Vida chi vɛ́ɛ́ cáávā Espíritu Nꞌdai yeⁿꞌé Ndyuūs
8
Maaⁿ ní ꞌiiⁿꞌyāⁿ sꞌeeⁿ chi yeⁿꞌe Señor Jesucristo nguɛ́ɛ́ condenado yā. Ní ꞌiiⁿꞌyāⁿ sꞌeeⁿ nguɛ́ɛ́ nꞌgɛɛtineé yā chi diíⁿ yā chiiⁿ chi neⁿꞌe cuerpo yeⁿꞌe maáⁿ yā naati nꞌgɛɛtineé yā tanꞌdúúcā chi neⁿꞌe Espíritu Nꞌdai yeⁿꞌé Ndyuūs. 2 Caati ley yeⁿꞌe Espíritu Nꞌdai yeⁿꞌé Ndyuūs chiiⁿ diiiⁿ chi vɛ́ɛ́ vida cueⁿꞌe daāⁿmaⁿ yeⁿꞌe ꞌiiⁿꞌyāⁿ chi yeⁿꞌe Jesucristo. Ní diiiⁿ chi ꞌúú caneé libre yeⁿꞌē nuuⁿndi chi diiiⁿ chi chꞌií cueⁿꞌe daāⁿmaⁿ. 3 Ní Ndyuūs diíⁿ yā chiiⁿ chi nguɛ́ɛ́ cuuvi diiiⁿ ley yeⁿꞌe Moisés miiⁿ caati ꞌiiⁿꞌyāⁿ ní duūvá yā na cuerpo yeⁿꞌe yā. Ní Ndyuūs diíⁿ yā condenar nuuⁿndi chi vɛ́ɛ́ na cuerpo yeⁿꞌé ꞌiiⁿꞌyāⁿ yeⁿꞌe iⁿꞌyeeⁿdí ꞌcūū taachi dichoꞌó yā ꞌáámá nꞌdyáⁿꞌā Daiya yā ndúúcū cuerpo tanꞌdúúcā sꞌuuúⁿ cáávā chi divíi yā nuūⁿndī yeⁿꞌé ꞌiiⁿꞌyāⁿ. 4 Ní chúū Ndyuūs diiⁿ yā cáávā chi sꞌuūuⁿ cuuvi chꞌɛɛtinee yú tanꞌdúúcā chi ngaⁿꞌa ley miiⁿ ti yeⁿꞌe Espíritu Nꞌdai sꞌuuúⁿ. Ní nguɛ́ɛ́ diiⁿ yú chiiⁿ chi neⁿꞌe maaⁿ cuerpo yeⁿꞌe yú ti diiⁿ yú tanꞌdúúcā chi neⁿꞌe Espíritu Nꞌdai yeⁿꞌé Ndyuūs.5 ꞌIiⁿꞌyāⁿ chi nꞌgɛɛtinée yā ní diíⁿ yā chi neⁿꞌe maaⁿ cuerpo yeⁿꞌé yā nacadiinúúⁿ yā ní diíⁿ yā denduꞌū chi neⁿꞌé yā. ꞌIiⁿꞌyāⁿ chi yeⁿꞌe Espíritu Nꞌdai yeⁿꞌé Ndyuūs nadacadiinúúⁿ yā ní diíⁿ yā chi neⁿꞌe Espíritu Nꞌdai yeⁿꞌe Ndyuūs. 6 Ní ꞌiiⁿꞌyāⁿ chi nadacadiinúúⁿ yā ní diíⁿ yā dɛꞌɛ̄ chi cuerpo yeⁿꞌē maáⁿ yā neⁿꞌe, ní ꞌcuūvi yā cueⁿꞌe daāⁿmaⁿ naati ꞌiiⁿꞌyāⁿ chi nadacadiinúúⁿ yā ni diíⁿ yā denduꞌū chi neⁿꞌe Espíritu Nꞌdai yeⁿꞌe Ndyuūs ní vɛɛ vida cueⁿꞌe daāⁿmaⁿ yeⁿꞌe yā ní nꞌgɛɛtinéé yā ndúúcū vaadī ꞌdiiíⁿ. 7 ꞌIiⁿꞌyāⁿ chi nadacadiinúúⁿ yā denduꞌu chi yeⁿꞌe cuerpo yeⁿꞌé yā, ꞌiiⁿꞌyāⁿ sꞌeeⁿ ní contra yeⁿꞌé Ndyuūs ꞌiiⁿꞌyāⁿ ti nguɛ́ɛ́ neⁿꞌé yā diíⁿ yā chi ngaⁿꞌa ley miiⁿ, ní nguɛ́ɛ́ cuuvi diíⁿ yā. 8 Ní cáávā chuū ꞌiiⁿꞌyāⁿ sꞌeeⁿ chi diíⁿ yā tanꞌdúúcā chi neⁿꞌe cuerpo yeⁿꞌe yā Ndyuūs nguɛ́ɛ́ inee yiinú yā chííⁿ chí diíⁿ yā.
