4 Tuuꞌmi ní Pedro miiⁿ ní tucaꞌa sa chii sa ꞌiiⁿꞌyāⁿ sꞌeeⁿ táácā chiī. Ní caⁿꞌa sa: 5 Caneé na yáāⁿ Jope ní ngaⁿꞌanguāꞌá ní nnduūchí ní nꞌdiichí ꞌáámá visión dácaā ꞌáámá tiīnūuⁿ chꞌɛɛtɛ́ cuchꞌééⁿ nanguuvi nꞌdɛ́ɛ́ chiīchí nduū cúūuⁿ esquinas ndaā ndii vmnááⁿ. 6 Taachi nꞌdiichí, nacádiinúúⁿ. Tuuꞌmi ní nꞌdiichí yeⁿꞌé icyáⁿꞌā ꞌiiti chí cuūuⁿ cáꞌa tī ndúúcū ꞌiiti taaⁿ ndúúcū cúú ndúúcū ꞌyaada yeⁿꞌē nanguuvi. 7 Ní chꞌiindiveéⁿ ꞌáámá nduudu chi caⁿꞌā chiī ꞌúú: Díí Pedro, nacueeⁿ di. ꞌCaaⁿꞌnuⁿ dí ꞌiiti, ní chéꞌé dí ꞌiiti. 8 Ní caⁿꞌá chuū: Señor, nguɛ́ɛ́; ti mar ꞌáámá chi vaatíī chí nguɛɛ nꞌdaacā cheꞌé. 9 Tuuꞌmi ní nduudu yeⁿꞌē nanguuvi caⁿꞌa ntuūⁿ ndiichi ndii ꞌúúví: Chííⁿ chi Ndyuūs nádindɛɛvɛ́ yā, nguɛ́ɛ́ caaⁿꞌmaⁿ di yeⁿꞌē chi vaatíī. 10 Chuū ní ꞌiiⁿnuⁿ cúúví chiī. Cuinaⁿꞌā ntúūⁿ tanducuéⁿꞌē nandɛ́ɛ yā cuááⁿ ꞌniiⁿnuⁿ nanguuvi. 11 Ní nꞌdiichí nī. Hora miiⁿ ndaā na ꞌiiⁿnuⁿ saⁿꞌā na vaꞌāī naachi ꞌúú caneé. ꞌÁámá ꞌiiⁿꞌyāⁿ chi nguuvi Cornelio dichóꞌo yā saⁿꞌā yeⁿꞌe yáāⁿ Cesarea ndíí naachi caneé. 12 Ní Espíritu Nꞌdai yeⁿꞌe Ndyuūs ngaⁿꞌa ngii ꞌúú chi caⁿꞌá ndúúcu sa. Ní nguɛ́ɛ́ dɛꞌɛ̄ vɛɛ nadicádiinúúⁿ. Cheⁿꞌé ndúúcū niyaaⁿ hermanos ní sndáa ꞌnū vaacu Cornelio. 13 Saⁿꞌā miiⁿ caⁿꞌa sá chii sá núsꞌuū, tááca nꞌdiichi sa ꞌáámá ángel vaācū sa chí cheendii yā ní cāⁿꞌa yā: Díí Cornelio, dichoꞌó dí saⁿꞌā sꞌeeⁿ yáāⁿ Jope ní diiⁿ dí chí ndaa sáⁿꞌā Simón chi nguuvi Pedro mííⁿ. 14 Saⁿꞌā miiⁿ ní caaⁿꞌmaⁿ sá nduudu chí nanguaⁿꞌāī dii ndúúcu nducyáácá ꞌiiⁿꞌyāⁿ yeⁿꞌe di na vaacu di. 15 Ní taachí tucáꞌá caⁿꞌá, ndaā Espíritu Nꞌdai yeⁿꞌe Ndyuūs yeⁿꞌe cuaaⁿ ꞌniiⁿnuⁿ vmnaaⁿ yeⁿꞌē nducyaaca ꞌiiⁿꞌyāⁿ sꞌeeⁿ denduꞌū, tanꞌdúúcā chí chiī ndúúcū sꞌuūúⁿ vmnááⁿ vmnaaⁿ. 16 Tuuꞌmi ní nnꞌgaācú chi caⁿꞌa Señor miiⁿ, chi caⁿꞌa yā: Juan mííⁿ chɛɛdinuūⁿníⁿ yā ndúúcū nuūⁿnīⁿ naati ndísꞌtiī ní cuɛ́ɛ́dinuūⁿníⁿ nī ndúúcū Espíritu Nꞌdai yeⁿꞌe Ndyuūs. 17 Nduuti chi Dendyuūs chi caꞌa yā regalo miiⁿ ꞌiiⁿꞌyāⁿ tanꞌdúúcā chi teé yā sꞌuūúⁿ chi iꞌteenu yú Señor Jesucristo, ¿duꞌū ꞌúú chi diꞌvaachí yeⁿꞌē Dendyuūs miiⁿ?

18 Tuuꞌmi ní chꞌiindiveéⁿ yā nduudu miiⁿ ní chꞌɛɛtinéé ꞌdiíⁿ yā ní cāⁿꞌa yā chi chꞌɛɛtɛ́ yā Ndyuūs, ní caⁿꞌa yā: ꞌTiicá ntúūⁿ caꞌa Dendyuūs ꞌiiⁿꞌyāⁿ sꞌeeⁿ chi nguɛ́ɛ́ ꞌiiⁿꞌyāⁿ yeⁿꞌe ndaata Israel chi ndaacadaamí yā yeⁿꞌē nuuⁿndi yeⁿꞌé yā ní nndaāca yā vida cueⁿꞌe daāⁿmaⁿ.

