Jesús ndee yā ndúúcū Chiidá yā caavā discípulos yeⁿꞌé yā
17
Chuū caⁿꞌa Jesús ní nꞌdiichí yā cuaaⁿ nanguuvi ní caⁿꞌa yā: Nꞌdiī Chiidá, hora yeⁿꞌé ní ꞌāā ndaā. Diíⁿ nī dichꞌɛɛtɛ́ nī Daiya nī. ꞌTiicā ntúūⁿ ꞌúú chi Daiya nī cuuvi dichꞌɛɛtɛ́ nꞌdiī. 2 Tanꞌdúúcā chi tee nī poder ꞌúú chi Daiya nī yeⁿꞌe dɛꞌɛ̄ chi diíⁿ nducyaaca ꞌiiⁿꞌyāⁿ cáávā chí caꞌá vida cueⁿꞌe daāⁿmaⁿ ꞌiiⁿꞌyāⁿ chi tee nī ꞌúú. 3 Chuū chi vida cueⁿꞌe daāⁿmaⁿ chí nꞌdiichí yā nꞌdiī chi ꞌáámá nꞌdyaⁿꞌā Dendyuūs chi cuaacu nííⁿnyúⁿ chí Dendyuūs ndúúcū Jesucristo chí dichóꞌo nī.4 ꞌÚú ní dichꞌɛɛtɛ́ nꞌdiī na yáⁿꞌāa ꞌcūū. ꞌĀā chꞌiinú diíⁿ ntiiⁿnyuⁿ chi teé nī chi diíⁿ. 5 Maaⁿ ní nꞌdiī, Chiidá, dichꞌɛɛtɛ́ nī ꞌúú, nꞌdiī ndúúcū maáⁿ nī, ndúúcū poder chi caneé nduucú maáⁿ taachi ꞌāā ꞌcuɛ́ɛ́ cunee iⁿꞌyeēⁿdī.
6 Ngaⁿꞌa cuaacú yeⁿꞌē chi duuchi yeⁿꞌé nī nanááⁿ saⁿꞌā sꞌeeⁿ yeⁿꞌe iⁿꞌyeeⁿdí ꞌcūū chi teé yā ꞌúú. Saⁿꞌā sꞌeeⁿ yeⁿꞌé nī. Ní teé nī ꞌúú. Ní nꞌgiindiveéⁿ yā nduudu yeⁿꞌé nī. 7 Maaⁿ ní déénú yā chi tanducuéⁿꞌē denduꞌū chi teé nī ꞌúú ní yeⁿꞌé nī. 8 Ti ndúúdú chi teé nī ꞌúú ní caⁿꞌá nanááⁿ ꞌiiⁿꞌyāⁿ ní ꞌiiⁿꞌyāⁿ sꞌeeⁿ ní nꞌgiindiveéⁿ yā nduudu miiⁿ. Ní deenu cuaacu yā chi chiīcá nanááⁿ nꞌdiī. Ní iꞌtéénu yā chi nꞌdiī dichoꞌó nī ꞌúú.
9 ꞌÚú ngiicá caavā ꞌiiⁿꞌyāⁿ sꞌeeⁿ. Nguɛ́ɛ́ nidiꞌcuíítu cáávā iⁿꞌyeēⁿdī ti cáávā ꞌiiⁿꞌyāⁿ chi teé nī ꞌúú, ti yeⁿꞌé nꞌdiī. 10 Ní taanduvɛ́ɛ́ denduꞌū yeⁿꞌé ní yeⁿꞌé nī. Ní taanduvɛ́ɛ́ denduꞌū yeⁿꞌé nī ní yeⁿꞌé. Ní chuū chꞌiⁿꞌi poder yeⁿꞌé.
11 Ní ꞌāā ntɛ́ɛ́ cūneé iⁿꞌyeēⁿdī naati ꞌiiⁿꞌyāⁿ sꞌeeⁿ snée yā iⁿꞌyeēⁿdī. ꞌÚú ní cuchií nanáaⁿ nī. Nꞌdiī Chiidá chi dɛɛvɛ, diíⁿ nī cuidado ꞌiiⁿꞌyāⁿ chi teé nī ꞌúú ndúúcū chi duuchí nī. Ní chi cuuví ꞌáámá yā tanꞌdúúcā sꞌuuúⁿ ní ꞌáámá yú. 12 Taachí caneé ndúúcū ꞌiiⁿꞌyāⁿ iⁿꞌyeēⁿdī ní dīiⁿ cuidado ꞌiiⁿꞌyāⁿ ndúúcū chi duuchi nī, ꞌiiⁿꞌyāⁿ chi nteé nī ꞌúú. ꞌÚú ní dīiⁿ cuidado ꞌiiⁿꞌyāⁿ ní mar ꞌáámá yā nguɛ́ɛ́ chindāi yā. ꞌÁámá nūuⁿ saⁿꞌā daiya yááⁿnꞌguiinūuⁿ chindai sa. Ní ꞌiicu naachi cánéé nguūⁿ ní cúúví cuaacu.
