Nꞌdii yú cucáávā nuuⁿndi yeⁿꞌe yú naati canduuchi yú cucáávā Cristo
6
Maaⁿ ní ¿dɛꞌɛ́ caaⁿꞌmāⁿ yú? ¿ꞌÁá dinuuⁿndi yú caati Ndyuūs cuuvi tée yā sꞌuuúⁿ vaadī nꞌdai ca yeⁿꞌé yā? 2 Nguɛ́ɛ́ diiⁿ yú ꞌtíícā. ꞌĀā chꞌiī yú yeⁿꞌe nuuⁿndi chi diīⁿ yú, ¿táácā cuuvi ꞌcuɛɛtinéé chiichi yú ndúúcū nuūⁿndī chi diiⁿ yú? 3 ¿ꞌÁá nguɛ́ɛ́ déénu ndísꞌtiī chi nducyaaca sꞌuūuⁿ chi chɛɛ̄dínuūⁿniⁿ yú cáávā chi sꞌuuúⁿ ní yeⁿꞌe Cristo sꞌuuúⁿ, ní vɛ́ɛ́ ꞌaama parte yeⁿꞌe yú ndúúcū Cristo taachi chꞌīi yā? 4 Ní caavā chí chɛɛ̄dinuūⁿniⁿ yú tanꞌdúúcā chi daama chꞌɛɛ̄chi yú ndúúcū Cristo, ní tanꞌdúúcā chi chꞌiī yú ndúúcu yā caati cuuvi nnduuchi yú yeⁿꞌē nguaaⁿ tináⁿꞌā ndúúcū Cristo. Ní tiicá ntúūⁿ vɛ́ɛ́ vida ngai yeⁿꞌe yú ti ꞌtíícā Cristo nduuchí yā yeⁿꞌe nguaaⁿ tinaⁿꞌā cáávā poder chi chꞌɛɛtɛ́ ca yeⁿꞌe Chiida yú.5 Ní nduuti chi tanꞌdúúcā chi daama cueⁿꞌe yú ndúúcu yā taachi chꞌīi yā, ꞌtiicá ntúūⁿ cuaacu nííⁿnyúⁿ chi dáámá cunee yú ndúúcu yā. Ní nnduuchi yú tanꞌdúúcā chí maáⁿ yā nnduuchi yā yeⁿꞌē nguaaⁿ tináⁿꞌā. 6 Ní chuū ní deenu yú vida ndiicúū yeⁿꞌe yú tanꞌdúúcā chi dáámá caꞌneeⁿngáꞌāa na cruz ndúúcū Señor Jesucristo yeⁿꞌe yú caati vida ndiicúū yeⁿꞌe yú ndúúcū chi neⁿꞌe chi diiⁿ yú ní canee tanꞌdúúcā chi nꞌdiī ndúúcū poder yeⁿꞌe nuuⁿndi caati nguɛ́ɛ́ cuuvi caaⁿꞌmaⁿ ntiiⁿnyuⁿ vida yeⁿꞌe yú chi dinuuⁿndi yú. 7 Deenu yú chi taachi ꞌiiⁿꞌyāⁿ ꞌāā chꞌīi yā ꞌāā ntɛ́ɛ́ cuuvi dinuuⁿndí yā. 8 Ní nduuti chi sꞌuuúⁿ ní ꞌāā chꞌiī yú dáámá ndúúcū Cristo miiⁿ, tuuꞌmi ní iꞌtéénu yú chi canduuchi yú ní cunee yú ndúúcū Cristo. 9 Deenu yú chi taachi Cristo ꞌāā chꞌīi yā ní nnduuchí yā yeⁿꞌe nguaaⁿ tináⁿꞌā, ꞌāā ntɛ́ɛ́ nguɛɛcunée yā ꞌcuūví yā caati vaadī nꞌgii mííⁿ nguɛ́ɛ́ dɛꞌɛ̄ vɛɛ cuuvi diiⁿ ndúúcu yā. 10 Taachi Cristo chꞌīi yā, chꞌīi yā ꞌáámá vmneⁿꞌé nūuⁿ ní cáávā nducyáácá ꞌiiⁿꞌyāⁿ ni cáávā nuuⁿndi yeⁿꞌé yā. Maaⁿ ní nnduuchí yā ní vida yeⁿꞌe yā nnduuchi yā cáávā Ndyuūs. 11 ꞌTiicá ntúūⁿ ndísꞌtiī diíⁿ nī cuenta chi nꞌdīi nī ndúúcū nuuⁿndi yeⁿꞌe nī ní maaⁿ ní canduuchí nī cáávā Ndyuūs caati ndísꞌtiī ní yeⁿꞌe Jesucristo ndísꞌtiī ni Jesucristo ní Señor yeⁿꞌe yú.