19 Maaⁿ ní ꞌiiⁿꞌyāⁿ chi cueⁿꞌē ꞌmúúⁿ cueⁿꞌe miiⁿ yā cucáávā chiiⁿ chi diíⁿ ꞌiiⁿꞌyāⁿ ndúúcū Esteban, ꞌiiⁿꞌyāⁿ miiⁿ choꞌó yā ndii yáⁿꞌāa Fenicia, ndúúcū isla Chipre, ndii yaāⁿ Antioquía. Ní nguɛ́ɛ́ cāⁿꞌa yā nduudu yeⁿꞌe Dendyuūs ndúúcū nducyáácá ꞌiiⁿꞌyāⁿ, dámaāⁿ ꞌiiⁿꞌyāⁿ Israel sꞌeeⁿ caⁿꞌa yā nduucú yā. 20 Nguaaⁿ ꞌiiⁿꞌyāⁿ sꞌeeⁿ ni snéé saⁿꞌā yeⁿꞌe isla Chipre yeⁿꞌe yáāⁿ Cirene. Saⁿꞌā sꞌeeⁿ ní taachi ndaā sa yáāⁿ Antioquía yaaꞌvi sá ꞌiiⁿꞌyāⁿ sꞌeeⁿ chi nguɛ́ɛ́ ꞌiiⁿꞌyāⁿ yéⁿꞌē ndaata Israel dendúꞌū ní caⁿꞌa sa evangelio chi ndúúdú ngai yeⁿꞌē Señor Jesús. 21 Ní taꞌā Señor ꞌiivú Ndyuūs miiⁿ canéé ndúúcū sa. Chii ꞌyaaⁿ nꞌdáí ꞌiiⁿꞌyāⁿ chiꞌtéénu yā Señor miiⁿ. Ní canꞌdáa yā Señor miiⁿ.

22 Choꞌōo chi ꞌiiⁿꞌyāⁿ yeⁿꞌe yáacū chi snée yā yáāⁿ Jerusalén chꞌiindiveéⁿ yā chuū. Ní dichóꞌo yā Bernabé chi caⁿꞌa sa yáāⁿ Antioquía. 23 Sáⁿꞌa ꞌcūū taachi ndaā sa ní nꞌdiichi sa favor chꞌɛɛtɛ taavi yeⁿꞌē Dendyuūs miiⁿ, yeenú taavi sa. Ní chiꞌcueeⁿ sa chí nducyáácá yā ꞌcuɛɛtinéé yā ndúúcū nuuⁿmaⁿ staava yeⁿꞌé yā ndúúcū Señor ꞌiivú Dendyuūs miiⁿ. 24 Saⁿꞌā Bernabé miiⁿ ní nꞌdai sa, ní ndiituú saⁿꞌā Espíritu Nꞌdai yeⁿꞌe Ndyuūs ní iꞌtéénu sá ndúúcū núúⁿmáⁿ staava yeⁿꞌe sa. Chii ꞌyaaⁿ nꞌdáí ꞌiiⁿꞌyāⁿ chiꞌtéénu yā Señor miiⁿ.

25 Cuayiivi miiⁿ ní cueⁿꞌē Bernabé na yáāⁿ Tarso chi inꞌnuuⁿ sa Saulo miiⁿ; ní ndaācā sa saⁿꞌā ní nandɛɛ̄ sa saⁿꞌā na yáāⁿ Antioquía. 26 Ní nduuvidaamá yā ꞌáámá nduuyu na yaācū miiⁿ, ní chiꞌcuééⁿ yā neené ꞌyaaⁿ ꞌiiⁿꞌyāⁿ. Chíí vmnááⁿ vmnaaⁿ na yáāⁿ Antioquía ꞌiiⁿꞌyāⁿ sꞌeeⁿ yeⁿꞌe yáāⁿ miiⁿ caⁿꞌa yā chi duuchí cristiano sꞌeeⁿ, ꞌiiⁿꞌyāⁿ chi iꞌteenu Cristo.

27 Nguuvi sꞌuúⁿ tanáⁿꞌā profetas chi ngaⁿꞌā nduudu yeⁿꞌe Dendyuūs canꞌdáa yā na yáāⁿ Jerusalén. Ndaá yā na yáāⁿ Antioquía. 28 Nadacueeⁿ ꞌáámá yā chi nguuví yā Agabo ní diíⁿ yā chí inadacádiinūuⁿ ꞌiiⁿꞌyāⁿ sꞌeeⁿ cáávā Espíritu Nꞌdai yeⁿꞌe Ndyuūs chí ndaa ꞌáámá cuiicu chꞌɛɛtɛ núúⁿmáⁿ yáⁿꞌāa chi vɛ́ɛ́ ꞌiiⁿꞌyāⁿ. Choꞌōo chuū nguuvi yeⁿꞌe saⁿꞌā Claudio. 29 Tuuꞌmi ní ꞌiiⁿꞌyāⁿ sꞌeeⁿ chi iꞌtéénú Cristo diíⁿ yā chí dichoꞌó yā ofrendas yeⁿꞌē hermanos chi snée yā yáⁿꞌāa Judea. ꞌÁámá ꞌáámá yā tuunu tuunu ca tanꞌdúúcā chi cuuvi caꞌá yā. 30 Chuū ní diíⁿ yā ní caꞌá yā ꞌiiⁿꞌyāⁿ ndiicúū. Ní ꞌiiⁿꞌyāⁿ ndiicúū dichóꞌo yā limosna ndúúcū Bernabé ndúúcū Saulo.