5 Tuuꞌmi ní saⁿꞌā miiⁿ chꞌíínu sa ꞌiiⁿꞌyāⁿ sꞌeeⁿ chi canee ngíínu sá dɛꞌɛ̄ caꞌá yā saⁿꞌā. 6 Naati Pedro miiⁿ caⁿꞌá yā: Nguɛ́ɛ́ tuūmī ꞌdííⁿnguɛɛ yeⁿꞌé ni nguɛ́ɛ́ ꞌdiiⁿnguāaⁿ yeⁿꞌé chí canéé yeⁿꞌé chi teé dii, cucáávā Jesucristo yeⁿꞌe yáāⁿ Nazaret miiⁿ, nacuééⁿ dī ní caaca di.

7 Ní staꞌá yā taꞌā sa lado tá cuaācū sa ní nadacuéeⁿ yā saⁿꞌā. Hora mííⁿ nūuⁿ ní ndaā dítiīnú caꞌa sa ndúúcū ꞌííní ruundi caꞌa sa. 8 Ní caī yaācú sa, ní chééndii sá, ní chiīcā sa. Sndáa sa ndúúcū Pedro ndúúcū Juan chɛɛti yaācū templo miiⁿ. Ngiica sá ní ngáí yaācú sa ní iꞌtéénu sá Dendyuūs. 9 Núúⁿmáⁿ yáāⁿ ꞌiiⁿꞌyāⁿ nꞌdiichí yā saⁿꞌā chi ngiica sa ní iꞌtéénu sa Dendyuūs. 10 Ní nntíínaaⁿ yā chi saⁿꞌā miiⁿ chi saⁿꞌā chi nꞌgiīndī cheendi yaācū templo chi nguuvi Hermosa, ní ngiica sa limosnas. Ní cheⁿꞌe yiinu yā ní ꞌiiⁿꞌyāⁿ sꞌeeⁿ diiꞌyá yā chiī chi ꞌtíícā nanduuvá yeⁿꞌē sa.

11 Saⁿꞌā chí nguɛɛ ngiica ní chi nduūvā yeⁿꞌē sa staꞌā sa Pedro ndúúcū Juan ní nuuⁿmaⁿ yáaⁿ yā ngeⁿꞌe yiinú yā ꞌiiⁿꞌyāⁿ. Ní cueⁿꞌé yā na corredor chi nguuvi Salomón chi ꞌáámá corredor yeⁿꞌe yaācū chꞌɛɛtɛ. 12 Taachi Pedro nꞌdiichi sa ꞌiiⁿꞌyāⁿ sꞌuúⁿ Pedro nanꞌguɛɛcútáⁿꞌa sa yeⁿꞌé ꞌiiⁿꞌyāⁿ yáāⁿ: Ndísꞌtiī saⁿꞌā yeⁿꞌe Israel, ¿dɛꞌɛ̄ cuuvi chi ngeⁿꞌe yiinú nī yeⁿꞌe chúū? O ¿dɛꞌɛ cuuví chi nꞌgíínu nī núsꞌuū? ¿ꞌÁá caava chi diitú ꞌnū o chí nꞌdáí ꞌnū chi diíⁿ ꞌnū chi ngíícá sáⁿꞌa ꞌcūū? 13 Ndyuūs yeⁿꞌe saⁿꞌā sꞌeeⁿ, Abraham ndúúcū Isaac ndúúcū Jacob ní Ndyuūs yeⁿꞌē chiida yú, Ndyuūs diíⁿ yā honrar Daiyá yā Jesús. Ndísꞌtiī ní caꞌá nī ꞌiiⁿꞌyāⁿ miiⁿ ní cheeⁿdiitú nī nanááⁿ Pilato miiⁿ taachi Pilato neⁿꞌé yā caꞌá yā libertad yeⁿꞌé yā. 14 Ndísꞌtiī ní cheeⁿdiitú nī chi Jesús chí nꞌdaaca yā, Jesús chí nꞌdai taaví yā, ní chiica nī chi canéé libre ꞌáámá saⁿꞌā chi ꞌnííⁿꞌnúⁿ ꞌiiⁿꞌyāⁿ. 15 Ní chꞌiiⁿꞌnuⁿ nī Jesús chi cāꞌa yā vida yeⁿꞌe ꞌiiⁿꞌyāⁿ. ꞌIiⁿꞌyāⁿ miiⁿ ní nadinꞌdūūchí Dendyuūs ꞌiiⁿꞌyāⁿ yeⁿꞌē nguaaⁿ tináⁿꞌā ní núsꞌuú caaⁿꞌmaⁿ cuaacú ꞌnū yeⁿꞌé yā. 16 Sáⁿꞌa ꞌcūū chi nguɛɛ ngiica chi ndísꞌtiī inaáⁿ nī ní nꞌdiichí nī, sáⁿꞌa ꞌcūū ní ditiinú sa cucáávā chi iꞌtéénu sa Jesús. Ndúúcū vaadī iꞌtéénú chi caꞌa Jesús, sáⁿꞌa ꞌcūū ꞌāā nduuvī nꞌdáí sá tanꞌdúúcā chi nꞌdiichī nducyaacá ndisꞌtiī.