9 Naati maaⁿ ní ndísꞌtiī nguɛ́ɛ́ diíⁿ nī tanꞌdúúcā chi neⁿꞌe cuerpo yeⁿꞌe maáⁿ nī naati diíⁿ nī tanꞌdúúcā chi neⁿꞌe Espíritu Nꞌdai yeⁿꞌé Ndyuūs ti maaⁿ ní Espíritu Nꞌdai yeⁿꞌé Ndyuūs cánée yā ndúúcū ndísꞌtiī. Ní nduuti chi ꞌáámá ꞌiiⁿꞌyāⁿ nguɛ́ɛ́ cánée yā ndúúcū Espíritu yeⁿꞌé Cristo, tuuꞌmi ní ꞌiiⁿꞌyāⁿ ꞌcūū nguɛ́ɛ́ yeⁿꞌe Cristo ꞌiiⁿꞌyāⁿ. 10 Ní nduuti chi ndísꞌtiī ní yeⁿꞌe Cristo ndísꞌtiī, ꞌáárá chi cuerpo yeⁿꞌé nī cuuvi nꞌdiī cucáávā nuuⁿndi yeⁿꞌé nī, tuuꞌmi ní canduuchí nī cáávā Espíritu Nꞌdai yeⁿꞌe Ndyuūs miiⁿ caati Ndyuūs diíⁿ yā aceptar ndísꞌtiī chi yeⁿꞌé yā ndísꞌtiī. 11 Ní ndúúti chi canée nī ndúúcū Espíritu Nꞌdai yeⁿꞌé Ndyuūs, Espíritu Nꞌdai yeⁿꞌé Ndyuūs chi nadacuéeⁿ yā Cristo yeⁿꞌe nguaaⁿ tináⁿꞌā, tuuꞌmi ní maaⁿ Ndyuūs miiⁿ chi nadacuéeⁿ yā Cristo caⁿꞌa yā chi tée yā cáávā Espíritu Nꞌdai yeⁿꞌé Ndyuūs chi canéé nduucú nī vida ngai na cuerpo yeⁿꞌé nī chi ꞌāā nꞌdíí.
12 Ní cáávā chuū, ndísꞌtiī hermanos yeⁿꞌé, vɛ́ɛ́ chi canéé chi diiⁿ yú naati nguɛ́ɛ́ ꞌcuɛɛtinee yú ní nguɛ́ɛ́ diiⁿ yú tanꞌdúúcā chi neⁿꞌe cuerpo yeⁿꞌe yú. 13 Caati ndúúti chi diiⁿ yú tanꞌdúúcā chi neⁿꞌe cuerpo yeⁿꞌe maaⁿ yú, tuuꞌmi ní cuuvi ꞌcuūvi yú cueⁿꞌe daāⁿmaⁿ. Naati nduuti chi nguɛ́ɛ́ diiⁿ yú cuenta chi diiⁿ cuerpo yeⁿꞌe yú, tuuꞌmi ní cáávā Espíritu Nꞌdai yeⁿꞌé Ndyuūs chi canee ndúúcu yú ꞌcuɛɛtinee yú.
