Cueⁿꞌe daāⁿmaⁿ snaaⁿ yú yeⁿꞌe Jesús
12
Maaⁿ ní deenu yú cáávā vida yeⁿꞌē nꞌdeee nꞌdáí ꞌiiⁿꞌyāⁿ chí chꞌīi yā ti chꞌiⁿꞌí yā sꞌuuúⁿ táácā cuuvi cuꞌteenu ca yú Ndyuūs. Ní cáávā chuū canee chi cūꞌneeⁿ yú tanducuéⁿꞌē denduꞌū chi diꞌvaachi sꞌuūúⁿ ndúúcū nuuⁿndi chi diiⁿ yú caati nuuⁿndi mííⁿ diiⁿ chí cuuvi ndai yú. Ní caānu yú ndúúcū ngiīnū carrera yeⁿꞌe vida yeⁿꞌē yú chi Ndyuūs itée yā sꞌuuúⁿ. 2 Ní cueⁿꞌe daāⁿmāⁿ snaaⁿ yú Jesús ti diíⁿ yā chi cuuvi iꞌtéénu yú ꞌyā. Ní diíⁿ yā chi nꞌdaacā ca cuuvi cuꞌteenu yú. Jesucristo ní chꞌeenú yā chiī taachi chꞌīi yā na cruz. Ní nguɛ́ɛ́ diíⁿ yā cuenta chi ꞌcuinaáⁿ yā cucáávā chi chꞌīi yā tanꞌdúúcā chi nꞌgiiⁿꞌnuⁿ yā ꞌiiⁿꞌyāⁿ caati deenú yā chi yeenú yā cuayiivi ti cuuví nadanguáⁿꞌai yā ꞌiiⁿꞌyāⁿ. Maaⁿ ní vɛɛ́ yā na lado yeⁿꞌe honor yeⁿꞌe trono yeⁿꞌe Ndyuūs.3 Ndísꞌtiī, nadacadíínuuⁿ nī tanꞌdúúcā Jesucristo chi ejemplo yeⁿꞌe yú. Chꞌeenú yā chiī cucáávā ꞌiiⁿꞌyāⁿ sꞌeeⁿ chi dinuuⁿndí yā. Ní ꞌíícú ndísꞌtiī nguɛ́ɛ́ cuuvi ꞌdaanꞌdí nī ní nguɛ́ɛ́ sꞌneéⁿ nī chiiⁿ chi iꞌtéénu nī. 4 Ndísꞌtiī ní ꞌāā chichɛɛ nī ndúúcū nuūⁿndī ní nguɛ́ɛ́ chꞌeenú nī chii ndíí chi ꞌāā nꞌdīi nī. 5 ¿ꞌĀā nguɛ́ɛ́ nꞌgaacú ndísꞌtiī consejo chi Ndyuūs caꞌá yā ndísꞌtiī chi daiyá yā? Canéé nguūⁿ na libro yeⁿꞌé Ndyuūs ꞌtíícā:
Díí, daiyá, nguɛ́ɛ́ nadacadíínuuⁿ nī chi nguɛ́ɛ́ dɛꞌɛ̄ vɛɛ taachi Ndyuūs diíⁿ yā castigar ndísꞌtiī caati cuuvi deenú nī chi nguɛ́ɛ́ nꞌdaacā idiíⁿ nī. Ní nguɛ́ɛ́ ndaacadáámí nī yeⁿꞌé yā taachi diíⁿ yā castigar ndísꞌtiī.
