Jesús tanꞌdúúcā ꞌáámá diiꞌyu dúndeꞌe chi cuaacu
15
Caⁿꞌa Jesús: ꞌÚú tanꞌdúúcā diiꞌyu dúndeꞌe chi cuaacu, ní Chiidá diíⁿ yā cuidado yeⁿꞌe diiꞌyu dúndeꞌe. 2 Tanducuéⁿꞌe duuⁿnē yeⁿꞌé chi nguɛ́ɛ́ dɛꞌɛ̄ vɛɛ nꞌguiꞌi yeⁿꞌē ꞌcaacá yā ní divíi yā. Ní nducuéⁿꞌē duuⁿnē chi vɛ́ɛ́ nꞌguiꞌi yeⁿꞌē ní didɛɛvɛ́ yā ꞌiicu cuuví nꞌdeēe ca nꞌguiꞌi yeⁿꞌē. 3 Ndísꞌtiī ꞌāā dɛɛvɛ́ nī cáávā nduudu chí ngaⁿꞌá. 4 Ndísꞌtiī cunée nī nduucú ní ꞌúú cuneé ndúúcu nī. Tanꞌdúúcā duúⁿne nguɛ́ɛ́ ꞌcuɛɛtinéē nꞌguiꞌi yeⁿꞌē nduūtī chi nguɛɛ canéé na diiꞌyu dúndeꞌe, ꞌtiicá ntúūⁿ ndisꞌtiī nduuti chi nguɛ́ɛ́ cunée nī nduucú.5 ꞌÚú tanꞌdúúcā diiꞌyu dúndeꞌe ní ndísꞌtiī ní dúuⁿnē. ꞌIiⁿꞌyāⁿ chi canée yā nduucú ní ꞌúú caneé nduucú yā, ꞌiiⁿꞌyāⁿ miiⁿ nééné nꞌdeee nꞌguiꞌi candɛ́ɛ yā. Ndúútī chi nguɛ́ɛ́ ꞌúú nduucú yā ní nguɛ́ɛ́ dɛꞌɛ̄ vɛɛ cuuvi diíⁿ yā. 6 Duꞌu ꞌííⁿꞌyāⁿ chi nguɛɛ canée yā nduucú cunꞌdáa yā tanꞌdúúcā dúúⁿne chi nguɛ́ɛ́ nꞌguiꞌi yeⁿꞌē ní ntíꞌi. Ní ꞌiiⁿꞌyāⁿ itaꞌá yā ní ngii yā na yaⁿꞌā. Ní ngiichi.
7 Ndúúti chi canée nī nduucú, ní nduudu yeⁿꞌé canéé nduucú nī, caaca nī tanducuéⁿꞌē chi neⁿꞌé nī ní cuuvi. 8 Taachi candɛɛ́ nī nꞌdeēe nꞌdáí nꞌguiꞌi yeⁿꞌé nī, ní chꞌiⁿꞌí nī chi discípulos yeⁿꞌé tuuꞌmi ní ndúúcū chuū ní chꞌiⁿꞌí nī poder Chiidá. 9 Tanꞌdúúcā chi neⁿꞌe Chiidá ꞌúú ꞌtiicá ntúūⁿ ꞌúú neⁿꞌé ndísꞌtiī. Cunée nī ndúúcū vaadī neⁿꞌe yeⁿꞌé. 10 Ndúúti chi diíⁿ nī tanꞌdúúcā chi ngaⁿꞌa ley yeⁿꞌé, tuuꞌmi cunée nī ndúúcū vaadī neⁿꞌe yeⁿꞌé. Ní chuū tanꞌdúúcā chi ꞌúú idiíⁿ nducuéⁿꞌē chi ngaⁿꞌa ley yeⁿꞌē Chiidá ní caneé ndúúcū vaadī neⁿꞌe yeⁿꞌé yā.
11 Dendúꞌū chi ꞌtuucā ngaⁿꞌá. Níícú vaadī yeenú yeⁿꞌé cunee nduucú nī. Ní vaadī yeenú yeⁿꞌé nī diīⁿ cumplir. 12 Chuū ley yeⁿꞌé chi dineⁿꞌé nī viꞌī ꞌaama nī taama nī tanꞌdúúcā chi ꞌúú neⁿꞌé ndisꞌtiī. 13 Mar ꞌáámá saⁿꞌā nguɛ́ɛ́ vaadī neⁿꞌe chi chꞌɛɛtɛ cá yeⁿꞌē chi ꞌcuuvi ꞌáámá saⁿꞌā caavā amigo yeⁿꞌē sa. 14 Ndísꞌtiī ní amigos yeⁿꞌé ndísꞌtiī ndúúti chi diíⁿ nī cosa chi ꞌúú ngaⁿꞌá. 15 ꞌĀā ntɛ́ɛ́ caaⁿꞌmáⁿ chi ndisꞌtiī ní mozos yeⁿꞌé ti mozos nguɛɛ deenu sa dɛꞌɛ̄ chi diiⁿ ꞌiiⁿꞌyāⁿ chi ngaⁿꞌa ntiiⁿnyúⁿ yā yeⁿꞌē sa. Naati ngaⁿꞌá chi ndísꞌtiī ní amigos yeⁿꞌé ti tanducuéⁿꞌē chi nꞌgiindiveéⁿ yeⁿꞌē Chiidá, ngaⁿꞌá ngií ndisꞌtiī. 16 Ndísꞌtiī nguɛ́ɛ́ ndɛɛvɛ nī ꞌúú, naati ꞌúú nindɛɛvɛ́ ndísꞌtiī. Ní ꞌneéⁿ ndísꞌtiī caati cuuvi candɛ́ɛ nī nꞌguiꞌi. Ní nꞌguiꞌi yeⁿꞌe nī ꞌáámá cūnee. Ní tanducuéⁿꞌē chi caaca nī Chiidá ndúúcū chi duuchí, ꞌiiⁿꞌyāⁿ miiⁿ ní tée yā ndísꞌtiī. 17 Chuū ní ngaⁿꞌá ndisꞌtiī chi dinéⁿꞌe nī viꞌī ꞌáámá nī táámá nī.
