3 Nanꞌgaacu yú yeⁿꞌe ꞌiiⁿꞌyāⁿ chi snúúⁿ yā vácūū. Diiⁿ yú cuenta chi sꞌuuúⁿ snuūⁿ yú vácūū nduucú yā. Nanꞌgaacu yú yeⁿꞌe ꞌiiⁿꞌyāⁿ chi nꞌgeenú yā ngii na cuerpo yeⁿꞌé yā ní diiⁿ yú cuenta chi sꞌuuúⁿ ní nꞌgeenu yú ngii na cuerpo yeⁿꞌe yú nduucú yā.

4 Diiⁿ yú respetar ꞌiiⁿꞌyāⁿ chi nꞌgiindivaacú yā ti nguɛ́ɛ́ dinuuⁿndí yā. ꞌIiⁿꞌyāⁿ chi nꞌgiindivaacú yā canee chi caⁿꞌá yā dámaāⁿ ndúúcū isaⁿꞌā o nꞌdaataá yeⁿꞌé yā. Ndyuūs ní nꞌdiichí yā nuuⁿndi yeⁿꞌe ꞌiiⁿꞌyāⁿ chi vɛ́ɛ́ nuuⁿndi yeⁿꞌé yā ndúúcū ꞌiiⁿꞌyāⁿ chi nꞌgiindivaacú yā ní caⁿꞌá yā ndúúcū táámá nꞌdaataá o saⁿꞌā.

5 Nguɛ́ɛ́ dineⁿꞌe yú tuūmī naati yeenú yú ndúúcū chi vɛ́ɛ́ chi yeⁿꞌe yú ti Ndyuūs ngaⁿꞌá yā ꞌtíícā: ꞌÚú nguɛ́ɛ́ cuꞌneéⁿ ndísꞌtiī ní nguɛ́ɛ́ diíⁿ abandonar ndísꞌtiī. 6 Ní ꞌtíícā cuuvi caaⁿꞌmaⁿ cuaacu yú ndúúcū confianza:

7 Nanꞌgaacú nī yeⁿꞌe ꞌiiⁿꞌyāⁿ nꞌgɛɛtɛ yeⁿꞌe yaācū chi ngaⁿꞌa ntiiⁿnyúⁿ yā nanááⁿ ndísꞌtiī ní ngaⁿꞌá yā ngii yā ndísꞌtiī nduudu cuaacu yeⁿꞌé Ndyuūs. Nadacadíínuuⁿ nī tááca ꞌiiⁿꞌyāⁿ sꞌeeⁿ diíⁿ yā ní nꞌgɛɛtineé yā ní chꞌīi yā. Maaⁿ ní candɛ́ɛ nī cuidado chi diíⁿ nī tanꞌdúúcā ꞌiiⁿꞌyāⁿ nꞌgɛɛtɛ chi iꞌtéénu yā Ndyuūs diíⁿ yā ti ꞌiiⁿꞌyāⁿ sꞌeeⁿ ejemplo yeⁿꞌé nī.

8 Jesucristo miiⁿ ní ꞌāā ꞌtiicá nūuⁿ tanꞌduucá yā ꞌiicu, ꞌtiicá ntúuⁿ yā maaⁿnguuvi. ꞌĀā ꞌtiica nuúⁿ yā cueⁿꞌe daāⁿmaⁿ. 9 Cuinꞌdiichí nī ndísꞌtiī. Nguɛ́ɛ́ ꞌcaandiveéⁿ nī ndúúdú ꞌnaⁿꞌa chi n̄ꞌdááⁿ ndúúcū yeⁿꞌē chi cheꞌe yú. Nꞌdaacā ca chi staava yeⁿꞌé nī canéé nꞌdaacā chi cuuvi cutaꞌá nī fuerzas yeⁿꞌē nducuéⁿꞌē chi nꞌdai taavi chi Ndyuūs itée yā ndísꞌtiī. Staava yeⁿꞌé ꞌiiⁿꞌyāⁿ nguɛ́ɛ́ diiⁿ aprovechar nduuti chi chiindiveéⁿ yā nduudu n̄ꞌdááⁿ ndúúcū yeⁿꞌe chi cheꞌe yú.

