Ejemplo yeⁿꞌe ꞌiiⁿꞌyāⁿ chi nꞌgiindivaacu yā
7
Ndísꞌtiī hermanos yeⁿꞌé chi vɛ́ɛ́ ley yeⁿꞌé nī, deenu nī chi ꞌiiⁿꞌyāⁿ canéé chi ꞌcaandiveéⁿ yā ley miiⁿ nuuⁿmáⁿ neⁿꞌe chí canduuchí yā. 2 Maaⁿ ní caꞌá ꞌaama ejemplo. ꞌÁámá nꞌdaataá chi nꞌgiindivaacu tá ni vɛ́ɛ́ isaⁿꞌā yeⁿꞌe tá, nꞌdaataá miiⁿ ní nꞌdaataá yeⁿꞌe isaⁿꞌā tá tanducuéⁿꞌē tiempo chi canduuchi sa tanꞌdúúcā chi ngaⁿꞌa ley. Ní taachi chꞌiī isaⁿꞌā yeⁿꞌe tá canee tá libre yeⁿꞌe ley miiⁿ chi ngaⁿꞌa yeⁿꞌe isaⁿꞌā yeⁿꞌē tá. 3 Naati taachi cánduuchi isaⁿꞌā yeⁿꞌe tá ní caⁿꞌa tá ndúúcū táámá saⁿꞌā, tuuꞌmi ní idinuūⁿndí ta. Ní nduuti chi chꞌiī isaⁿꞌā yeⁿꞌe tá, nguɛ́ɛ́ canee yā maaⁿ ley yeⁿꞌe ꞌiiⁿꞌyāⁿ chi nꞌgiindivaacú yā ní cuuvi ꞌcaandavaacú yā ndúúcū táámá saⁿꞌā ní nguɛ́ɛ́ dinuuⁿndi tá.4 Ní ꞌtiicá ntúūⁿ ndísꞌtiī hermanos yeⁿꞌé chi yeⁿꞌe Cristo, ley miiⁿ tanꞌdúúcā esposo yeⁿꞌe nī chi ꞌāā nꞌdíí, ní ꞌāā nꞌdiī ley miiⁿ cáávā ndísꞌtiī. Ní maaⁿ ní cuuvi yeⁿꞌe táámá yā ndísꞌtiī ní yeⁿꞌe Cristo ndísꞌtiī. ꞌIiⁿꞌyāⁿ miiⁿ ní nducuéeⁿ yā yeⁿꞌe nguaaⁿ tináⁿꞌā ní cucáávā ꞌiiⁿꞌyāⁿ miiⁿ dichiiꞌvɛ yú Ndyuūs. 5 Ní tiempo chi chóꞌōo taachi diiⁿ yú tanꞌdúúcā chi neⁿꞌe maaⁿ cuerpo yeⁿꞌe yú tuumicádíínuuⁿ yú chi vɛ́ɛ́ nuuⁿndi yeⁿꞌe yú cáávā chi ngaⁿꞌa ley miiⁿ chi diiⁿ yú ꞌtíícā. Ní nuuⁿndi chi diiⁿ yú diiⁿ chi ꞌcuūvi yú cueⁿꞌe daāⁿmaⁿ. 6 Naati maaⁿ ní diiⁿ yú cuenta chi nꞌdiī yú yeⁿꞌe ley miiⁿ. Ní nguɛ́ɛ́ canee yú maaⁿ poder yeⁿꞌē ley miiⁿ. Maaⁿ ní libre canee yú chi dichiiꞌvɛ yú Ndyuūs ndúúcū vida yeⁿꞌe yú chi ngai. Ní vida yeⁿꞌe yú ní yeⁿꞌe Espíritu Nꞌdai yeⁿꞌé Ndyuūs. Ní nguɛ́ɛ́ canee yú maaⁿ poder yeⁿꞌe ley ndiicúū chi canéé nguūⁿ.
