Nguɛ́ɛ́ caaⁿꞌmaⁿ nī yeⁿꞌē chi idiiⁿ hermano yeⁿꞌé nī
14
Ndísꞌtiī ní cutaꞌá nī nguaaⁿ ndísꞌtiī hermanos yeⁿꞌe yú chí duūva yā yeⁿꞌe chi iꞌtéénu yā; ní nguɛ́ɛ́ nééné nꞌdeēe caaⁿꞌmáⁿ nī nduucú yā yeⁿꞌe chi nadacádíínuuⁿ yā chi nguɛ́ɛ́ ituumicádíínuuⁿ yú yeⁿꞌē. 2 Ti ꞌtíícā, vɛ́ɛ́ ꞌiiⁿꞌyāⁿ chi iꞌtéénu yā Ndyuūs ní nadicadíínuuⁿ yā chi cuuvi cheꞌé yā nducuéⁿꞌē chi vɛ́ɛ́. Ní náⁿꞌá ꞌiiⁿꞌyāⁿ chi nguɛ́ɛ́ iꞌtéénu nꞌdaaca yā ní nguɛ́ɛ́ cuuvi cheꞌé yā nducuéⁿꞌē. Taachi caⁿꞌá yā cheꞌé yā nííꞌvɛ̄ɛ̄ nguɛ́ɛ́ cheꞌe yā yuūtɛ cáávā religión yeⁿꞌe yā. 3 ꞌIiⁿꞌyāⁿ chi cheꞌé yā tanducuéⁿꞌē chi vɛ́ɛ́ nguɛ́ɛ́ cánéé chi caaⁿꞌmáⁿ yā yeⁿꞌe chi nguɛɛ ineeⁿ yiinú yā yeⁿꞌé ꞌiiⁿꞌyāⁿ chi nguɛ́ɛ́ ngeꞌé yā nducuéⁿꞌē. Ní ꞌiiⁿꞌyāⁿ chi nguɛ́ɛ́ cheꞌé yā nducuéⁿꞌē nguɛ́ɛ́ canéé chí nꞌdiichí yā ꞌiiⁿꞌyāⁿ chi cheꞌe tanducuéⁿꞌē chi vɛ́ɛ́ caati Ndyuūs staꞌá ntúuⁿ yā ꞌiiⁿꞌyāⁿ sꞌeeⁿ chi cuuvi yeⁿꞌé yā ꞌiiⁿꞌyāⁿ. 4 Ndísꞌtiī, ¿duꞌū ndísꞌtiī chi nꞌdiichí nī chi diiⁿ ꞌiiⁿꞌyāⁿ chi dichííꞌvɛ̄ táámá yā? nduuti chi diíⁿ yā chi nꞌdaacā o chi nguɛ́ɛ́ nꞌdaacā. Dámaāⁿ ꞌiiví yā canéé chi nꞌdiichí yā ꞌiiⁿꞌyāⁿ chi dichííꞌvɛ yā. Ní nꞌdaacā cuuvi canee caavá yā, caati Señor Ndyuūs yeⁿꞌe yú cuuví diíⁿ yā chi canéé nꞌdaacā yeⁿꞌé yā caati Señor Ndyuūs vɛ́ɛ́ poder yeⁿꞌé yā chi inneé yā ꞌiiⁿꞌyāⁿ chi dichííꞌvɛ yā.5 Ní ꞌtiicá ntúūⁿ, ꞌáámá ꞌiiⁿꞌyāⁿ nadacadíínuuⁿ yā chi ꞌáámá nguuvi ní chꞌɛɛtɛ ca nguɛ́ɛ́ ti táámá nguuvi. Táámá ꞌiiⁿꞌyāⁿ nadacadíínuuⁿ yā chi ꞌāā daamá nūuⁿ nducuéⁿꞌē nguuvi. Ní caꞌáámá caꞌaama nī ní caneé nī tanꞌdúúcā chi diitu nadicádiinúúⁿ nī. 6 ꞌIiⁿꞌyāⁿ chi diíⁿ yā cuenta chi ꞌáámá nguuvi ní chꞌɛɛtɛ ca nguɛ́ɛ́ ti tanáⁿꞌā nguuvi, ꞌiiⁿꞌyāⁿ miiⁿ nadicadíínuuⁿ yā ꞌtíícā cáávā chi dichꞌɛɛtɛ́ yā Señor Ndyuūs yeⁿꞌé yā. ꞌIiⁿꞌyāⁿ chi nadicadíínuuⁿ yā dáámá nūuⁿ nducuéⁿꞌē nguuvi ꞌtiicá ntúūⁿ diíⁿ yā cáávā chi dichꞌɛɛtɛ́ yā Señor Ndyuūs yeⁿꞌé yā. Ní ꞌiiⁿꞌyāⁿ chi nguɛ́ɛ́ cheꞌé yā yeⁿꞌe tanducuéⁿꞌē chi vɛ́ɛ́ diíⁿ yā ꞌtúúcā cáávā chi iꞌtéénu yā Señor ní caꞌá yā gracias Ndyuūs cáávā chi cheꞌe yā. Ní ꞌtiicá ntúūⁿ ꞌiiⁿꞌyāⁿ chi cheꞌé yā yeⁿꞌe tanducuéⁿꞌē chi vɛ́ɛ́ diíⁿ yā ꞌtúúcā cáávā chi iꞌtéénu yā Señor ní ꞌtiicá ntúūⁿ caꞌá yā gracias Ndyuūs cáávā chi cheꞌe yā.
