Caꞌa yú vida yeⁿꞌe yú Ndyuūs ní diiⁿ yú tanducuéⁿꞌē chi neⁿꞌé yā
12
Maaⁿ ní ndísꞌtiī, hermanos yeⁿꞌé, cáávā chi Ndyuūs yaꞌai ꞌiinú yā yeⁿꞌe ndísꞌtiī, diꞌcuíítūu ndísꞌtiī chi caꞌá nī vida yeⁿꞌe maáⁿ nī tanꞌdúúcā ꞌáámá ofrenda chí canduuchi nanááⁿ Ndyuūs cáávā ntiiⁿnyuⁿ yeⁿꞌé Ndyuūs. Ní diíⁿ nī ntiiⁿnyuⁿ chi neⁿꞌé yā chi diíⁿ nī. Chuū chi diíⁿ nī ní cuaacu chi nꞌdai taavi chi inee yiinú Ndyuūs. Ní canéé chi diíⁿ nī ꞌtíícā. 2 Ní nguɛ́ɛ́ diíⁿ nī tanꞌdúúcā chi neⁿꞌe ꞌiiⁿꞌyāⁿ yeⁿꞌe iⁿꞌyeeⁿdí ꞌcūū naati cuaáⁿ nī lugar Ndyuūs chi n̄ꞌdaáⁿ yā vaanicadíínūuⁿ yeⁿꞌé nī ni ꞌtiicá ntuūⁿ n̄ꞌdaáⁿ yā vida yeⁿꞌé nī. Ní ꞌíícú cuuví deenú nī chɛɛ́ chi Ndyuūs neⁿꞌé yā chi diiⁿ nī, chɛɛ́ chi nꞌdaacā, chɛɛ́ chi cunee yiinú Ndyuūs ni chɛɛ́ chi nꞌdai taavi ca.3 Ní cáávā chi Ndyuūs tee yā ꞌúú chi nꞌdai taavi ntiiⁿnyuⁿ yeⁿꞌé yā ꞌúú ní ngaⁿꞌá ngīi caꞌáámá caꞌaama ndísꞌtiī chi nguɛ́ɛ́ nadacádíínuuⁿ nī chi nꞌgɛɛtɛ cá nī ngoꞌo ca chi canéé chi nadacádíínuuⁿ nī naati nadacádíínuuⁿ nī ní nꞌdiichí nī yeⁿꞌe maáⁿ nī ndúúcū chí iꞌtéénu nī chi Ndyuūs itée yā ndísꞌtiī. 4 Caati ꞌtíícā tanꞌdúúcā ꞌáámá cuerpo yeⁿꞌe ꞌiiⁿꞌyāⁿ chí neené nꞌdeee nááⁿ chi vɛ́ɛ́ yeⁿꞌē ní nguɛ́ɛ́ dáámá ntiiⁿnyuⁿ chi yeⁿꞌē nꞌdeee nááⁿ yeⁿꞌē; 5 ꞌtiicá ntúūⁿ sꞌuuúⁿ ꞌáárá chi nééné ꞌyaaⁿ yú ní sꞌuuúⁿ ní tanꞌdúúcā chi ꞌáámá cuerpo ti yeⁿꞌe Cristo sꞌuuúⁿ, ꞌtíícā sꞌuuúⁿ ní sꞌuuúⁿ ní tanꞌdúúcā chi nduuvidaama yú ꞌaama yú taama yú tanꞌdúúcā chi nꞌdeee nááⁿ yeⁿꞌe ꞌáámá cuerpo yeⁿꞌe maaⁿ yú, ꞌtíícā sꞌuuúⁿ.
