Herodes ꞌcaaⁿꞌnúⁿ yā Jacobo, ní sꞌnuúⁿ yā Pedro vácūū
12
Tiempo miiⁿ ní rey Herodes diiⁿyuⁿ taꞌá yā chi neⁿꞌe ꞌcaaⁿꞌnúⁿ yā náⁿꞌā ꞌiiⁿꞌyāⁿ chi ngeⁿꞌe yaācū. 2 Níícú chꞌiiⁿꞌnuⁿ rey miiⁿ ndúúcū machete chí ꞌcaāíⁿ ndúú ꞌuuvī lados Jacobo chi ꞌdíinū Juan. 3 Nꞌdiichí yā chi ꞌiiⁿꞌyāⁿ Israel sꞌeeⁿ canee yiinú yā chuū. Dichóꞌo yā saⁿꞌa sꞌeeⁿ chi cutaꞌā ntúuⁿ sa Pedro denduꞌū. Nguuvi mííⁿ ní nguuvi yeⁿꞌē pan chi nguɛ́ɛ́ yiinūuⁿ levadura miiⁿ. 4 Staꞌá yā Pedro ní sꞌnuúⁿ yā saⁿꞌā vácūū naachi snéé cuūuⁿ taáⁿ soldado, ꞌáámá tááⁿ soldado miiⁿ cuūuⁿ ngíi sa. Soldado sꞌeeⁿ cununꞌdai sa Pedro ní choꞌó yeⁿꞌē pascua ní rey Herodes tunꞌdái yā saⁿꞌā. 5 Cununꞌdai sa Pedro miiⁿ chi canuuⁿ sa vácūū. ꞌIiⁿꞌyāⁿ chí ngeⁿꞌe yaācū miiⁿ ngáⁿꞌánguāꞌá yā ní ngíícá yā Dendyuūs ndii nguuvi ndíí nꞌgaaⁿ cucáávā Pedro miiⁿ.Nanguaⁿꞌai Pedro yeⁿꞌe vácuū
6 Taachi neⁿꞌe ntunꞌdáa Herodes miiⁿ Pedro miiⁿ, nguiinū mííⁿ nūuⁿ ní cyaadu Pedro miiⁿ naavtaⁿꞌa yeⁿꞌe ꞌuuvī soldado sꞌeeⁿ. Ndɛɛ̄ chiīchí sa ndúúcū ꞌuuvī cadena sꞌeeⁿ. Saⁿꞌā sꞌeeⁿ chi diiⁿ cuidado vácūū mííⁿ snée sa cheendi vacūū miiⁿ. 7 ꞌCaandiveéⁿ nī, ndaā ꞌáámá ángel yeⁿꞌē Señor. Ní ꞌáámá dɛɛvɛ́ canéé na vácūū. Tuuꞌvi yā tíícuaa Pedro ní nanduuchí yā Pedro. Ní caⁿꞌa yā: Nacueeⁿ di cániicū di. Cadena sꞌūuⁿ ní chivíi na taꞌā sa. 8 Tuuꞌmi ní ngaⁿꞌa ángel miiⁿ ní ngii yā saⁿꞌā: Cuꞌneeⁿ di cinto yeⁿꞌē di ní cunuūⁿ cáꞌa di ndaacuú yeⁿꞌē di ní diīⁿ chiichí di cinta yeⁿꞌē. ꞌTíícā diiⁿ sa. Ní caⁿꞌa yā: Nunúúⁿ dí catecai vmnaaⁿ di ní cuchíi di, ní canꞌdaā dī ꞌúú.
9 Ní nꞌdaa sa ní cueⁿꞌe sa nꞌdaā sa ꞌiiⁿꞌyāⁿ. Pedro miiⁿ ní nguɛ́ɛ́ deenu sa chi cuaacu chi diiⁿ ángel miiⁿ. Nadacádiinuuⁿ sa chi ꞌáámá visión chi nꞌgííⁿnuⁿ sa nguaaⁿ na ꞌyúúduyaāⁿ yeⁿꞌē sa. 10 Choꞌó yā, yeⁿꞌē ꞌáámá tááⁿ soldado sꞌeeⁿ, ní choꞌó yā ndii chiiⁿ ndii ꞌúúví tááⁿ soldado sꞌeeⁿ. Ní ndaá yā ná cheendi vaꞌáí cūū chí canéé cuaaⁿ na yáāⁿ miiⁿ. Chii ní nánguááⁿ máāaⁿ cheendi vaꞌai yeⁿꞌé yā. Canꞌdáa yā ní choꞌó yā ꞌáámá yúúní, ní ángel miiⁿ ní chivíi yā yeⁿꞌe yā. 11 Tuuꞌmi ní Pedro miiⁿ ní nduuchi sa. Ní caⁿꞌā sa: Maaⁿ ní ituumicadiinúuⁿ chí Ndyuūs miiⁿ nidichoꞌó yā ángel yeⁿꞌé yā ní nanguáⁿꞌai yā ꞌúú yeⁿꞌē taꞌa rey Herodes. Níícú yeⁿꞌē tanducueⁿꞌē yáāⁿ chí yáāⁿ yeⁿꞌē ꞌiiⁿꞌyāⁿ Israel sꞌeeⁿ chi snéé ngiinu yā chi ꞌcuūvi ꞌúú.