6 Señor yeⁿꞌe yú yaaꞌvineéⁿ yā nducyáácá ꞌiiⁿꞌyāⁿ chi neⁿꞌé yā ní diíⁿ yā castigar nducyaaca ꞌiiⁿꞌyāⁿ chi staꞌá yā chi cuuvi daiyá yā. 7 Maaⁿ ní cuchɛ́ɛ nī castigo chi Ndyuūs itée yā ndísꞌtiī ti Ndyuūs ní chiidá nī. Taachi nꞌgeenú nī ngiī tuuꞌmi ní deenú nī chi diíⁿ yā ndúúcū ndísꞌtiī tanꞌdúúcā chi ndísꞌtiī ní daiyá yā. ꞌTíícā diíⁿ yā. ¿Dúꞌū daiyá yā vɛɛ chi chiidá yā nguɛ́ɛ́ idiíⁿ yā castigar? 8 Nduuti chi Ndyuūs nguɛ́ɛ́ diíⁿ yā castigar ndísꞌtiī tanꞌdúúcā chi diíⁿ yā castigar nducuéⁿꞌē daiyá yā, tuuꞌmi ní ndísꞌtiī nguɛ́ɛ́ maaⁿ daiyá yā ti ndísꞌtiī ní daiyá yeⁿꞌe táámá yā. Ní nguɛ́ɛ́ daiya Dendyuūs ndísꞌtiī. 9 Ní ꞌtiicá ntúūⁿ chiida yú chi yeⁿꞌe iⁿꞌyeeⁿdí ꞌcūū diíⁿ yā castigar sꞌuuúⁿ tanꞌdúúcā chi neⁿꞌé yā. Ní sꞌuuúⁿ ní dinéⁿꞌe yú chiida yú. Nꞌdaacā ca chi diiⁿ yú chiiⁿ chi neⁿꞌe Ndyuūs chi canéé na vaꞌai chɛɛti nguuvi ní snduuchi yú. 10 Chiida yú chi yeⁿꞌē iⁿꞌyeeⁿdí ꞌcūū diíⁿ yā castigar sꞌuuúⁿ dúuꞌvī nduuyū nūuⁿ tanꞌdúúcā chi tumicadíínuuⁿ yā chi nꞌdaacā caavā sꞌuuúⁿ. Ndyuūs yeⁿꞌe yú ní diíⁿ yā castigar sꞌuuúⁿ ti cuáácú chí nꞌdai caavā sꞌuuúⁿ ti sꞌuuúⁿ ní cuuvi dinꞌdai ca yú tanꞌdúúcā chi Ndyuūs ní nꞌdai cá yā. 11 Cuaacu chi nguɛ́ɛ́ yeenu yú taachi tée yā castigo sꞌuuúⁿ naati yáꞌai yú. Cuayiivi ní ꞌiiⁿꞌyāⁿ chi tuumicádíínuuⁿ yā yeⁿꞌē castigo yeⁿꞌé yā ni vɛ́ɛ́ chi nꞌdaācā yeⁿꞌe castigo. ꞌIiⁿꞌyāⁿ sꞌeeⁿ dinꞌdaacā cá yā ní canéé ꞌdiīiⁿ vida yeⁿꞌé yā.
Vɛ́ɛ́ peligro yeⁿꞌē yú nduuti chi nguɛ́ɛ́ nꞌgiindiveeⁿ yú nduudu yeⁿꞌé Ndyuūs
12 Maaⁿ ní Ndyuūs ꞌāā tee yā castigo ndísꞌtiī ní maaⁿ ní cutaꞌá nī fuerzas ndúúcū taꞌá nī ní dicuaacú nī duūⁿntiiꞌyá nī chi ndicuūnū. 13 Cachiicá nī ná yúúní cuaacu maaⁿ ní ꞌíícú cuuvi nanduūvā yeⁿꞌé nī caꞌa nī chi ndíí dúúvá yeⁿꞌe nī.