Nuuⁿndi chi idiiⁿ yú
7 Maaⁿ ní ¿dɛꞌɛ̄ caaⁿꞌmaⁿ yú? ¿ꞌÁá ley miiⁿ chi nuuⁿndi? Nguɛ́ɛ́ yeⁿꞌē mar ꞌáámá naaⁿ. ꞌÚú ní nguɛ́ɛ́ nꞌdiichí nuuⁿndi nduuti chi nguɛ́ɛ́ cáávā ley miiⁿ. Ní ꞌtiicá ntúūⁿ, ꞌúú ní nguɛ́ɛ́ deenú chi nuuⁿndi ꞌúú nduuti chi neⁿꞌé denduꞌū chi vɛ́ɛ́ yeⁿꞌe tanáⁿꞌā ꞌiiⁿꞌyāⁿ nduuti chi ley miiⁿ nguɛ́ɛ́ ꞌtíícā ngaⁿꞌa: Nguɛ́ɛ́ dinéⁿꞌe nī denduꞌū chi vɛ́ɛ́ yeⁿꞌe tanáⁿꞌā ꞌiiⁿꞌyāⁿ. 8 Ní cáávā ley miiⁿ tuumicadiinúúⁿ nuūⁿndi miiⁿ chi cuuvi neⁿꞌé diíⁿ tanducuéⁿꞌē denduꞌū chi nuuⁿndi. Ní ndúúti chi nguɛ́ɛ́ cáávā ley miiⁿ, nuuⁿndī miiⁿ canéé tanꞌdúúcā chi nꞌdiī. Ní nguɛ́ɛ́ deenú yeⁿꞌē. 9 Tiempo chi chóꞌōo ꞌúú ní nadacadíínuúⁿ chi nꞌdaacā canéé nguɛ́ɛ́ ndúúcū ley miiⁿ naati taachi nꞌdiichí ley miiⁿ, tuuꞌmi nꞌdiichí nuuⁿndi, ní ꞌúú ní caneé tanꞌdúúcā chi chꞌīí. 10 Ni ꞌtíícā ley miiⁿ chꞌiⁿꞌi ꞌiiⁿꞌyāⁿ táácā cuuvi cunduuchí yā cueⁿꞌe daāⁿmaⁿ, naati cucáávā ꞌúú nꞌgiⁿꞌi chi idiíⁿ nuuⁿndi tuuꞌmi ní cuuvi ꞌcuūví cueⁿꞌe daāⁿmaⁿ. 11 Ní cáávā ley miiⁿ deenú chi nuuⁿndí chi diíⁿ chííⁿ chí chinncheꞌei ꞌúú ti nguɛ́ɛ́ diíⁿ tanꞌdúúcā chi chꞌiindiveéⁿ ley miiⁿ. Naati cáávā ley miiⁿ, deenú nuuⁿndī chi diíⁿ ní diiⁿ chi chꞌīi cueⁿꞌe daāⁿmaⁿ.
12 Ní ley miiⁿ ní dɛɛvɛ ní yeⁿꞌe Ndyuūs. Ní mandamiento yeⁿꞌe ley miiⁿ ꞌtiicá ntúūⁿ ní dɛɛvɛ ní cuaacu ní nꞌdáácā. 13 Tuuꞌmi ní ley ¿ꞌáá cucáávā chi nꞌdaacā diiiⁿ chi ꞌúú ꞌcuūví cueⁿꞌe daāⁿmaⁿ? Nguɛ́ɛ́ ꞌtúúcā. Nuūⁿndī chi diíⁿ, diiiⁿ chi ꞌúú ꞌcuūvi. Ní ꞌtíícā cuuvi deenú nuuⁿndi ti nuuⁿndi miiⁿ chꞌiⁿꞌi chi cuáácú chí nuuⁿndi cáávā ley miiⁿ chi cosa chi nꞌdaacā. Ní cosa chi nꞌdaacā miiⁿ ní mandamiento chi chꞌiⁿꞌi chi nguɛɛ nꞌdaacā chí nuūⁿndī miiⁿ.
