16
Caⁿꞌa Jesús: Chuū ngaⁿꞌá ngií ndisꞌtiī ꞌiicu nguɛ́ɛ́ nduuvi taáⁿ nī. 2 ꞌIiⁿꞌyāⁿ ní ꞌcuɛɛcú yā ndísꞌtiī cuaaⁿ chuvaꞌāī yaācū. Ní taachí ndaá hora chi ꞌcaaⁿꞌnúⁿ yā ndísꞌtiī, nacádiinúúⁿ yā chi nꞌdaacā idiíⁿ yā ntiiⁿnyuⁿ yeⁿꞌé Dendyuūs. 3 Ní ꞌiiⁿꞌyāⁿ sꞌtíī ní ꞌtíícā idiíⁿ yā ti nguɛɛ nꞌdiichí yā Chiidá, ndii nguɛ́ɛ́ nduu ꞌúú ra. 4 Maaⁿ ní ngaⁿꞌá ngií chuū ndisꞌtiī caati taachí ndaa hora miiⁿ nꞌgáácú nī ti ꞌúú ní ꞌāā caⁿꞌá. Chuū ni nguɛ́ɛ́ caⁿꞌá ndíí cuaaⁿ vmnaaⁿ ti ꞌúú caneé ndúúcū ndisꞌtiī.Ntiiⁿnyuⁿ yeⁿꞌē Espíritu Nꞌdai yeⁿꞌe Ndyuūs
5 Caⁿꞌa Jesús: Naati maaⁿ ní caⁿꞌá nꞌdiichí ꞌiiⁿꞌyāⁿ chi dichóꞌō ꞌúú. Ní mar ꞌáámá ndísꞌtiī nguɛ́ɛ́ ntiinguuneéⁿ nī ꞌúú: ¿Tíí caⁿꞌa nī? 6 Chiiⁿ chi caⁿꞌá chi ꞌtúúcā, ní nééné chii ndaāchií staava yeⁿꞌé nī. 7 ꞌÚú ngaⁿꞌá nduudu cuaacu miiⁿ: Nꞌdaacā cáávā ndísꞌtiī chi caⁿꞌá. Ndúútī chi ꞌúú nguɛ́ɛ́ caⁿꞌá tuuꞌmi ní Espíritu Nꞌdai yeⁿꞌe Dendyuūs chi tée yā poder ndísꞌtiī nguɛ́ɛ́ ndai yā nanááⁿ ndísꞌtiī. Ndúútī chi ꞌúú caⁿꞌá ní ꞌúú dichoꞌó ꞌiiⁿꞌyāⁿ. 8 Taachí ꞌiiⁿꞌyāⁿ miiⁿ ní ndāa yā, ní caaⁿꞌmáⁿ yā ndúúcū ꞌiiⁿꞌyāⁿ yeⁿꞌe iⁿꞌyeēⁿdī yeⁿꞌē nuuⁿndi, ní yeⁿꞌē vaadī cuaacu, ní yeⁿꞌē ꞌiiⁿꞌyāⁿ chi diiⁿ juzgar. 9 Caaⁿꞌmáⁿ yā yeⁿꞌē nuuⁿndi chi nguɛ́ɛ́ iꞌtéénu yā ꞌúú. 10 Caaⁿꞌmáⁿ yā yeⁿꞌe vaadī cuaacu chi ꞌúú caⁿꞌá nanááⁿ Chiidá ní ꞌāā ntɛ́ɛ́ nꞌdiichí yā ꞌúú. 11 Caaⁿꞌmáⁿ yā nuuⁿndi yeⁿꞌe ꞌáámá ꞌiiⁿntyeⁿꞌē chꞌɛɛtɛ yeⁿꞌe iⁿꞌyeeⁿdí ꞌcūū ꞌāā canéé juzgado sa.