13 Naati maaⁿ ní cuchií nanáaⁿ nī. Ní ngaⁿꞌá chuū taachi cuneé iⁿꞌyeēⁿdí ꞌcūū caati vaadī yeēnu yeⁿꞌé canéé nduucú yā, ní cuuvi yeenú taavi yā. 14 ꞌÚú ní caꞌá ꞌiiⁿꞌyāⁿ nduudu yēⁿꞌe nī. Iⁿꞌyeēⁿdī nguɛ́ɛ́ dinéⁿꞌe ꞌiiⁿꞌyāⁿ ti nguɛ́ɛ́ yeⁿꞌe iⁿꞌyeēⁿdī ꞌiiⁿꞌyāⁿ. ꞌTiicá ntúūⁿ nguɛ́ɛ́ yeⁿꞌe iⁿꞌyeēⁿdī ꞌúú. 15 Nguɛ́ɛ́ diꞌcuíítūu chi ndivíi nī ꞌiiⁿꞌyāⁿ yeⁿꞌē íⁿꞌyeēⁿdī. Diíⁿ nī cuidado ꞌiiⁿꞌyāⁿ sꞌeeⁿ yeⁿꞌe yááⁿnꞌguiinūuⁿ. 16 Nguɛ́ɛ́ yeⁿꞌe iⁿꞌyeēⁿdī ꞌiiⁿꞌyāⁿ sꞌeeⁿ tanꞌdúúcā chi nguɛ́ɛ́ yeⁿꞌe iⁿꞌyeēⁿdī ꞌúú. 17 Diíⁿ nī didɛɛvɛ́ nī ꞌiiⁿꞌyāⁿ cucáávā nduudu cuaacu yeⁿꞌé nī. Nduudu yeⁿꞌé nī ní nduudu cuaacu. 18 Tanꞌdúúcā chi dichoꞌó nī ꞌúú iⁿꞌyeēⁿdī ꞌtiicā ntúūⁿ dichoꞌó ꞌiiⁿꞌyāⁿ sꞌeeⁿ iⁿꞌyeēⁿdī. 19 Cáávā ꞌiiⁿꞌyāⁿ sꞌeeⁿ ꞌúú māaⁿ didɛɛvɛ́ maáⁿ. Ní ꞌiiⁿꞌyāⁿ sꞌeeⁿ cuuví yā dɛɛvɛ na nduudu cuaacu.
20 Nguɛ́ɛ́ diꞌcuiituú dámaaⁿ caavā ꞌiiⁿꞌyāⁿ miiⁿ ti cáávā ꞌiiⁿꞌyāⁿ chi cuꞌtéénu yā ꞌúú cáávā nduudu yeⁿꞌē ꞌiiⁿꞌyāⁿ sꞌeeⁿ. 21 Ní nducyaaca yā ní ꞌáámá nūuⁿ cuuví yā tanꞌdúúcā nꞌdiī canée nī nduucú, ní caneé nduucú nī. Níícú ꞌiiⁿꞌyāⁿ sꞌeeⁿ ní canéé ntúuⁿ yā ꞌáámá nūuⁿ ndúúcu yú. Ní ꞌiicu cuꞌtéénú ꞌiiⁿꞌyāⁿ yeⁿꞌe iⁿꞌyeēⁿdī chi nꞌdiī dichoꞌó nī ꞌúú. 22 Ní poder chi tée nī ꞌúú, miiⁿ ni caꞌá ꞌiiⁿꞌyāⁿ. Ní ꞌáámá nūuⁿ cuuví yā tanꞌdúúcā chi ꞌáámá nusꞌūu. 23 ꞌÚú ní ndúúcū ꞌiiⁿꞌyāⁿ sꞌeeⁿ. Ní nꞌdiī ní ndúúcū ꞌúú. Níícú ꞌáámá nūuⁿ chi nꞌdaacā cuuví yā. Ní iⁿꞌyeēⁿdī ní cuuvi deenu chi dichoꞌó nī ꞌúú ní chí dinéⁿꞌe nī ꞌiiⁿꞌyāⁿ sꞌeeⁿ tanꞌdúúcā chi neⁿꞌé nī ꞌúú.
24 Nꞌdiī Chiidá, ꞌiiⁿꞌyāⁿ sꞌeéⁿ chi teé nī ꞌúú, neⁿꞌé chi naachi ꞌúú cuneéⁿ, ꞌiiⁿꞌyāⁿ sꞌeéⁿ cūnée yā nduucú. Ní cuuvi nꞌdiichí yā poder yeⁿꞌé chi teé nī ꞌúú caati nꞌdiī ní neⁿꞌé nī ꞌúú ndii taachi ꞌāā ꞌcuɛ́ɛ́ iⁿꞌyeēⁿdī. 25 Nꞌdiī Chiidá chi dɛɛvɛ, ꞌaa ntɛ́ɛ́ rá chi iⁿꞌyeēⁿdī nguɛ́ɛ́ nꞌdiichí nꞌdiī ꞌúú nꞌdiichí nꞌdiī. Ní ꞌiiⁿꞌyāⁿ sꞌtíī ní deenú yā chi nꞌdiī dichóꞌo nī ꞌúú. 26 ꞌÚú ní ngaⁿꞌá yeⁿꞌe chi duuchí nī, ní caⁿꞌá ngāⁿꞌaⁿ yeⁿꞌe chi duuchí nī. Níícú maaⁿ vaadī neⁿꞌe chi néⁿꞌe nī ꞌúú cuuvi cunéé ndúúcu yā. Ní ꞌúú caneé ndúúcu yā.