Yeⁿꞌe chiiya yú
3
Ndísꞌtiī hermanos yeⁿꞌé nguɛ́ɛ́ canéé chi cuuví ꞌyaaⁿ maestros yeⁿꞌe yaacū nguaaⁿ ndísꞌtiī. Deenú nī chi Ndyuūs diitu nꞌdiichí yā nuuⁿndi yeⁿꞌe maestros miiⁿ nguɛ́ɛ́ ti ndísꞌtiī. 2 Nducyaacu yú idiiⁿ yú nꞌdeee nꞌdáí faltas. Ní nduuti chi ꞌáámá ꞌiiⁿꞌyāⁿ nguɛ́ɛ́ caaⁿꞌmáⁿ yā mar ꞌáámá falta tuuꞌmi ní ꞌiiⁿꞌyāⁿ miiⁿ ní neené nꞌdaacā. Ní cuuvi ngaⁿꞌá ntiiⁿnyuⁿ yā yeⁿꞌe nuuⁿmaⁿ cuerpo yeⁿꞌe maáⁿ yā. 3 Cuinꞌdiichí nī. Cuꞌnuūⁿ yú frenos naaⁿ ꞌyúúdūu ní cuꞌtéénu tī yeⁿꞌe yú. Ní nuuⁿmaⁿ cuerpo yeⁿꞌe tī cuuvi diīiⁿ tanꞌdúúcā chi neⁿꞌe yú. 4 Maaⁿ ní nadacadíínuuⁿ yú yeⁿꞌe barco. ꞌÁárá chí chꞌɛɛtɛ ní ꞌyúúné taaⁿ ngéenū ní ꞌiiⁿꞌyāⁿ cuuvi diiⁿ yā manejar barco miiⁿ cáávā ꞌáámá yáⁿꞌá ꞌlííⁿ yeⁿꞌē barco miiⁿ chi canúúⁿ chɛɛti nuūⁿnīⁿꞌyáⁿꞌā. Ní barco miiⁿ ngiicā naachi neⁿꞌé yā. 5 ꞌTiicá ntúūⁿ chiiya yú. ꞌÁárá chi ꞌáámá chi ꞌlííⁿ chi yeⁿꞌe cuerpo yeⁿꞌe yú naati ngaⁿꞌa yú yeⁿꞌē nꞌdeee nꞌdáí cosas chi nꞌgɛɛtɛ ndúúcū chiiya yú. Ní cuinꞌdiichí nī ta ꞌlííⁿ chuundí yaⁿꞌā cuuvi caacyáⁿꞌā ꞌáámá icyáⁿꞌā chꞌɛɛtɛ. 6 Ní chiiya yú tanꞌdúúcā ꞌáámá nguuchi yaⁿꞌā ꞌtíícā chiiya yú. Ní tanducuéⁿꞌē tanꞌdúúcā ꞌáámá iⁿꞌyeeⁿdi chi ndiituú ndúúcū nducuéⁿꞌē chi nguɛɛ nꞌdaacā, ꞌtíícā cuerpo yeⁿꞌe yú cáávā chiiya yú. Ní diīiⁿ chi núúⁿmáⁿ cuerpo yeⁿꞌe yú vɛ́ɛ́ nuuⁿndi yeⁿꞌē. Ní tanꞌdúúcā infierno chi ngiichi yaⁿꞌā ꞌtíícā diīiⁿ chiiya yú. Ní yaⁿꞌā miiⁿ ní diīiⁿ tanꞌdúúcā chi ngiichi nducuéⁿꞌē vida yeⁿꞌe yú ꞌnaaⁿ chi canee yú iⁿꞌyeeⁿdí ꞌcūū. 7 Caꞌáámá caꞌáámá naaⁿ ꞌiiti chi vɛ́ɛ́ iⁿꞌyeeⁿdí ꞌcūū yeⁿꞌē ꞌiiti ꞌyúúdūu, yeⁿꞌē ꞌyaada, yeⁿꞌē cúú, ꞌiiti chi snúūⁿ chɛɛti nuūⁿnīꞌyáⁿꞌā ní nducyaaca tī saⁿꞌā cuuvi diiⁿ sa amansar ní ꞌāā diiⁿ sa amansar ꞌiiti sꞌeeⁿ. 8 Naati mar ꞌáámá ꞌiiⁿꞌyāⁿ nguɛ́ɛ́ cuuvi diíⁿ yā chi amansar chiiya maáⁿ yā. Ngaⁿꞌa yú cosas chi nguɛ́ɛ́ nꞌdaacā ꞌaara chi nguɛ́ɛ́ neⁿꞌe yú. Ní ndúúcū chiiya yú ngaⁿꞌa yú nꞌdeee nꞌdáí chi nguɛ́ɛ́ nꞌdaacā yeⁿꞌe ꞌiiⁿꞌyāⁿ. Ní diiⁿ yú chi cuuvi ꞌcuūvi yā. 9 Ní ndúúcū maaⁿ chiiya yú dichꞌɛɛtɛ yú Ndyuūs chiida yú ní ngaⁿꞌa taaⁿ yú yeⁿꞌe ꞌiiⁿꞌyāⁿ chi Ndyuūs dinꞌdái yā chi tanꞌdúúcā maáⁿ Ndyuūs ꞌtiicá dinꞌdái yā ꞌiiⁿꞌyāⁿ. 