12 Nééné nꞌdeee denduꞌū chi vɛ́ɛ́ chi cuuví ndisꞌtiī naati maaⁿ ní nguɛɛ cuuví cūnee ná vaanicadiinūuⁿ yeⁿꞌé nī. 13 Taachí ndaá Espíritu yeⁿꞌé vaadī cuaacu, ꞌiiⁿꞌyāⁿ miiⁿ ní caꞌcuéeⁿ yā ndísꞌtiī na tanducuéⁿꞌē vaadī cuaacu. Ni nguɛ́ɛ́ caaⁿꞌmáⁿ yā yeⁿꞌē maáⁿ yā ti caaⁿꞌmáⁿ yā tanducuéⁿꞌē chi nꞌgiindiveéⁿ yā. Ní chꞌiⁿꞌi yā ndisꞌtiī dɛꞌɛ̄ chí cuchiī. 14 ꞌIiⁿꞌyāⁿ miiⁿ ní chꞌiⁿꞌí yā poder yeⁿꞌé ti cutaꞌá yā poder yeⁿꞌe ꞌúú ní chꞌiⁿꞌí yā ndisꞌtiī. Ní cuuvi cádiinúúⁿ nī. 15 Nducuéⁿꞌē chi vɛ́ɛ́ yeⁿꞌē Chiidá, chuū ní yeⁿꞌé. Cáávā chuū ngaⁿꞌá chi Espíritu yeⁿꞌe vaadī cuaacu cutaꞌá yā yeⁿꞌē ꞌúú ní chꞌiⁿꞌí yā ndísꞌtiī. Ní cádiinúúⁿ nī.
Chi ndaachií yeⁿꞌé nī ní nduuvi vaadī yeenú
16 Caⁿꞌa Jesús: Taa ꞌlííⁿ ní ꞌāā ntɛ́ɛ́ snaáⁿ nī ꞌúú. Taama vmnéⁿꞌee, taa ꞌlííⁿ ní snaáⁿ nī ꞌúú ti ꞌúú ní caⁿꞌá nanááⁿ Chiidá.
17 Tuuꞌmí caⁿꞌa nꞌduuvi discípulos yeⁿꞌé yā ngii yā ꞌáámá yā táámá yā: ¿Dɛꞌɛ chi ꞌtíícā ngaⁿꞌa yā ngiī yā sꞌuuúⁿ taaⁿ ꞌlííⁿ ní ꞌāā ntɛ́ɛ́ chinaáⁿ nī ꞌúú ní taama vmneⁿꞌēe taaⁿ ꞌlííⁿ ní chinaáⁿ nī ꞌúú, ti ꞌúú ní caⁿꞌá nanááⁿ Chiidá? 18 Tuuꞌmi ní ngaⁿꞌa yā. ¿Dɛꞌɛ chi ꞌtíícā taaⁿ ꞌlííⁿ? Nguɛ́ɛ́ tuumicadiinuuⁿ yú.
19 Ní tuumicádíínuuⁿ Jesús chi neⁿꞌe ntiinguuneeⁿ saⁿꞌā sꞌeeⁿ, ní ngaⁿꞌa yā: ¿ꞌÁá ntííngúúneeⁿ viꞌí nī chi ꞌtúúcā caⁿꞌá chií taaⁿ ꞌlííⁿ ní ꞌāā ntɛ́ɛ́ chi naaⁿ nī ꞌúú, ní taama vmnéⁿꞌēe, taa ꞌlííⁿ ní chi naáⁿ nī ꞌúú? 20 Cuaacu nííⁿnyú cuāācū niiⁿnyuⁿ ngaⁿꞌá ngií ndisꞌtiī: Maaⁿ ní cuɛɛcu nī ní yaꞌai nī. Ní iⁿꞌyeēⁿdī ní cuuvi yeenú naati ndísꞌtiī ní chi n̄ꞌdaaⁿ chi yáꞌai nī ndúúcū vaadī yeenú. 21 Nꞌdaataá chí canee chi ꞌāā ꞌcuundiyáāⁿ daiyā tá, vɛ́ɛ́ vaadī yaꞌai yeⁿꞌē ta, ti ꞌāā chɛ́ɛ́ ndaa hora yeⁿꞌē tá. Taachí ꞌāā vɛ́ɛ́ daiya tá ꞌāā ntɛ́ɛ́ nꞌgaacu tá yeⁿꞌe vaadī yaꞌai yeⁿꞌē tá chi yeenú tá chi vɛ́ɛ́ ꞌáámá daiya tá yeⁿꞌé iⁿꞌyeēⁿdī. 22 ꞌTiicá ntúūⁿ ndísꞌtiī ní canéé vaadī ndaachií nanáaⁿ nī. Naati taama vmnéⁿꞌēe ní nꞌdiichí ntuúⁿ ndísꞌtiī. Ní cuneé nī vaadī yeenú na staava yeⁿꞌé nī. Ní mar ꞌáámá ꞌiiⁿꞌyāⁿ ní nguɛ́ɛ́ divíi yā vaadī yeenú yeⁿꞌé ndisꞌtiī.
