Yeⁿꞌe ndísꞌtiī amigos yeⁿꞌe ꞌiiⁿꞌyāⁿ chi nguɛ́ɛ́ iꞌtéénu yā Jesucristo
4
¿Tií ngiica cosas chi caandaá chi ꞌtííca nguⁿꞌú nī nguaaⁿ maáⁿ nī? Ngiicā yeⁿꞌe ná vaanicadíínūuⁿ yeⁿꞌe maáⁿ nī ti neⁿꞌe nī diiⁿ nī cosas chi nguɛ́ɛ́ nꞌdaacā. 2 Ndísꞌtiī neⁿꞌé nī cosas ní nguɛ́ɛ́ vɛ́ɛ́ yeⁿꞌe nī. Ní cáávā chuū neⁿꞌé nī ꞌcaaⁿꞌnúⁿ nī ꞌiiⁿꞌyāⁿ. Neⁿꞌé nī denduꞌū chi inaáⁿ nī ní nguɛ́ɛ́ cuuvi cutaꞌá nī. Ní cáávā chuū nguⁿꞌú nī ní diíⁿ nī caandaá. Ní nguɛ́ɛ́ ndaaca nī chiiⁿ chi neⁿꞌé nī ti nguɛ́ɛ́ ngiicá nī Ndyuūs dɛꞌɛ̄ chi neⁿꞌe nī. 3 Ní taachi ndísꞌtiī ngiicá nī Ndyuūs dɛꞌɛ̄ chi neⁿꞌe nī, Ndyuūs nguɛ́ɛ́ tée yā chiiⁿ chi neⁿꞌe nī ti ngiicá nī dámaāⁿ caavā maáⁿ nī caati cuuvi yeenú nī. Ní nguɛ́ɛ́ nꞌdaacā chi ngiica nī ꞌtíícā. 4 Ndísꞌtiī ꞌiiⁿꞌyāⁿ chi nguɛ́ɛ́ ꞌáámá cunee nī ndúúcū chi iꞌtéénu nī, ¿ꞌáá nguɛ́ɛ́ deenu ndísꞌtiī chi taachi caⁿꞌá nī ndúúcū ꞌiiⁿꞌyāⁿ chi nguɛ́ɛ́ iꞌtéénu yā Jesucristo ní diíⁿ nī denduꞌū chi yeⁿꞌe iⁿꞌyeeⁿdí ꞌcūū tuuꞌmi ní caneé nī enemigos yeⁿꞌé Ndyuūs? ꞌTiicá nī. 5 ¿ꞌÁá nadacádíínuuⁿ ndísꞌtiī chi diíⁿ nī chi nguɛ́ɛ́ dichííꞌvɛ̄ nduudu yeⁿꞌe libro yeⁿꞌé Ndyuūs naachi canéé nguūⁿ ꞌtíícā?: Ndyuūs sꞌneeⁿ yā Espíritu Nꞌdai yeⁿꞌé yā chɛɛti staava yeⁿꞌe yú. Ní Espíritu miiⁿ ní neⁿꞌe ca chi sꞌuuúⁿ canee yú dámaāⁿ yeⁿꞌe Ndyuūs sꞌuuúⁿ. 6 Naati Ndyuūs nginnée yā sꞌuuúⁿ ní itée yā sꞌuuúⁿ vaadī nꞌdai yeⁿꞌé yā sꞌuuúⁿ. Canéé nguūⁿ na libro yeⁿꞌé Ndyuūs ꞌtíícā: Ndyuūs nguɛ́ɛ́ caⁿꞌá yā lado yeⁿꞌe ꞌiiⁿꞌyāⁿ chi idinꞌgɛɛtɛ maáⁿ yā naati caꞌa yā vaadī nꞌdai yeⁿꞌé yā ꞌiiⁿꞌyāⁿ ndiicúúⁿ. 7 ꞌTíícā canee chi sꞌneéⁿ nī vida yeⁿꞌe maáⁿ nī na taꞌá Ndyuūs. Nguɛ́ɛ́ caꞌá nī lugar yááⁿnꞌguiinūuⁿ chi ngaⁿꞌa ntiiⁿnyuⁿ sa yeⁿꞌe ndísꞌtiī ní yááⁿnꞌguiinūuⁿ ní cuɛɛvii sá yeⁿꞌē nanááⁿ ndísꞌtiī. 