6 Ní Ndyuūs tee yā yeⁿꞌe vaadi nꞌdai yeⁿꞌé yā ntiiⁿnyuⁿ chi n̄ꞌdááⁿ caꞌáámá caꞌaama sꞌuūuⁿ tanꞌdúúcā chi neⁿꞌé yā diíⁿ yā. Ní canee chi diiⁿ yú nꞌdai ntiiⁿnyuⁿ yeⁿꞌe yú. Ní nduuti chi Ndyuūs tee yā ntiiⁿnyuⁿ yeⁿꞌe yú chi candɛɛ yú nduudu cuaacu yeⁿꞌé yā chi tee yā sꞌuuúⁿ canéé chi caaⁿꞌmaⁿ yú nduudu miiⁿ tanꞌdúúcā chi iꞌtéénu yú. 7 Ní nduuti chi Ndyuūs tee yā sꞌuuúⁿ ntiiⁿnyuⁿ chi nginnee yú, tanáⁿꞌā ꞌiiⁿꞌyāⁿ canee chi cunnee yú nꞌdaacā ca. Ní sꞌuuúⁿ chi vɛ́ɛ́ ntiiⁿnyuⁿ yeⁿꞌe yú chí ngiꞌcueeⁿ yú canéé chi caꞌcueeⁿ yú nꞌdaacā. 8 Sꞌuūuⁿ chi diíⁿ ntiiⁿnyuⁿ chi yaaꞌvi née yú ꞌiiⁿꞌyāⁿ chi cuꞌtéénu cá yā canéé chi diiⁿ yú nꞌdaacā ca. Sꞌuuúⁿ chi vɛ́ɛ́ ca yeⁿꞌe yú chi cuuvi caꞌa yú taama yā, canéé chi caꞌa yú ndúúcū núúⁿmáⁿ staava yeⁿꞌe yú. Sꞌuuúⁿ chi ngaⁿꞌa ntiiⁿnyuⁿ yeⁿꞌe tanáⁿꞌā sꞌuuúⁿ canee chi ngaꞌa ntiiⁿnyuⁿ yú nꞌdaacā ca. Sꞌuuúⁿ chi caꞌa yú tanáⁿꞌā sꞌuuúⁿ chi nguɛ́ɛ́ vɛ́ɛ́ necesidades yeⁿꞌé yā canéé chi diiⁿ yú ní yeenu yú.
Yeⁿꞌe chi canéé chi diiⁿ yú ti yeⁿꞌe Cristo sꞌuuúⁿ
9 Canéé chi dineⁿꞌe yú ꞌaama yú taama yú ndúúcū núúⁿmáⁿ staava yeⁿꞌe yú. Ní nguɛ́ɛ́ dineⁿꞌe yú cosa chi nguɛɛ nꞌdaācā naati canéé chi diiⁿ yú tanducuéⁿꞌē chi nꞌdaacā. 10 Canéé chi dineⁿꞌe yú ꞌaama yú taama yú tanꞌdúúcā chi ꞌaama viꞌi yú chi cuaacu chi ꞌáámá yuuuⁿ yú ní dineⁿꞌe yú ꞌaama yú ndúúcū taama yú.
11 Ní nꞌdaacā idiiⁿ ca yú ntiiⁿnyúⁿ ní nguɛ́ɛ́ ꞌdaanꞌdí yú ní diiⁿ yú ntiiⁿnyuⁿ yeⁿꞌe Señor ndúúcū núúⁿmáⁿ staava yeⁿꞌe yú ti neⁿꞌe yú Señor yeⁿꞌe yú.
12 Ní cáávā chi Ndyuūs caⁿꞌá yā chi tée yā sꞌuuúⁿ chi cuuvi yeⁿꞌe yú canéé chi yeenu yú. Ní taachi nꞌgeenu yú ngii canéé chi cuchɛ́ɛ yú ngiinū ngiinū. Ní cuéⁿꞌé daāⁿmaⁿ canéé chi caaⁿꞌmaⁿnguaꞌa yú.
13 Ní canéé chi cunnee yú ꞌiiⁿꞌyāⁿ chi iꞌtéénu yā Ndyuūs ni tée yú yeⁿꞌe necesidades chi nguɛ́ɛ́ vɛ́ɛ́ yeⁿꞌé yā. Canéé chi cuaaⁿ yú ꞌiiⁿꞌyāⁿ chi diíⁿ yā visitar sꞌuuúⁿ.
