10
Ndísꞌtiī hermanos yeⁿꞌé, neⁿꞌé ndúúcū núúⁿmáⁿ staava yeⁿꞌé chi nducyaaca ꞌiiⁿꞌyāⁿ Israel yeⁿꞌe ndaata yeⁿꞌé cuuvi nnguaⁿꞌai yā. Ní ꞌúú ní ngaⁿꞌanguaꞌá cááva yā. 2 Deenú chi cuaacu chi ꞌiiⁿꞌyāⁿ yeⁿꞌe ndaataá yeⁿꞌé ní neⁿꞌé yā dichꞌɛɛtɛ cá yā Ndyuūs naati nguɛ́ɛ́ diíⁿ yā tanꞌdúúcā chi neⁿꞌe Ndyuūs caati nguɛ́ɛ́ déénu yā táácā cuuvi diiⁿ yā. 3 Ní nguɛ́ɛ́ déénu yā táácā Ndyuūs diíⁿ yā aceptar ꞌiiⁿꞌyāⁿ chi cuuvi yeⁿꞌé yā ꞌiiⁿꞌyāⁿ. Ní diíⁿ yā chɛɛ chi nadacádíínuuⁿ yā chi nꞌdaacā. Ní nguɛ́ɛ́ neⁿꞌé yā diíⁿ yā tanꞌdúúcā chi Ndyuūs neⁿꞌe yā chi diiⁿ yā caati nꞌdaacā caneé yā nanááⁿ Ndyuūs. 4 Ní taachi ndaā Cristo diíⁿ yā chi ꞌāā viꞌí cā ley yeⁿꞌe Moisés. Ní maaⁿ ní nducyáácá ꞌiiⁿꞌyāⁿ chi iꞌtéénu yā Cristo, ꞌiiⁿꞌyāⁿ sꞌeeⁿ nꞌdaacā caneé yā nanááⁿ Ndyuūs.5 Ní Moisés miiⁿ dinguuⁿ yā yeⁿꞌe ꞌiiⁿꞌyāⁿ chi neⁿꞌé yā canee nꞌdaāca yā nanááⁿ Ndyuūs cáávā chi diíⁿ yā chi ngaⁿꞌa ley miiⁿ. ꞌTíícā dinguúⁿ yā: ꞌIiⁿꞌyāⁿ chi diiⁿ yā tanducuéⁿꞌē denduꞌū chi ngaⁿꞌa ley yeⁿꞌe Moisés canduuchí yā cueⁿꞌe daāⁿmaⁿ cucáávā ley miiⁿ. 6 Naati chuū ní ngaⁿꞌa yeⁿꞌe ꞌiiⁿꞌyāⁿ chi canee nꞌdaacā nanááⁿ Ndyuūs cáávā chi iꞌtéénu yā Jesucristo. Díí nguɛ́ɛ́ ngaⁿꞌa di na staava yeⁿꞌe di ꞌtíícā: ¿Duꞌu caⁿꞌā na vaꞌai chɛɛti nguuvi? Taachi ngaⁿꞌa di ꞌtíícā, nadicuaꞌáí di Cristo yeⁿꞌé vaꞌāī chɛɛti nguuvi. 7 Ní nguɛ́ɛ́ caaⁿꞌmaⁿ di na staava yeⁿꞌē di ꞌtíícā: ¿Duꞌū cuuvi caⁿꞌá yā iⁿꞌyeēⁿdī chí yáanūuⁿ tanꞌdúúcā chi cheⁿꞌe Cristo? Taachi diiⁿ di ꞌtíícā, diiⁿ di chi Cristo nadacuéeⁿ yā yeⁿꞌē nguaaⁿ tináⁿꞌā. 8 Chuū chi canee chi caaⁿꞌmaⁿ yú: Nduudu cuaacu yeⁿꞌé Ndyuūs ꞌāā niiⁿnuúⁿ canee yeⁿꞌé nī ní canee na cheendí nī ní canee na staava yeⁿꞌé nī. Nduudu cuaacu miiⁿ ní nduudu chi ngaⁿꞌá ꞌnū nanááⁿ ndísꞌtiī cááva chi cuuvi cuꞌtéénu nī. 9 Nduuti chi caaⁿꞌmáⁿ nī ndúúcū ꞌiiⁿꞌyāⁿ ní ngaⁿꞌa nī ꞌtííca chi Jesús miiⁿ chííⁿ chí ꞌiiví nī ní iꞌtéénu nī ndúúcū núúⁿmáⁿ staava yeⁿꞌé nī chi Ndyuūs nadicuéeⁿ yā Cristo miiⁿ yeⁿꞌe nguaaⁿ tináⁿꞌā, tuuꞌmi ní díí nanguáⁿꞌai di. 10 Canéé chi cuꞌteenú nī ndúúcū núúⁿmáⁿ staava yeⁿꞌe nī ní Ndyuūs cuaáⁿ yā ndísꞌtiī. Canéé chi caaⁿꞌmáⁿ nī ndúúcū ꞌiiⁿꞌyāⁿ ní ngaⁿꞌá nī chi iꞌtéénu nī Jesucristo ní cuuvi nanguaⁿꞌai nī.
