13
Nducyaaca yú canee chi cuꞌneeⁿ veeⁿ yú yeⁿꞌe ꞌiiⁿntyéⁿꞌē caati nguɛ́ɛ́ vɛ́ɛ́ mar ꞌáámá ꞌiiⁿntyéⁿꞌē chi nguɛ́ɛ́ Ndyuūs caꞌá yā ꞌiiⁿꞌyāⁿ chi vɛ́ɛ́ lugar yeⁿꞌé yā chi ꞌiiⁿntyéⁿꞌē. Ní Ndyuūs sꞌneéⁿ yā nducuéⁿꞌē ꞌiiⁿntyéⁿꞌē chi vɛ́ɛ́ na lugar yeⁿꞌe yā. 2 Ní ꞌiiⁿꞌyāⁿ chi nguɛ́ɛ́ idiíⁿ yā chi ngaⁿꞌa ꞌiiⁿntyéⁿꞌē ꞌtiicá ntúūⁿ ꞌiiⁿꞌyāⁿ ní contra yeⁿꞌe chi Ndyuūs ngaⁿꞌa ntiiⁿnyúⁿ yā. Ní ꞌiiⁿꞌyāⁿ chi diíⁿ yā ꞌtúúcā idinuuⁿndí yā ní cuuví yā condenado. 3 Ní ꞌiiⁿꞌyāⁿ chi nꞌdaacā idiíⁿ yā nguɛ́ɛ́ canee chi diꞌvaꞌá yā yeⁿꞌe ꞌiiⁿntyéⁿꞌē naati ꞌiiⁿꞌyāⁿ chi nguɛ́ɛ́ nꞌdaacā idiíⁿ yā ꞌvaꞌá yā yeⁿꞌe ꞌiiⁿntyéⁿꞌē. ¿ꞌÁá neⁿꞌé nī chi nguɛ́ɛ́ ꞌvaꞌá nī yeⁿꞌe ꞌiiⁿntyéⁿꞌē? Diíⁿ nī chi nꞌdaacā ní ꞌiiⁿntyéⁿꞌē miiⁿ ní cuuví ngaⁿꞌá yā chi nꞌdaacā idiíⁿ nī, 4 caati ꞌiiⁿntyéⁿꞌē chi ngaⁿꞌa yā ntiiⁿnyuⁿ dichííꞌvɛ̄ Ndyuūs cáávā chi cuuvi nꞌdaacā yeⁿꞌé nī. Naati nduuti chi idiíⁿ nī chi nguɛ́ɛ́ nꞌdaacā, tuuꞌmi ní diꞌvaꞌá nī yeⁿꞌe ꞌiiⁿntyéⁿꞌē. Caati cuaacu chi ꞌiiⁿntyéⁿꞌē cuuvi diíⁿ yā castigar ꞌiiⁿꞌyāⁿ tiī ꞌiiⁿntyéⁿꞌē ní vɛ́ɛ́ poder yeⁿꞌe yā. ꞌIiⁿntyéⁿꞌē ní dichííꞌvɛ̄ Ndyuūs ní canéé chi diíⁿ yā denduꞌū chi cuaacu. Ní diíⁿ yā castigar ꞌiiⁿꞌyāⁿ caati Ndyuūs nguɛ́ɛ́ inee yiinú yā yeⁿꞌe ꞌiiⁿꞌyāⁿ chi nguɛ́ɛ́ nꞌdaacā idiíⁿ yā. 5 Ni cáávā chuū canee chi ꞌcaandiveéⁿ nī chi ngaⁿꞌa ꞌiiⁿntyéⁿꞌē nguɛ́ɛ́ dámaāⁿ caavā chi cuuví nī castigo ti cáávā deenú nī chi nꞌdaacā chi nacadiinúúⁿ nī na staava yeⁿꞌé nī. 6 Ni ꞌtiicá ntúūⁿ caavā chúū, caꞌá nī tuumī cobrador yeⁿꞌē gobierno. ꞌIiⁿntyéⁿꞌē miiⁿ dichííꞌvɛ̄ Ndyuūs taachi diíⁿ yā ntiiⁿnyuⁿ yeⁿꞌé yā.7 Canee yú chi caꞌa yú tuumī cobrador yeⁿꞌe gobierno. Canee yú chi caꞌa yú tuumī yeⁿꞌe yáⁿꞌāa yeⁿꞌe yú cobrador miiⁿ. Canee yú chi diiⁿ yú chí cuꞌteenu yú ꞌiiⁿꞌyāⁿ ꞌiiⁿntyéⁿꞌē ní diiⁿ yú estimar ꞌiiⁿꞌyāⁿ sꞌeeⁿ. 