Vɛ́ɛ́ chi cuuvi yeⁿꞌe yú taachi Ndyuūs ngaⁿꞌa yā chi nguɛ́ɛ́ vɛ́ɛ́ nuuⁿndi yeⁿꞌe yú
5
Maaⁿ ní chi Ndyuūs diíⁿ yā recibir sꞌuuuⁿ cáávā chi iꞌtéénu yú Jesucristo vɛ́ɛ́ vaadī ꞌdiiíⁿ yeⁿꞌe yú ndúúcū Ndyuūs caava Señor Jesucristo yeⁿꞌe yú. 2 Ní cáávā Señor Jesucristo ndaa yú nanááⁿ Ndyuūs. Ní Ndyuūs itée yā sꞌuuúⁿ denduꞌū chi nꞌdai taavi yeⁿꞌé yā. Ní díítú iꞌtéénu yú ndúúcū denduꞌū chi nꞌdai yeⁿꞌé yā chi itée yā sꞌuuúⁿ. Ní yeenú nꞌdai yú ní canéé ngiinu yú chííⁿ chí cuuvi yeⁿꞌe yú na vaꞌai chɛɛti nguuvi naachi canéé Ndyuūs chi dɛɛvɛ́ nꞌdai. 3 Ní ꞌtiicá ntúūⁿ yeenú taavi yú taachi nꞌgeenu yú ngii caati deenu yú chi taachi nꞌgeenu yú ngii ní nꞌdaacā ca yeⁿꞌe yú ti vɛ́ɛ́ cá paciencia yeⁿꞌe yú. 4 Ní taachi cuchɛɛ yú yeⁿꞌe nducuéⁿꞌē, tuuꞌmi ní deenu yú chi diiⁿ yú chi Ndyuūs neⁿꞌe yā chi diiⁿ yú ꞌtúúcā. Ní cūnee ngiinu yú chi cuuvi yeⁿꞌe yú chi Ndyuūs caⁿꞌá yā tée yā sꞌuuúⁿ. 5 Ní deenu yú chi cuaacu chi cuuvi yeⁿꞌe yú chi cūnee ngiinu yú. Ní nguɛ́ɛ́ ꞌcuináaⁿ yú caati Ndyuūs ꞌāā tee yā sꞌuūuⁿ na staava yeⁿꞌe yú vaadī neⁿꞌe yeⁿꞌé yā cucáávā Espíritu Nꞌdai yeⁿꞌé yā chi ꞌāā tee yā sꞌuūuⁿ.6 Taachi ꞌāā cuɛ́ɛ́ cuuvi nanguaⁿꞌāī yú cucáávā maaⁿ yú, tuuꞌmi ní Ndyuūs dichoꞌó yā Cristo tiempo chi neⁿꞌe yā caati Cristo chꞌīi yā cáávā ꞌiiⁿꞌyāⁿ chi vɛ́ɛ́ nuuⁿndi yeⁿꞌe yā. 7 Nguɛ́ɛ́ nꞌgíⁿꞌīi chi ꞌáámá ꞌiiⁿꞌyāⁿ ꞌcuūvi yā cucáávā táámá ꞌiiⁿꞌyāⁿ chi nguɛ́ɛ́ nuuⁿndi yeⁿꞌe yā. Ní nꞌdáá rá chi ꞌáámá ꞌiiⁿꞌyāⁿ ꞌcuūvi yā cáávā táámá ꞌiiⁿꞌyāⁿ chi nꞌdaāca diíⁿ yā, ꞌáárá chi ꞌiiⁿꞌyāⁿ chi cuaacu chi nꞌdaāca yā. 8 Ní Ndyuūs chꞌiⁿꞌí yā chi neⁿꞌé yā sꞌuuúⁿ taachi dichoꞌó yā Cristo iⁿꞌyeeⁿdí ꞌcūū chi chꞌīi yā cáávā sꞌuuúⁿ caati sꞌuuúⁿ vɛ́ɛ́ nuūⁿndī yeⁿꞌe yú. 9 Maaⁿ ní Ndyuūs diíⁿ yā recibir sꞌuuúⁿ cáávā Cristo chi chꞌīi yā chi nadanguáⁿꞌai yā sꞌuuúⁿ. Ní Ndyuūs caⁿꞌá yā nadanguaⁿꞌai cá yā sꞌuuúⁿ yeⁿꞌe castigo cucáávā Cristo. 10 Ní taachi sꞌuuúⁿ ꞌāā cuɛ́ɛ́ cuuvi nꞌdiichi yú Ndyuūs, Ndyuūs diíⁿ yā chi cuuvi yeⁿꞌé yā sꞌuuúⁿ cáávā Jesucristo chi chꞌīi yā. Maaⁿ ní sꞌuuúⁿ ní yeⁿꞌe Ndyuūs sꞌuuúⁿ ní nanguaⁿꞌai cā yú cáávā chi Cristo cánduuchi yā ní yeⁿꞌe yā sꞌuuúⁿ. 11 Ní yeenu ca yú nanááⁿ Ndyuūs nguɛ́ɛ́ damaāⁿ cáávā chuū ti yeⁿꞌé Ndyuūs sꞌuuúⁿ cáávā Señor Jesucristo yeⁿꞌe yú. Ní cáávā Cristo miiⁿ vɛ́ɛ́ vaadī ꞌdiīiⁿ yeⁿꞌe yú nanááⁿ Ndyuūs.
