—Manca pueblobi paluca tsachila jominlanue. Manca tsachi oco jominue; junsi manca tsachi mantimini popere jominue. 2 Aman oco tsachiri duque wala, opisa titiya taminue. 3 Mannan popere tsachiri opisa manca nacá caya juncari taminue. Yanan opisaca uwasuwaca jominue. Ya opisari yachi nalalabe, junsi yabenan parejo uwaica jominue. Ya opisari yala ano finanuncanan pefimin jominue; junsi jun tásabinan ticatiya cuchimin jominue; junsi yachi quelole catsomin jominue. Ya tsachiri ya opisaca yachi namaca cuwenta laquiraminue. 4 Junni man mate tsachi manca nuwiri jinato ya oco tsachichica quirabi jinue. Juntonan ya oco tsachiri ya quirabi jamin tsachichi cufichun yachi walaca, junsi yachi opisaca toteto cufino munaratuminue. Junto yari popere tsachi opisa manca nacá tanunca josoleto, aman ya opisaca toteto yaca quirabi jaminchi cufinue tinue.

5 Junni miya Daviri ya fiquica meráto, ya oco tsachica duque painue. Junto Natanbe itsantinue:

—La pato, Diosi lachi testico joe tito pato, tsanquimin tsachiri puyano joe tinayoe tinue. 6 Junsi ya opisa tsacuminchi junpalu tsansi pacara quino jochunae tinue laquiratuto duque seiton quinun tenchi.

7 David tsantinan, Natanni itsantinue:

—Nu ya tsachi joe tinue Uríachi sonaca caya jonun tenchi. Junsi israelítalachi Miya Diosi itsantinae tinue: David, lari nuca israelítalachi miya josa wentecayoe tinae tinue. Junsi Saúl totetusa isaicayoe tinae tinue. 8 Saúl nuchi miya jomin josanan, lari yachi yaca, junsi junbi chuminlaca, yachi sonalaca titiya nuchi jera cuwapocayoe tinae tinue. Junsi israelítalacanan nuchi cuwapocayoe tinae tinue Israel tobi, junsi Judá tobinan. Aman yasiri itoe tinae tinue; nanni fe duquenan cacuwapono jomin joinhie tinae tinue. 9 Junni ¿niyaito la pacaca merátuto, la munaratununca quiyun? tinue. Nuri ya heteo tsachica amonítalachi cuwapoto totesa carinue tinue. Aman yaca totelaquinunbi, yachi sonaca cae tinae tinue. 10 Nuri Diosi paca junca merátun, aman Uríachi sonaca can, quinun tenchi nuchi familialari numasitiya pataato chularachunae tinae tinue.

11 La Miya Diosi tsantinayoe tinae tinue: La nuchi familialacanan nube problema quisa cariyanae tinae tinue. Nu mirasanan nuchi sonalaca josoleto, nuchi familia máncachi cuwanae tinae tinue. Ya tsachiri nuchi sonalabe piyanlela quiranasa tsodichunae tinae tinue. 12 Nuri nuchi jutsaca nosa quinue. Juntonan lari piyanle israelítala quiralaquinasa nuchi sonalabe tsodisa cariyanae tinae tinue.

13 Natán tsanque jera cuenta quinunsi, Daviri itsantinue:

—La Miya Diosichi cale jutsa quica joyoe tinue.

Junnan Natanni itsantinue:

—Miya Diosi nuchi jutsaca piyarica joe; nuca puyasa carituchunae tinue. 14 Juntonan nu Miya Diosichi cale wa jutsa quica jonan, nuchi nao casan naica jun, puyano jochunae tinue.

15 Junni Natán yaca manjinunbi, Miya Diosiri Davibe Betsabebe na tanunca duque seitonque quiyaisa carinue. 16 Junnan Daviri ya na tenchi Diosibe rocainue ano fitunca ito. Junto quepenteri tobi tson polenue. 17 Junnan Davichi yabi chumin unicalari Davíchica jito, tobi tsominbe manwiruisa rocainaminlanue. Juntonan Daviri manwiruituchi tinue; junsi yalabe ano pefitumin jominue na laquichi.

18 Junte nechi siete ma polenunbi, na puyanue. Junni miya Davibe mantaiminlari na puyanueque pano jeleraminlanue. Yalari itsanque tenca taminlanue: Na casonnasanan Daviri duque laqui jominueque, chiquila pánasanan tulantumin jominheque tenca canaminlanue. Junni tsan jonari, ¿niyaque na puyaeque pacaichunnan? tilatinue. Yari seiton cosa quino podeichunaeque tenca canaminlanue.

19 Jun tsan josanan, miya Daviri yabe mantaiminla yala tala nosa cuenta quilaquinaminca meráto, yari tenhinue na puyaca joeque. Junto na puyanque panhanue. Junni yalari janhan, puyaca joe tilatinue.

20 Tsantinan, miya Daviri tobi nechi manwiruinue. Jun manwiruito, pipiyato, puban pi ilipoto, camisa titiya uyan manponue. Junto Diosichi yabi winue Diosica se tichun. Junni aman Diosica se titobi, yachi yaca jito ano fino panhato ano finue. 21 Junnan yachi cotole mantaminlari itsanque panhalaquinue:

—Miya, ¿niyaito tsanquinayun? tilatinue. Nuchi na cason josari, nuri ano fitunca ito na tenchi warenaminhe. Juntonan amana na puyaca joe; junnasa ano manfinue tilatinue. Miino podeilaitiyoe tilatinue.

22 Junnan miya Daviri itsanque tulannue:

—Na casonnasa, lari ano fitunca ito warenamanyoe tinue pansile Miya Diosi laca laquirato náca puyasa carituchunaeque tenca cato. 23 Amanari puyaca joe tinue. ¿Junni ti quichun ano fitunca ino join? tinue. Lari náca mansonhisa carino podeitiyoe tinue. La yabe mantulaibi jiichunae; tsan josanan yari lachica manjatuchunae tinue.

24 Davichi na puyanunbi, David yachi sona Betsabebe pejominue yape laqui jomin manpolarisa. Junsi Betsabebe mancatsonue. Junnan ya sonari manan na manporeito manca naoman quinue. Junnan miya Daviri ya náca Salomón tinue. Aman Miya Diosiri ya náca laquiraminue.