ꞌcūū. Ní cuayiivi miiⁿ nduuti chi ꞌiiⁿꞌyāⁿ nanguɛɛcunée yā taama vmnéⁿꞌēe ní diíⁿ yā dendúꞌū nuuⁿndi chi yeⁿꞌe iⁿꞌyeeⁿdí ꞌcūū tuuꞌmi ní cunncáā ca canee yā nguɛ́ɛ́ ti tiempo chi ꞌāā cuɛ́ɛ́ iꞌtéénu yā Jesucristo. 21 Nꞌdáácā ca chi ꞌiiⁿꞌyāⁿ sꞌeeⁿ nguɛ́ɛ́ nꞌdiichí yā yúúní cuaacu yeⁿꞌé Ndyuūs ti taachi ꞌāā nꞌdiichí yā yúúní cuaacu tuuꞌmi ní ndaācādaamí yā yeⁿꞌe ley yeⁿꞌé Ndyuūs chi Ndyuūs caꞌa yā ꞌiiⁿꞌyāⁿ sꞌeeⁿ. 22 Ní choꞌoó yeⁿꞌe ꞌiiⁿꞌyāⁿ sꞌeeⁿ tanꞌdúúcā chi ngaⁿꞌa ꞌáámá nduudu cuaacu ꞌtíícā: ꞌYaānā nguɛɛcunée tī cheꞌe tī chí ndaāchi tī ní cuuchí chi ꞌiiⁿꞌyāⁿ naaⁿnú yā chi dɛɛvɛ tī ní nguɛɛcunée tī ngeⁿꞌe tī nguɛɛcundáa tī nguaaⁿ nuūⁿnīⁿ nchɛɛ̄tí.