Yeⁿꞌe saⁿꞌā Adán ndúúcū Cristo
12 ꞌTíícā caati cáávā ꞌáámá saⁿꞌā chi duuchi Adán ndaā nuuⁿndi iⁿꞌyeeⁿdí ꞌcūū. Ní cáávā nuuⁿndi miiⁿ ꞌiiⁿꞌyāⁿ nꞌdīi yā. Maaⁿ ní chííⁿ chi nducyaaca ꞌiiⁿꞌyāⁿ ní ꞌcuūvi yā caati nducyááca yā ní dinuuⁿndi yā. 13 Ní nuuⁿndī miiⁿ canéé iⁿꞌyeeⁿdí ꞌcūū. Ni ꞌiiⁿꞌyāⁿ idinuuⁿndí yā vmnaaⁿ chi ndaā ley yeⁿꞌe Moisés. Ní nguɛ́ɛ́ diíⁿ yā cuenta yeⁿꞌe nuuⁿndi taachi nguɛ́ɛ́ ley miiⁿ chi chꞌiⁿꞌi ꞌiiⁿꞌyāⁿ yeⁿꞌē nuuⁿndi. 14 ¿Dɛ́ꞌɛ̄ yeⁿꞌe chuū? Ndii tiempo chi canéé Adán ní dinuuⁿndi sa ndii tiempo chi canéé Moisés. Ní Moisés caꞌá yā ley miiⁿ ꞌiiⁿꞌyāⁿ sꞌeeⁿ chi dinuuⁿndí yā ní canéé chi ꞌcuūvi yā. Ní chꞌīi yā ꞌáárá chi nguɛ́ɛ́ dinuuⁿndí yā tanꞌdúúcā Adán chi nguɛ́ɛ́ nꞌgiindiveéⁿ yā chi ngaⁿꞌa Ndyuūs. Ní cáávā chi Adán miiⁿ dinuuⁿndí yā, chuū chꞌiⁿꞌi ꞌiiⁿꞌyāⁿ chi Daiyá Ndyuūs canéé chí cúchiī ní ꞌiiⁿꞌyāⁿ sꞌeeⁿ ꞌcaandiveéⁿ yā nduudu yeⁿꞌé Ndyuūs.