14 Ní nducyáácá ꞌiiⁿꞌyāⁿ chi Espíritu Nꞌdai yeⁿꞌé Ndyuūs ngaⁿꞌa yā chi cuuvi diíⁿ yā ꞌiiⁿꞌyāⁿ sꞌeeⁿ ní daiya Dendyuūs ꞌiiⁿꞌyāⁿ. 15 Ní Ndyuūs ꞌāā tee yā sꞌuuúⁿ Espíritu Nꞌdai yeⁿꞌé yā nguɛ́ɛ́ cáávā chi diiⁿ yú ntiiⁿnyuⁿ yeⁿꞌé yā chi diꞌvaꞌa yú ley cáávā chi condenado yú taama vmnéⁿꞌēe naati cáávā chi sꞌuuúⁿ ní daiya Ndyuūs sꞌuuúⁿ. ꞌÍícú cucáávā Espíritu Nꞌdai yeⁿꞌé Ndyuūs ní sꞌuuuⁿ ní cuuvi caaⁿꞌmaⁿ yú: Nꞌdiī, Ndyuūs ní Chiidá. 16 Ní maaⁿ Espíritu Nꞌdai yeⁿꞌé Ndyuūs ngaⁿꞌá yā ndúúdú cuaacu ndúúcū espíritu yeⁿꞌe yú chi sꞌuūuⁿ ní daiya Dendyuūs sꞌuuúⁿ. 17 Ní nduuti chi sꞌuūuⁿ ní daiyá Ndyuūs sꞌuūuⁿ, tuuꞌmi ní vɛ́ɛ́ chi cuuvi yeⁿꞌe yú chi Ndyuūs caⁿꞌa yā chi tée yā sꞌuuúⁿ. Ní cutaꞌa yú chi cuuvi yeⁿꞌe yú ndúúcū Cristo maáⁿ yā nduuti chi sꞌuūuⁿ ní ꞌcueenu yú cuuvi maaⁿ cáávā chi yeⁿꞌe Cristo sꞌuuúⁿ. Cuayiivi ní vɛ́ɛ́ parte yeⁿꞌe yú ndúúcū Cristo ndúúcū vaadī dɛɛvɛ nꞌdáí taavi yeⁿꞌé yā.
18 Maaⁿ ní inadacadiinúúⁿ chí denduꞌū chi nꞌgeenu yú ngii maaⁿ nguɛ́ɛ́ dɛ́ꞌɛ̄ vɛɛ chí chꞌɛɛtɛ nguɛ́ɛ́ tanꞌdúúcā denduꞌū chi dɛɛvɛ ca ní chꞌɛɛtɛ ca chi Ndyuūs ꞌcuuⁿꞌmíⁿ yā sꞌuuúⁿ. 19 Tanducuéⁿꞌē yeⁿꞌe iⁿꞌyeeⁿdī chi dinꞌdái Ndyuūs cuáácú cunee ngiinu tiempo chi cuuvi nꞌdiichi ꞌiiⁿꞌyāⁿ sꞌeeⁿ chi daiya Ndyuūs. 20 Caati tanducuéⁿꞌē chi dinꞌdái Ndyuūs ndáā nguuvi chi ꞌāā ntɛ́ɛ́ nꞌdaacā. Ní nguɛ́ɛ́ cucáávā chi maāⁿ néⁿꞌe naati cucáávā chi Ndyuūs neⁿꞌé yā chi ꞌtíícā. Ní maaⁿ ní tanducuéⁿꞌē tiempo miiⁿ ní tanducuéⁿꞌē denduꞌū cunee ngiinu chi Ndyuūs diíⁿ yā chi canéé nꞌdaacā cáávā yeⁿꞌē. 21 Ní tanducuéⁿꞌē chi dinꞌdái Ndyuūs canéé chi natuuvií. Naati ndaā tiempo chi nguɛ́ɛ́ natúúvií caati vɛ́ɛ́ parte yeⁿꞌē ndúúcū libertad chí nꞌdai taavi chi yeⁿꞌē ꞌiiⁿꞌyāⁿ sꞌeeⁿ chi daiyá Dendyuūs. 