3 Nanꞌguɛɛcútaⁿꞌā Jesús ní nguɛ́ɛ́ ndúú sáⁿꞌa cūū ní nguɛ́ɛ́ chiida sa ndúúcū chɛɛcu sa vɛɛ nuuⁿndí yeⁿꞌé yā chi ngueēe nduutináaⁿ sa. ꞌTíícā saⁿꞌā ní ꞌcuuⁿꞌmiⁿ chi diiⁿ Déndyuūs miiⁿ nduucú yā. 4 Cánéé chí diíⁿ ntiiⁿnyuⁿ chi idiiⁿ ꞌiiⁿꞌyāⁿ chi dichoꞌó yā ꞌúú neⁿꞌe chi vɛ́ɛ́ nguuvi. Ndaá chi cuuvi ꞌdaꞌa taachi mar ꞌáámá ꞌiiⁿꞌyāⁿ ní nguɛ́ɛ́ diíⁿ yā ntiiⁿnyuⁿ. 5 Nuuma neⁿꞌe chí cuneé iⁿꞌyeēⁿdī ꞌúú chi cuneé tanꞌdúúcā dɛɛvɛ yeⁿꞌē iⁿꞌyeēⁿdī ꞌúú.

6 Taachí níngaⁿꞌa yā chuū chiīdaiⁿ yā na yáⁿꞌāa níícú inꞌdái yā inchɛɛtí ndúúcū nuuⁿniⁿ daíⁿ yā. Níícú sꞌnéeⁿ yā nchɛɛtí nduutináaⁿ saⁿꞌā ngueenááⁿ. 7 Ní ngaⁿꞌa yā: Cúnaⁿꞌā dí. Nááⁿnú dí nduutináaⁿ di na cheendi yíívɛ yeⁿꞌē Siloé. (Nduudu miiⁿ neⁿꞌe caaⁿꞌmaⁿ Dichóꞌo Yā.) Tuuꞌmi ní cunaⁿꞌā sa ní naāⁿnu sa ní nguɛɛcundíi sa ꞌāā inaaⁿ sa. 8 Tuuꞌmi ní ꞌiiⁿꞌyāⁿ na nííⁿnúⁿ vaꞌai yeⁿꞌē sa ndúúcū ꞌiiⁿꞌyāⁿ chi ꞌāā ndíí vmnaaⁿ nꞌdiichí yā saⁿꞌā chi ngueenáaⁿ ní ngaⁿꞌa yā: ¿ꞌÁá nguɛ́ɛ́ sáⁿꞌa ꞌcūū nꞌgiīndī ngiica limosna?

9 Nꞌduuví yā ngaⁿꞌa yā: Sáⁿꞌa ꞌcūū. Ta nꞌduuví yā ní ngaⁿꞌa yā: Tanꞌdúúcā saⁿꞌā miiⁿ, ꞌtíícā saⁿꞌā. Saⁿꞌā miiⁿ ngaⁿꞌa sa: ꞌÚú.

10 Ngaⁿꞌa yā ngiī yā saⁿꞌā: ¿Taaca nínguaaⁿ nduutináaⁿ di?

11 Nꞌguɛɛcútaⁿꞌā sa ní ngaⁿꞌā sa: Saⁿꞌā chi nguuvi Jesús miiⁿ dinꞌdái sa nchɛɛtí ní chiꞌneeⁿ sa nduutinaáⁿ. Ní ngaⁿꞌā sa ngii sa ꞌúú: Cueⁿꞌe di cheendi yiivɛ nuūⁿnīⁿ yeⁿꞌē Siloé. Naaⁿnu di nduutináaⁿ di. Níícú cheⁿꞌé, ní naāⁿnu nduutinaáⁿ, ní ꞌāā inaáⁿ.