10 Deenu yú chi chiiduú sꞌeeⁿ chi diíⁿ yā ntiiⁿnyuⁿ yeⁿꞌe yaācū yeⁿꞌé yā nguɛ́ɛ́ cuuvi cheꞌé yā yuūtɛ̄ yeⁿꞌe nátai yeⁿꞌe ꞌiiti chi chꞌiiⁿꞌnúⁿ yā cáávā ofrenda yeⁿꞌe yú ti ofrenda yeⁿꞌe yú ní ꞌāā viꞌí caā ti iꞌteenu yú Jesucristo. Ní Jesucristo miiⁿ ní chꞌīi yā chi lado yeⁿꞌe ofrenda yeⁿꞌe yú. 11 Chiiduú chꞌɛɛtɛ ca yeⁿꞌe judíos chi Israel sꞌeeⁿ taachi chꞌiiⁿꞌnúⁿ yā ꞌiiti cáávā ofrenda yeⁿꞌe nuūⁿndī candɛ́ɛ yā yuūúⁿ yeⁿꞌé ꞌiiti chɛɛti cuarto chi nguuvi Dɛɛvɛ naati cuerpo yeⁿꞌē ꞌiiti miiⁿ ní ngiichí yā ꞌáámá lado yeⁿꞌē yáāⁿ yeⁿꞌé yā. 12 Ní ꞌtiicá ntúūⁿ Jesucristo chꞌīi yā cuaaⁿ dáámí cheendi vaꞌāī yeⁿꞌe yáāⁿ Jerusalén ní ꞌíícú cuuvi dɛɛvɛ́ yā ꞌiiⁿꞌyāⁿ yeⁿꞌe nuuⁿndi yeⁿꞌé yā ndúúcū yuuúⁿ yeⁿꞌe maáⁿ yā. 13 Maaⁿ ní caⁿꞌa yú tanꞌdúúcā chi cueⁿꞌe Jesús ꞌáámá lado yeⁿꞌē yáāⁿ ní ꞌcueenu yú cuuvi tanꞌdúúcā chi chꞌeenú yā chiī ní cuuvi ꞌcuinaaⁿ yú tanꞌdúúcā chi ꞌcuinaáⁿ yā. 14 Caati nguɛ́ɛ́ vɛ́ɛ́ ꞌáámá yáāⁿ chi ꞌáámá cūnee cáávā sꞌuuúⁿ naati inꞌnuuⁿ yú ꞌáámá yáāⁿ chꞌɛɛtɛ chi ꞌáámá cūnee chi vɛ́ɛ́ tiempo chi cuchiī. 15 Ní cáávā chuū canee yú chi dichꞌɛɛtɛ yú Ndyuūs cucáávā Jesucristo. Ní taachi dichꞌɛɛtɛ yú Ndyuūs chuū ní ofrenda chi canee chi caꞌa yú Ndyuūs. Ní canéé chi caꞌa yú gracias Ndyuūs cáávā Jesucristo ndúúcū nduudu yeⁿꞌē yú. 16 Nguɛ́ɛ́ cuuvi ꞌnáaⁿ nī chi dinꞌdaacá nī ní nneé nī ꞌaamá nī taamá nī caati chuū ní ofrenda yeⁿꞌé nī chi ꞌtúúcā Ndyuūs neⁿꞌe yā.

17 Cuꞌneeⁿveéⁿ nī nduudu yeⁿꞌé ꞌiiⁿꞌyāⁿ chi ngaⁿꞌa ntiiⁿnyuⁿ yeⁿꞌé nī. Cuꞌtéénu nī yeⁿꞌé yā chi ngaⁿꞌa yā caati ꞌiiⁿꞌyāⁿ sꞌeeⁿ diíⁿ yā cuidado yeⁿꞌē staava yeⁿꞌé nī. ꞌIiⁿꞌyāⁿ sꞌeeⁿ canéé chi ncaꞌá yā cuenta nanááⁿ Ndyuūs yeⁿꞌē ntiiⁿnyuⁿ chi diíⁿ yā. Diiⁿ núúⁿ yiiⁿnu nī chi ngaⁿꞌa yā caati yeenú yā diíⁿ yā ntiiⁿnyuⁿ yeⁿꞌé yā. Ti nduuti chi nguɛ́ɛ́ diíⁿ nī ꞌtúúcā nguɛ́ɛ́ yeenú yā ní nguɛ́ɛ́ diíⁿ nī aprovechar yeⁿꞌē ntiiⁿnyuⁿ chi diíⁿ yā cáávā ndísꞌtiī.

