Davibe Betsabebe
11
Junni piyanle wata cura fuinasa, miyalari yalachi soldadolabe quera quicaabi jimin jominlanue. Juntonan jun watateri miya Daviri quera quicaabi pejica itominue. Junto yachi soldadolaca mantamin Joaca ereca jominue. Junsi Joachi cotole mantaminlacanan peereca jominue; junsi jerale soldadolaca ereca jominue.Yalari jito amonítalabe quicaanato, yalachi pueblo, Rabá tinun, awinta ilainue quicaachun. Junnasa miya Daviri Jerusalénbinan puraica jominue.
2 Junni quebi tala David lowabi nechi mancupato, yachi ya jamochi nenaminue. Junni junte nenato, duque moso sona pipiyanaminca quiranue. 3 Junni Daviri yachi peyun mancaca erenue ya sona mo jonunca miichun. Jun jinari, Betsabé joe tilatinue. Eliámichi nama joe tilatinue Uríachi sona. Aman ya Uríari Heteo to tsachi jominue.
4 Junni Daviri tsachi mancaca erenue yape Betsabeca tanjasa. Jun tanjanan, Daviri ya sonabe catsonue. Ya sonari miya Davibe catsotobi, yachi yaca manjinue. Junni yari luban quirato casan manseica jun jominue. 5 Aman ya sonari na poreito Davíchica fiqui manherenue na pun joyoeque. 6 Junnan Daviri Joáchica itsanque fiqui erenue: Uríaca manherede! tinue. Weyan soldadolaca purato lachica jasa tide! tinue. Junnan Joari tsanhinue. 7 Junni Urías Davíchica janan, Daviri Joabe soldadolaberi niyan jolajunque panhanue. Junsi querabi niyan junquenan panhanue.
8 Junni nanni wanbi Daviri Uríaca yaca manjide! tinue yape manjasaisa. Urías miya Davichi yate nechi jinasa, Daviri fe sen anoca epe cuwato erenue. 9 Juntonan Uríari yachi yaca manjituto, Davichi ya tamolante man quepen pepolenue Davichi peyunlabe. 10 Junni ayuna nanchi Davibe pato, Urías yachi yaca manjitue tilatinue. Junnan Daviri Uríabe itsanque panhanue:
—Nuwiri nechi manjaca jotonan, ¿niyaito nuchi yaca manjitiyun? tinue
11 Junnasa Uríari itsantinue:
—Diosichi cajon, junsi israelita soldadolari, jelen yabi chularae tinue. Aman fe mantamin Joanan, junsi nuchi cotole mantaminlanan urate catsolainae tinue. Junnasari lari numanan lachi yabi manwito, ano fin, junsi titiya cuchin, junsi lachi sonabe mancatson, ino podeitiyoe tinue. Lachi miya, nuchi tencachi juraquito pato, la numanan tsan cosa quino podeitiyoe tinue.
12 Junni Daviri itsantinue:
—Amanari intenan puraide! tinue. Junto ayuna queraca manhereyanae tinue.
Junnan Uríari man malon fecári Jerusalenbi purainue. 13 Junni Daviri Uríaca yabe ano fin, bino cuchin, quichun jasa tinue. Junto Uríaca jun quepen winan suwanue. Junni Uríari Davichi yate nechi loto jito, manaman miyachi peyunlabe catsobi jinue; yachi yacari natiya catsobi manjitunue.
14 Ayuna nanchi quepenan, Daviri Joachi pila quinue; junto Uríaca yachica tanjisa tinue. 15 Pilabi itsanque chuteca jominue: Uríaca fe caquebi erede! tinue fe seiton postobi. Junto mancari puralaquede! tinue yape pa junlari totelaquisa.
16 Aman junni Joari soldadolaca pa jominlachi pueblo awinta jera erenaminue. Jun erenato, Uríaca nanni fe podenla ranun postote peerenue. Yala pa jomin soldadolari duque poden jominlanue. 17 Junni jun to soldadolari israelítalabe quicaachun lalainue. Junni pa jominlari lato, Davichi soldadolabe quicaalaquinasa, weyan Davichi cotole mantaminlanan puyalainue. Junni yala puyalainasa, Uríanan parejo pepuyanue.