22 Ní sꞌuūuⁿ ní deenu yú chi ndíí nguuvi maaⁿ tanducuéⁿꞌē chi dinꞌdái Ndyuūs ní nꞌgai yaꞌāī ngɛɛcū yeⁿꞌē tanꞌdúúcā ꞌáámá nꞌdaataá ndúúcū vaadī yaꞌai yeⁿꞌē chi ꞌcundiyáaⁿ daiya tá. 23 Ní nguɛ́ɛ́ dámaāⁿ tanducuéⁿꞌē chi dinꞌdái Ndyuūs ní nꞌgáí yaꞌāī naati ꞌtiicá ntúūⁿ sꞌuuúⁿ nꞌgeenu yú ngii. ꞌÁárá chi canee yú ndúúcū Espíritu Nꞌdai yeⁿꞌé Ndyuūs chi Ndyuūs datee yā sꞌuuúⁿ chi vmnááⁿ vmnaaⁿ staꞌa yú yeⁿꞌé Ndyuūs. Ní ꞌcueenu taavi yú cuuvi ꞌnaaⁿ chi canéé ngiinu yú tiempo chi Ndyuūs cutaꞌá yā sꞌuūuⁿ chi daiyá Ndyuūs sꞌuuúⁿ. Ní nanguaⁿꞌáí yā sꞌuūuⁿ yeⁿꞌe cuerpo yeⁿꞌe yú chi vɛ́ɛ́ maaⁿ. Ní ꞌāā ntɛ́ɛ́ vɛ́ɛ́ cuerpo ndíícuū yeⁿꞌe yú naati vɛɛ cuerpo chí ngai yeⁿꞌe yú. 24 Ní sꞌuuúⁿ nguaⁿꞌai yú cáávā chi canee ngiinu yú chi Ndyuūs caⁿꞌa yā chi tée yā sꞌuuúⁿ. Nduuti chi ꞌāā inaaⁿ yú dɛꞌɛ̄ chi canee ngiinu yú ꞌāā ntɛ́ɛ́ canee ngiinu yú yeⁿꞌē. Chííⁿ chi ꞌāā inaaⁿ ꞌiiⁿꞌyāⁿ ꞌāā ntɛ́ɛ́ canéé ngiinu yā yeⁿꞌē. 25 Naati nduuti chi canéé ngiinu yú chi ꞌāā cuɛ́ɛ́ snaaⁿ yú canéé chi cunee ngiinu yú ndúúcū ꞌvííchꞌɛɛtíínūuⁿ.
26 Ní Espíritu Nꞌdai yeⁿꞌé Ndyuūs nnginnée yā sꞌuūuⁿ taachi dúuvā yú. Sꞌuuúⁿ nguɛ́ɛ́ deenu yú táácā canéé chí caaⁿꞌmaⁿnguaꞌa yú tanꞌdúúcā chi Ndyuūs neⁿꞌé yā, ní maaⁿ ní Espíritu Nꞌdai yeⁿꞌé Ndyuūs inneé yā sꞌuuúⁿ taachi ngaⁿꞌanguaꞌa yú nanááⁿ Ndyuūs taachi nꞌgai yaꞌáí yā ní nguɛ́ɛ́ cuuvi caaⁿꞌmaⁿ yú chuū ndúúcū nduudu. 27 Ní Ndyuūs chi nꞌdiichí yā staava yeⁿꞌe yú deenú yā chi nadacadiinuuⁿ Espíritu Nꞌdai yeⁿꞌé Ndyuūs caati Espíritu Nꞌdai yeⁿꞌe Ndyuūs ngiica yā dámaāⁿ yeⁿꞌe chi neⁿꞌe Ndyuūs ní cáávā ꞌiiⁿꞌyāⁿ chi yeⁿꞌe Ndyuūs.