8 Ndaá nī nanááⁿ Ndyuūs ní Ndyuūs ní chí nndaa ntúūⁿ yā nanááⁿ ndísꞌtiī. Ndísꞌtiī ꞌiiⁿꞌyāⁿ nuuⁿndíī nadidɛɛvɛ́ nī vida yeⁿꞌé nī. Ndísꞌtiī chi vɛ́ɛ́ ꞌuūvī vaanicadíínūuⁿ yeⁿꞌé nī, nadidɛɛvɛ́ nī staava yeⁿꞌé nī. 9 Ndísꞌtiī ꞌiiⁿꞌyāⁿ nuuⁿndíī diꞌvaachi maáⁿ nī ní cuɛɛcú nī ní yaꞌāī ꞌiinú nī yeⁿꞌē chi diiⁿ nī. Nguɛ́ɛ́ canee chi nꞌgííⁿnyuⁿ nī naati canee chi cuɛɛcú nī. Nguɛ́ɛ́ canéé chi yeenú nī naati canee chi diꞌvaachí maaⁿ nī. 10 Ní ꞌcuɛɛtinéé ndiicuuⁿ nī nanááⁿ Señor yeⁿꞌe yú ní Señor yeⁿꞌē yú ní diíⁿ yā chi nꞌgɛɛtɛ nī.Yeⁿꞌē chi nꞌdiichi yú nuūⁿndī yeⁿꞌe hermanos yeⁿꞌe yú
11 Ndísꞌtiī hermanos yeⁿꞌé, nguɛ́ɛ́ caaⁿꞌmaⁿ cúnncaa nī yeⁿꞌē ꞌaama nī taama nī hermanos yeⁿꞌe yú. ꞌĀā duꞌú ndísꞌtiī chí ngaⁿꞌa contra ꞌáámá hermano yeⁿꞌe yú o nꞌdiichi nī nuuⁿndi yeⁿꞌe hermano yeⁿꞌe yú, ndísꞌtiī ngaⁿꞌa ntúūⁿ cúnncaa nī contra ley yeⁿꞌé Ndyuūs ní nꞌdiichi nī yeⁿꞌe ley miiⁿ. Ní naachi nꞌdiichí nī yeⁿꞌe ley miiⁿ tuuꞌmi ní diíⁿ nī ntiiⁿnyuⁿ yeⁿꞌe juez ní nguɛ́ɛ́ diíⁿ nī chi ngaⁿꞌa ley miiⁿ. 12 Dámaāⁿ vɛɛ ꞌáámá nꞌdyáⁿꞌā chi Ndyuūs chi caꞌá yā ley miiⁿ ní ꞌtiicá ntúūⁿ Ndyuūs ní juez. Maáⁿ yā cuuvi nadinguáⁿꞌai yā ꞌiiⁿꞌyāⁿ o cuuvi diꞌcuiinú yā ꞌiiⁿꞌyāⁿ. Maaⁿ ní ndísꞌtiī, ¿duꞌu ndísꞌtiī chi nꞌdiichí nī dɛꞌɛ̄ idiiⁿ táámá ꞌiiⁿꞌyāⁿ?
Nguɛ́ɛ́ deenu yú dɛꞌɛ chi cuuvi ndúúcu yú ndii cavyaaⁿ
13 Maaⁿ ní ꞌcaandiveéⁿ nī nduudu chi ngaⁿꞌá ngīi ndísꞌtiī chi ngaⁿꞌa nī ꞌtíícā. Maaⁿnguuvi o cavyaaⁿ caⁿꞌá táámá yáāⁿ ni caneé miiⁿ ꞌáámá nduūyū, ní diíⁿ negocio ní diíⁿ ganar. 14 Ndísꞌtiī ní nguɛ́ɛ́ dɛꞌɛ̄ vɛɛ déénu nī chi dɛꞌɛ̄ cuuvi cavyaaⁿ. ¿Dɛꞌɛ̄ vida yeⁿꞌe ndísꞌtiī? Vida yeⁿꞌé nī ní tanꞌdúúcā ꞌáámá meēeⁿ chi ngoꞌoó ꞌáámá nchꞌɛɛ̄tɛ́ ní nꞌgiinu. 15 Ndísꞌtiī ní canéé chi caaⁿꞌmáⁿ nī ꞌtíícā. Nduuti chi Ndyuūs neⁿꞌé yā chi cunduūchí tuuꞌmi ní diíⁿ chuū o diíⁿ cháā. 16 Naati nguɛ́ɛ́ diíⁿ nī ꞌtíícā. Ndísꞌtiī ngaⁿꞌá nī yeⁿꞌe cosas nꞌgɛɛtɛ chi diíⁿ nī. Ní yeenú nī yeⁿꞌe nducuéⁿꞌe ꞌcūū chi ngaⁿꞌa nī chí nꞌgɛɛtɛ. Ní nguɛ́ɛ́ nꞌdaacā chi diíⁿ nī ꞌtíícā. 17 ꞌIiⁿꞌyāⁿ chi déénu yā yeⁿꞌē chi cuuvi diíⁿ yā chi nꞌdaacā ní nguɛ́ɛ́ idiíⁿ yā chuū tuuꞌmi ní dinuuⁿndí yā.