15 Ní nguɛ́ɛ́ cuuvi nduuvidáámá cosa chi Ndyuūs tee yā sꞌuuúⁿ ndúúcū nuuⁿndi chi diiⁿ Adán miiⁿ. Cáávā chi ꞌáámá saⁿꞌā Adán miiⁿ idinuuⁿndí yā, nducyaaca ꞌiiⁿꞌyāⁿ canéé chi ꞌcuūvi yā caati condenado yā. Ní cáávā ꞌáámá saⁿꞌā Jesucristo, Ndyuūs dátēe yā sꞌuuúⁿ chi nadinguaⁿꞌáí yā sꞌuuúⁿ ní nguɛ́ɛ́ nadííꞌvɛ̄ yú yeⁿꞌé yā. Ní chuū chi tee Ndyuūs ní nꞌdaacā ca ní cáávā nꞌdeēe nꞌdáí ꞌiiⁿꞌyāⁿ. 16 Ní ꞌāā viꞌí cā nuuⁿndi chi diiⁿ Adán yeⁿꞌe chiiⁿ chi Ndyuūs tee yā ꞌiiⁿꞌyāⁿ chi nadinguáⁿꞌai yā ꞌiiⁿꞌyāⁿ. Cuayiivi chi Adán idinuuⁿndí yā nducyaaca ꞌiiⁿꞌyāⁿ ní caneé yā condenado. Maaⁿ ní Ndyuūs nadinguáⁿꞌai yā ꞌiiⁿꞌyāⁿ chi cuuvi yeⁿꞌé yā ꞌiiⁿꞌyāⁿ. Ní ꞌiiⁿꞌyā sꞌeeⁿ nguɛ́ɛ́ nadííꞌvɛ yā ní Ndyuūs nadinguáⁿꞌai yā ꞌiiⁿꞌyāⁿ chi nꞌdeēe nꞌdáí nuuⁿndi idiíⁿ yā. 17 Cuaacu chi ꞌiiⁿꞌyāⁿ canéé chi ꞌcuūvi yā cáávā chi ꞌáámá saⁿꞌā dinuuⁿndi sa. Ní maaⁿ ní nꞌdaacā ca chi diiⁿ ꞌáámá ꞌiiⁿꞌyāⁿ chi Jesucristo miiⁿ. Ni cucáávā Jesucristo miiⁿ Ndyuūs diíⁿ yā recibir ꞌiiⁿꞌyāⁿ sꞌeeⁿ chi cuuvi yeⁿꞌé yā. Ní ꞌiiⁿꞌyāⁿ sꞌeeⁿ nguɛ́ɛ́ nadííꞌvɛ yā yeⁿꞌe chuū. ꞌIiⁿꞌyāⁿ sꞌeeⁿ ní vɛ́ɛ́ poder yeⁿꞌé Ndyuūs ndúúcu yā chi ꞌcuɛɛtinéé nꞌdááca yā na vida yeⁿꞌé yā chi ngai.
18 ꞌTíícā nducyáácá ꞌiiⁿꞌyāⁿ canee condenado yā cáávā ꞌáámá saⁿꞌā Adán chi dinuuⁿndí yā. Naati cáávā Jesucristo miiⁿ chi diíⁿ yā chi neⁿꞌe Ndyuūs, Ndyuūs diíⁿ yā recibir nducyaaca ꞌiiⁿꞌyāⁿ chi cuuví yeⁿꞌé yā ni vɛ́ɛ́ vida cueⁿꞌe daāⁿmaⁿ yeⁿꞌé yā. 19 Chuū ní neⁿꞌe caaⁿꞌmaⁿ ꞌtíícā. Cáávā chi ꞌáámá saⁿꞌā Adán nguɛ́ɛ́ chꞌiindiveeⁿ sa nduudu chi ngaⁿꞌa Ndyuūs nducyaaca ꞌiiⁿꞌyāⁿ snée yā maaⁿ poder yeⁿꞌē nuuⁿndi. ꞌTiicá ntúūⁿ. Cáávā chi ꞌáámá saⁿꞌa Cristo chꞌiindiveéⁿ yā nduudu chi ngaⁿꞌa Ndyuūs nééné ꞌyaaⁿ ꞌiiⁿꞌyāⁿ cuuví ndaa yā nanááⁿ Ndyuūs, ní cuuvi yeⁿꞌé Ndyuūs ꞌiiⁿꞌyāⁿ sꞌeeⁿ.
20 Ndyuūs tee yā ley miiⁿ caati ꞌiiⁿꞌyāⁿ cuuví nꞌdiichi cá yā chi dinuuⁿndi cá yā. Ní taachi dinuuⁿndi cá yā Ndyuūs tee yā vaadī nꞌdai ca yeⁿꞌe yā chí chꞌɛɛtɛ ca chi nadanguáⁿꞌai yā ꞌiiⁿꞌyāⁿ nguɛ́ɛ́ ti nuuⁿndi miiⁿ. 21 Maaⁿ ní choꞌó chuū caati taachi ꞌiiⁿꞌyāⁿ idinuuⁿndí yā ní canéé chi ꞌcuūvi yā cáávā poder yeⁿꞌe nuuⁿndi. ꞌTiicá ntúūⁿ vaadī nꞌdai ca yeⁿꞌé Ndyuūs ndúúcú poder yeⁿꞌé yā diiⁿ chi diíⁿ yā aceptar sꞌuuúⁿ chi cuuvi yeⁿꞌé yā sꞌuuúⁿ ní diiⁿ chi vɛ́ɛ́ vida cueⁿꞌe daāⁿmaⁿ yeⁿꞌe yú cucáávā Señor Jesucristo yeⁿꞌe yú.