Jesucristo ní abogado yeⁿꞌē táámá compromiso
8
Chuū chi caⁿꞌa ꞌnū ní chꞌɛɛtɛ ca yeⁿꞌe tanducuéⁿꞌē chi ngaⁿꞌá ꞌnū chi ꞌtíícā. Chiiduú chꞌɛɛtɛ ca yeⁿꞌe yú chi Jesucristo ní vɛɛ́ yā ná vaꞌai chɛɛti nguuvi na lado yeⁿꞌē honor yeⁿꞌe trono yeⁿꞌé Ndyuūs chí canéé na vaꞌai chɛɛti nguuvi. 2 Ní Jesucristo diíⁿ yā ntiiⁿnyuⁿ yeⁿꞌē chiiduú chꞌɛɛtɛ ca na yaācū na vaꞌai chꞌɛɛtɛ nguuvi chi cuaacu nííⁿnyúⁿ chí yeⁿꞌé Ndyuūs. Ní ꞌiiⁿꞌyāⁿ sꞌeeⁿ nguɛ́ɛ́ dinꞌdái yā yaācū miiⁿ ti Señor Jesucristo maáⁿ yā dinꞌdái yā. 3 ꞌIiⁿꞌyāⁿ sꞌneéⁿ yā caꞌáámá cāꞌaama chiiduú chꞌɛɛtɛ ca chi canéé chí caꞌá yā ofrenda ní ꞌcaaⁿꞌnúⁿ yā ꞌiiti cáávā nuuⁿndi yeⁿꞌé ꞌiiⁿꞌyāⁿ. Cáávā chuū Jesucristo canéé chi vɛ́ɛ́ yeⁿꞌé yā chi cuuví caꞌa yā chi vida yeⁿꞌe maáⁿ yā. 4 Ní ndúútí chi Cristo miiⁿ cunée yā iⁿꞌyeeⁿdí ꞌcūū nguɛ́ɛ́ cuuvi chiidúú yā caati vɛ́ɛ́ chiiduú sꞌeeⁿ chi ngaꞌa yā ofrendas nanááⁿ Ndyuūs tanꞌdúúcā chi ngaⁿꞌa ley yeⁿꞌe Moisés. 5 Ní chiiduú sꞌeeⁿ ní diíⁿ yā ntiiⁿnyuⁿ yeⁿꞌé yā ní diíⁿ yā tanꞌdúúcā ntiiⁿnyuⁿ yeⁿꞌe yaācū chi canéé na vaꞌai chꞌɛɛti nguuvi. Deenú ꞌnū chi diíⁿ yā copiar ntiiⁿnyuⁿ yeⁿꞌé Ndyuūs ti taachi Moisés neⁿꞌé yā dinꞌdái yā yaācū chi vaꞌai tíínūuⁿ, Ndyuūs caⁿꞌa yā chīi yā Moisés ní ngaⁿꞌa yā:Dii, Moisés, candɛ́ɛ nī cuidado yeⁿꞌē tanducuéⁿꞌē chi diiⁿ di. Ní diiⁿ di tanꞌdúúcā chi chꞌiⁿꞌí dii taachi canee di na cuɛ́ɛ́tí. 6 Naati Cristo chi chiiduú chꞌɛɛtɛ ca yeⁿꞌe yú diíⁿ yā ntiiⁿnyuⁿ chí chꞌɛɛtɛ taavi ca nguɛ́ɛ́ ti yeⁿꞌe chiiduú nꞌgɛɛtɛ ca yeⁿꞌē iⁿꞌyeeⁿdí ꞌcūū caati Ndyuūs diíⁿ yā compromiso chi Cristo canéé yā naavtaⁿꞌā yeⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ndúúcū Ndyuūs. Maaⁿ ní sꞌuuúⁿ cuuvi ndaa yú nanááⁿ Ndyuūs cáávā Cristo miiⁿ. Ní compromiso miiⁿ ní chꞌɛɛtɛ ca tí yeⁿꞌe tanducuéⁿꞌē chi nꞌdaacā taavi ca.
7 Ní nduuti chí compromiso chi vmnááⁿ vmnaaⁿ chi yeⁿꞌé Ndyuūs ní nꞌdaacā taavi ca tuuꞌmi ní nguɛ́ɛ́ canee chi diíⁿ yā ndiichí ndii ꞌúúví compromiso. 8 Naati Ndyuūs nꞌdiichi yā chi nguɛ́ɛ́ nꞌdaacā diíⁿ ꞌiiⁿꞌyāⁿ tiempo chi ꞌāā chóꞌōo. Ní ngaⁿꞌá yā ngīi yā ꞌiiⁿꞌyāⁿ sꞌeeⁿ tanꞌdúúcā chi canéé nguūⁿ na libro yeⁿꞌé yā ꞌtíícā:
ꞌTíícā ngaⁿꞌa Señor: Tiempo chi cuchiī ꞌúú ní diíⁿ ꞌáámá compromiso ngaī ndúúcū ꞌiiⁿꞌyāⁿ yeⁿꞌe ndaata Israel ní ndúúcū ꞌiiⁿꞌyāⁿ yeⁿꞌe ndaata Judá.
9 Nguɛɛ idiíⁿ tanꞌdúúcā chi diíⁿ ndúúcū chiidá yā taachi divíi ꞌiiⁿꞌyāⁿ yeⁿꞌe yáⁿꞌāa Egipto. ꞌIiⁿꞌyāⁿ sꞌuuⁿ nguɛ́ɛ́ diíⁿ yā tanꞌdúúcā chi ꞌúú yaaꞌví ꞌiiⁿꞌyāⁿ sꞌuuⁿ. Ní cáávā chuū nguɛ́ɛ́ diíⁿ cuenta yeⁿꞌé yā.
10 Cuayiivi chi chóꞌōo nguuvi sꞌeeⁿ ní maaⁿ ní chuū chi compromiso ngaī chi caⁿꞌá diíⁿ ndúúcū ꞌiiⁿꞌyāⁿ yeⁿꞌe nación Israel. Ngaⁿꞌa Señor: Cuꞌneéⁿ leyes yeⁿꞌé na vaanicadíínūuⁿ yeⁿꞌé yā ní dinguúⁿ leyes yeⁿꞌé na staava yeⁿꞌé yā. Ní ꞌúú cuuvi Ndyuūs yeⁿꞌé yā, ní ꞌiiⁿꞌyāⁿ sꞌeeⁿ cuuvi ꞌiiⁿꞌyāⁿ yeⁿꞌé.
11 Ní mar ꞌáámá yā canee chi caꞌcueéⁿ yā ꞌiiⁿꞌyāⁿ yeⁿꞌe nación yeⁿꞌé yā ꞌtíícā. Ndísꞌtiī nꞌdiichí nī Señor miiⁿ, caati nducyáácá yā ní nꞌdiichí yā ꞌúú ndíí ꞌiiⁿꞌyāⁿ chi ngaⁿꞌā ntiiⁿnyúⁿ yā ndii tanáꞌā ꞌiiⁿꞌyāⁿ.