12 Taachí Pedro nacadíínuuⁿ yā yeⁿꞌē chuū cueⁿꞌé yā, ní ndaa yā na vaacu María chɛɛcu Juan, chi ngúúví ntúūⁿ sa Marcos, naachí neení ꞌyaaⁿ yā snée yā chi nduuvidáámá yā ní ngaⁿꞌanguaꞌá yā. 13 Taachí diꞌcuɛɛ̄cú Pedro cheendi vaꞌāī yeⁿꞌe patio, canꞌdáā ꞌáámá nꞌdaataá chi nguuvi tá Rode. 14 Tá ꞌcūū ní ꞌnaanaveeⁿ tá nduudu yeⁿꞌē Pedro ní chiī yeenú tá. Ní nguɛ́ɛ́ nnꞌguaaⁿ tá cheendi vaꞌāī. Cunaⁿꞌā tá ngeēnū tá chɛɛti vaꞌāī ní caⁿꞌa tá chi Pedro miiⁿ canee sa cheendi vaꞌāī. 15 ꞌIiⁿꞌyāⁿ sꞌeeⁿ ní ngaⁿꞌá yā ngiī yā táⁿꞌā: Loca dii. Taⁿꞌā miiⁿ dicuaācu tá saⁿꞌā miiⁿ. Tuuꞌmí ꞌiiⁿꞌyāⁿ sꞌeeⁿ caⁿꞌa yā: Angel chi diíⁿ cuidado saⁿꞌā.
16 Pedro miiⁿ ní iyaaꞌvi ca sá. Taachí nnꞌguaaⁿ yā ní nꞌdiichi yā saⁿꞌā diiꞌyá yā chiī. 17 Pedro miiⁿ ní ditáꞌa sa yeⁿꞌé yā chi ꞌcuɛɛtinéé ꞌdiíⁿ cheendi yā. Ní chii sa ꞌiiⁿꞌyāⁿ táácā ángel yeⁿꞌe Señor ntunꞌdáa yā saⁿꞌā vácūū. Pedro ní caⁿꞌa sa: Diíⁿ nī chi cadiinuuⁿ Jacobo ndúúcū hermanos. Pedro canꞌdáa sa ní cueⁿꞌe sa taama lugar.
18 Chi dɛɛvɛ mííⁿ ní diiꞌyā nꞌdáí soldado sꞌeeⁿ chi chii ndúúcū Pedro. 19 Herodes miiⁿ ní nꞌnuúⁿ yā saⁿꞌā. Nguɛ́ɛ́ ndaaca yā saⁿꞌā. Chꞌiinu maaⁿ ní tiinguuneéⁿ yā saⁿꞌā sꞌeeⁿ chi diiⁿ cuidado. Caⁿꞌa yā chi ꞌcuūvī saⁿꞌa sꞌeeⁿ. Cuayiivi cueⁿꞌe Herodes miiⁿ yáⁿꞌāa Judea ná yáāⁿ Cesarea ní canee yā miiⁿ.
Chꞌiī rey Herodes
20 Herodes miiⁿ taaⁿ nꞌdai yā yeⁿꞌē ꞌiiⁿꞌyāⁿ yáāⁿ Tiro ndúúcū ꞌiiⁿꞌyāⁿ yáāⁿ Sidón. Naati ꞌiiⁿꞌyāⁿ yeⁿꞌe yáāⁿ sꞌeeⁿ ní ndaá yā nanááⁿ rey Herodes miiⁿ chí neⁿꞌe taaví yā chi canéé ꞌdiīíⁿ, ti chí ngeꞌé yā chi yeⁿꞌē yáⁿꞌāa yeⁿꞌe rey. Cutaꞌá yā tanꞌdúúcā amigo yeⁿꞌé yā saⁿꞌā chi nguuvi Blasto chi diiⁿ cuidado vaꞌai yeⁿꞌe rey, cuarto naachi cyaadú yā. Neⁿꞌé yā chi cuuví caaⁿꞌmaⁿ sa ndúúcū rey cááva yā. 21 ꞌÁámá nguuvi chí diiⁿ señalado cáávā chuū, Herodes canuuⁿ yā catecai rey. Chꞌiindí yā na trono yeⁿꞌé yā ní caⁿꞌa yā chii yā ꞌiiⁿꞌyāⁿ ꞌáámá nduudu. 22 Ní ꞌiiⁿꞌyāⁿ yáāⁿ miiⁿ ꞌcai yiicú yā ní caⁿꞌa yā: Ndúúdú miiⁿ yeⁿꞌē Dendyuūs, nguɛ́ɛ́ yeⁿꞌe saⁿꞌā iⁿꞌyeeⁿdí ꞌcūū.
23 Hora miiⁿ ní ꞌáámá ángel yeⁿꞌe Señor miiⁿ nꞌnuuⁿ cáꞌai yā saⁿꞌā Herodes caati nguɛ́ɛ́ caⁿꞌa sa chi yeⁿꞌe Dendyuūs chí chꞌɛɛtɛ taavi chi ngaⁿꞌa sa. Ní cheꞌē taavi nꞌdáá rey miiⁿ ní chꞌiī sa.
24 Nduudú yeⁿꞌē Señor Jesucristo miiⁿ ndíí chꞌɛɛtɛ ca ní ꞌiiⁿꞌyāⁿ chi iꞌtéénu ngíí ꞌyaaⁿ cá yā.
25 Bernabé ndúúcū Saulo miiⁿ nndaá ntúuⁿ yā yáāⁿ Jerusalén ti ꞌāā diíⁿ yā cumplir ntiiⁿnyuⁿ yeⁿꞌé yā. Ndɛɛ̄ ntúuⁿ yā Juan chi nguuvi Marcos.