ꞌIiⁿꞌyāⁿ yeⁿꞌe iⁿꞌyeēⁿdī nguɛ́ɛ́ nꞌdiichi ndísꞌtiī
18 Ndúúti chi ꞌiiⁿꞌyāⁿ yeⁿꞌe iⁿꞌyeēⁿdī nguɛ́ɛ́ neⁿꞌe yā ndísꞌtiī ꞌāā déénu nī chi vmnááⁿ vmnaaⁿ nguɛ́ɛ́ neⁿꞌe yā ꞌúú. 19 Ndúúti chi canée nī ní diíⁿ nī cosas ndúúcū ꞌiiⁿꞌyāⁿ yeⁿꞌe iⁿꞌyeēⁿdī, ꞌiiⁿꞌyāⁿ yeⁿꞌe iⁿꞌyeēⁿdī dinéⁿꞌe yā ndísꞌtiī, naati ndísꞌtiī nguɛ́ɛ́ yeⁿꞌē iⁿꞌyeēⁿdī ndísꞌtiī. Ndɛɛvɛ́ ndísꞌtiī vmnaáⁿ yeⁿꞌē chi dinꞌdái iⁿꞌyeēⁿdī. Cáávā chuū chi iⁿꞌyeēⁿdī nguɛ́ɛ́ neⁿꞌe ndísꞌtiī. 20 Nꞌgaacu nī yeⁿꞌe nduudu chi ꞌúú ngaⁿꞌá ngií ndisꞌtiī: Nguɛ́ɛ́ vmnaaⁿ ca ꞌiiⁿꞌyāⁿ chi diiⁿ mandado ti ꞌiiⁿꞌyāⁿ chi ngaⁿꞌa ntiiⁿnyuⁿ. Ndúúti chi ꞌiiⁿꞌyāⁿ sꞌtíī ní canꞌdaa yā ꞌúú ꞌtiicá ntúūⁿ canꞌdaa yā ndísꞌtiī. Nduuti chi diíⁿ yā tanꞌdúúcā chi ngaⁿꞌá ꞌtiicá ntúūⁿ diíⁿ yā tanꞌdúúcā chi ngaⁿꞌá nī. 21 Tanducuéⁿꞌē chuū diíⁿ yā ndúúcū ndisꞌtiī caavā chi duuchí ti nguɛ́ɛ́ nꞌdiichí yā ꞌiiⁿꞌyāⁿ chi dichóꞌo yā ꞌúú.
22 Ndúúti chi nguɛ́ɛ́ ndaá ndíí nguɛ́ɛ́ ndúú yaaꞌví rá ꞌiiⁿꞌyāⁿ tuuꞌmi ꞌiiⁿꞌyāⁿ ní nguɛ́ɛ́ déénu yā chi vɛ́ɛ́ nuuⁿndi yeⁿꞌé yā. Maaⁿ ní nguɛ́ɛ́ mar ꞌáámá yā chi cuuvi caaⁿꞌmáⁿ yā chi nguɛ́ɛ́ vɛ́ɛ́ nuuⁿndi yēⁿꞌe yā. 23 ꞌIiⁿꞌyāⁿ chi nguɛ́ɛ́ neⁿꞌé yā ꞌúú ꞌtiicá ntúūⁿ Chiidá mííⁿ ní nguɛ́ɛ́ neⁿꞌe yā ꞌiiⁿꞌyāⁿ. 24 Ndúúti chi ꞌúú nguɛ́ɛ́ diíⁿ nguaaⁿ yā ntiiⁿnyūⁿ chi mar ꞌáámá ꞌiiⁿꞌyāⁿ nguɛ́ɛ́ diíⁿ yā, nguɛ́ɛ́ déénú yā chi vɛ́ɛ́ nuuⁿndi yēⁿꞌe yā. Naati maaⁿ ní nꞌdiichí yā ꞌúú, ní nguɛ́ɛ́ neⁿꞌé yā ꞌúú ndúúcū Chiidá. 25 ꞌIicu cuuví cuaacu nduudu chi canéé nguūⁿ na ley yēⁿꞌe yā: Nguɛ́ɛ́ dɛꞌɛ̄ caavā chi nguɛɛ neⁿꞌé yā ꞌúú.
26 Naati taachi ndaá yā ꞌiiⁿꞌyāⁿ chi Espíritu Nꞌdai yeⁿꞌe Dendyuūs ní tée yā poder sꞌuuúⁿ. Ní ꞌúú ní dichoꞌó Espíritu Nꞌdai chi yeⁿꞌē Chiidá. Espíritu Nꞌdai yeⁿꞌe Dendyuūs ní cuaacu ní cuchii yeⁿꞌē Chiidá. Espíritu miiⁿ caaⁿꞌmaⁿ cuaacú yā yeⁿꞌē ꞌúú. 27 ꞌIicu ndísꞌtiī ní caaⁿꞌmaⁿ cuaacú nī yeⁿꞌē ꞌúú caati canée nī nduucú ndii cuááⁿ naachi chi ngaꞌā.