14 Maaⁿ ndísꞌtiī ní diíⁿ nī chi ꞌdiiíⁿ ꞌcuɛɛtinée nī ndúúcū nducyaaca ꞌiiⁿꞌyāⁿ. Ní diíⁿ nī nducuéⁿꞌē chi nꞌdaacā ca caati dɛɛvɛ canéé vida yeⁿꞌé nī. ꞌIiⁿꞌyāⁿ chi nguɛ́ɛ́ dɛɛvɛ vida yeⁿꞌé yā nguɛ́ɛ́ cuuvi nꞌdiichí yā Señor Ndyuūs. 15 Cundɛ́ɛ nī cuidado chi mar ꞌáámá ndísꞌtiī nguɛ́ɛ́ divíi nī yeⁿꞌe Ndyuūs ti nguɛ́ɛ́ cuuvi inneé yā ndísꞌtiī. Ní nguɛ́ɛ́ cúúví cunee ꞌaamá nī nguaaⁿ ndísꞌtiī chi tanꞌdúúcā ꞌáámá diiꞌyu yaātā yaāa chi diiⁿ daño yeⁿꞌe nducuéⁿꞌē diiꞌyu yaātā. ꞌTíícā cuuvi diiⁿ daño ꞌáámá nī tanꞌdúúcā chi veneno nguaaⁿ ndísꞌtiī. 16 Candɛ́ɛ nī cuidado chi mar ꞌáámá ndísꞌtiī nguɛ́ɛ́ caⁿꞌá nī ndúúcū nꞌdaataá o saⁿꞌā chi nguɛ́ɛ́ yeⁿꞌe nī. Ní nguɛ́ɛ́ diíⁿ nī cuenta yeⁿꞌe nducuéⁿꞌē chi yeⁿꞌé Ndyuūs. ꞌTíícā diiⁿ saⁿꞌā Esaú ti cáávā ꞌáámá comida nūuⁿ nꞌdiicuí sá chi cuuvi yeⁿꞌe sa ti saⁿꞌā vmnaaⁿ. 17 Ní ndísꞌtiī deenú nī yeⁿꞌe saⁿꞌā Esaú taachi neⁿꞌe sa cutaꞌa sa yeⁿꞌe chiidá sa chi cuuvi yeⁿꞌē sa ti saⁿꞌā daiya vmnaaⁿ, naati nguɛ́ɛ́ ꞌcuūⁿ chiida sa. Ní Esaú chɛɛ̄cū taavi sá ní nꞌnuuⁿ sa manera chi nduuvi nꞌdaacā chi ꞌāā diiⁿ sa naati nguɛ́ɛ́ ndaācā nꞌdaaca sa.
18 Maaⁿ ní ndísꞌtiī nguɛ́ɛ́ ndáa nī na yiīcū chi ngiichi chi diíⁿ nī sentir ngiichi miiⁿ, tanꞌdúúcū chi diiⁿ ꞌiiⁿꞌyāⁿ Israel tiempo chi ꞌāā chóꞌōo. Ndíí nguɛ́ɛ́ diíⁿ nī sentir maāiⁿ, ndíí nguɛ́ɛ́ ndúú meēeⁿ, ndíí nguɛ́ɛ́ ndúú ꞌáámá cheeⁿ cúúvī díítūu. 19 Ní nguɛ́ɛ́ nꞌgiindiveéⁿ nī chi chꞌɛɛ̄cū trompeta miiⁿ ní nguɛ́ɛ́ nduudu yeⁿꞌé Ndyuūs chi caⁿꞌa yā ndúúcū ꞌiiⁿꞌyāⁿ sꞌeeⁿ. Taachí ꞌiiⁿꞌyāⁿ sꞌeeⁿ chꞌiindiveéⁿ yā nduudu yeⁿꞌe Ndyuūs chiica yā Ndyuūs chi ꞌāā ntɛ́ɛ́ caaⁿꞌmaⁿ cá yā ꞌiiⁿꞌyāⁿ sꞌeeⁿ. 20 ꞌTíícā ngaⁿꞌa yā ti nguɛ́ɛ́ cuuvi chɛɛ yā chi Ndyuūs ngaⁿꞌa ntiiⁿnyuⁿ yā ti ꞌtíícā: Ndúúti chi ꞌáámá ꞌiiti nindaá tī na yiīcu ꞌcūū canee chi cuiituú yā ꞌiiti ní ꞌcaaⁿꞌnúⁿ yā ꞌiiti. 21 Ní maaⁿ Moisés miiⁿ ní taachi nꞌdiichí yā yiīcu ꞌcūū ní chꞌiindiveéⁿ yā nducuéⁿꞌē, ꞌtíícā ngaⁿꞌá yā: Nééné ꞌvaꞌá ní yiinꞌduuvi ꞌúú.