12 Tuuꞌmi ní ngaⁿꞌa yā ngiī yā saⁿꞌā: ¿Tii canéé saⁿꞌā miiⁿ? Tuuꞌmí ngaⁿꞌā sa: Nguɛ́ɛ́ deenú.

13 Tuuꞌmi ní candɛ́ɛ yā saⁿꞌā chi ngueenaáⁿ ndíí cuaaⁿ vmnaaⁿ nanááⁿ saⁿꞌā fariseos. 14 Ni sábado miiⁿ nguuvi chí ntaaviꞌtúúnuuⁿ ꞌiiⁿꞌyāⁿ Israel chi Jesús idinꞌdái yā nchɛɛtí mííⁿ. Ní ninꞌguáaⁿ yā nduutinaaⁿ sa. 15 Tuuꞌmi ní ntiinguuneeⁿ ntúuⁿ yā fariseos: ¿Táácā ꞌāā inaaⁿ di? Tuuꞌmi ní ngaⁿꞌā sa: Sꞌnéeⁿ yā nchɛɛtí na nduutinaáⁿ, níícú naāⁿnú. Maaⁿ ní inaáⁿ.

16 Tuuꞌmi ní ꞌáámá saⁿꞌā fariseo ngaⁿꞌa sa: Sáⁿꞌa ꞌcūū ní nguɛ́ɛ́ yeⁿꞌé Dendyuūs saⁿꞌā caati nguɛ́ɛ́ diiⁿ sa nguuvi sábado tanꞌdúúcā chi ngaⁿꞌa ley yeⁿꞌe yú. Ta nꞌduuvi sa ngaⁿꞌa sa: ¿Táácā saⁿꞌā chi vɛ́ɛ́ nuuⁿndi yeⁿꞌē sa diiⁿ sa señales chi ꞌtuucā? ꞌUuvi nuúⁿ díiⁿ sa vaanicadíínuūⁿ yeⁿꞌē sa. 17 Nguɛɛcundíí ntúuⁿ sa ní ngaⁿꞌa sa ngii sa saⁿꞌā chi ngueenáaⁿ sa: Díí, ¿dɛꞌɛ́ ngaⁿꞌa di yeⁿꞌē saⁿꞌa chí nanꞌguaaⁿ nduutináaⁿ di? Saⁿꞌā miiⁿ ngaⁿꞌā sa: ꞌIiⁿꞌyāⁿ miiⁿ profeta.

18 Saⁿꞌa Israel sꞌeeⁿ nguɛ́ɛ́ iꞌtéénu sa yeⁿꞌe saⁿꞌā chí chingueēnáaⁿ sa ní inaaⁿ sa ndíí ꞌcai yā chiida sa ndúúcū chɛɛcu sa yeⁿꞌē sáⁿꞌā chí ꞌāā inaaⁿ sa. 19 Ní ntiinguunééⁿ saⁿꞌā sꞌeeⁿ ꞌiiⁿꞌyāⁿ, ní ngaⁿꞌā sa: ¿ꞌÁá sáⁿꞌa ꞌcūū daiyá nī, saⁿꞌā chi ngaⁿꞌā ndísꞌtiī chí chꞌiindiyáaⁿ sa ꞌāā ngueenáaⁿ sa? ¿Tááca chi maaⁿ inaaⁿ sa?

20 Nanꞌguɛɛcutáⁿꞌa yā chiida sa ndúúcū chɛɛcu sa ní ngaⁿꞌa yā ꞌiiⁿꞌyāⁿ: Déénu ꞌnū daiya ꞌnū saⁿꞌá ꞌcūū ꞌāā ngueeé nduutináaⁿ sa taachi chꞌiindiyáaⁿ sa. 21 Maaⁿ ní inaaⁿ sa. Nguɛ́ɛ́ déénu ꞌnū táácā ínaaⁿ sa. Duꞌú yā chi ninꞌguaaⁿ yā nduutináaⁿ sa núsꞌuu nguɛ́ɛ́ déénu ꞌnū. Saⁿꞌā tii ꞌāā ꞌnaaⁿ sa, ntiingúúneeⁿ nī saⁿꞌā. Saⁿꞌā tii caaⁿꞌmaⁿ sa yeⁿꞌē maaⁿ sa.