7 Ní ꞌtíícā mar ꞌáámá sꞌuuúⁿ nguɛ́ɛ́ snduuchi yú cucáávā maaⁿ yú ndíí nguɛ́ɛ́ ndúú ꞌcuūvi yú cucáávā maaⁿ yú. 8 Ndúúti chi snduuchi yú, snduuchi yú cáávā Señor. Ní nduuti chi ꞌcuūvi yú, ꞌcuūvi yú cáávā Señor. Maaⁿ ní ndúútī chi snduuchi yú o nꞌdiī yú yeⁿꞌe Señor sꞌuuúⁿ. 9 Ní Cristo chꞌīi yā ní nduuchi ntuúⁿ yā yeⁿꞌe nguaaⁿ tináⁿꞌā caati cuuví yā Señor yeⁿꞌe tináⁿꞌā, ní ꞌtiicá ntuūⁿ yeⁿꞌē ꞌiiⁿꞌyāⁿ chí snduuchi.
10 Maaⁿ ní dii, ¿dɛꞌɛ̄ cúúví chí nꞌdííchí nuuⁿndi yeⁿꞌe hermano yeⁿꞌē di? ¿O dɛ́ꞌɛ̄ cúúví chi nguɛɛ neⁿꞌe di hermano yeⁿꞌē di? ꞌTíícā nducyaaca yú canee chi naⁿꞌa yú nanááⁿ Cristo. Ní Cristo miiⁿ caⁿꞌá yā nꞌdiichí yā nuuⁿndi yeⁿꞌe yú. 11 Canéé nguūⁿ na libro yeⁿꞌé Ndyuūs ꞌtíícā:
Cuaacu nííⁿnyúⁿ tanꞌdúúcā chi ꞌúú chí canduuchí, ngaⁿꞌa Señor Ndyuūs, nducyáácá ꞌiiⁿꞌyāⁿ canéé chi cáántiiꞌyá yā nanáaⁿ ꞌúú, ní nducyaaca yā canee chi caaⁿꞌmáⁿ yā chi ꞌúú ní Ndyuūs ꞌúú.
12 Ní ꞌtíícā vaa. Caꞌáámá caꞌaama sꞌuūuⁿ canee chi caꞌa yú cuenta nanááⁿ Ndyuūs yeⁿꞌe chi maaⁿ yú diiⁿ yú.
Nguɛ́ɛ́ diíⁿ nī chi hermano yeⁿꞌé nī dinuuⁿndí yā
13 Cáávā chuū nguɛ́ɛ́ canéé chi nꞌdiichi yú yeⁿꞌe chi diiⁿ hermanos yeⁿꞌe yú. Nguɛ́ɛ́ idiiⁿ yú ꞌtúúcā. Canéé chi nadacádíínuuⁿ nī chi nguɛ́ɛ́ idiíⁿ nī mar ꞌáámá naaⁿ chi hermanos yeⁿꞌé nī nguɛ́ɛ́ cūnee yiinú yā ní cuuvá yā na nuuⁿndi. 14 Maaⁿ ní chi ꞌúú ni yeⁿꞌé Jesucristo ꞌúú, deenú chi cuaacu chi nguɛ́ɛ́ vɛ́ɛ́ mar ꞌáámá denduꞌū chi nguɛ́ɛ́ nꞌdaacā yeⁿꞌē maāáⁿ. Ní nduuti chi ꞌiiⁿꞌyāⁿ nadacádíínuuⁿ yā chi ꞌáámá denduꞌū nguɛ́ɛ́ nꞌdaacā, tuuꞌmi ní chuū ní cáávā ꞌiiⁿꞌyāⁿ miiⁿ cuaacu chi nguɛ́ɛ́ nꞌdaacā. 15 Ní nduuti chí cáávā ꞌáámá denduꞌū chi cheꞌé nī ní diíⁿ nī chi hermano yeⁿꞌé nī cuuvi yaꞌáí yā, tuuꞌmi ní nguɛ́ɛ́ diíⁿ nī ꞌtúúcā cáávā chi dineⁿꞌé nī hermano yeⁿꞌé nī. Nguɛ́ɛ́ diíⁿ nī chi cuuvi ndaí hermano yeⁿꞌe nī cáávā ꞌáámá denduꞌū chi cheꞌé nī caati Cristo ní chꞌīi yā cáávā ꞌiiⁿꞌyāⁿ miiⁿ. 16 Nguɛ́ɛ́ diíⁿ nī cosas chi ꞌiiⁿꞌyāⁿ cuuvi caaⁿꞌmáⁿ yā yeⁿꞌe chi ndísꞌtiī chi nguɛ́ɛ́ nꞌdaacā idiíⁿ nī yeⁿꞌe chi ndísꞌtiī deenú nī chi nꞌdaacā. 