19
Junni miya Ezequías tsanque otinaminca meráto, duque duque wepananue. Yachi tsanpaca chilenue; junto duque seiton pitasa carimin tsanpaca poniraminue yape duque wepanaca joeque tenhilaisa. Junto Miya Diosichi yabi winue.2 Junsi Ezequías yachi amicolaca erenue yape Diosichi mantate pamin Isaíabe palaquisa. Eliaquinca, Sébnaca, junsi fe mantá tan patelelaca erenue. Eliaquinni Ezequíachi mayordomo jominue; Sébnari jun tobi niyanhinanuncatiya pila quimin jominue. Yalari Isaíachica jilainue. Yalanan duque seiton pitasa carimin tsanpaca poca jun jilainue duque wepanato. Yala jeralelaca Ezequías erenue yape Amochi nao Isaíabe palaquisa. 3 Isaíabe itsanlatina! tinue. Amana chiquila duque seiton problema talarayoe tilatina! tinue. Duque tennalarasa carinae. Asíriola chiquilaca pele tenca isa carito, Diosica seitonque palaquinae tilatina! tinue. Sona manca na quichun quiyanchi podeituto sonba iton cuwenta jolajoyoe. 4 Junni nuchi Miya Diosiri Rabsaces pánacaca meraca jonari, se jonoe tilatina! tinue. Yari Asiria miya ereca jun jato, son Diosica seitonque pacae. Junni nuchi Miya Diosi ya fiquica meráto casticaquino jonhoe. Junnan nu rocaide! tilatina! tinue chiquila casonnaminlachi tenchi.
5 Junni Ezequías ereca junlari Isaíachibi felaito, ya fiquica jera polarilaquinue. 6 Junnan yari manpato, in fiquica Ezequíachicanan mantanjisa tinue: Miya Diosi itsantinae: Asiria to miyachi mantate pamin tsachi laca seiton fiqui pánasa, yaca jeleratude! tinae tinue.
Junni Miya Diosi Isaíabe Ezequíabe rocaica junca meránue. Junto Asiria to soldadolaca yalachi tocanan manjilaisa carinue. Man quepentenan Miya Diosichi anjeli patsa ochu chunca mante mili soldadolaca totenue. Tsanquito yalachi toca manjilaisa carinue.
Junnunsi, Ezequías puyanunbi, Judá tobi duque miyala jominlanue. Casale yachi nao Manasés miya jominue; yari duque seiton jominue. Jun polenunbi Manasechi nao Amón miya inue; yanan seiton tsachi jominue. Juntonan Amonchi nao Josías duque sen miya jominue; Miya Diosibe seque nenamin jominue. Junni ya puyanunbi yachi nao Joacaz miya inue. Jun benebi yachi aco Joacim miya inue. Yanan duque seiton miya jominue.