14 Canéé chi caaⁿꞌmaⁿ yú: Dɛ́ꞌɛ chúúcā nꞌdai yeⁿꞌé ꞌiiⁿꞌyāⁿ chi nguɛ́ɛ́ nꞌdaacā idiíⁿ yā ndúúcū sꞌuuúⁿ. Ní ngiica yú Ndyuūs chi diꞌviicú yā ꞌiiⁿꞌyāⁿ sꞌeeⁿ ní nguɛ́ɛ́ taaⁿ yú nduucú yā.
15 Ní canéé chí cuuvi yeenu yú ndúúcū ꞌiiⁿꞌyāⁿ chi yeenú yā. Ní canéé chi cuɛɛcu yú ndúúcū ꞌiiⁿꞌyāⁿ chí ngɛɛcú yā.
16 Ní ꞌcuɛɛtinee yú nꞌdaacā ndúúcū ꞌáámá yú taama yú. Nguɛ́ɛ́ nadacádíínuuⁿ yú yeⁿꞌē maaⁿ yú chi chꞌɛɛtɛ́ naati ndiicúúⁿ nꞌdai ꞌcuɛɛtinee yú ní nguɛ́ɛ́ nadacádíínuuⁿ yú yeⁿꞌē maaⁿ yú chi sꞌuūuⁿ chí deenu yú.
17 Nguɛ́ɛ́ nanguɛɛcundii yú ní diiⁿ yú cosa chi nguɛɛ nꞌdaacā ndúúcū ꞌiiⁿꞌyāⁿ chi ꞌāā diíⁿ yā cosa chi nguɛ́ɛ́ nꞌdaacā ndúúcu yú. Diiⁿ núúⁿ yiiⁿnuⁿ yú chi diiⁿ yú dámaāⁿ chi nꞌdaacā ndúúcū nducyaaca ꞌiiⁿꞌyāⁿ. 18 Ní diiⁿ yú nducuéⁿꞌē chi nꞌdaacā chi cuuvi diiⁿ yú caati ꞌdiiíⁿ cuuvi cunee yú nguaaⁿ nducyaaca ꞌiiⁿꞌyāⁿ. 19 Ní ndísꞌtiī hermanos yeⁿꞌé chi neⁿꞌé taavi, nguɛ́ɛ́ diiⁿ yú castigar ꞌiiⁿꞌyāⁿ naati cuꞌneeⁿ yú nanááⁿ Ndyuūs ní nguɛ́ɛ́ cuuvi ꞌcuinaaⁿ yú. Ní ꞌíícú Ndyuūs cāꞌa yā castigo ꞌiiⁿꞌyāⁿ. Canéé nguūⁿ na libro yeⁿꞌé Ndyuūs ꞌtíícā: ꞌÚú chi Señor ní ngaⁿꞌá chi ꞌúú ní diíⁿ castigar ꞌiiⁿꞌyāⁿ yeⁿꞌe ꞌúú ní nadííꞌvɛ yā yeⁿꞌe chi nguɛ́ɛ́ nꞌdaāca chi diíⁿ yā. 20 Naati sꞌuuúⁿ ní diiⁿ yú tanꞌdúúcā chi canéé nguūⁿ na libro yeⁿꞌé Ndyuūs ꞌtíícā: Nduuti chi ꞌiiⁿꞌyāⁿ chi taáⁿ yā yeⁿꞌé nī nadichꞌɛɛcú nī yeⁿꞌe yā. Nduuti chi cuiicu yā, caꞌa nī chi cheꞌe yā. Ní nduuti chi yaaca yā, caꞌá nī chi cuꞌu yā. Tí caati diíⁿ nī ꞌtúúcā, tuuꞌmi ní diíⁿ nī chi ꞌcuinaáⁿ yā yeⁿꞌe chi diíⁿ yā chi taáⁿ yā ndúúcu nī. 21 Maaⁿ ní cuchɛɛ yú cáávā cosa chi nguɛɛ nꞌdaacā chi diiⁿ yú naati cuchɛɛ yú yeⁿꞌe tanducuéⁿꞌē chi nguɛɛ nꞌdaacā cáávā chi nꞌdaacā chi idiiⁿ yú.