Cuchɛɛ ca yú yeⁿꞌe nducuéⁿꞌē
28 Ní deenu yú chi Ndyuūs diíⁿ yā chi tanducuéⁿꞌē chi chóꞌōo yeⁿꞌe sꞌuūuⁿ chí yeⁿꞌe sꞌuūuⁿ ní cáávā chi nꞌdaacā yeⁿꞌe yú caati neⁿꞌe yú Ndyuūs. Ní Ndyuūs yaaꞌví yā ꞌiiⁿꞌyāⁿ sꞌeeⁿ chi cuuvi yeⁿꞌé yā ꞌiiⁿꞌyāⁿ sꞌeeⁿ. 29 Ní Ndyuūs ndɛɛvɛ yā ꞌiiⁿꞌyāⁿ chi cuuvi yeⁿꞌé yā ní divíi yā ꞌiiⁿꞌyāⁿ sꞌeeⁿ lado yeⁿꞌé yā ndii vmnááⁿ vmnaaⁿ caati ꞌiiⁿꞌyāⁿ sꞌeeⁿ cuuvi daiyá yā tanꞌdúúcā Daiyá yā Jesucristo. Ní ꞌíícú Cristo chi Daiya Ndyuūs ní Daiyá yā vmnááⁿ vmnaaⁿ nguaaⁿ nꞌdeee nꞌdáí viꞌi yā.
30 Ní ꞌiiⁿꞌyāⁿ sꞌeeⁿ chi Ndyuūs chíndɛɛvɛ yā ndíí vmnááⁿ vmnaaⁿ Ndyuūs yaaꞌví yā ꞌiiⁿꞌyāⁿ sꞌeeⁿ chi cuuvi yeⁿꞌé yā ꞌiiⁿꞌyāⁿ sꞌeeⁿ. Ní yaaꞌví yā ꞌiiⁿꞌyāⁿ chí staꞌá yā ꞌiiⁿꞌyāⁿ sꞌeeⁿ chi cuuvi daiyá yā. Ní Ndyuūs chí staꞌa yā ꞌiiⁿꞌyāⁿ sꞌeeⁿ chi cuuvi yeⁿꞌé yā ní cuayiivi dichꞌɛɛtɛ́ yā ꞌiiⁿꞌyāⁿ sꞌeeⁿ.
31 ¿Dɛ́ꞌɛ̄ cuuvi caaⁿꞌmaⁿ yú yeⁿꞌé dendúꞌū sꞌeeⁿ? Dámaāⁿ cuuvi caaⁿꞌmaⁿ yú chuū. Nduuti chi Ndyuūs canée yā ndúúcū sꞌuuúⁿ, ¿duꞌū cuchɛ́ɛ́ cūnee contra yeⁿꞌe sꞌuuúⁿ? 32 Ní Ndyuūs nguɛ́ɛ́ diyaꞌāī ꞌíínu yā Daiya yā cáávā sꞌuuúⁿ naati dichoꞌó yā Daiyá yā caati chꞌiī Daiya yā caavā nducyaaca sꞌuuúⁿ. Ní nduuti chi ꞌtíícā diíⁿ yā ndúúcū Daiya yā, ¿ꞌáá nguɛ́ɛ́ tee Ndyuūs tanducuéⁿꞌē sꞌuuúⁿ daama ndúúcū Daiyá yā ní nꞌdeee nꞌdáí yeⁿꞌē? 33 ¿Dúꞌū cuuvi caaⁿꞌmaⁿ nuuⁿndi yeⁿꞌé ꞌiiⁿꞌyāⁿ chi Ndyuūs ndɛɛvɛ yā? Ndyuūs maáⁿ yā diíⁿ yā aceptar ꞌiiⁿꞌyāⁿ chi yeⁿꞌé yā. 34 ¿Dúꞌu tuuꞌmi cuuvi diíⁿ yā condenar sꞌuuúⁿ? Cristo ní ꞌiiⁿꞌyāⁿ chi chꞌīi yā cáávā nuuⁿndi yeⁿꞌe yú ní nduuchí yā yeⁿꞌe nguaaⁿ tinaⁿꞌā. Ni maaⁿ ní Cristo canee yā na lado yeⁿꞌe honor yeⁿꞌē Chiidá yā. Ní ngaⁿꞌanguaꞌá yā cáávā sꞌuuúⁿ. 