12 Ní cáávā chuū ndísꞌtiī nguɛ́ɛ́ caꞌá nī lugar chi nuuⁿndi caaⁿꞌmaⁿ ntiiⁿnyuⁿ yeⁿꞌe cuerpo yeⁿꞌe nī ti ndísꞌtiī diíⁿ nī nuuⁿndi tanꞌdúúcā chi neⁿꞌe cuerpo yeⁿꞌé nī. 13 Ní nguɛ́ɛ́ ncaꞌá nī cuerpo yeⁿꞌe maaⁿ nī na poder yeⁿꞌē nuuⁿndi chi cuuvi dinuuⁿndí nī tanꞌdúúcā chi neⁿꞌe cuerpo yeⁿꞌé nī. Nguɛ́ɛ́ diíⁿ nī ꞌtíícā. Ncaꞌá nī vida yeⁿꞌe maáⁿ nī ndúúcū cuerpo yeⁿꞌe maáⁿ nī maaⁿ poder yeⁿꞌe Ndyuūs tanꞌdúúcā chi ꞌāā nꞌdīi nī ní ꞌāā nnduuchí nī ndúúcū ꞌáámá vida ngai. Maaⁿ ní cuuvi dinꞌdaacá nī. 14 Ní nuuⁿndi ní nguɛ́ɛ́ vɛ́ɛ́ poder yeⁿꞌē nanááⁿ ndísꞌtiī caati nguɛ́ɛ́ caneé nī maaⁿ yeⁿꞌe ley miiⁿ naati canee nī maaⁿ nducuéⁿꞌē vaadī nꞌdai yeⁿꞌé Ndyuūs.
Yeⁿꞌe ejemplo yeⁿꞌe ꞌiiⁿꞌyāⁿ chi ꞌáámá idiíⁿ yā ntiiⁿnyuⁿ yeⁿꞌé Ndyuūs
15 ¿Tuuꞌmi ní dɛꞌɛ̄ diiⁿ yú? ¿ꞌÁá diiⁿ yú nuuⁿndi caati ꞌāā ntɛ́ɛ́ canee yú maaⁿ ley miiⁿ naati canee yú maaⁿ denduꞌū chi nꞌdai taavi chi yeⁿꞌé Ndyuūs? Nguɛɛ yeⁿꞌē mar ꞌáámá naaⁿ. 16 Ndísꞌtiī ní deenu nī chi nduuti chi caꞌá nī vida yeⁿꞌe maáⁿ nī na taꞌa ꞌáámá patrón yeⁿꞌe nī ní ꞌáámá caneé nī chi diíⁿ nī ntiiⁿnyuⁿ chi ngaⁿꞌa ꞌiiví nī, tuuꞌmí ndísꞌtiī ní esclavos ndísꞌtiī yeⁿꞌe ꞌiiví nī. Ní canéé chí diíⁿ nī nducuéⁿꞌē chí ngaⁿꞌa ꞌiiví nī chi diíⁿ nī. ꞌTiicá ntúūⁿ nduuti chi diíⁿ nī chi ngaⁿꞌa nuuⁿndi chi diíⁿ nī tuuꞌmi ní canee nī tanꞌdúúcā chi nuuⁿndi miiⁿ patrón yeⁿꞌe nī. Ní cuuvi ꞌcuūvi nī cueⁿꞌe daāⁿmaⁿ. Ní nduuti chi diíⁿ nī chi ngaⁿꞌa Ndyuūs, tuuꞌmi ní nꞌdaacā diíⁿ nī nanááⁿ Ndyuūs. 