11 Ní canéé nguūⁿ na libro yeⁿꞌé Ndyuūs ꞌtíícā: Nducyáácá ꞌiiⁿꞌyāⁿ chi cuꞌtéénu yā Cristo nguɛ́ɛ́ cuuví ꞌcuináaⁿ yā. 12 Nguɛ́ɛ́ n̄ꞌdáaⁿ yā ꞌiiⁿꞌyāⁿ Israel sꞌeeⁿ ndúúcū ꞌiiⁿꞌyāⁿ yeⁿꞌe tanáⁿꞌā naciones. Maaⁿ Señor Jesucristo miiⁿ ní maaⁿ Señor yeⁿꞌe nducyáácá ꞌiiⁿꞌyāⁿ. Ní Señor miiⁿ itée yā yeⁿꞌe nducuéⁿꞌē chi nꞌdai yeⁿꞌé yā nducyaaca ꞌiiⁿꞌyāⁿ chi ngaⁿꞌanguaꞌá yā nanááⁿ Ndyuūs cáávā chi duuchi yā. 13 Caati ꞌtíícā canéé nguūⁿ na libro yeⁿꞌé Ndyuūs: Nducyáácá ꞌiiⁿꞌyāⁿ chi ngaⁿꞌa yā ngii yā: “Nꞌdíí Señor Jesucristo yeⁿꞌé,” ní cuuví nanguaⁿꞌai yā. 14 ¿Táácā cuuvi caaⁿꞌmáⁿ yā ndúúcū Señor miiⁿ nduuti chi nguɛɛ iꞌtéénu yā ꞌiiⁿꞌyāⁿ? ¿Ní táácā cuuvi cuꞌtéénu yā yeⁿꞌē ꞌáámá ꞌiiⁿꞌyāⁿ chi nguɛ́ɛ́ nꞌgiindiveéⁿ yā yeⁿꞌe yā? ¿Ní táácā cuuvi caandiveéⁿ yā nduuti chi nguɛ́ɛ́ ꞌaama ꞌiiⁿꞌyāⁿ chi caaⁿꞌmáⁿ yā nduudu cuaacu yeⁿꞌe Ndyuūs? 15 ¿Ni táácā cuuvi caaⁿꞌmáⁿ yā nduudu cuaacu yeⁿꞌé Ndyuūs miiⁿ nduuti chi nguɛ́ɛ́ duꞌū vɛɛ dichoꞌó? ꞌTíícā canéé nguūⁿ na libro yeⁿꞌé Ndyuūs: Dɛꞌɛ chúúcā nꞌdaacā chi ndaā ꞌiiⁿꞌyāⁿ sꞌeeⁿ chi candɛ́ɛ yā nduudu cuaacu yeⁿꞌe vaadī ꞌdiīiⁿ ni ngaⁿꞌá yā nduudu ngai yeⁿꞌé Cristo.