35 ¿Duꞌū cuuvi divíi yā sꞌuūuⁿ yeⁿꞌe Cristo chi neⁿꞌé yā sꞌuuúⁿ? ¿ꞌÁá chiiⁿ chi nꞌgeenu yú ngii, ꞌáá cuuvi nadivíi sꞌuūuⁿ, o denduꞌū chi diiiⁿ chi idiꞌvaachi yú o denduꞌū chi diiⁿ ꞌiiⁿꞌyāⁿ chi ꞌcueenu yú cuuvi o taachi cuuví cuiica yú o taachi ꞌāā ntɛ́ɛ́ catecai yú o cáánda yeⁿꞌe yú o taachi chꞌiinꞌnúⁿ yā sꞌuūuⁿ ndúúcū machete chi ꞌuūvī lados ꞌcaāiⁿ? ¿ꞌÁá cuuvi diiiⁿ nducuéⁿꞌē chuū nadivíi sꞌuuúⁿ ná vaadī neⁿꞌe yeⁿꞌe Cristo? Nguɛ́ɛ́ cuuvi. 36 ꞌTíícā canéé nguūⁿ na libro yeⁿꞌé Ndyuūs:
Cáávā chi sꞌuuúⁿ ní yeⁿꞌe di sꞌuuúⁿ nuuⁿmaⁿ nguuvi canee yú listo chi ꞌcaaⁿꞌnúⁿ yā sꞌuuúⁿ cáávā di. Ní ꞌiiⁿꞌyāⁿ diiⁿ cuenta yā chi sꞌuuúⁿ tanꞌdúúcā ꞌiiti cuūchī chi caⁿꞌá yā ꞌcaaⁿꞌnuⁿ yā, ꞌtíícā sꞌuuúⁿ.
37 Naati yeⁿꞌe nducuéⁿꞌē denduꞌū cuchɛɛ cá yú cáávā Cristo chi dinéⁿꞌe yā sꞌuuúⁿ. 38 ꞌTíícā ꞌúú ní deenú chi cuaacu chi mar ꞌáámá ꞌiiⁿꞌyāⁿ nguɛ́ɛ́ cuuvi divíi yā sꞌuūuⁿ yeⁿꞌe Ndyuūs chi dinéⁿꞌe yā sꞌuuúⁿ. Ndíí nguɛ́ɛ́ ndúú vaadī nꞌgii, ndíí nguɛ́ɛ́ ndúú chi cunduūchi yú, ndíí nguɛ́ɛ́ ndúú ángeles, ndíí nguɛ́ɛ́ ndúú espíritus chi ngaⁿꞌa ntiiⁿnyuⁿ ndúúcū poder yeⁿꞌe espíritus, ndíí nguɛ́ɛ́ ndúú denduꞌū chi vɛ́ɛ́ maaⁿ, ndíí nguɛ́ɛ́ ndúú denduꞌū chi cuchiī, 39 ndíí nguɛ́ɛ́ ndúú yeⁿꞌe chi vɛ́ɛ́ chí na yáácú, ndíí nguɛ́ɛ́ ndúú yeⁿꞌe chi vɛ́ɛ́ ndii na yáanūuⁿ, ndíí nguɛ́ɛ́ ndúú táámá naaⁿ chi vɛ́ɛ́, tanducuéⁿꞌē chuū nguɛ́ɛ́ cuuví divíi sꞌuuúⁿ yeⁿꞌe Ndyuūs chi dinéⁿꞌe yā sꞌuuúⁿ caati sꞌuuúⁿ ní yeⁿꞌe Jesucristo sꞌuuúⁿ.