17 ꞌÚú ní caꞌá gracias Ndyuūs caava ndísꞌtiī caati ndísꞌtiī ꞌáárá chi tiempo chi chóꞌōo ní ndísꞌtiī esclavos yeⁿꞌe nuuⁿndi ndísꞌtiī naati maaⁿ ní chꞌiindiveéⁿ nī ndúúcū nuuⁿmaⁿ staava yeⁿꞌé nī nduudu cuaacu yeⁿꞌé Ndyuūs chi ꞌiiⁿꞌyāⁿ sꞌeeⁿ ꞌāā chiꞌcueéⁿ yā ndísꞌtiī. 18 Ní taachi canee libre nī yeⁿꞌe poder yeⁿꞌe nuuⁿndi, tuuꞌmi ní ndísꞌtiī diíⁿ nī nducuéⁿꞌē chi nꞌdaacā cáávā poder yeⁿꞌé Ndyuūs chí ngaⁿꞌa ntiiⁿnyuⁿ yeⁿꞌé nī. 19 Ngaⁿꞌá ndúúcū ndísꞌtiī ndúúcū nduudu chi tuumicadiinúúⁿ nī caati ndísꞌtiī cuuvi tuumicadiinuuⁿ cá nī. Tiempo chi chóꞌōo ndísꞌtiī sꞌneéⁿ nī cuerpo yeⁿꞌé nī cáávā nuuⁿndi ní dinuuⁿndí nī tanꞌdúúcā chi maaⁿ cuerpo yeⁿꞌé nī neⁿꞌe chi diíⁿ nī. Ni diiⁿ cá nī chi nguɛ́ɛ́ nꞌdaacā. Maaⁿ ní ꞌāā ꞌneéⁿ nī cuerpo yeⁿꞌe nī cáávā chi diíⁿ nī cosa chi nꞌdaacā ní nducuéⁿꞌē chi diíⁿ nī, diíⁿ nī cáávā Ndyuūs.
20 Taachi ndísꞌtiī canee nī maaⁿ poder yeⁿꞌe nuuⁿndi, nguɛ́ɛ́ cuuvi diíⁿ nī denduꞌū chi nꞌdaacā. 21 Ní ¿dɛꞌɛ̄ chi nꞌdaacā chi diíⁿ nī aprovechar yeⁿꞌe nuuⁿndi chi diíⁿ nī chí ngii ꞌcuináaⁿ nī yeⁿꞌē? Chííⁿ chi diīiⁿ chi caⁿꞌá nī ꞌcuūvi nī cueⁿꞌe daāⁿmaⁿ. 22 Naati maaⁿ ní nguɛ́ɛ́ caneé nī maaⁿ poder yeⁿꞌē nuuⁿndi caati dichííꞌvɛ nī Ndyuūs chi diíⁿ nī ntiiⁿnyuⁿ yeⁿꞌé Ndyuūs. Ní cuayiivi ní vɛ́ɛ́ vida cueⁿꞌe daāⁿmaⁿ chi yeⁿꞌe nī. 23 Chí chiiꞌvɛ̄ yeⁿꞌe nuuⁿndi miiⁿ ní diiⁿ chi ꞌiiⁿꞌyāⁿ chꞌīi yā cueⁿꞌe daāⁿmaⁿ naati chiiⁿ chi Ndyuūs tée yā ꞌiiⁿꞌyāⁿ sꞌeeⁿ ní regalo chi vida cueⁿꞌe daāⁿmaⁿ ti ꞌiiⁿꞌyāⁿ sꞌeeⁿ ní yeⁿꞌe Jesucristo chi Señor yeⁿꞌe yú.