8 Nguɛ́ɛ́ cunꞌdiicú nī yeⁿꞌē mar ꞌáámá ꞌiiⁿꞌyāⁿ nguɛ́ɛ́ duꞌū vɛɛ. Dámaāⁿ canee chi dineⁿꞌe yú nducyaaca ꞌiiⁿꞌyāⁿ. ꞌIiⁿꞌyāⁿ chi dineⁿꞌé nducyaaca ꞌiiⁿꞌyāⁿ diíⁿ yā tanꞌdúúcā chi ngaⁿꞌa ley yeⁿꞌe yú. 9 Ní mandamiento yeⁿꞌe ley yeⁿꞌe yú ní chuū chiiⁿ: Nguɛ́ɛ́ caⁿꞌá nī ndúúcū nꞌdaata o isaⁿꞌā chi nguɛ́ɛ́ yeⁿꞌé nī. Nguɛ́ɛ́ ꞌcaaⁿꞌnúⁿ nī ꞌiiⁿꞌyāⁿ. Nguɛ́ɛ́ diduucú nī. Nguɛ́ɛ́ caaⁿꞌmaⁿ nī nduudu yaadi yeⁿꞌe mar ꞌáámá ꞌiiⁿꞌyāⁿ. Nguɛ́ɛ́ dinéⁿꞌe nī denduꞌū chi vɛ́ɛ́ chi yeⁿꞌe táámá yā. Ní nducuéⁿꞌē mandamiento ꞌcūū ndúúcū tanáⁿꞌā mandamiento yeⁿꞌē ley yeⁿꞌe yú chi vɛ́ɛ́, ní cuuví cuaacú nduudu ní tuumicádíínuuⁿ yú na nduudú ꞌcūū: Dinéⁿꞌe nī ꞌiiⁿꞌyāⁿ niiⁿnuúⁿ vaacú nī tanꞌdúúcā chi dineⁿꞌé nī maáⁿ nī. 10 ꞌIiⁿꞌyāⁿ chi dineⁿꞌé yā ꞌiiⁿꞌyāⁿ niiⁿnuúⁿ vaacú yā nguɛ́ɛ́ cunncáā idiíⁿ yā ndúúcu yā. Ni ꞌtíícā. Taachi dineⁿꞌe yú ꞌiiⁿꞌyāⁿ diiⁿ yú tanꞌdúúcā chi ngaⁿꞌa ley yeⁿꞌe yú.
11 Nꞌdeee cá ní nguɛ́ɛ́ dámaāⁿ chúū. Nadacádíínuuⁿ yú yeⁿꞌe nguuvi sꞌeeⁿ chi canee yú iⁿꞌyeeⁿdí ꞌcūū. Canéé chi ꞌcuɛɛtinéé ngiinu yú caati yeⁿꞌe hora chi nguaⁿꞌai yú ní ꞌāā snee niiⁿnuúⁿ cá yeⁿꞌe sꞌuuúⁿ nguɛ́ɛ́ ti taachi caama iꞌtéénu yú Cristo. 12 Maaⁿ ní hora miiⁿ tanꞌdúúcā chi ꞌāā chɛ́ɛ́ cuuvi dɛɛvɛ ní ꞌāā cūchii nguuvi taachi ndaá Cristo maaⁿ. Ní nguɛ́ɛ́ canee chi diiⁿ yú denduꞌū chi nguɛɛ nꞌdaacā chi diiⁿ yú tanꞌdúúcā chi na maaíⁿ, naati nꞌdaacā ꞌcuɛɛtinee yú tanꞌdúúcā chi canee yú na dɛɛvɛ yeⁿꞌé Ndyuūs ní nꞌdaacā canee cáávā sꞌuuúⁿ. 13 Ní ꞌcuɛɛtinee yú nꞌdaacā tanꞌdúúcā chi canéé chi diiⁿ yú na dɛɛvɛ yeⁿꞌé Ndyuūs. Nguɛ́ɛ́ cuuvi cuuꞌvi yú ní nguɛ́ɛ́ idiiⁿ yú ꞌviicu yeⁿꞌē chi cheꞌe yú ndúúcū nꞌdeee nꞌdáí ruido. Ní nguɛ́ɛ́ ꞌcuáaⁿ yú caⁿꞌa yú ndúúcū nꞌdaataá o isaⁿꞌā chi nguɛ́ɛ́ yeⁿꞌe yú. Ndíí nguɛ́ɛ́ ndúú canee yú ndúúcū vicio yeⁿꞌe yú. Nguɛ́ɛ́ ꞌcaaꞌva yú ní nguɛ́ɛ́ ngueē yú yeⁿꞌē táámá ꞌiiⁿꞌyāⁿ. 14 Naati ꞌcuɛɛtinee yú nꞌdaacā ní diiⁿ yú tanꞌdúúcā chi Señor Jesucristo yeⁿꞌe yú diíⁿ yā. Ní nguɛ́ɛ́ diiⁿ yú tanꞌdúúcā chi neⁿꞌe maaⁿ cuerpo yeⁿꞌe yú.