Caque fiqui (Esdras tenchi, junsi Nehemías tenchi): Diosi israelítalaca numari paca jominue yachi mantaca obedeseitulajonari yalaca casticaquito bare toca ereyanaeque. Junni israelítalari yachi mantaca merátuchi timin jera icala jonan, Diosi yalaca bare toca jera ereca jominue.

Babilonia to soldadolari israelítalabe quera quicaato, yalaca fe loto, Babilonia toca jera tanjica jominlanue. Israelítalabe quera quicaato, yalaca jera fe loto, duque israelítalaca yalachi tobi nechi larito Babilonia toca tanjica jominlanue. Jesucristo naino case sota patsa wata cajosanan tsanque tanjica jominlanue. (Junca fécari miichun, Benete Miyalabi quirade! capitulo 24-25-bi.)

Junni Babilóniaca tanjicale nechi mante chunca wata tsansite Babilonia to miyari israelítalaca yalachi toca manherenue. Israelítalachi permiso cuwanue yape mochi manjino muquilaquinatiya, yalachi toca jera manjino podeilaisa. Junni duque israelítala yalachi toca manjilainue Jerusalén puebloca. Junni junbi manfesi, casale casaleri Diosichi ya manquino munaraminlanue. Junni Diosichi ya quilaquinasanan, uyan quelole chumin tsachilari yalaca paito duque pasuwanaminlanue yape Diosichi ya quilaquitusa. Tsan josanan inale Diosichi ya jera manquino podeilainue.

Matu mate Diosi israelítalaca Egipto tobi nechi manse larica jominue. Israelítala Egíptobi epe mantato tanun esclabo jominlaca manse larinue. Junni se larinun quepen Diosi israelítalaca mantaca jominue lebadura iton bibu quito filaquisa. Opisa náca toteto, ya tsachicaca, junsi lebadura potuca jun bibuca filaquinue. Junni Diosi mantanue israelítala wata cura fiesta quito jun tsanquenan opisa náca, junsi lebadura iton bibuca filaquisa Diosi yalaca Egíptobi nechi manse larica jonunca mantenhilaisa. Junni bare toca tanjica jun israelítalari yalachi toca manjato, Diosichi ya jera manquetobi, jun fiesta quilaquinue. Yari casa ma fiesta jominue. Esdras capitulo 6-bi junca paca joe.

Aman israelítalaca yalachi tobi nechi tanjica junle nechi, yalachi toca manjato Diosichi ya jera manquino fecári, siete chunca wata jominue. Aman “Esdras” tinun pilabi jun fecári jera pila chuteca joe.

Junni manaman siete chunca wata polenunbi, weyan israelítalanan yalachi toca jera manjilainue. Yalanan Babilonia tobi nechi yalachi toca manjilainue. Aman Nehemíari ya bolon israelítalaca mantamin jominue. Yalari Jerusalén pueblo awinta wa serica tsan jominca manquilaquinue. Matuleri Babilonia soldadola quera quilaquinato, ya sericaca jera yucapiyarica jominlanue. Junni Nehemíalari ya sericaca jera manselaquinue yape yaca pa junlari yalaca quera quito fe lolaitusa. Aman junca “Nehemías” pilabi jera chuteca joe.