17 Naati chííⁿ chi yeⁿꞌē Ndyuūs chi ngaⁿꞌa ntiiⁿnyuⁿ yeⁿꞌē nguɛ́ɛ́ yeⁿꞌē chi ngeꞌe yú ndúúcū chi ngiꞌi yú. Ndyuūs ngaⁿꞌa ntiiⁿnyúⁿ yā yeⁿꞌē denduꞌū chi cuaacu ndúúcū vaadī ꞌdiīíⁿ ndúúcū vaadī yeenú chi Espíritu Nꞌdai yeⁿꞌé Ndyuūs tee yā sꞌuuúⁿ. 18 Ní ꞌiiⁿꞌyāⁿ chi dichííꞌvɛ̄ Cristo ní diíⁿ yā dendúꞌū chi ꞌtúúcā, ꞌiiⁿꞌyāⁿ miiⁿ diíⁿ yā tanꞌdúúcā chi neⁿꞌe Ndyuūs. ꞌTiicá ntuūⁿ ꞌiiⁿꞌyāⁿ yeⁿꞌe iⁿꞌyeeⁿdí ꞌcūū ngaⁿꞌa yā chi nꞌdaācā idiiⁿ ꞌiiⁿꞌyāⁿ miiⁿ.
19 Maaⁿ ní ꞌtíícā canee chi diiⁿ yú. Canéé chi diiⁿ yú denduꞌū cáávā chi ꞌiiⁿꞌyāⁿ ꞌcuɛɛtinée yā ndúúcū vaadī ꞌdiīiⁿ ní ndúúcū chi diiⁿ yú cunnee yú ꞌaama yú taama yú chi cuꞌtéénu ca yú yeⁿꞌe Ndyuūs. 20 Ní nguɛ́ɛ́ n̄dituuví nī dendúꞌū ntiiⁿnyuⁿ chi diiⁿ Ndyuūs cáávā ꞌáámá denduꞌū chi ngeꞌé nī. Cuaacu chi tanducuéⁿꞌē denduꞌū ní dɛɛvɛ naati nguɛ́ɛ́ nꞌdaacā idiiⁿ yú. Nduuti chi cheꞌe yú ꞌáámá denduꞌū, ní cáávā chi cheꞌe yú tuuꞌmi ní diiⁿ yú chi táámá ꞌiiⁿꞌyāⁿ dinuuⁿndí yā. 21 Nꞌdaacā ca chi nguɛ́ɛ́ diiⁿ yú mar ꞌáámá denduꞌū chi diiⁿ chi hermano yeⁿꞌe yú cuuvi dinuuⁿndí yā o diiⁿ chi nguɛ́ɛ́ iꞌtéénu yā nꞌdaacā. Nguɛ́ɛ́ cheꞌe yú yuutɛ̄ o nguɛɛ́ ngiꞌi yú vino o nguɛ́ɛ́ diiⁿ yú ꞌáámá denduꞌū chi ꞌtúúcā chí diiⁿ chi hermano yeⁿꞌe yú nduuví duūva yā yeⁿꞌe chi iꞌtéénu yā. 22 Ní yeⁿꞌe chi ndísꞌtiī iꞌtéénu nī yeⁿꞌe chi ngaⁿꞌa maáⁿ nī canéé chi iꞌtéénu nī yeⁿꞌē nanááⁿ Ndyuūs. Dɛꞌɛ chúúcā nꞌdai taavi ꞌiiⁿꞌyāⁿ chi staava yeⁿꞌé yā nguɛ́ɛ́ diiⁿ condenar maáⁿ yā cáávā cosa chi diiⁿ yā chi nguɛ́ɛ́ nꞌdaacā. 23 ꞌIiⁿꞌyāⁿ chi cheꞌé yā ꞌáámá denduꞌū ní nꞌdeee nadicadíínuuⁿ yā yeⁿꞌē nduuti chi nꞌdaacā o chi nguɛ́ɛ́ nꞌdaacā cuuví yā condenado caati nguɛ́ɛ́ ngeꞌé yā ndúúcū núúⁿmáⁿ staava yeⁿꞌé yā. Ní nducuéⁿꞌē chi diiⁿ yú taachi nguɛ́ɛ́ deenu yú nduuti chi nꞌdaacā o nguɛ́ɛ́ nꞌdaacā, tuuꞌmi ní dinuuⁿndi yú.