10 Yeⁿꞌe maaⁿ cheendi ntúuⁿ yú ngaⁿꞌa yú chi Ndyuūs nꞌdaācá yā ní ngaⁿꞌa taaⁿ yú ndúúcū ꞌiiⁿꞌyāⁿ. Ndísꞌtiī hermanos yeⁿꞌé, nguɛ́ɛ́ canéé chi cuuvi ꞌtíícā. 11 ¿ꞌÁá yeⁿꞌē ꞌáámá nduutinaaⁿ nuūⁿnīⁿ canꞌdáā nuūⁿnī yaāa ndúúcū nuūⁿnīⁿ yaādī? Nguɛ́ɛ́ cuuvi. 12 Ndísꞌtiī hermanos yeⁿꞌé, ¿ꞌáá cúúví ꞌáámá yáⁿꞌá yeⁿꞌe nꞌguiidīi yááⁿ nguuvi cuuvi aceitunas yeⁿꞌē? Nguɛ́ɛ́ cuuvi. O ꞌaama yáⁿꞌá ꞌlííⁿ yeⁿꞌe uvas ¿áá cuuvi nꞌguiidīi yááⁿ nguuvi cuuvi yeⁿꞌē? Nguɛ́ɛ́ cuuvi. ꞌTiicá ntúūⁿ yeⁿꞌē ꞌaama ndúútínaáⁿ nuūⁿnīⁿ nguɛ́ɛ́ cuuvi canꞌdáā nuūⁿnīⁿ diini ndúúcū nuūⁿnīⁿ yaadi.Yeⁿꞌe vaadī deenu chi cuaacu nííⁿnyúⁿ chi vaadī deenu
13 Nduuti chi vɛ́ɛ́ saⁿꞌā chi cadiinuuⁿ sa ní chi deenu nguaaⁿ ndísꞌtiī canéé chí cuuⁿꞌmiⁿ sa ꞌiiⁿꞌyāⁿ chi cuaacu chi deenu sa ní ndiicuuⁿ sa cáávā nduudu nꞌdai yeⁿꞌē sa ndúúcū ntiiⁿnyuⁿ nꞌdaāca chi diiⁿ sa. 14 Naati nduuti chi vɛ́ɛ́ vaadī ngueēe chi chꞌɛɛtɛ ndúúcū vaadī ꞌcaaꞌva na staava yeⁿꞌé nī ní ndísꞌtiī ní nadacádíínuuⁿ nī na staava yeⁿꞌé nī chi caⁿꞌá nī diiⁿ nī nducuéⁿꞌē caavā maáⁿ nī diíⁿ nī aprovechar, tuuꞌmi ní nguɛ́ɛ́ cuuvi nadacádíínuuⁿ nī chi nꞌgɛɛtɛ nī. Ndíí nguɛ́ɛ́ cuuvi caaⁿꞌmáⁿ nī nduudu yaadi chi contra yeⁿꞌē nduudu cuaacu. 15 Ní vaadī deenú ꞌcūū yeⁿꞌé nī nguɛ́ɛ́ vaadī deenu chi yeⁿꞌé Ndyuūs naati vaadī deenú ꞌcūū ní yeⁿꞌe iⁿꞌyeeⁿdí ꞌcūū ní yeⁿꞌe chi nadacádíínuuⁿ yā ní yeⁿꞌē yááⁿnꞌguiinuuⁿ. 16 Naachi ꞌiiⁿꞌyāⁿ chí dínngueé yā ní diíⁿ yā nducuéⁿꞌē caava maáⁿ yā neⁿꞌé yā diíⁿ yā aprovechar, tuuꞌmi ní miiⁿ canéé ꞌiiⁿꞌyāⁿ chi nguɛ́ɛ́ vɛ́ɛ́ orden yeⁿꞌé yā. Ní diíⁿ yā tanducuéⁿꞌē denduꞌū chi nguɛ́ɛ́ nꞌdaacā. 17 Naati ꞌiiⁿꞌyāⁿ chi vɛ́ɛ́ vaadi deenu yeⁿꞌé yā chi yeⁿꞌe Ndyuūs, tuuꞌmi ní vmnááⁿ vmnaaⁿ canéé chí chꞌɛɛtinéé nꞌdaaca yā ndúúcū vida yeⁿꞌé yā chi dɛɛvɛ. Cuayiivi ní diíⁿ yā chi vɛ́ɛ́ vaadī ꞌdiīíⁿ. Ní ndiicúuⁿ yā, ní amigo yā. Ní yaꞌai ꞌiinú yā ndúúcū ꞌiiⁿꞌyāⁿ ní dámaāⁿ diíⁿ yā tanducuéⁿꞌē chi nꞌdaacā. ꞌĀā daamá nūuⁿ ꞌcuaaⁿ yā nducyaaca ꞌiiⁿꞌyāⁿ. Ní nguɛ́ɛ́ nadacádíínuuⁿ yā yeⁿꞌē chi nguɛ́ɛ́ ndaacā, ní nguɛ́ɛ́ diíⁿ yā denduꞌū chi nguɛ́ɛ́ nꞌdaacā. 18 Ní ꞌiiⁿꞌyāⁿ chi diíⁿ yā chi vɛ́ɛ́ vaadī ꞌdiiíⁿ ní diíⁿ yā tanꞌdúúcā chí cuuⁿnú yā ndaata yeⁿꞌe nducuéⁿꞌē chi cuaacu. ꞌTíícā diíⁿ yā. Ní nꞌguiꞌi yeⁿꞌē nducueⁿꞌē chi cuaacu ní vaadī cuaacu.