23 Ní nguuvi miiⁿ nguɛ́ɛ́ ntiinguunéeⁿ nī duꞌū vɛɛ yeⁿꞌé. Cuaacu nííⁿnyúⁿ cuāācū niiⁿnyuⁿ ngaⁿꞌá ngií ndísꞌtiī chi tanducuéⁿꞌē chi caaca nī Chiidá ndúúcū chi duuchí ní Chiidá tée yā ndísꞌtiī. 24 Ndii maaⁿ nguɛ́ɛ́ duꞌū vɛɛ ngiica nī ndúúcū chi duuchí. Caaca nī ní Chiidá tée yā ndísꞌtiī. Ní vaadī yeenú yeⁿꞌé nī cuuvi yeenu taavi.
Jesús chichɛɛ́ yā ndúúcū íⁿꞌyeēⁿdī
25 Chuū chi ngaⁿꞌá ndúúcū cuentas yeⁿꞌé ndúúcū ndísꞌtiī. Maaⁿ ní ndaa hora chi ꞌāā ntɛ́ɛ́ caⁿꞌá yeⁿꞌé ndisꞌtiī ndúúcū cuentas naati caaⁿꞌmáⁿ cuaacu yeⁿꞌē Chiidá. 26 Nguuvi miiⁿ ní caaca nī ndúúcū chi duuchí. Ní ꞌúú nguɛ́ɛ́ ngaⁿꞌá chi ꞌúú nídiꞌcuíítú Chiidá cáávā ndisꞌtiī. 27 Maaⁿ Chiidá neené neⁿꞌé yā ndísꞌtiī caati ndísꞌtiī neⁿꞌé nī ꞌúú. Ní iꞌteenu nī chi ꞌúú chiicá yeⁿꞌē Chiidá. 28 Chiicá yeⁿꞌē Chiidá ní ndaá iⁿꞌyeēⁿdí ꞌcūū. Cuꞌneeⁿ ntuúⁿ iⁿꞌyeēⁿdī. Ní naⁿꞌá nꞌdiichí Chiidá.
29 Tuuꞌmí ngaⁿꞌa discípulos yeⁿꞌé yā: Cunꞌdííchí dí maaⁿ ní ngaⁿꞌā cuaacu di nguɛ́ɛ́ ndúúcū cuentas. 30 Maaⁿ ní tuumicadiinúúⁿ ꞌnū chi deenú nī tanducuéⁿꞌē denduꞌū. Ní nguɛ́ɛ́ canee ngiinú nī chi ntiinguuneeⁿ ꞌiiⁿꞌyāⁿ nꞌdiī. Cáávā chuū iꞌteenú ꞌnū chi chiica nī yeⁿꞌé Dendyuūs.
31 Nanꞌguɛɛcútaⁿꞌā Jesús: ¿ꞌÁá iꞌtéénu nī maaⁿ? 32 Cunꞌdiichí nī. Hora miiⁿ ní cuchiī. Ní ꞌāā ndaā chí caⁿꞌā ꞌmuuⁿ caⁿꞌā miiⁿ ndísꞌtiī na vaacú nī. Ní cuꞌneéⁿ nūuⁿ nī ꞌúú dámaaáⁿ. Naati nguɛ́ɛ́ canee dámaaáⁿ ti Chiidá canée yā nduucú. 33 Chuū ni ngaⁿꞌá ngií ndisꞌtiī chi cucáávā ꞌúú canee ꞌdiiíⁿ nī. Iⁿꞌyeēⁿdī ní ꞌcueenú nī cuuvi. Cuuvi chꞌɛɛ̄tiinúu nī. ꞌÚú ní chichɛɛ́ ndúúcū iⁿꞌyeēⁿdī.