14 Deenu yú chi ley miiⁿ ní yeⁿꞌe Espíritu Nꞌdai yeⁿꞌé Ndyuūs. Naati ꞌúú ní saⁿꞌā yeⁿꞌe iⁿꞌyeeⁿdí ꞌcūū. ꞌÚú chi dinuuⁿndí ni caneé maaⁿ poder yeⁿꞌe nuuⁿndi chi idiíⁿ nuuⁿndi. 15 ꞌÚú nguɛ́ɛ́ deenú dɛꞌɛ cáávā chi diíⁿ chiiⁿ chi diíⁿ. ꞌÚú nguɛ́ɛ́ diíⁿ chi neⁿꞌé diíⁿ naati diíⁿ chi nguɛ́ɛ́ neⁿꞌé diíⁿ ti nguɛ́ɛ́ neⁿꞌé diíⁿ. 16 Ní nduuti chi nguɛ́ɛ́ neⁿꞌé diíⁿ ní chííⁿ chí diíⁿ, tuuꞌmi ní deenú chi ley miiⁿ ní nꞌdai. 17 ꞌTíícā nguɛ́ɛ́ ꞌúú chi diíⁿ, naati nuuⁿndi chi canéé nduucú chííⁿ diiiⁿ chi dinuuⁿndí. 18 Caati deenú chi maaⁿ ꞌúú chi cuerpo yeⁿꞌé nguɛɛ vɛɛ mar ꞌáámá denduꞌū chi nꞌdaacā. Cuaacu chi ꞌúú neⁿꞌé diíⁿ chi nꞌdaācā naati nguɛ́ɛ́ deenú táácā cuuvi diíⁿ chi nꞌdaācā. 19 Denduꞌū chi nꞌdai chi neⁿꞌé diíⁿ, nguɛ́ɛ́ diíⁿ naati chi nguɛ́ɛ́ nꞌdaacā chi nguɛ́ɛ́ neⁿꞌé diíⁿ, chííⁿ chí diíⁿ. 20 Maaⁿ ní nduuti chi diíⁿ chi nguɛ́ɛ́ neⁿꞌé diíⁿ, tuuꞌmi nguɛ́ɛ́ ꞌúú chi diíⁿ naati nuuⁿndi ndúúcū poder yeⁿꞌē chi canéé nduucú chííⁿ diiiⁿ chi dinuuⁿndí.
21 Ní ꞌtíícā canee nduucú. Taachi neⁿꞌé diíⁿ chi nꞌdaacā miiⁿ, dámaāⁿ chi nguɛ́ɛ́ nꞌdaacā canee nduucú. 22 Cuáácú chi neⁿꞌé diíⁿ chiiⁿ chi ngaⁿꞌā ley yeⁿꞌé Ndyuūs. 23 Naati deenú chi vɛ́ɛ́ táámá cosa na cuerpo yeⁿꞌé chi nguɛ́ɛ́ neⁿꞌé chi ꞌúú idiíⁿ cosa chi nꞌdaacā tanꞌdúúcā chi nadacadiinúúⁿ chi diíⁿ. Chuū ní ley yeⁿꞌe nuūⁿndī chi vɛ́ɛ́ na cuerpo yeⁿꞌé. Ní ꞌúú caneé tanꞌdúúcā preso yeⁿꞌe ley yeⁿꞌe nuuⁿndi. ꞌTíícā ꞌúú.
24 Dɛ́ꞌɛ chúúcā nndaachií yeⁿꞌé maaⁿ. ¿Duꞌú cuuvi nadanguáⁿꞌai ꞌúú yeⁿꞌe cuerpo yeⁿꞌé chí diiⁿ chi ꞌcuūví cueⁿꞌe daāⁿmaⁿ? 25 Maaⁿ ní ꞌúú ní ncāꞌa gracias Ndyuūs chi dámaaⁿ Ndyuūs cuuvi nadinguáⁿꞌai yā ꞌúú cáávā Jesucristo Señor yeⁿꞌe yú. ꞌÚú ní dichííꞌvɛ̄ ꞌúú ley yeⁿꞌe Ndyuūs ndúúcū núúⁿmáⁿ staāvā yeⁿꞌé naati cuerpo yeⁿꞌé ní neⁿꞌe dinuuⁿndi cáávā ley yeⁿꞌe nuuⁿndi chi canéé nduucú.