16 Naati nguɛ́ɛ́ nducyaaca ꞌiiⁿꞌyāⁿ iꞌtéénu yā nduudu cuaacu yeⁿꞌé Cristo. Ní tanꞌdúúcā chi ngaⁿꞌa profeta Isaías ndii cuááⁿ vmnaaⁿ taachi ngaⁿꞌa ꞌtíícā: Nꞌdiī Señor, ¿dúꞌū iꞌtéénu nduudu cuaacu chí ngaⁿꞌā cuaacu yú? 17 ꞌTíícā tuuꞌmi, ꞌiiⁿꞌyāⁿ iꞌtéénu yā nduudu cuaacu yeⁿꞌe Jesucristo cáávā chi nꞌgiindiveéⁿ yā nduudu miiⁿ, ní nꞌgiindiveéⁿ yā nduudu cuaacu yeⁿꞌe Cristo.
18 Naati ꞌúú itiinguuneéⁿ ndísꞌtiī: ¿ꞌÁá cuaacu chi nguɛ́ɛ́ nꞌgiindiveéⁿ yā nduudu cuaacu yeⁿꞌé Ndyuūs? Cuaacu chi nꞌgiindiveéⁿ yā. ꞌTíícā canéé nguūⁿ na libro yeⁿꞌé Ndyuūs:
Nduudu cuaacu chi ngaⁿꞌa yā, ngaⁿꞌa yā na núúⁿmáⁿ íⁿꞌyeeⁿdī. Ní nduudu yeⁿꞌe yā ní ngaⁿꞌa yā ní ndíí núúⁿmáⁿ cuaaⁿ chi yaⁿꞌai ca yeⁿꞌē íⁿꞌyeēⁿdī.
19 Táámá vmnéⁿꞌēe itiinguuneéⁿ ndísꞌtiī: ¿ꞌÁá nguɛ́ɛ́ diíⁿ cuenta ꞌiiⁿꞌyāⁿ Israel chi judíos sꞌeeⁿ yeⁿꞌe nduudu cuaacu yeⁿꞌé Ndyuūs? Moisés miiⁿ, ꞌiiⁿꞌyāⁿ chi vmnááⁿ vmnaaⁿ nguɛɛcuneé yā yeⁿꞌe chuū, ní ꞌtíícā canéé nguūⁿ:
ꞌÚú ní diíⁿ chi cuuvi nngueé nī yeⁿꞌe ꞌiiⁿꞌyāⁿ yeⁿꞌe táámá nación chi nguɛ́ɛ́ vɛ́ɛ́ nación yeⁿꞌé Ndyuūs. ꞌÚú ní diíⁿ chi nduuví táaⁿ nī ndúúcū ꞌiiⁿꞌyāⁿ chi nguɛ́ɛ́ yeⁿꞌé chí yeⁿꞌe táámá nación caati caⁿꞌá diíⁿ cosa chi nꞌdaacā nduucú yā.
20 Ní profeta Isaías miiⁿ claro ca chi ngaⁿꞌá yā ndúúcū nduudú ꞌcūū. Ndyuūs ngaⁿꞌá yā ꞌtíícā:
ꞌIiⁿꞌyāⁿ chi nguɛ́ɛ́ nꞌnuúⁿ yā ꞌúú ní indaacá yā ꞌúú. ꞌIiⁿꞌyāⁿ chi nguɛ́ɛ́ itiinguuneéⁿ yā yeⁿꞌé, ꞌúú ní chꞌiⁿꞌí maáⁿ ꞌúú nanáaⁿ yā.
21 Ní taachi Isaías miiⁿ ngaⁿꞌa yā nanááⁿ ꞌiiⁿꞌyāⁿ yeⁿꞌe Israel, ꞌtíícā ngaⁿꞌa yā: Ndyuūs ngaⁿꞌa ꞌtíícā: Nguuvi nguuvi nꞌdoó taꞌá ní yaaꞌví ꞌiiⁿꞌyāⁿ chi nguɛ́ɛ́ nꞌgiindiveéⁿ yā nduudu yeⁿꞌé. Ní chɛɛchi staava yeⁿꞌé yā.