Diíⁿ yā votar ndɛɛ̄chɛ̄ sáⁿꞌā diáconos
6
Nguuvi miiⁿ chiꞌyááⁿ ꞌiiⁿꞌyāⁿ sꞌeeⁿ chi iꞌtéénu yā Jesús. Chꞌiindiveéⁿ yā nduudú vaadī caaꞌva nguáaⁿ yā. ꞌIiⁿꞌyāⁿ sꞌeeⁿ chi griego yā caⁿꞌa yā chí ꞌiiⁿꞌyāⁿ Israel sꞌeeⁿ nguɛ́ɛ́ diíⁿ yā cuenta ndii nguɛɛ caꞌá yā nguuvi nguuvi nꞌdáátaa nguáꞌaā chi cutaꞌā tá chɛɛ̄ chi cheꞌē tá. 2 Tuuꞌmi ní ndiichúúví apóstoles nadidaama yā nducyáácá ꞌiiⁿꞌyāⁿ chi iꞌtéénu yā Jesús, ní caⁿꞌa yā: Nguɛ́ɛ́ nꞌdaacā chí cuꞌneeⁿ ꞌnū chi caaⁿꞌmáⁿ ꞌnū yeⁿꞌē nduudu yeⁿꞌe Dendyuūs ní caꞌá ꞌnū chi cheꞌé ꞌiiⁿꞌyāⁿ. 3 Ndísꞌtiī hermanos, inꞌnuúⁿ nī nguaaⁿ sꞌuuúⁿ ndɛɛ̄chɛ̄ saⁿꞌā chi nꞌdaacā vida yeⁿꞌe yā ní chi diītú yā ndúúcū Espíritu Nꞌdai yeⁿꞌe Ndyuūs ndúúcū vaadī cadíínūuⁿ. Saⁿꞌā sꞌeeⁿ caꞌā yú ntííⁿnyúⁿ ꞌcūū saⁿꞌā. 4 Ní núsꞌuū ꞌcuɛɛtinée ꞌnū caaⁿꞌmaⁿnguaꞌá ꞌnū ní ꞌcuɛɛtinée ꞌnū lado yeⁿꞌē chi caaⁿꞌmáⁿ ꞌnū nduudu yeⁿꞌe Dendyuūs.5 Nducyáácá yā ní canee yiinú yā chuū. Ní diíⁿ yā votar Esteban saⁿꞌā chi iꞌteenu taavi ní ndiituú ndúúcū Espíritu Nꞌdai yeⁿꞌe Ndyuūs, ndúúcū Felipe, ndúúcū Prócoro, ndúúcū Nicanor, ndúúcū Timón, ndúúcū Parmenas, ndúúcū Nicolás ꞌaama chi iꞌteenu yeⁿꞌe yáāⁿ Antioquía ní maaⁿ ní ꞌāā saⁿꞌā Israel. 6 Nducyaacá yā chiꞌnéeⁿ yā saⁿꞌā sꞌeeⁿ ní cueⁿꞌe sa nanááⁿ apóstoles chi dichóꞌó Dendyuūs. Ní cuayííví chi caⁿꞌanguaꞌá yā tuuꞌmi ní snꞌdúu yā taꞌá yā vmnááⁿ yeⁿꞌe saⁿꞌā sꞌeeⁿ cáávā ntiiⁿnyūⁿ chí caꞌa yā saⁿꞌā.
7 Níícú chiī ꞌyaāⁿ ꞌiiⁿꞌyāⁿ chí chiꞌteenú yā nduudu yeⁿꞌe Dendyuūs miiⁿ. Ní ꞌiicu ꞌiiⁿꞌyāⁿ sꞌeeⁿ chí iꞌteenú yā Jesús neené chii ꞌyaaⁿ taaví sá ná yáāⁿ Jerusalén. Neené ꞌyáāⁿ chiiduú sꞌúúⁿ yeⁿꞌē Israel chiꞌtéénu yā tanꞌdúúcā chi ꞌiiⁿꞌyāⁿ sꞌeeⁿ chiꞌtéénu yā.
