Caque fiqui: “Caque Miyala” pila, junsi “Benete Miyala” pila, israelítala niyan ilainanunca pamin pila joe. Israelítalari casale yalachi tobi chubi wino mate jeralela man posto man posto jera ara cura chudilainue. Itsanque jominue: Matu to Israel tinun tsachiri chunca paluca naola taminue. Junni yalachi alicalari chunca paluca bolon israelítala jominlanue. Junni yala chuno jun tobi wito, man bolon man postote, man bolon man postote, chumin jominlanue. Rubenchi alicalari man postote chumin jominlanue, Judáchi bolon man postote chumin jominlanue, junsi uyanlanan tsanquenan bolon cura chudilainue. Bolon cura yalachi to case amana mate probinsia cuwenta inue.

Junni miya David jerale chunca palu bolon israelítalachi miya jominue. Junni ya puyanunbi yachi nao Salomón jun tsanquenan jerale israelítalachi miya manhinue. Aman yala mantananun to Israel tinun to jominue. Junni Salomón puyanunbi yachi nao Roboaman jerale israelítalachi miya ino jominue. Tsannan weyan israelítalari Roboanbe mantaituchique jera chican loto, yalari chican nasion ilainue. Chunca palu bolon israelítalale nechi chunca bolon chican lolainue. Yalachi to norte nanchi jominue. Ya tonan Israel mumunnan jominue. Aman puchuica junlari sur nanchi chumin jominlanue. Yalari palu bolonsiri jominlanue Judachi alicalabe Benjaminchi alicalabe. Junni yalachi tori Judá mumun jominue. (Benjaminchi alicalari duque na bolon jominlanue. Jun tenchi weyante Judá toca pato, Benjamínlaca tennatuto, Judáchi alicalacasiri tennato, manca bolonsiri joe timin jominlanue.) Aman Salomonchi nao Roboam Judá tobi miya jominue.

Israelítalaca pato, chunca palu bolonla tinun joe. Juntonan ya bolonlaca seque mino nasi tenfe joe. Israélichi nao manca Leví jominue. Junni Levichi alicalari man postobiri layaito chutumin jominlanue. Patelela joto, junsi patelelaca ayudaminla joto, ara cura chumin jominlanue jerale israelítalabe palaito. Junni chunca palu bolonlachi toca pato, Levichi alicalaca tennatuntsan joe. Chican to itoto uyanlachi tobi pechumin jominlanue. Junni tsan jonun tenchi chunca palu bolon patitue; chunca mancari patie. Junnan Israélichi manca nao José jominue. Yari paluca naola taminue Efraínbe Manasebe. Junni israelítalachi bolonlaca mito, ya naolaca chican chican miminla joe. Efraínca man bolon joe, Manaseca man bolon joe, timinla joe. Junni tsanque minari, chunca palu bolon manpatie. Inca fécari miichun, “ISRAELITALARI MOLA JOLAJONUNCA” tinun dibujoca quirade!