22 Maaⁿ ní nguɛ́ɛ́ ꞌtíícā ti ndísꞌtiī ndaa nī ꞌáámá yiīcū chi nguuvi Sión chi yáāⁿ yeⁿꞌe Ndyuūs chi cánduuchi chí yáāⁿ Jerusalén chí vaꞌai chɛɛti nguuvi naachi nꞌdeee nꞌdáí miles ángeles snée yā. 23 Ní nduuvidaamá yā chi dichꞌɛɛtɛ́ yā Ndyuūs. Ní miiⁿ canee nducyaaca ꞌiiⁿꞌyāⁿ chi daiyá Ndyuūs. Ní chi duuchí yā canéé nguūⁿ na libro yeⁿꞌē vaꞌai chɛɛti nguuvi. Nducyaaca nī ndaa nī nanááⁿ Ndyuūs chi diíⁿ yā juzgar nducyáácá ꞌiiⁿꞌyāⁿ. Ní ndísꞌtiī chi yeⁿꞌē iⁿꞌyeeⁿdí ꞌcūū ní ndaa nī nanááⁿ espíritu sꞌeeⁿ yeⁿꞌe ꞌiiⁿꞌyāⁿ chi dɛɛvɛ ca chi Ndyuūs diíⁿ yā chi nguɛ́ɛ́ nuuⁿndi yeⁿꞌé yā. 24 Ní ndaá nī nanááⁿ Jesucristo chi abogado chi canúuⁿ yā naavtaⁿꞌā compromiso chí ngai chi yeⁿꞌé Ndyuūs ndúúcū ꞌiiⁿꞌyāⁿ. Ní ndaá nī nanááⁿ Cristo chi chingée yā yuūúⁿ yeⁿꞌé yā cucáávā sꞌuuúⁿ. Yuūúⁿ yeⁿꞌe Cristo ní nꞌdaacā ca nguɛ́ɛ́ ti yuūúⁿ yeⁿꞌe Abel. Ndúúcū yuūúⁿ yeⁿꞌe Cristo, Ndyuūs nadichꞌɛɛcú yā nuuⁿndi yeⁿꞌe ꞌiiⁿꞌyāⁿ. Naati cáávā ꞌdíínu Abel chꞌiiⁿꞌnúⁿ Abel tuuꞌmi ní Ndyuūs caꞌa yā castigo ꞌdíínu Abel.
25 Ní cáávā nducuéⁿꞌē chuū candɛɛ́ nī cuidado chi nꞌgiindiveéⁿ nī nduudu yeⁿꞌe Ndyuūs chi ngaⁿꞌá yā ngīi yā ndísꞌtiī. ꞌIiⁿꞌyāⁿ sꞌeeⁿ chi nguɛ́ɛ́ chꞌiindiveéⁿ yā nduudu yeⁿꞌe Cristo taachí snée yā iⁿꞌyeeⁿdí ꞌcūū nguɛ́ɛ́ nguaⁿꞌáí yā yeⁿꞌē nuuⁿndi yeⁿꞌé yā. Ní ꞌtɛɛ cá sꞌuuúⁿ chi cuuvi nguaⁿꞌāī yú nduuti chi ndaacadaami yú yeⁿꞌé Cristo chi canee na vaꞌai chɛɛti nguuvi ní ngaⁿꞌá yā ndúúcū sꞌuuúⁿ yeⁿꞌe chi cuchiī. 26 Tiempo chi chóꞌōo taachi Ndyuūs ngaⁿꞌá yā yeⁿꞌe yiīcū nuⁿꞌu yáⁿꞌāa. Maaⁿ ní Ndyuūs ngaⁿꞌá yā ꞌtíícā: Taama vmnéⁿꞌēe inuⁿꞌú yáⁿꞌāa ndúúcū nanguuvi. 27 Maaⁿ ní taachi ngaⁿꞌa Ndyuūs taama vmnéⁿꞌēe nūuⁿ deenu yú chi nducuéⁿꞌē chi dinꞌdái Ndyuūs ní caⁿꞌá yā dinꞌnúⁿꞌu yā ní divíi yā. Ní nducuéⁿꞌē chi nguɛ́ɛ́ dinꞌnúⁿꞌu yā ní cūnee. 28 Canéé chí caꞌa yú gracias Ndyuūs caati vɛ́ɛ́ yáāⁿ yeⁿꞌe yú, lugar naachi Ndyuūs ngaⁿꞌa ntiiⁿnyuⁿ yā. Ní nguɛ́ɛ́ cuuví nuⁿꞌu lugar miiⁿ. Canee chi dichꞌɛɛtɛ yú Ndyuūs ní iꞌteenu yú Ndyuūs. Ní ꞌvaꞌa yú yeⁿꞌé yā ní diiⁿ yú tanꞌdúúcā chi neⁿꞌe yā. 29 Ndyuūs yeⁿꞌe yú tanꞌdúúcā ꞌáámá nguuchi yáⁿꞌā chí dituūví nducuéⁿꞌē chi nguɛ́ɛ́ nꞌdaacā. Tiicá yā.