18 Maaⁿ ní caaⁿꞌmaⁿnguaꞌá nī cáávā núsꞌuu ti nadacadiinúúⁿ ꞌnū nꞌdaacā na staava yeⁿꞌé ꞌnū ní neⁿꞌé ꞌnū ꞌcuɛɛtinéé nꞌdaacá ꞌnū yeⁿꞌe nducuéⁿꞌē denduꞌū. 19 ꞌÚú ngiicá ndísꞌtiī chi taachi ngaⁿꞌanguaꞌá nī, ngiicá nī Ndyuūs chi tée yā lugar ꞌnū chi niiⁿnuúⁿ nūuⁿ cuuví nandaá ní cuneé ndúúcū ndísꞌtiī.

20 Maaⁿ ní Ndyuūs ní yeⁿꞌē vaadī ꞌdiīiⁿ, maaⁿ Ndyuūs miiⁿ nadinꞌduuchí yā Jesucristo yeⁿꞌē yú yeⁿꞌē nguaaⁿ tináⁿꞌā chi Jesucristo miiⁿ Pastor chi chꞌɛɛtɛ nꞌdai chi diíⁿ yā cuidado sꞌuuúⁿ chi tanꞌdúúcā ꞌiiti cuūchī yeⁿꞌé yā. Ní Jesucristo yeⁿꞌē yú ndúúcū yuūúⁿ yeⁿꞌé yā diíⁿ yā chi ꞌáámá cūnee compromiso chi Ndyuūs diíⁿ yā ndúúcū ꞌiiⁿꞌyāⁿ. 21 Neⁿꞌé chi Ndyuūs yeⁿꞌe vaadī ꞌdiīiⁿ tée yā ndísꞌtiī nducuéⁿꞌē chi nꞌdai yeⁿꞌé yā chi nguɛ́ɛ́ yeⁿꞌé nī. Ní cuuvi nꞌdaí nī ti ndísꞌtiī cuuvi diíⁿ nī chiiⁿ chi neⁿꞌé Ndyuūs chi diíⁿ nī. Ní neⁿꞌé chi Ndyuūs diíⁿ yā cáávā nducyaaca yú nducuéⁿꞌē chi neⁿꞌé yā diíⁿ yā cáávā Jesucristo. Caⁿꞌa yú chi chꞌɛɛtɛ ca canéé Cristo ní nꞌdɛɛvɛ́ ngii yā cuéⁿꞌé daāⁿmaⁿ cueⁿꞌe daāⁿmaⁿ. ꞌTíícā. 22 Ndísꞌtiī hermanos yeⁿꞌé ngiicá ndísꞌtiī chí cuchɛɛ́ nī ndúúcū nduudu chi ngiꞌcueéⁿ ti nguɛ́ɛ́ ꞌyaaⁿ idinguúⁿ na carta miiⁿ yeⁿꞌé ndísꞌtiī. 23 Yaaꞌví ndísꞌtiī chi cadiinúúⁿ nī chi Timoteo hermano yeⁿꞌē yú ꞌāā ntɛ́ɛ́ canee sa vácūū. Ní ndúúti chi niiⁿnuⁿ niiⁿnuⁿ ndaa sa nanáaⁿ ꞌúú tuuꞌmi ꞌúú ní candɛɛ́ saⁿꞌā taachi ndaá nanááⁿ ndísꞌtiī ní nꞌdiichí ndísꞌtiī.

24 Maaⁿ ní caaⁿꞌmáⁿ nī ꞌiiⁿꞌyāⁿ chi ngaⁿꞌa ntiiⁿnyuⁿ yeⁿꞌé nī ndúúcū nducyaaca ꞌiiⁿꞌyāⁿ chi iꞌtéénu yā Jesucristo: Nꞌdaí ndísꞌtiī, caaⁿꞌmáⁿ nī. ꞌIiⁿꞌyāⁿ yeⁿꞌe país Italia: Nꞌdaí ndísꞌtiī, ngaⁿꞌa yā.

25 Neⁿꞌé chi Ndyuūs tée yā nducyaaca ndísꞌtiī nducuéⁿꞌē vaadī nꞌdai yeⁿꞌé yā. ꞌTíícā cuuvi.