22 Chuū chi nanꞌguɛɛcutáⁿꞌa sa chiida sa ndúúcū chɛɛcu sa, caati ꞌvaꞌá yā ꞌiiⁿꞌyāⁿ Israel sꞌeeⁿ. Caati ꞌiiⁿꞌyāⁿ Israel sꞌeeⁿ ꞌāā indeē sa chi duꞌū chi caaⁿꞌmaⁿ chi Mesías chí Cristo miiⁿ chuū ní tunꞌdaa yā chɛɛti yaācū. 23 Chii chi ꞌtíícā caⁿꞌā chiida sa ndúúcū chɛɛcu sa: Sáⁿꞌā ꞌcaa ꞌāā ꞌnāaⁿ sa. Ntííngúúneeⁿ nī saⁿꞌā.

24 ꞌTíícā ní ꞌcaī ntúuⁿ yā saⁿꞌā chí ngueenááⁿ níícú ngaⁿꞌa yā ngiī yā saⁿꞌā: Dii, ní caꞌa di honra Dendyuūs. Núsꞌuu deenu ꞌnū chí sáⁿꞌa ꞌcūū vɛ́ɛ́ nuuⁿndi yeⁿꞌē sa.

25 Tuuꞌmi ní nanꞌguɛɛcutáⁿꞌa sa ní caⁿꞌā sa: Ndúúti chi nuuⁿndi yā o nguɛ́ɛ́ nuuⁿndi yā nguɛ́ɛ́ deenú. ꞌÁámá chi deenú chi ngueeé nduutinaáⁿ ní maaⁿ ní ināaⁿ.

26 Ní ngaⁿꞌā ntúuⁿ yā ngii yā saⁿꞌā: ¿Dɛ́ꞌɛ̄ diíⁿ yā ndúúcū dii? ¿Táácā ꞌāā inaaⁿ di?

27 Nanꞌguɛɛcutáⁿꞌa sa yeⁿꞌé yā: ꞌĀā ngaⁿꞌá ngií ndísꞌtiī ní nguɛ́ɛ́ chꞌiindiveéⁿ nī. ¿Dɛꞌɛ̄ cúúví chi neⁿꞌē ntúuⁿ nī ꞌcaandiveéⁿ nī? ¿ꞌÁá neⁿꞌé nī ntúuⁿ ndísꞌtiī chi cuuvi discípulos yeⁿꞌé yā ndísꞌtiī?

28 Ní ꞌcaaꞌvá yā ndúúcu sa ní caⁿꞌa yā: Díí, chí discípulo yeⁿꞌé yā dii, naati núsꞌuū discípulos yeⁿꞌē Moisés núsꞌuu. 29 Núsꞌuu ní déénu ꞌnū chi Dendyuūs ní yaaꞌvi yā Moisés naati nguɛ́ɛ́ déénu ꞌnū tií ndiica sáⁿꞌa ꞌcūū.

