Esdras chuteca jun pila
Miya Ciro mantanunca
1
Ciro Persia tobi miya inunle nechi caque watate mantá cuwanue yape israelítalari yalachi toca manjino podeilaisa. Diosichi mantate pamin Jeremías paca jominue israelítalari yalachi toca manjilaichunaeque. Junto Diosinan Círoca mantá cuwasa carinue yape Jeremías paca junca jera tsa patisa. Junni Círori jerale tote ya mantaca meracuwasa erenue. Pila quisa carito erenue yape mantaminlari tsachilaca layasuwato ya pilaca quirato palaquisa. Itsanque mantá erenue:2 La Ciro, Pérsiabi miya joto, itsantinayoe: Miya Diosi jamochi chuto laca jera tote mantasa miya suwaca joe tinue. Junni aman Jerusalenbi yachi ya manca manquisa tica joe tinue Judá tobi. Miya Diosichi ya jochunae tinue.
3 Junni nula israelítalari, Diosichi tsachila joto meralaquede! Nula motiya jino munaralaratori, Jerusalenca manjilaito, Diosichi yaca quilaquina! tinue. Diosi ayudaisa tenjae tinue. Miya Diosi israelítalachi Diosi jonan, yachi ya Jerusalenbi quintsan joe tinue.
4 Israelita itonlanan ayudainola joe tinue. Amana israelítalari yalachi tote nechi nuwiri chuto manjilaichinae tinue; junnan yala jinanun minubi quelote chuminlari ayudainola joe tinue. Cala, oro, animali ticatiya epe cuwato ayudainola joe. Junsi cala cuwanola joe tinue Jerusalenbi Diosichi ya quilaquisa.
Ciro tsanque fiqui erenue.
Israelítala Jerusalenca manjalainunca
5 Junni layan israelita mantaminla Jerusalenca manjino tenca calaquinue. Yalari Judachi, junsi Benjaminchi alicala jominlanue. Junsi Levichi alicalanan jominlanue. Yalari weyanla patelela jominlanue; weyanlari patelelabe peayudaimin jominlanue ya lebita tinunla. Yalaca Diosinan Jerusalenca manjano muquesa carinue Miya Diosichi casan ya quebi. 6 Jerale israelítalachi quelote chuminlanan, israelita itotonan ayudailainue cala epe cuwato, oro, animali, junsi uyan cosa titiya, duque mica cosalacanan epe cuwato. Junsi yalachi tenca muna duque ofrenda cuwalaquinue yape israelítalari yalachi tobi manfetobi Diosichi ya quilaquisa.
7 Miya Círonan ayudainue. Duque numari manca miya, Nabucodonosori tinun, Miya Diosichi yaca aralesa carica jominue. Cayucapiyaritusanan, duque mica cosalaca tarinsa carica jominue. Junto Miya Diosichi yabi tarinca cosalaca yachi epe diosi tinunlachi yabi posa carica jominue. Junni ya tarinca cosalaca Ciro miyari israelítalachi jera mancuwanue yape mantanjito Diosichi casan ya quica junbi manpolaquisa.