17 Naati maaⁿ ní, ndísꞌtiī viꞌí, deenú chí ndísꞌtiī dīiⁿ nī chuū cucáávā chi nguɛɛ déénu nī tanꞌdúúcā chi díīⁿ ꞌiiⁿꞌyāⁿ sꞌeeⁿ chi ngaⁿꞌa ntiiⁿnyúⁿ yā yeⁿꞌē ndísꞌtiī. 18 ꞌTíícā Dendyuūs ní snuūⁿ caꞌa chi caⁿꞌa yā vmnááⁿ vmnaaⁿ cáávā cheendi nducyaaca profetas chi nꞌdai chí caⁿꞌa nduudu yeⁿꞌe Dendyuūs yeⁿꞌe chi Cristo Daiyá yā. Ní cánéé chí Cristo ní ꞌcueenú yā cuuvi. 19 ꞌTíícā maaⁿ ní nacadíínuuⁿ nī ní ndaacadáámí nī yeⁿꞌē nuuⁿndi yeⁿꞌé nī ní cuꞌtéénú nī. Níícú Ndyuūs nadivíi yā nuuⁿndi yeⁿꞌé nī. Níícú ndaa tiempo chí ntaaviꞌtuunúúⁿ nī nanááⁿ Señor ꞌiivú Ndyuūs. 20 Ndyuūs ní ndɛɛvɛ́ yā Jesucristo ndíí vmnaaⁿ níícú caⁿꞌa yā chi dichóꞌo yā Jesucristo tanꞌdúúcā chi caⁿꞌa yā ndíí cuááⁿ vmnaaⁿ. 21 Cuaacu nííⁿnyúⁿ chi ꞌiiⁿꞌyāⁿ miiⁿ canee cúúⁿmíⁿ chi canéé yā vaꞌāī chɛɛti nguuvi ndíí taachi ndáá nguuvi chi Dendyuūs diíⁿ yā taanduvɛ́ɛ́ dendúꞌū chi Dendyuūs caⁿꞌá yā vmnááⁿ vmnaaⁿ cucáávā cheendi profetas yeⁿꞌe yā. Profetas chi nꞌdai caⁿꞌa yā chi cuchiī ndíí cuááⁿ vmnaaⁿ. 22 Caati Moisés miiⁿ ní caⁿꞌa yā chii yā chiida yú sꞌeeⁿ ndíí vmnaaⁿ: Señor Ndyuūs yeⁿꞌē yú nadacuéeⁿ yā ꞌáámá profeta nguaaⁿ ꞌiiⁿꞌyāⁿ yeⁿꞌē yú tanꞌdúúcā ꞌúú. Ní yeⁿꞌé ꞌiiⁿꞌyāⁿ miiⁿ ꞌcaandiveéⁿ nī yeⁿꞌē taanduvɛ́ɛ́ denduꞌū chi caaⁿꞌmaⁿ yā ndúúcū ndísꞌtiī. 23 Ní cuuví chí nducyaaca yā chi nguɛ́ɛ́ ꞌcaandiveéⁿ yā yeⁿꞌe ꞌiiⁿꞌyāⁿ profeta miiⁿ canéé chí canꞌdáa yā yeⁿꞌē nguaaⁿ ꞌiiⁿꞌyāⁿ.

24 Tanducuéⁿꞌe profetas ní ndii tiempo yeⁿꞌe Samuel ndii tiempo chi cuchíī ꞌyaaⁿ nꞌdáí yā ní caⁿꞌa yā, ní ꞌāā caⁿꞌa ntúuⁿ yā yeⁿꞌē nguuvi ꞌcūū. 25 Ndísꞌtiī daiya profetas chí caⁿꞌa nduudu yeⁿꞌé Dendyuūs ní yeⁿꞌe compromiso chí Dendyuūs caⁿꞌa cuaacú yā ndúúcū chiida yú sꞌeeⁿ ní caⁿꞌa yā chii yā Abraham: Ná ndaatá yeⁿꞌē di cuchiī ꞌáámá saⁿꞌā cuayiivi, caati sáⁿꞌā miiⁿ cúúví diꞌviicú sa tanducuéⁿꞌē ꞌiiⁿꞌyāⁿ yeⁿꞌe iⁿꞌyeeⁿdí ꞌcūū. 26 Ndyuūs nadicuéeⁿ yā Daiyá yā vmnááⁿ vmnaaⁿ cáávā ndísꞌtiī. Ní dichóꞌó yā ꞌiiⁿꞌyāⁿ miiⁿ chí diꞌviīcú yā ndísꞌtiī chi ꞌáámá ꞌáámá nī ndaacadaamí nī yeⁿꞌē nuuⁿndí yeⁿꞌé nī.