Staꞌá yā Esteban
8 Esteban miiⁿ ní ꞌáámá ꞌiiⁿꞌyāⁿ chi iꞌteenú taavi yā níícú chi diitú yā ndúúcū poder. Ní neene nꞌgɛɛtɛ vaadī nꞌgiinu ndúúcū señales diíⁿ yā nguaaⁿ ꞌiiⁿꞌyāⁿ yáāⁿ. 9 Tuuꞌmi ní tanáⁿꞌā ꞌiiⁿꞌyāⁿ chi caⁿꞌá yā yaacū sinagoga yeⁿꞌe yáāⁿ yeⁿꞌe yā ꞌiiⁿꞌyāⁿ chi nguuvi Libertos, ndúúcū ꞌiiⁿꞌyāⁿ yeⁿꞌē yáāⁿ Cirene, ndúúcū ꞌiiⁿꞌyāⁿ yeⁿꞌe yáāⁿ Alejandría, ndúúcū denduꞌū ꞌiiⁿꞌyāⁿ yeⁿꞌe yáⁿꞌāa Cilicia, ndúúcū ꞌiiⁿꞌyāⁿ yeⁿꞌē yáāⁿ Asia, ꞌiiⁿꞌyāⁿ sꞌeeⁿ chꞌɛɛcu cheendí yā ndúúcū Esteban. 10 Naati nguɛ́ɛ́ chi chɛɛ́ yā ndúúcū Esteban cáávā vaadī deenu yeⁿꞌé yā ndúúcū chii Espíritu Nꞌdai yeⁿꞌe Ndyuūs caⁿꞌa chi caaⁿꞌmaⁿ Esteban. 11 Tuuꞌmi ní nꞌdeꞌei nꞌdeꞌei caⁿꞌa yā chii yā náⁿꞌā ꞌiiⁿꞌyāⁿ chi caaⁿꞌmáⁿ yā chi ꞌāā nꞌgiindiveéⁿ yā chi Esteban miiⁿ caⁿꞌa yuudú yā contra Moisés ndúúcū Dendyuūs. 12 ꞌIiⁿꞌyāⁿ sꞌeeⁿ ní chicadiinuuⁿ yā chi nducyaaca ꞌiiⁿꞌyāⁿ yeⁿꞌe yáāⁿ miiⁿ ní nééné chꞌɛɛcu cheendí yā ní ndástaⁿꞌa vaadī cadiinúúⁿ yeⁿꞌé ꞌiiⁿꞌyāⁿ ndicúū ndúúcū maestros yeⁿꞌe ley. Ní nducyáácá ꞌiiⁿꞌyāⁿ sꞌeeⁿ ndaacá yā Esteban, ní staꞌá yā ꞌiiⁿꞌyāⁿ, ní ndɛ́ɛ yā nanááⁿ ꞌiiⁿntyéⁿꞌē concilio. 13 Ní ꞌnēeⁿ yā testigos chí ngaⁿꞌa nduudu yaadi ní ngaⁿꞌa sa: Esteban ꞌcūū ní nguɛ́ɛ́ íꞌnēēⁿnaaⁿ sa chí ngaⁿꞌa taaⁿ sá yeⁿꞌe lugar ꞌcūū yeⁿꞌé Dendyuūs ní contra yeⁿꞌe ley. 14 Nꞌgiindiveéⁿ ꞌnū chi ngaⁿꞌa sa chi Jesús miiⁿ yeⁿꞌe yáāⁿ Nazaret nadatuuví yā lugar ꞌcūū ní n̄ꞌdaáⁿ yā costumbre chi teē Moisés sꞌuūúⁿ.
15 Tuuꞌmi ní nducyaacá ꞌiiⁿntyéⁿꞌē concilio vɛɛtɛ́ yā ní nꞌdiichí yā saⁿꞌā miiⁿ. Nꞌdiichí yā naaⁿ sa tanꞌdúúcā naaⁿ ángel chi saⁿꞌā yeⁿꞌe vaꞌai chɛɛti nguuvi chi diiⁿ ntiiⁿnyuⁿ yeⁿꞌé Ndyuūs.