30 Nanꞌguɛɛcutáⁿꞌa saⁿꞌā miiⁿ ní caⁿꞌa sa: Chuū ní cuaacu ní cosa chi ꞌāā ngeⁿꞌe yiinu yú caati ndísꞌtiī nguɛ́ɛ́ déénu nī tií ndiicá yā ní nnꞌguaaⁿ yā nduutinaáⁿ. 31 Ní deenu yú chi Dendyuūs ní nguɛ́ɛ́ nꞌgiindiveé yā yeⁿꞌe ꞌiiⁿꞌyāⁿ nuuⁿndi. Duꞌú ꞌiiⁿꞌyāⁿ chi neⁿꞌē Dendyuūs níícú idiíⁿ yā chiiⁿ chi neⁿꞌē Dendyuūs, tuuꞌmi ní Dendyuūs mííⁿ nnꞌgiindiveéⁿ yā yeⁿꞌē ꞌiiⁿꞌyāⁿ ꞌcúū. 32 Ní taachi chi ngaꞌā iⁿꞌyeeⁿdí ꞌcūū, nguɛ́ɛ́ chꞌiindiveeⁿ yú chi mar ꞌáámá ꞌiiⁿꞌyāⁿ nnꞌguaaⁿ yā nduutinaáⁿ ꞌiiⁿꞌyāⁿ chi ngueenááⁿ ndíí chꞌiindiyáaⁿ yā. 33 Ndúúti chi ꞌiiⁿꞌyāⁿ ꞌcúū chi nguɛ́ɛ́ yeⁿꞌé Dendyuūs ꞌiiⁿꞌyāⁿ, tuuꞌmi ní nguɛ́ɛ́ duꞌū vɛɛ cuuvi diíⁿ yā.

34 Nanꞌguɛɛcútaⁿꞌā ꞌiiⁿꞌyāⁿ sꞌeeⁿ ní caⁿꞌa yā chii yā saⁿꞌā: Dii ní na nuuⁿndi chꞌiindiyáaⁿ di. ¿ꞌÁá dii ngiꞌcuééⁿ dí núsꞌuū? Ní tunꞌdaa yā saⁿꞌa chɛɛti yaācū.

35 Jesús chꞌiindiveéⁿ yā chi ꞌāā tunꞌdáa yā saⁿꞌā chivaꞌāī yaacu templo. Taachi nindaaca yā saⁿꞌā ní ngaⁿꞌa yā ngii yā saⁿꞌā: ¿ꞌÁá iꞌtéénu dí Daiya Dendyuūs miiⁿ?

36 Tuuꞌmi ní nanꞌguɛɛcutáⁿꞌa sa ní caⁿꞌa sa: Señor, ¿duꞌū mííⁿ, ní ꞌtíícā cuꞌteenú?

37 Ní ngaⁿꞌa Jesús ngii yā saⁿꞌā: Inꞌdiichi dí ꞌiiⁿꞌyāⁿ ní ꞌiiⁿꞌyāⁿ miiⁿ ní ꞌiiⁿꞌyāⁿ chi indeé yā ndúúcū di.

38 Tuuꞌmi ní ngaⁿꞌā sa ngii sa Jesús: Señor, cuꞌteenú nꞌdiī. Ní diiⁿ sa adorar yā.

39 Ní ngaⁿꞌā Jesús: ꞌÚú nindaá iⁿꞌyeeⁿdí ꞌcūū chí caaⁿꞌmáⁿ nuuⁿndi yeⁿꞌé ꞌiiⁿꞌyāⁿ caati ꞌiiⁿꞌyāⁿ chi nguɛ́ɛ́ inaáⁿ yā ní naáⁿ yā. Ní ꞌiiⁿꞌyāⁿ chí cuuvi inaáⁿ yā cuuvi ngueenáaⁿ yā.

40 Nꞌduuvi ꞌiiⁿꞌyāⁿ fariseos chi canée yā ndúúcu yā chꞌiindiveéⁿ yā chuū ní caⁿꞌá yā Jesús: ¿ꞌÁá ngueēe ntúuⁿ nduutináaⁿ ꞌnū tuuꞌmi?

41 Tuuꞌmi ní ngaⁿꞌa Jesús ngii yā saⁿꞌā sꞌeeⁿ: Ndúúti ngueenáaⁿ nī nguɛ́ɛ́ nuuⁿndi yeⁿꞌe nī. Naati maaⁿ ní ngaⁿꞌa nī: Inaaⁿ ꞌnū. Chiiⁿ chi nuuⁿndi yeⁿꞌé nī ꞌáámá cunéé nūuⁿ.